Okusalutila epandela. Oonzapo dhaJehova odhi itaala kutya okwiinyongamena epandela nenge oku li salutila shoka olundji hashi endele pamwe neimbilo lyopashigwana, oshi li omukalo gwelongelokalunga tagu ulike kutya epangelo nenge aaleli yalyo otaya vulu okuhupitha aantu pehala lyokwiinekela muKalunga e shi ninge. (Jes. 43:11; 1 Kor. 10:14; 1 Joh. 5:21) Omuleli gumwe ngoka a li niikala ya tya ngaaka oNebukadnezzar gwaBabilonia shonale. Opo a kumithe aantu nuunene wepangelo lye nuulaadhi we wopalongelokalunga, omukwaniilwa nguka omunankondo okwa li a dhike oshiyelekela oshinene nokuthiminika aalelwa ye ye shi inyongamene omanga ondjimbo ndjoka ya fa eimbilo lyopashigwana tayi imbwa. Ihe Aahebeli yatatu Shadrak, Meshak naAbednego oya li ya tindi okwiinyongamena oshiyelekela shoka nonando osha li tashi vulu oku ye etela eso. — Daniel ontopolwa 3.

Omunandjokonona Carlton Hayes okwa nyola a ti kutya pethimbo lyetu ‘epandela oli li endhindhiliko lyegalikano. Aalumentu ohaya kutha ko omagala ngele epandela tali londo, aatoti yuutewo ohaya toto uutewo taya tanga epandela naanona ohayi imbi taya tanga epandela.’ Okwa gwedha ko wo a ti kutya iilongo oyi na “omasiku omayapuki” ngaashi omasiku gamwe ngoka hayi simaneke aantu “aayapuki nomapendafule” gayo nosho wo “ootempeli”  nenge omahala gayo omayapuki. Moshituthi shimwe shopashigwana muBrasilia, omupresidende gwOmpangu yopombanda yaakwiita okwe shi zimine kutya “epandela ohali inyongamenwa nokusimanekwa . . . ngaashi owala aantu haya simaneke iilongo moka ya valelwa.” Embo The Encyclopedia Americana olya tile kutya “epandela eyapuki ngaashi owala omushigakano.”

Ethimbo opo lya zi ko, oensiklopedia oyo tuu ndjoka oya ti kutya omaimbilo gopashigwana “oge li euliko kutya owu hole oshilongo sheni nolundji oga kwatela mo egalikano ndyoka tali pula Kalunga a wilike noku gamene aantu nenge aapangeli yomoshilongo shoka.” Onkee ano, oshi shi okuuviwa ko sho aapiya yaJehova ya tala ko iituthi yopashigwana moka mwa kwatelwa okusalutila omapandela nosho wo omaimbilo gopashigwana ya fa elongelokalunga. Embo The American Character olya popi kombinga yaanona yOonzapo dhaJehova mboka ya tindi okusalutila epandela nenge okuuvaneka kutya otaya ka kala aadhiginini kulyo moosikola dhomuAmerika lya ti: “Ompangu yopombanda oya koleka miipotha ya landulathana kutya omikalondjigilile ndhoka dhakehe esiku odhi li elongelokalunga.”

Nonando oshigwana shaJehova ihashi kutha ombinga miituthi kaayi li pamanyolo, ohashi simaneke uuthemba wayalwe mboka haye shi ningi. Osha simaneka wo epandela kutya oli li endhindhiliko lyopashigwana nohashi vulika “kaapangeli” mboka taya longo ongo ‘aayakuli yaKalunga.’ (Rom. 13:1-4) Onkee ano, Oonzapo dhaJehova ohadhi pulakene kekumagidho ndyoka tali ti kutya “naku galikanenwe aakwaniilwa naapangeli ayehe.” Ihe elalakano lyetu olyo ‘tu kale twa ngungumana nombili mokusimaneka Kalunga akuhe nomikalo omiwanawa.’ — 1 Tim. 2:2.

Okukutha ombinga momahogololo gopapolitika. Aakriste yashili oya simaneka uuthemba wayalwe wokuhogolola. Ihaya piyaganeke omahogololo nohaya vulika kaapangeli mboka ya hogololwa. Ihe nando ongaaka, ihaya kutha nando ombinga miinima yuuyuni mbuka yopapolitika. (Mat. 22:21; 1 Pet. 3:16) Aakriste oye na okuninga shike miilongo moka omahogololo taga dhengele nenge ngele mboka itaaya yi kuuketha womahogololo taya thiminikwa oku shi ninga? Dhimbulukwa kutya Shadrak, Meshak naAbednego oya li ya yi sigo omolushandja lwaDura, onkee ano Omukriste ngoka e li monkalo ya faathana  otashi vulika a tokole okuya mokaketha komahogololo ngele eiyuvo lye otali mu pitike e shi ninge. Ihe oku na okutakamitha opo kaa game ombinga. Oku na okukaleka momadhiladhilo omakotampango gahamano ngaka taga landula:

1. Aalanduli yaJesus ‘kaye shi yomuuyuni.’ — Joh. 15:19, OB-1954.

2. Aakriste oye lile po Kristus nUukwaniilwa we. — Joh. 18:36; 2 Kor. 5:20.

3. Egongalo lyopaKriste olya hangana meitaalo niilyo yalyo oya mangelwa kumwe kohole yaKristus. — 1 Kor. 1:10; Kol. 3:14.

4. Mboka haya hogolola omupangeli gwontumba oye na oshinakugwanithwa mwaashoka ta ningi. — Tala kekotampango ndyoka tali adhika muSamuel gwotango 8:5, 10-18 nomuTimoteus gwotango 5:22.

5. Jehova okwa li a tala ko Aaisraeli ye mu ekelahi sho ya li ya hala omukwaniilwa gwopantu. — 1 Sam. 8:7.

6. Aakriste oye na okupopya neiyuvo lya yela naantu ayehe mboka ye li moongundu dhopapolitika adhihe kombinga yepangelo lyUukwaniilwa waKalunga. — Mat. 24:14; 28:19, 20; Heb. 13:18.

Iilonga yopashigwana. Miilongo yimwe, epangelo ohali pula mboka ya tinda iilonga yuukwiita opo ya ka longe iilonga yopashigwana uule wethimbo lyontumba. Ngele tatu ningi etokolo moshinima shika, otu na okugalikana kwaashoka noku shi kundathana nOmukriste a pyokoka e tatu ningi ihe etokolo lya kankamena keiyuvo lyetu. — Omayel. 2:1-5; Omayel. 11:14.

Oohapu dhaKalunga otadhi tu lombwele tu ‘kale hatu vulika kaaleli nokaapangeli notu kale hatu vulu okulonga uuwanawa kehe nokukala tu na [ondjele, NW].’ (Tit. 3:1, 2) Tu na oohapu ndhoka momadhiladhilo otatu vulu okwiipula omapulo taga landula: ‘Mbela okulonga iilonga yopashigwana otaku ka guma okwaahe na ombinga kwandje kwopaKriste nenge otaku ka ningitha ndje ndi kuthe ombinga momalongelokalunga giifundja?’ (Mika 4:3, 5; 2 Kor. 6:16, 17) ‘Mbela iilonga mbyoka otayi shi ningi oshidhigu kungame nenge otayi ki imbi ndje ndi gwanithe po iilonga yandje yopaKriste?’ (Mat. 28:19, 20; Ef. 6:4; Heb. 10:24, 25) ‘Mepingathano naashoka, iilonga mbyoka otayi ka pitika  ndje ngaa ndi tamunune mo uupambepo wandje nondi kale omukalele gwethimbo lyu udha?’ — Heb. 6:11, 12.