Kwaamboka ye hole Jehova Kalunga nosho wo Oohapu dhe Ombiimbeli:

Jesus okwa ti: “Ne otamu ka tseya ihe oshili, noshili otayi ke mu mangulula.” (Johannes 8:32) Dhiladhila nkene wa li wu uvite sho wi ilongo tango oshili okuza mOmbiimbeli. Owa li wa nyanyukwa sho wi ilongo kutya nonando otu li muuyuni muka iifundja ya ha, otatu vulu okwiilonga oshili. — 2 Timoteus 3:1.

Jehova Kalunga okwa hala tu tseye oshili. Oha tu longo aantu oshili, molwaashoka tu ya hole. Ihe okulongela Kalunga okwa kwatela mo oshindji. Otu na okuninga ngaashi tatu vulu, opo tu ulike kutya otu li Aakriste yashili, molwaashoka otwa lenga omakotampango gaJehova. Jesus okwa popya omukalo gwa simana ngoka tatu vulu okuulika kutya otu hole Kalunga. Okwa ti: ‘Ngele otamu vulika komalombwelo gandje, otamu kala mohole yandje naanaa, ngaashi ngame he vulika komalombwelo gaTate nonda kala mohole ye.’ — Johannes 15:10.

Jesus oku hole He shili, noha vulika kuye mu kehe shoka te Mu pula a ninge. Ngele otwa kala tatu holele Jesus monkalamwenyo yetu, Jehova ota ka kala e tu hole, natse otatu ka kala twa nyanyukwa shili. Jesus okwa ti: “One aanelago, ngele tamu shi ningi.” — Johannes 13:17.

Otwi inekela kutya embo ndika otali ke ku kwathela wu ilonge okukala metsokumwe noshili yOmbiimbeli nowu ninge kuume kaKalunga. Otwi inekela wo kutya oto ka koleka ohole yoye yokuhola Kalunga noto ki ikaleka ‘mohole yaKalunga, manga wa tegelela oku ka mona omwenyo gwaaluhe.’ — Judas 21.