1, 2. (a) Oshike omathimbo gamwe hashi vulika tu kale tatu ipula nasho kombinga yaamboka opo ya hokana, nomolwashike? (b) Omapulo geni tatu ka kundathana montopolwa ndjika?

MBELA oho nyanyukilwa okuya kohango yontumba? Aantu oyendji ohaye shi nyanyukilwa okuya ko, molwaashoka ohayi kala yinyanyudha noonkondo. Aafuko ohaya kala ya zala yo opala notaya monika nawa. Ihaya kala tuu ya nyanyukwa noonkondo! Mesiku ndyoka, aafuko ohaya kala tayi imemeha nohaya kala netegameno kutya onakuyiwa yawo otayi ka kala ombwanawa lela.

² Ihe nando ongaaka, oondjokana odhindji kunena odhi li muupyakadhi. Nonando ohatu kala twa halela uuwanawa mboka opo ya hokana, otashi vulika omathimbo gamwe tu ipule tatu ti: ‘Mbela otaya ka kala ngaa ye na enyanyu mondjokana yawo? Mbela ondjokana yawo otayi ka kalelela ngaa?’ Eyamukulo komapulo ngoka otali ka kala lyi ikolelela komusamane nomukulukadhi ngele oya kala yi inekela omayele gaKalunga ge na ko nasha nondjokana noku ga tula miilonga mondjokana. (Lesha Omayeletumbulo 3:5, 6.) Oya pumbwa oku shi ninga opo yi ikaleke mohole yaKalunga. Ngashingeyi natu taleni komayamukulo gOmbiimbeli gomapulo gane taga landula: Omolwashike aantu haya hokana? * Ngele owa hala okuhokana, olye wu na okukonga oye a kale kuume koye kopandjokana? Mbela ongiini to vulu okwiilongekidhila ondjokana? Oshike tashi vulu okukwathela aaihokani ya kale ya nyanyukwa mondjokana yawo?

3. Omolwashike kaashi li pandunge okuhokana omolwomatompelo kaage na oshilonga?

³ Aantu yamwe oyi itaala kutya ondjokana oyo tayi eta enyanyu noito vulu okukala wa mbilipalelwa nenge wa nyanyukwa monkalamwenyo ngele ino hokana. Ihe shika kashi shi shoshili nando. Jesus ngoka a li inaa hokana okwa popya kutya okukala inoo hokana oku li omagano nokwa li a ladhipike mboka taye shi vulu ye shi ninge. (Mat. 19:11, 12) Omuyapostoli Paulus okwa li wo a kundathana kombinga yuuwanawa wokukala inoo hokana. (1 Kor. 7:32-38) Jesus nosho wo Paulus inaya tula po ompango kutya aantu inaya hokana, oshoka ‘okwiindika’ aantu ya hokane oku li limwe ‘lyomomalongo goompwidhuli.’ (1 Tim. 4:1-3) Ihe okwaahokana ohaku etele omauwanawa ogendji mboka ya hala okulongela Jehova kaapu na shoka tashi ya piyaganeke. Onkee ano, kashi li pandunge okuhokana omolwomatompelo inaaga simana, ngaashi okuhokana molwaashoka wu wete oomakula yoye ye shi ninga.

4. Ondjokana tayi pondola ohayi yala ekankameno lini shi na ko nasha nokuputudha aanona?

⁴ Mepingathano naashono twa kundathana metetekelo, mbela opu na omatompelo ge na oshilonga ngoka taga ningitha omuntu a hokane? Eeno, opo ge li. Ondjokana nayo omagano ga za kuKalunga omunahole. (Lesha Genesis 2:18.) Onkee ano, ohayi vulu okweetela aantu omauwanawa gontumba nosho wo enyanyu. Pashiholelwa, ondjokana yi na omupondo oyi li ekankameno lya kola lyonkalamwenyo yuukwanegumbo. Aanona oya pumbwa okukala momudhingoloko gu li nawa moka taya pewa egeeloputudho kaavali yawo noku ya wilika. (Eps. 127:3; Ef. 6:1-4) Ihe aantu ihaya hokana owala molwaashoka ya hala aanona.

5, 6. (a) Omauwanawa gamwe ogeni hage etwa kuukuume wopothingo, ngaashi sha popiwa kOmuuvithi 4:9-12? (b) Ongiini ondjokana tayi vulu okukala ya fa ongodhi ya yogohwa oondali ndatu?

⁵ Natu taleni enyolo ndyoka li li petameko lyontopolwa ndjika nosho wo oovelise ndhoka dha tetekele enyolo ndika, ndhoka tadhi ti: “Yaali ye vule gumwe, oshoka oye na ondjambi ombwanawa yomaipyakidhilo giilonga yawo. Oshoka gumwe ngele ta punduka, mukwawo ota vulu oku mu toola po, ihe yaye ngoka ta punduka  po pwaa na mukwawo e mu toole po. Natango tuu yaali nge ya lala pamwe, otaa ningilathana omuyenye, ihe gumwe oti ipupyaleke ngiini? Ngele oku na ngoka ta matukile po gumwe, nena ayehe yaali otaye mu thikamene. Ongodhi ya yogohwa oondali ndatu, ihayi tokoka mbala.” — Omuuv. 4:9-12.

⁶ Oovelise ndhoka otadhi tsu omuthindo lela uuwanawa wokukala nakuume. Ondjokana oya kwatela mo uukuume wopothingo. Ngaashi enyolo tali shi ulike, ondjokana ohayi gandja ompito kaaihokani ya kale taya kwathelathana, taya hekelekathana notaya gamenathana. Ongodhi ya yogohwa oondali mbali ohayi vulu okutokoka mbala ngaashi ovelise ndjika tayi shi popi. Ihe ndjoka ya yogohwa oondali ndatu ihaayi tokoka mbala. Ondjokana ohayi kala ya kola unene tuu ngele oya ningi Kalunga oye omuntu omutitatu muyo. Ngele aaihokani oya pititha komeho okunyanyudha Jehova, ondjokana yawo ohayi kala ya fa ongodhi ndjoka ya yogohwa oondali ndatu. Ngele oya lenga uudhiginini wawo kuJehova, ondjokana yawo ohayi kala ya kola lela.

7, 8. (a) Paulus okwa gandja omayele geni kAakriste mboka inaaya hokana mboka ye na omahalo gopamilalo ge na oonkondo? (b) Ombiimbeli otayi tu kwathele tu kale netaloko li li paushili lini li na ko nasha nondjokana?

⁷ Ondjokana oyo owala elongekidho moka aantu taya vulu okugwanitha po omahalo gawo gopamilalo momukalo gu li mondjila. Omilalo otadhi vulu shili okweetela aaihokani enyanyu. (Omayel. 5:18) Ihe nonando omuntu ngoka inaa hokana oku pite nokuli methimbo lyuugundjuka moka omahalo gopamilalo haga kala ge na oonkondo unene, otashi vulika a kale natango e na omahalo gopamilalo ge na oonkondo. Ngele omahalo ngoka oga kala itaaga pangelwa, otaga vulu okufala omuntu momikalo dha nyata. Paulus okwa nwethwa mo a gandje omayele ngaka kwaamboka inaaya hokana taga ti: “Ngele itamu shi vulu, indeni moondjokana, oshoka okuya moondjokana okuhwepo ku vule okuhepekwa kehalo.” — 1 Kor. 7:9; Jak. 1:15.

⁸ Oshi li nawa okukala tu na etaloko lyondjokana li li paushili, kutya nduno oshike tashi inyengitha omuntu a hokane. Ngaashi Paulus e shi popya, mboka taya hokana otayi iyetele ‘uudhigu womokukalamwenyo.’ (1 Kor. 7:28) Aaihokani ohaya adhika komaupyakadhi  ngoka ihaaga adha mboka inaaya hokana. Ihe ngele ngoye owa hala okuhokana, ongiini to vulu okuyanda omaupyakadhi ogendji e to kala wa nyanyukwa? Omukalo gumwe ogwo okukonga noondunge kuume kopandjokana.

9, 10. (a) Paulus okwa longitha eudhi lini opo a yelithe oshiponga shoka hashi etithwa kokuhokana ngoka kee shi omwiitaali? (b) Olundji oshike hashi etithwa kokwiipwililika omayele gaKalunga ge na ko nasha nokuhokana ngoka kee shi omwiitaali?

⁹ Paulus okwa nwethwa mo a nyole ekotampango lya simana ndyoka li na okutulwa miilonga uuna omuntu ta kongo kuume kopandjokana, a ti: “Inamu pitika, mu humbate ondjoko yaa shi yeni pamwe naakaaneitaalo.” (2 Kor. 6:14, OB-1954) Okwa li a ningi eudhi li na ko nasha niinamwenyo iyali yi li kondjoko. Ngele iinamwenyo iyali yi vulathane muunene nenge moonkondo ya tulwa kondjoko yimwe, ayihe otayi ka nana nuudhigu. Sha faathana, ngele omwiitaali naangoka kee shi omwiitaali ya hokanathana, nena osha yela kutya otaya ka mona omaupyakadhi nokwaauvathana okundji. Ngele kuume gumwe kopandjokana okwa hala a kale mohole yaJehova namukwawo ke na ohokwe muyo, omalalakano gawo monkalamwenyo itaga ka kala ga faathana noshi na uupu ya adhike komaupyakadhi ogendji. Omolwaashono Paulus a ladhipike Aakriste ya hokane owala “mOmuwa.” — 1 Kor. 7:39, OB-1954.

¹⁰ Omathimbo gamwe Aakriste mboka inaaya hokana ohaya dhiladhila kutya oshi li hwepo okuhumbata ondjoko yimwe pamwe naangoka kee shi omwiitaali pehala lyokukala taya si ezaza. Yamwe ohaya tokola okwiipwililika omayele gOmbiimbeli e taya hokana naangoka ihaa longele Jehova. Ihe shono olundji ohashi etitha iilanduliko yinikitha oluhodhi. Aantu ya tya ngaaka ohayi iyadha ya hokana naantu mboka itaaya vulu okukundathana nayo kombinga yiinima mbyoka ya simana noonkondo monkalamwenyo yawo. Ohaya kala ya sa ezaza noonkondo shi vulithe sho ya li inaaya hokana. Lago enene, opu na Aakriste oyendji inaaya hokana mboka yi inekela omayele gopakalunga ge na ko nasha nondjokana nohaya vulika kugo nuudhiginini. (Lesha Episalomi  32:8.) Nonando oya hala okuhokana esiku limwe, ohaya kala inaaya hokana sigo taya mono kuume kopandjokana mwaamboka haya longele Jehova Kalunga.

11. Oshike tashi vulu oku ku kwathela wu konge kuume kopandjokana ngoka to opalele? (Tala wo oshimpungu “ Mbela onda hala kuume kopandjokana a tya ngiini?”)

¹¹ Odhoshili kutya hakehe omupiya gwaJehova e li kuume kopandjokana to opalele. Ngele oto dhiladhila okuhokana, konga ngoka e na omaukwatya nomalalakano gopambepo ga fa goye noku hole Kalunga ngaashi ngoye. Omupiya omudhiginini nomunandunge okwa nyanyangidha uuyelele owundji wu na ko nasha noshinima shoka, noshi li pandunge okukonakona pamwe negalikano omayele ngaka gopamanyolo e to etha ge ku wilike mokuninga etokolo ndika lya simana. * — Lesha Episalomi 119:105.

12. Omukalondjigilile guni gu na ko nasha nondjokana hagu longithwa miilongo oyindji, noshiholelwa shOmbiimbeli shini tashi gandja omayele ge na ko nasha naashino?

¹² Miilongo oyindji aavali oyo haya kongele aanona yawo kuume kopandjokana, molwaashoka oshi li omukalondjigilile gwawo. Osha ziminwa apuhe momaputuko ngoka kutya aavali oye na owino owindji mboka hawu ya kwathele okuninga omatokolo ngoka ga simana. Oondjokana dhu unganekwa kaavali olundji ohadhi pondola, ngaashi sha li hashi ningwa pethimbo lyOmbiimbeli. Oshiholelwa shaAbraham shokutuma omupiya gwe a ka kongele Isak omukulukadhi otashi longo sha aavali mboka ye li monkalo ya fa yaAbraham kunena. Abraham ka li i ipula niimaliwa nenge nondondo yanakukongwa. Pehala lyaashono, okwa li a ningi oonkambadhala dha tokolekeka okukongela Isak omukulukadhi mokati kaamboka haya longele Jehova. * — Gen. 24:3, 67.

13-15. (a) Ekotampango ndyoka tali adhika mOmayeletumbulo 24:27 otali vulu okukwathela ngiini omulumentu omugundjuka ngoka ta dhiladhila okuhokana? (b) Omukiintu omugundjuka oku na okuninga shike opo i ilongekidhile ondjokana?

¹³ Ngele oto dhiladhila okuhokana, oshi li nawa wi ipule to ti: ‘Mbela onde ku ilongekidhila ngaa shili?’ Eyamukulo lyoye inali ikolelela owala komaiyuvo goye ge na ko nasha nohole, omilalo, uukuume nenge nokutekula aanona. Pehala lyaashono, opu na omalalakano gokondandalunde ngoka kehe gumwe a hala okuninga omusamane nenge omukulukadhi e na okudhiladhila kugo.

¹⁴ Omulumentu omugundjuka ngoka ta kongo omukiintu a hokane naye oku na okudhiladhila nawa kombinga yekotampango ndika tali ti: “Opaleka iilonga yoye pondje, ngoye u tule epya lyoye melandulathano; opo ihe oto ka tunga egumbo lyoye.” (Omayel. 24:27) Mbela osha hala okutya shike? Pethimbo lyonale, ngele omulumentu a hala okutota po uukwanegumbo mokuhokana, okwa li e na okwiipula ngeyi: ‘Mbela ondi ilongekidha ngaa okusila oshimpwiyu omukulukadhi gwandje naanona mboka tashi vulika tu ka mone?’ Tango okwa li e na okulonga epya lye. Ekotampango ndika otali longo wo nokunena. Omulumentu ngoka a hala okuhokana okwa pumbwa okwiilongekidha okutaamba ko oshinakugwanithwa shondjokana. Oku na okulonga manga e na uukolele palutu. Oohapu dhaKalunga otadhi ti kutya omulumentu ngoka ihaa sile oshimpwiyu uukwanegumbo we palutu, pamadhiladhilo nopambepo, omwiinayi e vulike komupagani. — Lesha 1 Timoteus 5:8.

¹⁵ Omukiintu ngoka a tokola okuhokanwa naye okwa zimina a taambe ko iinakugwanithwa yontumba iidhigu. Ombiimbeli otayi popile uunkulungu nomaukwatya gamwe ngoka omukulukadhi a pumbwa okukala e na opo a kwathele omusamane gwe nokusila oshimpwiyu uukwanegumbo wawo. (Omayel. 31:10-31) Aalumentu naakiintu mboka haye endelele okuhokana omanga inaayi ilongekidhila okutaamba ko iinakugwanithwa mbyoka ya kwatelwa mondjokana, oyi ihole yo yene, molwaashoka inaya dhiladhila nkene ye na okukwathela ngoka ta ka ninga kuume kawo kopandjokana monakuyiwa. Ihe shoka sha simana  osho kutya oonakwiikonga oye na okukala yi ilongekidha pambepo.

16, 17. Mboka tayi ilongekidhile ondjokana oye na okutedhatedha kombinga yomakotampango gopamanyolo geni?

¹⁶ Okwiilongekidhila ondjokana okwa kwatela mo okutedhatedha kombinga yiinakugwanithwa mbyoka Kalunga a pa omusamane nomukulukadhi. Omusamane okwa pumbwa okutseya kutya osha hala okutya shike okukala omutse gwuukwanegumbo wopaKriste. Shika inashi hala okutya omusamane oku na okukala kayamukulwa. Pehala lyaashono, oku na okuholela omukalo moka Jesus ha longitha uukwamutse we. (Ef. 5:23) Omukiintu Omukriste naye okwa pumbwa okutseya iinakugwanithwa ya simana mbyoka e na mondjokana. Mbela ota ka vulika ngaa nehalo ewanawa ‘kompango yomulumentu’ gwe? (Rom. 7:2, NW) Omukiintu oku li nale kohi yompango yaJehova naKristus. (Gal. 6:2) Ihe ngele okwa hokanwa, oku li wo kohi yompango yomusamane gwe. Mbela ota ka vula ngaa okuyambidhidha omusamane gwe inaa gwanenena nokuvulika koonkondopangelo dhe? Ngele ke wete a hala oku shi ninga ita ka vulika kuye, oshi li hwepo a kale inaa hokanwa.

¹⁷ Kakele kaashono, aaihokani oye na okukala yi ilongekidhila okwiigwanithila po oompumbwe dhawo dhi ikalekelwa. (Lesha Aafilippi 2:4.) Paulus okwa nyola a ti: “Omulumentu kehe oku na okuhola omukiintu gwe, ngashika i ihole ye mwene, nomukiintu kehe oku na okusimaneka omulumentu gwe.” Paulus okwa nwethwa mo kuKalunga a mone kutya omulumentu okwa pumbwa okukala e uvite a simanekwa komukulukadhi gwe. Omukulukadhi naye okwa pumbwa okukala e uvite kutya oku holike komusamane gwe. — Ef. 5:21-33.

18. Omolwashike mboka taye endelathana ye na okukala ye na eipangelo pethimbo taye shi ningi?

¹⁸ Ano osha yela kutya eendelathano kali shi owala ethimbo lyokwiinyanyudha. Ihe olyo ethimbo ndyoka omulumentu nomukiintu ye na okwiilongathana nokutala ngele otaya vulu okuhokana. Oli li wo ethimbo lyokuulika eipangelo. Nando oshi li paunshitwe kuyo okukala ya hala okuya momilalo, aaikongi mboka ye holathane shili otaya ka yanda okuninga oshinima kehe shoka tashi vulu okuyona po ekwatathano lyamukwawo naKalunga. (1 Tes.  4:6) Onkee ano ngele to endele gumwe, kala wu na eipangelo, nuukwatya mboka otawu vulu oku ku kwathela monkalamwenyo yoye ayihe, kutya nduno owa hokana nenge ino hokana.

19, 20. Etaloko lyAakriste li na ko nasha nondjokana olya yooloka ko ngiini kwaandyoka lyaantu oyendji kunena muuyuni? Shi thaneka.

¹⁹ Ngele aaihokani oya hala ondjokana yawo yi kalelele, oye na okukala ye na etaloko li li mondjila shi na ko nasha nayo. Ondjokana kayi shi oshiningwanima shahugunina monkalamwenyo, ihe oyo etameko, sha hala okutya, etameko lyelongekidho ndyoka Jehova a tota po li kalelele. (Gen. 2:24) Mupya munene, aantu oyendji muuyuni hasho ya tala ko ondjokana ngawo. Momaputuko gamwe aantu ohaya popi kutya ondjokana oya fa oongodhi mbali dha mangwa edhita. Otashi vulika inaaya tseya kutya eudhi ndyoka otali hokolola nkene aantu oyendji haya tala ko ondjokana. Omolwashike taku vulu okutiwa ngawo? Nonando edhita lyongodhi otali vulu okukala lya kola, shoka sha simana osho kutya otali vulu wo okumangululwa nuupu.

²⁰ Aantu oyendji kunena oya tala ko ondjokana yi li oshinima shopokathimbo. Ohaya hokana meendelelo taya dhiladhila kutya otaya gwanitha po oompumbwe dhawo, ihe ohaya dhiladhila wo kutya otaya ka vula okuhengathana ngele opwa holoka omaupyakadhi mondjokana yawo. Ihe dhimbulukwa eudhi lyomOmbiimbeli ndyoka tali popi ekwatathano pokati kookuume kopandjokana kutya olya fa ongodhi. Oongodhi ndhoka hadhi longithwa okuhila oothaila dhoosikepa odha kola lela noihadhi hwahunuka, nokuli nonando oku kale oshikungulu oshidhigu. Ondjokana nayo oya totwa po nelalakano lyokukalelela. Dhimbulukwa kutya Jesus okwa ti: “Shono Kalunga e shi tula kumwe, inashi kuthwa kumwe komuntu.” (Mat. 19:6) Ngele owa hokana owu na okukala wu na etaloko lya fa ndyoka shi na ko nasha nondjokana. Mbela okutala ko ondjokana pamukalo nguka otaku yi ningi yi kale omutengi? Hasho nando.

21. Omusamane nomukulukadhi oya pumbwa okukala ye ninathane iikala yini, noshike tashi vulu oku ya kwathela oku shi ninga?

²¹ Aaihokani oya pumbwa okukala ye ninathane etaloko ewanawa.  Ngele kehe gumwe okwa kambadhala okukala ha tala komaukwatya omawanawa gakuume ke kopandjokana nokoonkambadhala dhe, ondjokana yawo otayi ke ye etela enyanyu nembilipalelo. Mbela otashi wapa ngaa omuntu a kale e na etaloko ewanawa lyakuume kopandjokana ngoka inaa gwanenena? Jehova oku shi kutya inatu gwanenena, ihe nando ongaaka, otu na einekelo kutya oha ndhindhilike nokupandula omaukwatya getu omawanawa. Omupisalomi okwa pula a ti: “OMUWA, ngele to kala nokudhimbulukwa oondjo, olye ta vulu okukala po?” (Eps. 130:3) Sha faathana, aaihokani oya pumbwa okukala ye na etaloko ewanawa  li na ko nasha nookuume kawo kopandjokana nosho wo okukala ye na iikala yokudhiminathana po. — Lesha Aakolossa 3:13.

22, 23. Abraham naSara oya tulila po aaihokani yokunena oshiholelwa oshiwanawa shini?

²² Ondjokana otayi vulu okweetela aaihokani omalaleko nuuyamba ogendji ngele tayi kala po uule woomvula odhindji. Ombiimbeli oya popya shi na ko nasha nondjokana yaAbraham naSara sho ya li aakulupe. Onkalamwenyo yawo nayo oya li yi na omaupyakadhi. Dhiladhila owala kunkene Sara ngoka tashi vulika a li e na oomvula 60 nasha a li e uvite sho a li e na okuthiga po egumbo lye lyuuzeko moshilando sha hepuluka shaUr noku ka kala momatsali onkalamwenyo ye ayihe. Ihe nando ongaaka, okwa li a vulika kuukwamutse womusamane gwe. E li omukwathi gwaAbraham to opalele, okwa li a yambidhidha nesimaneko omatokolo ge. Okwa li ha vulika lela tashi zi komutima. Okwa li hi ithana omusamane gwe omuwa gwe nokuli “momwenyo gwe.” (Gen. 18:12, NW; 1 Pet. 3:6) Okwa li ha simaneke Abraham tashi zi komutima.

²³ Shika itashi ti kutya Abraham naSara oya li haya tsu kumwe aluhe moshinima kehe. Oshikando shimwe Sara okwa li a ningi eetopo ndyoka lya li lya “ningitha Abraham omwenyo omwiinayi.” Ihe nando ongaaka, Abraham okwa li a pulakene neifupipiko kuSara, ngaashi Jehova a li e mu lombwele, naashoka oshe ke etela uukwanegumbo wawo omalaleko nuuyamba. (Gen. 21:9-13) Aasamane naakulukadhi kunena otaya vulu okwiilonga oshindji kaaihokani mboka aatilikalunga, kashi na nduno mbudhi kutya oya kala ya hokana uule woomvula dhi thike peni.

24. Oondjokana dhini hadhi simanekitha Jehova Kalunga, nomolwashike?

²⁴ Megongalo lyopaKriste kunena moka oondjokana omayuvi ogendji tadhi pondola, aakulukadhi ohaya simaneke aasamane yawo, naasamane oye hole aakulukadhi yawo nohaye ya simaneke, naayehe yaali oya pititha komeho okulonga ehalo lyaJehova mukehe shimwe taya ningi. Ngele owa tokola okuhokana, konga kuume kopandjokana noondunge, ilongekidhila nawa ondjokana e to kambadhala okukala nondjokana yi na ombili noyi na ohole, opo yi kale tayi simanekitha Jehova Kalunga. Kungawo, ondjokana yeni otayi ke mu kwathela lela mu ikaleke mohole yaKalunga.