1-3. (a) Omagano gamwe geni omawanawa twa pewa kuJehova, nomomukalo guni tashi vulika tu ga longithe nayi? (b) Ongiini tu na okulongitha omagano getu gokupopya?

OMUSAMANE gumwe okwa li a landele omwanamati ombasikela. Okwa li a nyanyukwa sho e mu pe omagano ngoka omawanawa. Ihe ongiini ngele omwana ohe yi hingi nuuhasha, esiku limwe e ta pumu omuntu noku mu monitha oshiponga? Mbela he ote ku uva ngiini?

² Jehova oye Omugandji ‘gwoshipewa kehe oshiwanawa nomagano kehe ga gwana ga pwa.’ (Jakob 1:17) Omagano gamwe omawanawa ngoka e tu pa, okupopya. Ohage tu kwathele tu holole omadhiladhilo nomaiyuvo getu. Ohatu vulu okupopya iinima mbyoka tayi kwathele aantu notayi ya uvitha nawa. Ihe shoka hatu popi ohashi vulu okweehameka yalwe noku ya uvitha nayi.

³ Oohapu ohadhi vulu lela okuguma aantu, na Jehova ohe tu longo nkene tu na okulongitha nawa omagano getu gokupopya. Ote tu lombwele ta ti: “Inamu popya oohapu oombwinayi. Popyeni ashike oohapu ndhoka oombwanawa tadhi tungu nodha pumbiwa, opo aapulakeni yeni ye dhi hokwe.” (Aaefeso 4:29) Natu konakoneni nkene tatu vulu okulongitha omagano ngaka ga za  kuKalunga, momukalo ngoka tagu mu nyanyudha notagu tsu yalwe omukumo.

4, 5. Oshike tatu ilongo mOmbiimbeli nkene oohapu hadhi vulu okuguma yalwe?

⁴ Oohapu odhi na oonkondo, onkee otu na okukala twa kotokela shoka tatu popi nankene tatu shi popi. Omayeletumbulo 15:4 otayi ti: “Elaka etalala olyo omuti gwomwenyo, ihe elaka lyomakoto ohali tolokana omwenyo.” Ngaashi owala omuti gwa ziza gu na omunzile omwaanawa nohagu tu pe ombepo yohapi ndjoka hayi tu kaleke nomwenyo, oohapu oombwanawa ohadhi talaleke wo ngoka te dhi uvu. Ihe oohapu oombwinayi ohadhi ehameke yalwe noku ya uvitha nayi. — Omayeletumbulo 18:21.

⁵ Omayeletumbulo 12:18 otaga ti: “Aanamalaka omadhigu otayu ulula ngegongamwele.” Oohapu oombwiinayi ohadhi ehameke pamadhiladhilo nohadhi yono po ekwatathano lyetu nayalwe. Otashi vulika to dhimbulukwa sho gumwe a li e ku ula oohapu oombwiinayi ndhoka dhe ku uvitha nayi. Ihe Omayeletumbulo otaga tsikile ko taga ti: “Elaka lyaanawino olyo ealudho.” Oohapu dha dhiladhilwa nawa, ohadhi vulu okwaaludha omutima gwa tekauka nohadhi hanganitha aantu mboka ya topoka omolwokwaahauvathana. (Lesha Omayeletumbulo 16:24.) Ngele otwa kala tu shi kutya oohapu dhetu ohadhi vulu okuguma yalwe, otatu ka kala twa kotokela okupopya kwetu.

6. Omolwashike oshidhigu okupangela elaka lyetu?

⁶ Etompelo limwe kutya omolwashike tu na okukotokela okupopya kwetu, olyo kutya atuheni inatu gwanenena. “Omadhiladhilo [gomuntu] omawinayi,” naashoka hatu popi, olundji ohashi holola shoka shi li momitima  dhetu. (Genesis 8:21; Lukas 6:45) Otashi vulu okukala lela oshidhigu okupangela elaka lyetu. (Lesha Jakob 3:2-4.) Onkee otwa pumbwa okuninga oonkambadhala tu hwepopaleke omukalo moka hatu popi nayalwe.

7, 8. Oohapu dhetu otadhi vulu ngiini okuguma ekwatathano lyetu naJehova?

⁷ Otwa pumbwa wo okukotokela elaka lyetu, oshoka otatu ki ihokolola kuJehova kombinga yaashoka hatu popi nomomukalo moka hatu shi popi. Jakob 1:26 otayi ti: “Ngele oku na ngoka ta dhiladhila kutya ota longele Kalunga, ndele ita pangele okupopya kwe, nena elongelokalunga lye itali tompola sha, oti ifundjaleke owala.” Oshitya shOshihebeli shoka sha tolokwa “itali tompola sha,” otashi ti wo “kali na oshilonga.” (1 Aakorinto 15:17) Onkee ano, ngele ihatu ikwata nawa mokupopya, otatu ka kanitha ekwatathano lyetu naJehova. — Jakob 3:8-10.

⁸ Osha yela kutya otu na omatompelo omawanawa okukotokela shoka tatu popi nomomukalo moka tatu shi popi. Opo Jehova e tu kwathele nkene tu na okulongitha  omagano getu gokupopya, otwa pumbwa okutseya kutya okupopya kuni tu na okuyanda.

9, 10. (a) Okupopya kuni ku li apuhe kunena? (b) Omolwashike hatu yanda okupopya oohapu oombwinayi?

⁹ Okuninga omashendjo guugoya, nenge okupopya oohapu dha nyata oku li apuhe kunena. Oyendji ohaya dhiladhila kutya, opo ya holole omaiyuvo gawo, oye na okutukana nokupopya oohapu tadhi sitha ohoni. Olundji aaningi yiiyolitha, ohaya ningi omashendjo omawinayi nokupopya oohapu kaadhi shi okupulakenwa, opo ya yolithe aantu. Ihe omuyapostoli Paulus okwa ti: “Omu na okweetha iinima mbika ayihe: ondjahi, uugeyi nuuwinayi auhe. Momakana geni inamu pita we omasheko nenge oohapu oombwinayi.” (Aakolossa 3:8) Paulus okwa ti wo kutya “oohapu dha nyata” kadhi na ‘okuuvika mokati’ kAakriste yashili. — Aaefeso 5:3, 4.

¹⁰ Oohapu dhuugoya ohadhi yemateke Jehova naamboka ye mu hole, oshoka odha nyata. MOmbiimbeli, ‘onyata’ nayo oyi li ‘iilonga yuuhalu wopantu.’ (Aagalati 5:19-21, yelekanitha NW.) Iilonga ya nyata oya kwatela mo omayono gi ili nogi li, nongele omuntu okwa ningi oshinima shimwe sha nyata, oha vulu okulandulitha ko oshikwawo. Ngele omuntu okwe shi ningi omukalondjigilile okukala ha ningi omashendjo guugoya, ha popi oohapu dha nyata noina hala oku shi etha po, otashi ulike kutya ina gwana okukala mo megongalo. — 2 Aakorinto 12:21; Aaefeso 4:19; tala eyelithilo eti-23.

11, 12. (a) Olwaambo oshike? (b) Omolwashike tu na okuyanda okulundila gumwe?

¹¹ Otu na wo okuyanda olwaambo. Oshi li paunshitwe okukala tu na ko nasha nayalwe nokukundaneka yalwe kombinga yookuume ketu nosho wo aantu yaandjetu.  Omimvo 2 000 nasha dha ka pita, Aakriste nayo oya li ya hala okuuva kutya aamwahe oye li po ngiini noshike ye na okuninga, opo ye ya kwathele. (Aaefeso 6:21, 22; Aakolossa 4:8, 9) Ihe okupopya kombinga yayalwe, oshipu ku shituke olwaambo. Ngele otwa kala nokweendulula shono tu uva, otashi vulika tu ka popye iinima kaayi shi yoshili nenge mbyoka inaayi pumbwa okuuvika kuyalwe. Ngele inatu kotoka, otatu ki iyadha tatu lundile aantu. Aafarisayi oya li ya lundile Jesus sho ye mu pe uusama miinima mbyoka inaa ninga. (Mateus 9:32-34; 12:22-24) Okulundila ohaku nyateke edhina lyomuntu, ohaku eta oontamanana, ohaku uvitha nayi nohaku teya po uukuume. — Omayeletumbulo 26:20.

¹² Jehova okwa hala tu popye oohapu tadhi tungu notadhi tsu yalwe omukumo, ihe haandhoka tadhi teya po ekwatathano lyetu nayalwe. Oku tonde wo mboka taya “kunu olutandu mokati kaamwayina.” (Omayeletumbulo 6:16-19) Satana Ondiyapoli, oye omulundili gwotango, ngoka a li a lundile Kalunga. (Ehololo 12:9, 10) Kunena muuyuni osha ha okulundila yalwe. Ihe hasho shi na okukala ngaaka megongalo lyopaKriste. (Aagalati 5:19-21) Onkee ano, natu kotokele okupopya kwetu nokudhiladhila aluhe tango manga inaatu popya. Manga inoo popya oshinima shontumba shoka wu uva kombinga yomuntu gulwe, ipula to ti: ‘Mbela oshoshili ngaa? Oshi li ngaa nawa oku shi popya? Otashi tungu ngaa? Mbela onda hala ngaa oohapu ndhoka omuntu ngoka tandi popi e dhi uve? Otandi ka kala ndu uvite ngiini, uuna gumwe a popi oohapu dha tya ngaaka kombinga yandje?’ — Lesha 1 Aatessalonika 4:11.

13, 14. (a) Omatukano ohaga gumu ngiini yalwe? (b) Okusheka oshike, nomolwashike Aakriste ye na oku ku yanda?

¹³ Omathimbo gamwe atuheni ohatu popi iinima  mbyoka lwanima hatu ki ipa uusama. Ihe inatu hala shi kale omukalondjigilile okupopila yalwe muuwinayi noku ya ula omalaka omawinayi. Katu na okukala hatu tukana. Omuyapostoli Paulus okwa ti: “Etheni ano uululu auhe, ondjahi nonkone, omakudhilo nenge omatukano.” (Aaefeso 4:31) Oombiimbeli dhimwe odha toloka oshitya “omatukano” tadhi ti “elaka lya honga” nenge “elaka tali tolokana.” Omatukano ohaga ningitha aantu ya kale yu uvite kaaye na oshilonga noyi isa uunye. Aanona oyo unene hayu uvu nayi koohapu dhomatukano, onkene natu kotoke kaatu ya ehameke noohapu dhetu. — Aakolossa 3:21.

¹⁴ Ombiimbeli otayi tu londodha tu yande okusheka. Okusheka okwo okuula nayi yalwe nelalakano lyoku ya uvitha nayi. Kashi yemateka tuu, ngele gumwe ohu ungaunga nakuume ke kopandjokana nenge noyana momukalo gwa tya ngaaka! Omuntu ngoka ta tindi okweetha po okusheka yalwe, nena ina gwana okukala mo megongalo. (1 Aakorinto 5:11-13; 6:9, 10) Ngaashi twi ilonga, ngele otwa kala hatu popi oohapu dhuugoya, iifundja, nenge kaadhi li pahole otatu ka yona po ekwatathano lyetu naJehova nosho wo nayalwe.

15. Oohapu dhini hadhi koleke ekwatathano lyetu nayalwe?

¹⁵ Ongiini tatu vulu okulongitha omagano getu gokupopya momukalo moka Jehova a hala? Nonando Ombiimbeli inayi tu lombwela kondandalunde shoka tu na okupopya nenge kaatu na okupopya, otayi tu lombwele tu popye “ashike oohapu ndhoka oombwanawa tadhi tungu.” (Aaefeso 4:29) Oohapu ndhoka tadhi tungu, odha yogoka, odhopahole nodhoshili. Jehova okwa hala tu popye oohapu tadhi tsu yalwe omukumo notadhi ya kwathele. Shika  otashi vulu okukala oshidhigu. Ohashi pula oonkambadhala okupopya oohapu oombwanawa pehala lyokupopya oohapu oombwiinayi noinaadhi dhiladhilwa nawa. (Titus 2:8) Natu kundathaneni omikalo dhimwe, nkene tatu vulu okupopya oohapu tadhi tungu.

16, 17. (a) Omolwashike twa pumbwa okukala hatu pandula yalwe? (b) Oolye tatu vulu okupandula?

¹⁶ Jehova naJesus ohaya pandula. Otwa hala oku ya holela. (Mateus 3:17; 25:19-23; Johannes 1:47) Okupandula yalwe momukalo ngoka tagu ya tsu omukumo, okwa kwatela mo okupopya oohapu dha dhiladhilwa nawa nokuulika kutya otu na ko nasha nayo. Omayeletumbulo 15:23 otayi ti: ‘Ohapu oyo opala ngiini pethimbo lyu uka!’ Ohashi tu tsu omukumo uuna gumwe e tu pandula nomutima aguhe, omolwiilonga yetu yuudhiginini nenge molwoshinima shontumba. — Lesha Mateus 7:12; tala eyelitho eti-27.

¹⁷ Ngele owa kala ho tala komaukwatya omawanawa gayalwe, otashi ka kala oshipu oku ya pandula. Pashiholelwa, otashi vulika wa mona kutya gumwe megongalo ohi ilongekidha aluhe nawa iipopiwa ye nenge ha ningi oonkambadhala a gandje omayamukulo pokugongala. Omugundjuka gumwe otashi vulika ha popile oshili kosikola, nenge omukokele gumwe tashi vulika ha kutha aluhe ombinga miilonga yokuuvitha. Aantu ya tya ngawo, otwa pumbwa oku ya pandula. Osha simana wo komusamane a kale ha lombwele nekulu lye kutya oku mu hole noku mu pandula. (Omayeletumbulo 31:10, 28) Ngaashi iimeno ya pumbwa uuyelele nomeya, aantu nayo oya pumbwa okukala haya pandulwa, unene tuu aanona. Kala ho ya pandula omolwomaukwatya gawo omawanawa nosho wo oonkambadhala ndhoka haya ningi. Oku ya  pandula otaku vulu oku ya kwathela ya kale ye na uulaadhi nomukumo notaku ke ya ningitha ya ninge oonkambadhala dha mana mo ya longe shoka shu uka.

18, 19. Omolwashike tu na okuninga ngaashi tatu vulu tu tse yalwe omukumo noku ya hekeleka? Ongiini tatu vulu oku shi ninga?

¹⁸ Ngele ohatu tsu yalwe omukumo nohatu ya hekeleke, otatu holele Jehova. Oku na ko nasha lela ‘naaifupipiki’ naamboka ya “nyanyagulwa.” (Jesaja 57:15) Jehova okwa hala tu kale hatu ‘kumagidhathana nokupopya nehekeleko noomwenyo dha polimana.’ (1 Aatessalonika 5:11, 14, yelekanitha NW.) Uuna tatu kambadhala oku shi ninga, ohe tu mono nohe tu pandula omolwoonkambadhala dhetu.

 ¹⁹ Otashi vulika wu mone kutya gumwe megongalo okwa teka omukumo nenge a polimana. Oshike to vulu okupopya, opo wu mu kwathele? Otashi vulika wu kale itoo vulu okukandula po uupyakadhi we, ihe oto vulu okuulika kutya owu na ko nasha naye. Pashiholelwa, oto vulu wu ke mu talele po. Oto vulu oku mu leshela enyolo tali tsu omukumo noto vulu wo okugalikana pamwe naye. (Episalomi 34:18; Mateus 10:29-31) Mu lombwele kutya aamwatate naamwameme megongalo oye mu hole. (1 Aakorinto 12:12-26; Jakob 5:14, 15) Popya momukalo ngoka tagu ulike kutya shoka to mu lombwele oshoshili nowe shi itaala. — Lesha Omayeletumbulo 12:25.

20, 21. Oshike hashi ningitha omuntu a taambe ko omayele nuupu?

 ²⁰ Ohatu tungu wo yalwe uuna tatu ya pe omayele omawanawa. Tu li aantu inaatu gwanenena, atuhe otwa pumbwa omayele ethimbo nethimbo. Omayeletumbulo 19:20 otayi ti: “Pulakena omayele, taamba eputudho, opo u kale omunandunge komeho.” Aakuluntugongalo hayo owala taya vulu okugandja omayele nenge epukululo. Aavali oya pumbwa okuputudha oyana. (Aaefeso 6:4) Aamwameme nayo otaya vulu okupaathana omayele taga tungu. (Titus 2:3-5) Molwaashoka otu hole aamwatate naamwameme, natu shilipaleke aluhe kutya omayele ngoka tatu ya pe itage ya uvitha nayi. Oshike tashi vulu oku tu kwathela?

²¹ Otashi vulika to dhimbulukwa sho wa li wa pewa omayele omawanawa nowa li we ga taamba ko nuupu. Oshike sha ningitha wu ga taambe ko nuupu? Otashi vulika wa mono kutya omuntu ngoka oku na ko nasha lela nangoye. Nenge a popi nangoye nombili nonohole. (Aakolossa 4:6) Otashi vulika omayele ngoka ga li ga kankamena kOmbiimbeli. (2 Timoteus 3:16) Kutya nduno otatu lesha mOmbiimbeli nenge hasho, omayele ngoka tatu gandja naga kale gi ikolelela kovelise yontumba. Katu na okuthiminikila yalwe omadhiladhilo getu nenge tu longithe omanyolo papuko, opo ga opalele etaloko lyetu. Omukalo moka wa pelwe omayele, otagu vulu oku ku kwathela uuna to pe yalwe omayele.

22. Owa hala okulongitha ngiini omagano goye gokupopya?

²² Okupopya omagano ga za kuKalunga. Ohole yetu yoku mu hola nayi tu inyengitha tu ga longithe nawa. Natu dhimbulukwe kutya oohapu odhi na oonkondo dhokuteya po yalwe nenge oku ya tunga. Onkee ano, natu kale hatu ningi ngaashi tatu vulu tu popye oohapu ndhoka tadhi tsu yalwe omukumo notadhi ya ladhipike.