1-3. (a) Aantu oyendji oya tala ko ngiini iilonga yawo? (b) Ombiimbeli otayi ladhipike aantu ya kale ye na etaloko lini kombinga yiilonga, nomapulo geni tatu ka kundathana montopolwa ndjika?

AANTU oyendji kunena muuyuni ihaya nyanyukilwa iilonga yawo. Molwaashoka ohaya longo oowili odhindji kiilonga mbyoka ihaaya nyanyukilwa naanaa, kaye hole okuya ko esiku kehe. Ongiini aantu mboka ye na iikala mbyoka taya vulu okuladhipikwa ya kale ye hole iilonga yawo noku yi nyanyukilwa?

² Ombiimbeli otayi ladhipike aantu ya kale ye na etaloko ewanawa lyokulonga nuudhiginini. Otayi ti kutya iilonga niizemo yayo oyi li elaleko nuuyamba. Salomo okwa ti: ‘Omuntu na lye ye a nwe noku nyanyukilwe iilonga ye ayihe yuudhiginini — oyo omagano gaKalunga.’ (Omuuv. 3:13, yelekanitha NW.) Jehova ngoka e tu hole nokwe tu halela aluhe uuwanawa okwa hala tu kale hatu nyanyukilwa iilonga yetu nosho wo iizemo yayo. Opo tu ikaleke mohole ye, otwa pumbwa okukala metsokumwe netaloko lye lyiilonga nosho wo nomakotampango ge ge na ko nasha niilonga. — Lesha Omuuvithi 2:24; 5:18.

³ Montopolwa ndjika otatu ka kundathana omapulo gane taga landula: Ongiini tatu vulu okunyanyukilwa iilonga yetu yuudhiginini? Iilonga yoludhi luni itaayi opalele Aakriste yashili? Ongiini tatu vulu okukala tu na ondjele miilonga yokwiikongela omboloto nomomaipyakidhilo getu gopambepo? Iilonga ya simanenena yini tu na okukala hatu longo? Ihe tango natu konakoneni oshiholelwa shaalongi yaali aanenenene meshito alihe, Jehova Kalunga naJesus Kristus.

4, 5. Ombiimbeli otayi ulike ngiini kutya Jehova oha longo nuudhiginini?

⁴ Jehova oye Omulongi Omunenenene. Genesis 1:1 ota ti: “Petameko Kalunga okwa shiti egulu nevi.” Sho Kalunga a mana iilonga ye yokushita evi naashihe shoka shi li ko, okwa li a popi kombinga yiilonga mbyoka a ti kutya ‘oyo opala lela.’ (Gen. 1:31) Oku shi popya niitya yimwe, okwa li a mbilipalelwa thiluthilu kiilonga ye ayihe mbyoka a li a longo kombanda yevi. Kapu na omalimbililo kutya Jehova, ‘Kalunga omunelago’ okwa li a nyanyukilwa noonkondo iilonga ye yuudhiginini. — 1 Tim. 1:11, OB-1954.

⁵ Kalunga ketu omulongi omudhiginini ke na siku e ethe po okulonga. Konima sho pwa piti ethimbo ele okuza sho evi naashihe shoka shi li ko ya pu okushitwa, Jesus okwa popi a ti: “Tate ota longo aluhe.” (Joh. 5:17) He okwa kala ta longo shike? Nonando oku li megulu, okwa kala i ipyakidhila mokuwilika aantu noku ya sila oshimpwiyu. Okwa shiti “omushitwa omupe,” sha hala okutya, Aakriste aagwayekwa mboka taya ka pangela pamwe naJesus megulu monakuyiwa. (2 Kor. 5:17) Okwa kala ta longo opo a gwanithe elalakano lye li na ko nasha naantu, opo mboka ye mu hole ya ka mone omwenyo gwaaluhe muuyuni uupe. (Rom. 6:23) Jehova okwa nyanyukwa noonkondo omolwiizemo yiilonga mbyoka. Aantu omamiliyona oya taamba ko etumwalaka lyUukwaniilwa, oya hililwa kuKalunga noya lundulula onkalamwenyo yawo opo yi ikaleke mohole ye. — Joh. 6:44, OB-1954.

6, 7. Jesus oku na ondjokonona onde yini yokulonga nuudhiginini?

⁶ Jesus oku na ondjokonona onde yokukala omulongi omudhiginini. Manga a li inee ya kombanda yevi, okwa li a longithwa kuKalunga e li “engomba” mokushita iinima ayihe “yomegulu noyokombanda yevi.” (Omayel. 8:22-31; Kol. 1:15-17) Sho Jesus a li kombanda yevi, okwa li a tsikile okulonga nuudhiginini. Sho a li omugundjuka, okwa li i ilongo okuhonga iipilangi, nokwa li a tseyika e li “omuhongi gwiipilangi.” *  (Mark. 6:3) Iilonga mbyoka oya li iidhigu noya li tayi pula okukala nuunkulungu wi ili nowi ili, unene tuu methimbo lyonale sho kwa li kaaku na oofabilika dhokuhonga iipilangi, iilongitho yokolusheno noositola dhokulanda iilongitho mbyoka. Dhiladhila owala Jesus ta yi a ka longe, tashi vulika ta ka ka omiti noku dhi tutila hoka ta longo. Mbela owa fa wu mu wete ta tungu omagumbo, ta longekidha iikonde e te yi tula mo nota hongo omiyelo nokuninga iipundi yomomagumbo? Jesus okwa li e na enyanyu ndyoka hali zi mokulonga nuudhiginini nosho wo nuukeka.

⁷ Jesus okwa li oshiholelwa sha dhenga mbanda mokulonga nuudhiginini muukalele. Okwa li i itula mo lela uule woomvula ndatu netata miilonga mbyoka ya simana noonkondo. Molwaashono okwa li a hala okuuvithila aantu oyendji ngaashi ta vulu, okwa li ha longitha nawa ethimbo lye, ha penduka ongula onene ta longo sigo okongulohi. (Luk. 21:37, 38; Joh. 3:2) Okwa li he endaenda ‘niilando nomikunda noku uvitha elaka etoye lyOshilongo shaKalunga’ nenge Uukwaniilwa waKalunga. (Luk. 8:1) Okwa li he ende ookilometa omathele kolupadhi moondjila dhi na ontsi opo e ku uvithile aantu onkundana ombwanawa.

8, 9. Jesus okwa li ha nyanyukilwa ngiini iilonga ye yuudhiginini?

⁸ Mbela Jesus okwa li ha nyanyukilwa iilonga ye yuudhiginini muukalele? Eeno. Okwa li a kunu oombuto dhoshili yUukwaniilwa nokwa thigi omapya ga pya okuteywa. Okulonga iilonga yaKalunga okwa li kwe mu koleke nomolwaashono a li i idhilike iikulya pompito yimwe opo a gwanithe po iilonga mbyoka. (Joh. 4:31-38) Dhiladhila nkene a li e uvite a gwanenwa sho pehulilo lyuukalele we kombanda yevi a li a vulu okulombwela He a ti: “Onde ku adhimitha kombanda yevi, onda tsakanitha oshilonga shoka we shi pe ndje, ndi shi longe.” — Joh. 17:4.

⁹ Jehova naJesus oye li shili iiholelwa ya dhenga mbanda ye  li aantu mboka haya nyanyukilwa iilonga yawo yuudhiginini. Ohole yetu yokuhola Jehova ohayi tu inyengitha tu ‘mu holele.’ (Ef. 5:1) Ohole yetu yokuhola Jesus ohayi tu inyengitha tu “landule ondjila ndjoka a li e yi ende.” (1 Pet. 2:21) Onkee ano, natu ka konakoneni nkene natse tatu vulu okukala hatu nyanyukilwa iilonga yetu yuudhiginini.

10, 11. Oshike tashi vulu oku tu kwathela tu kale tu na etaloko ewanawa kombinga yiilonga yetu?

¹⁰ Aakriste yashili nayo ohaya longo iilonga yokwiikongela omboloto. Otwa hala okunyanyukilwa iilonga yetu nokukala twa gwanenwa, ihe otashi vulu okukala oshidhigu noonkondo ngele otatu longo iilonga yokwiikongela omboloto mbyoka kaatu hole. Ongiini tatu vulu okukala hatu nyanyukilwa iilonga yetu moonkalo dha tya ngawo?

¹¹ Omokukala tu na etaloko ewanawa. Haaluhe tatu vulu okulundulula oonkalo dhetu, ihe otatu vulu okulundulula etaloko lyetu. Ngele tatu tedhatedha kombinga yetaloko lyaKalunga, otashi vulu oku tu kwathela tu kale tu na etaloko ewanawa lyiilonga. Pashiholelwa, ngele owu li omutse gwuukwanegumbo, dhimbulukwa kutya iilonga yoye otayi ku kwathele wu sile oshimpwiyu uukwanegumbo woye, nonando oya fa yidhinitha. Okusila oshimpwiyu uukwanegumbo woye oku li oshinima sha simana koshipala shaKalunga. Oohapu dhe otadhi ti kutya omuntu ngoka ihaa sile oshimpwiyu uukwanegumbo we ‘omwiinayi e vulike komupagani.’ (1 Tim. 5:8) Okukala wu shi kutya iilonga yoye otayi ku kwathele wu gwanithe po oshinakugwanithwa shoye shoka wa pewa kuKalunga, otashi vulu oku ku kwathela wu nyanyukilwe iilonga yoye mbyoka to longo nelalakano, omaukwatya ngoka tashi vulika kaage niwe kaaniilonga ooyakweni.

12. Omomikalo dhini okulonga nuudhiginini nokukala aanashili kiilonga yetu haku eta omauwanawa?

¹² Omokukala hatu longo nuudhiginini notu li aanashili. Okulonga nuudhiginini nokwiilonga okulonga nawa iilonga yetu  otaku vulu oku tu etela omalaleko nuuyamba. Aaniilonga mboka haya longo nuudhiginini nonuukeka oya simanekwa noonkondo kaagandji yiilonga yawo. (Omayel. 12:24; 22:29) Tu li Aakriste yashili, otu na wo okukala aanashili miilonga yetu, mokukala ihaatu yaka iimaliwa, iinima yilwe nenge ethimbo lyomugandji gwiilonga. (Ef. 4:28) Ngaashi twe shi mona montopolwa ya tetekele, okukala aanashili ohaku eta uuwanawa. Omuniilonga ngoka a tseyika e li omunashili ohi inekelwa nuupu. Kutya nduno aagandji yiilonga yetu oye wete oshiholelwa shetu tu li aaniilonga aadhiginini nenge hasho, otatu vulu okukala twa mbilipalelwa shoka hashi etithwa kokukala ‘neiyuvo lya yela’ nokokutseya kutya otatu nyanyudha Kalunga ngoka tu hole. — Heb. 13:18; Kol. 3:22-24.

13. Oshiholelwa shetu oshiwanawa kiilonga otashi vulu okweeta iizemo yini?

 ¹³ Omokukala tu shi shi kutya eihumbato lyetu ohali simanekitha Kalunga. Ngele otwa dhiginine omithikampango dha dhenga mbanda dhopamikalo dhopaKriste kiilonga, aantu yamwe otaye ke shi mona. Iizemo yini tashi ke eta? Otatu ka ‘simanekitha elongo ndyoka tali popi Kalunga, Omuhupithi gwetu.’ (Tit. 2:9, 10) Eihumbato lyetu ewanawa otali vulu okuningitha yalwe ya mone kutya elongelokalunga lyetu ewanawa nolihokitha kuyo. Dhiladhila owala nkene to ka kala wa nyanyukwa ngele omuniilonga mukweni gumwe okwa taamba ko oshili molwoshiholelwa shoye oshiwanawa kiilonga. Shoka sha simana noonkondo osho: Mbela itashi ka kala shinyanyudha unene okutseya kutya eihumbato lyoye ewanawa ohali simanekitha Jehova nohali nyanyudha omutima gwe? — Lesha Omayeletumbulo 27:11; 1 Petrus 2:12.

14-16. Ngele tatu ningi omatokolo ge na ko nasha niilonga, omapulo ga simana geni tu na okwiipula?

¹⁴ Ombiimbeli inayi popya kondandalunde kutya iilonga yokwiikongela omboloto yini tayi opalele nenge itaayi opalele Aakriste. Shika itashi ti kutya otatu vulu okulonga iilonga kehe, kutya nduno oya kwatela mo shike. Omanyolo otaga vulu oku tu kwathela tu konge iilonga mbyoka tayi opalele, mbyoka tayi nyanyudha Kalunga, notage tu kwathele wo tu yande iilonga mbyoka itaayi mu nyanyudha. (Omayel. 2:6) Ngele tatu ningi omatokolo ge na ko nasha niilonga, otu na okwiipula omapulo gaali ga simana taga landula.

¹⁵ Mbela okulonga iilonga mbino okwa kwatela mo iinima mbyoka ya pangulwa kOmbiimbeli? Oohapu dhaKalunga odha pangula lela okuyaka, okufundja nokwiihongela iihongwathano. (Eks. 20:4; Iil. 15:29; Ef. 4:28; Eh. 21:8) Otu na okutinda iilonga kehe tayi tu pula tu ninge iinima ya tya ngaaka. Ohole yetu yokuhola Jehova itayi ke tu pitika nando tu taambe ko iilonga mbyoka ya kwatela mo iilonga tayi yono iipango ye. — Lesha 1 Johannes 5:3.

 ¹⁶ Mbela okulonga iilonga mbika otaku ningitha ndje lela ndi kuthe ombinga nenge ndi yambidhidhe iilonga ya puka? Natu tale koshiholelwa shika. Okulonga wu li amushanga inaku puka. Ihe ongiini ngele Omukriste okwa pewa iilonga mbyoka mokapangelo kokukutha mo omala? Iilonga mbyoka itayi mu pula a kale ta kwathele shi na ko nasha noku ga kutha mo. Ihe nando ongaaka, mbela iilonga ye mbyoka ha longo aluhe moka itayi yambidhidha nando iilonga yokapangelo hoka ke lile po okukutha mo omala, shoka itaashi tsu  kumwe nOohapu dhaKalunga? (Eks. 21:22-24) Molwaashoka otu hole Jehova, inatu hala okukala tu na ekwatathano niilonga kaayi li pamanyolo.

17. (a) Iinima yini tatu vulu okukonakona nuukeka ngele tatu ningi omatokolo ge na ko nasha niilonga? (Tala oshimpungu “ Nandi taambe ko ngaa iilonga mbika?”) (b) Ongiini eiyuvo lyetu tali vulu oku tu kwathela tu ninge omatokolo ngoka taga nyanyudha Kalunga?

¹⁷ Omaipulo ogendji ge na ko nasha niilonga otaga vulu okukandulwa po mokukonga nuukeka omayamukulo gomapulo gaali ga simana ngoka ge li mokatendo okati-15 nokati-16. Kakele kaashono, opu na natango iinima yilwe mbyoka twa pumbwa okukonakona nuukeka ngele tatu ningi omatokolo ge na ko nasha niilonga. * Inatu tegelela omupiya omudhiginini oye e tu totele po oompango ndhoka tadhi popi onkalo kehe ndjoka  tayi vulu okuholoka po. Otwa pumbwa okulongitha oondunge dhokuyoolola. Ngaashi twi ilonga montopolwa onti-2, otwa pumbwa okulonga nokudheula eiyuvo lyetu mokukonakona nkene tu na okutula miilonga Oohapu dhaKalunga monkalamwenyo yetu yesiku kehe. Ano ngele otwi “igilila okuyoolola shoka shu uka nenge sha puka,” eiyuvo lyetu otali vulu oku tu kwathela mokuninga omatokolo ngoka taga nyanyudha Kalunga notage tu kwathele tu kale mohole ye. — Heb. 5:14.

18. Omolwashike kaashi shi oshipu okukala netaloko li li pandjele shi na ko nasha niinima yopambepo?

¹⁸ Kashi li oshipu okukala netaloko li li pandjele li na ko nasha niinima yopambepo ‘momasiku gahugunina,’ ngoka ge li “omathimbo omadhigu.” (1 Tim. 3:1, yelekanitha OB-1954.) Okumona iilonga nokukala we yi dhiginina otashi vulu okukala lela oshidhigu. Ihe tu li Aakriste yashili, otwa tseya kutya osha simana okulonga nuudhiginini opo tu sile oshimpwiyu omaukwanegumbo getu. Ihe ngele inatu kotoka, omathininiko kiilonga nenge omadhiladhilo guuyuni gokuhola omaliko otaga vulu okuya moshipala omaipyakidhilo getu gopambepo. (1 Tim. 6:9, 10) Natu konakoneni nkene tatu vulu okukala tu na ondjele mokupititha komeho “iinima mbyoka yi na oshilonga.” — Fil. 1:10.

19. Omolwashike Jehova oye twa gwana okwiinekela thiluthilu, neinekelo ndyoka otali tu kwathele tu yande shike?

¹⁹ Inekela Jehova thiluthilu. (Lesha Omayeletumbulo 3:5, 6.) Mbela haye twa gwana okwiinekela? Otu na oku shi ninga, oshoka ohe tu sile oshimpwiyu. (1 Pet. 5:7) Okwa tseya oompumbwe dhetu e tu vule noiha nyengwa oku dhi gwanitha po. (Eps. 37:25) Onkee ano, oshi li nawa okupulakena shoka Oohapu dhe tadhi tu dhimbulukitha tadhi ti: “Mokukala kweni inamu mangwa kohole yeliko, ihe kaleni mwa gwana naashoka mu na. Oshoka Kalunga okwa ti: ‘Itandi ku etha nando; itandi ku thigi po.’” (Heb. 13:5) Aakalele oyendji yethimbo lyu udha otaya vulu oku shi koleka kutya Kalunga oha sile  shili oshimpwiyu oompumbwe dhonkalamwenyo. Ngele otwi inekela lela kutya Jehova ote ke tu sila oshimpwiyu, otatu ka yanda okukala noshimpwiyu sha pitilila shi na ko nasha nokusila oshimpwiyu omaukwanegumbo getu. (Mat. 6:25-32) Itatu ke etha iilonga yetu yokwiikongela omboloto yi tu ethithe po omaipyakidhilo getu gopambepo, ngaashi okuuvitha onkundana ombwanawa nokuya kokugongala. — Mat. 24:14; Heb. 10:24, 25.

20. Okukaleka eho lyanathangwa otashi ti shike, noshike tashi vulu oku tu kwathela tu ninge ngawo?

 ²⁰ Kaleka eho lyoye lyanathangwa. (Lesha Mateus 6:22, 23.) Okukala neho lyanathangwa otashi ti kutya okukaleka onkalamwenyo yetu yanathangwa. Eho lyOmukriste lyanathangwa ohali gandja eitulomo kelalakano limwe alike, sha hala okutya, kokulonga ehalo lyaKalunga. Ngele eho lyetu otali gandja eitulomo kiinima yu uka, itatu ka pwila mokwiikongela iilonga hayi futu nawa nokulalakanena onkalamwenyo yuuzeko. Itatu ka pwila wo mokwiikongela aluhe iinima yoshinanena noya dhenga mbanda mbyoka aatseyithi yiipindi haya kambadhala oku tu itaalitha kutya otwe yi pumbwa opo tu kale twa nyanyukwa. Ongiini to vulu okukaleka eho lyoye lyanathangwa? Yanda okwiindumbila oongunga inaadhi pumbiwa. Ino igongelela iiniwe mbyoka hayi pula ethimbo neitulomo olindji. Vulika komayele gOmbiimbeli ngoka taga ti kutya natu kale twa gwanenwa ‘kiikulya nomizalo.’ (1 Tim. 6:8) Kambadhala okukaleka onkalamwenyo yoye yanathangwa.

21. Omolwashike twa pumbwa okutokola kutya oshike sha simana monkalamwenyo yetu, noshike tu na okukala twa pititha komeho?

²¹ Itulila po omalalakano ge na ko nasha niinima yopambepo noku ga dhiginina. Molwaashoka itatu vulu okuninga kehe shimwe shoka twa hala monkalamwenyo, otwa pumbwa okutokola kutya oshike sha simana. Ngele itatu shi ningi, iinima mbyoka inaayi simana otayi ka mana po ethimbo lyetu lyiinima ya simana. Oshike tu na okupititha komeho monkalamwenyo yetu? Aantu oyendji muuyuni ohaya gandja eitulomo olindji kokulalakanena elongo lyopombanda opo ya vule okumona omaithano ga tumbala monkalelo ndjika. Ihe Jesus okwa ladhipike aalanduli ye ya ‘konge tango Uukwaniilwa waKalunga.’ (Mat. 6:33, NW) Onkee ano, tu li Aakriste yashili, otwa pititha komeho Uukwaniilwa waKalunga monkalamwenyo yetu. Onkalamwenyo yetu ndjoka ya kwatela mo omatokolo ngoka hatu ningi, omalalakano ngoka hatu itulile po nomaipyakidhilo getu, oyi na okuulika kutya otwa pititha komeho iinima yUukwaniilwa nosho wo okulonga ehalo lyaKalunga pehala lyiinima yopamaliko nomaithano guuyuni.

22, 23. (a) Iilonga yini ya simanenena kAakriste yashili, nongiini tatu vulu okuulika kutya otwa lenga iilonga mbyoka? (Tala oshimpungu  “Etokolo lyandje olye etela ndje enyanyu nembilipalelo monkalamwenyo.”) (b) Owa tokola toko okuninga shike shi na ko nasha niilonga yokwiikongela omboloto?

²² Molwaashoka otu shi shi kutya otu li lela methimbo lyehulilo, otatu gandja eitulomo olindji kiilonga ya simanenena mbyoka yi na okulongwa kAakriste yashili, okuuvithila aantu noku ya ninga aalongwa. (Mat. 24:14; 28:19, 20) Ngaashi Jesus ngoka e li oshiholelwa shetu, otwa hala okukala twi itula lela miilonga mbyoka tayi hupitha oomwenyo. Ongiini tatu vulu okuulika kutya iilonga mbika oya simana kutse? Oyendji yomoshigwana shaKalunga otaya kutha ombinga miilonga yokuuvitha nomutima aguhe ye li aauvithi momagongalo. Yamwe oyu unganeka nawa iinima yawo opo ya vule okuninga aakokolindjila nenge okuya miilonga yuutumwa. Aavali oyendji oya ladhipika aanona yawo ya lalakanene omaithano ngoka ge na ko nasha niilonga yethimbo lyu udha, molwaashoka oye shi shi kutya osha simana okwiitulila po omalalakano ge na ko nasha niinima yopambepo. Mbela aauvithi yUukwaniilwa aalaadhi ohaya nyanyukilwa ngaa iilonga yawo yuudhiginini yuukalele? Eeno, ohaye yi nyanyukilwa lela. Okulongela Jehova nomutima aguhe ohashi etele omuntu enyanyu monkalamwenyo, embilipalelo nomalaleko nuuyamba ogendji. — Lesha Omayeletumbulo 10:22.

²³ Oyendji yomutse ohatu longo oowili odhindji kiilonga yokwiikongela omboloto opo tu sile oshimpwiyu omaukwanegumbo getu palutu. Natu dhimbulukweni kutya Jehova okwa hala tu kale hatu nyanyukilwa iilonga yetu yuudhiginini. Ngele otwa kala tu na iikala ya fa ye nokukatuka metsokumwe nomakotampango ge, otatu ka nyanyukilwa iilonga yetu. Onkee ano, natu kale twa tokola toko kaatu ethe nando iilonga yokwiikongela omboloto yi ye moshipala iilonga yetu ya simanenena yokuuvitha onkundana ombwanawa yUukwaniilwa waKalunga. Ngele otwa pititha komeho iilonga mbika monkalamwenyo yetu, otatu ulike kutya otu hole Jehova, nokungeyi otatu ki ikaleka mohole ye.