Ontumwafo ya za kOlutuwiliki
Ombiimbeli mAahebeli 5:12 otayi tu lombwele kutya natu ‘kale aalongi’ yaantu. Omulongi dhingi meshito alihe, Jehova, ote tu pula tu longe aantu kombinga ye. Oshinakugwanithwa kehe tu na shokulonga aantu oshili kombinga yaJehova, kutya nduno omegumbo, omegongalo nenge omiilonga yokuuvitha, oshi li uuthembahenda uunene nosha kwata miiti. Ongiini tatu vulu oku shi gwanitha po?
Eyamukulo oli li moohapu ndhoka omuyapostoli Paulus a li a nyolele Timoteus, sho a ti: “Longitha ethimbo lyoye mokulesha Omanyolo omayapuki montaneho yaayehe, mokuuvitha nomokulonga aantu.” Paulus okwa gwedha ko a ti: “Ngele to shi ningi, oto ihupitha nosho wo mboka taye ku pulakene.” (1 Tim. 4:13, 16) Etumwalaka ndyoka to uvitha otali hupitha oomwenyo. Onkee ano, osha simana wu hwepopaleke okulesha nosho wo okulonga aantu kwoye. Okambo haka oka nyanyangidhwa nelalakano lyoku ku kwathela. Tala kiinima yimwe mbyoka yi li mo.
Pepandja kehe opu na enyolo moka mwa kuthwa ekotampango lyOmbiimbeli ndyoka lya pambathana noshitsa shoka tashi kundathanwa nenge tali gandja oshiholelwa shankene oshitsa shoka tashi vulu okutulwa miilonga
Jehova ‘oye mwene te tu longo,’ sha hala okutya, oye Omulongi a dhenga mbanda. (Jes. 30:20) Okambo haka otake ku kwathele wu hwepopaleke uunkulungu woye wokulesha nowokulonga aantu. Ihe ino dhimbwa kutya Jehova oye Onzo yetumwalaka ndyoka hatu uvitha noye ha nanene aantu kuYe. (Joh. 6:44) Onkee ano, galikana aluhe e ku pe ombepo ondjapuki. Longitha aluhe Oohapu Dhe. Ino popya omadhiladhilo goye mwene, ihe kala aluhe ho kwathele yalwe ya mone kutya Jehova oku uvite ngiini nota dhiladhila ngiini kombinga yoshinima shontumba. Kambadhala okukwathela aapulakeni yoye ya kale ye hole Jehova nomutima aguhe.
Owa pewa oshinakugwanithwa shoka inaashi inekelelwa aantu yalwe, shokulonga aantu etumwalaka lya simanenena. Otwi inekela kutya ngele owi inekele ‘moonkondo ndhoka we dhi pewa kuKalunga’ oto ka pondola. — 1 Pet. 4:11.
Aalongi pamwe nane
Olutuwiliki lwOonzapo dhaJehova
