Jehova okwa tegelela aaihokani ya kale ya dhiginina egano lyawo lyondjokana. Sho a hanganitha omulumentu nomukiintu gwotango mondjokana, okwa ti: ‘Omulumentu ota kwatathana nomukadhi, oyo notaa ningi onyama yimwe.’ Konima yethimbo Jesus Kristus okwa li e endulula oohapu ndhoka e ta gwedha ko a ti: “Ano shono Kalunga e shi tula kumwe, inashi kuthwa kumwe komuntu.” (Gen. 2:24; Mat. 19:3-6) Omolwetompelo ndyoka, Jehova naJesus oya tala ko ondjokana kutya oyi li euvathano lyaaluhe nohali hulu owala ngele gumwe gwomaaihokani a si. (1 Kor. 7:39) Molwaashoka ondjokana oshinima oshiyapuki oku yi teya kaku na okutalika ko ku li oshinima sha nathangwa. Jehova oku tonde okuteya ondjokana nopwaahe na etompelo lyOpamanyolo. — Mal. 2:15, 16.

 Omolwetompelo lini lyopamanyolo aaihokani taya vulu okuteya ondjokana? Jehova oku tonde okuteya ondjokana nosho wo oluhondelo. (Gen. 39:9; 2 Sam. 11:26, 27; Eps. 51:4) Oluhondelo okwe lu tala ko lwa nyata noonkondo nokwa pitika ondjokana yi teke ngele gumwe gwomaaihokani e shi ningi. (Kombinga yuuyelele kutya oluhondelo oshike, tala ontopolwa 9, okatendo 7.) Jehova okwa pa kuume kopandjokana ngoka kee na ondjo uuthemba a hogolole ngele ota kala mondjokana nenge ote yi teya. (Mat. 19:9) Jehova ita ka tonda okuteya ondjokana hoka ngele kuume ngoka kee na ondjo osho a tokola. Ihe egongalo lyopaKriste ihali ladhipike nando omuntu a teye ondjokana. Opu na oonkalo dhimwe ndhoka hadhi ningitha kuume ngoka kee na ondjo a kale mondjokana, unene tuu ngele kuume ngoka e na ondjo okwi iyela ombedhi nomutima aguhe. Ihe lwahugunina mboka ye na etompelo lyopamanyolo okuteya ondjokana oye na okuninga etokolo nokukala yi ilongekidhila iilanduliko ayihe mbyoka tayi ya. — Gal. 6:5.

Opwa li pu na oonkalo dhontumba moka Aakriste yamwe ya li ye wete taya thiminikwa noonkondo e taya tokola okutopoka nenge okuteya ondjokana, nonando kuume ina ya moluhondelo. Moshinima shoka, Ombiimbeli otayi ti kutya ngoka a thiga po mukwawo “oku na okukala itaa yi we moondjokana nenge a hangane ishewe” nakuume ke kopandjokana. (1 Kor. 7:11) Omukriste ngoka ina manguluka okuhokanununa nenge okuhokanununwa. (Mat. 5:32) Tala oonkalo oondhigu dhontumba ndhoka dha ningitha yamwe ya thige po oondjokana nenge ya topoke paveta (nando kashi li pamanyolo).

Uuna omulumentu inaa hala okusila oshimpwiyu uukwanegumbo we. Uukwanegumbo otawu vulu okukala wa hepa noonkondo nokawu na iipumbiwa yakehe esiku, molwaashoka omulumentu ihe wu sile oshimpwiyu, nonando ota vulu oku shi ninga. Ombiimbeli otayi ti: ‘Ngele opu na omuntu ngoka itaa sile oshimpwiyu aanegumbo lye, oye okwi idhimbike eitaalo nomwiinayi e vulike komupagani.’ (1 Tim. 5:8) Ngele omulumentu ngono ina hala okulundulula omikalo dhe, omukulukadhi oku na okutokola ngele okwa pumbwa okugamena onkalonawa ye nosho wo yaanona ye mokuteya ondjokana paveta (nonando kashi li  pamanyolo) nenge okukatuka onkatu yimwe yopaveta. Aakuluntugongalo oye na lela okukonakona nawa epopyo kutya omulumentu Omukriste ina hala okusila oshimpwiyu uukwanegumbo we. Omuntu ota vulu okukondwa ngele ina hala okusila oshimpwiyu uukwanegumbo we.

Ehepeko lyopalutu lya kwata miiti. Kuume kopandjokana otashi vulika a kale e na onyanya noonkondo shoka tashi tula uukolele wakuume ke nonkalamwenyo ye moshiponga nokuli. Aakuluntugongalo oye na okukonakona oshinima shoka ngele kuume kopandjokana ngoka ta hepeke mukwawo oku li Omukriste. Omuntu ota vulu okukondwa ngele oha geye sha pitilila noha longitha oonkondo. — Gal. 5:19-21.

Ngele uupambepo we wu li moshiponga. Kuume kopandjokana otashi vulika e shi ninge oshidhigu kumukwawo okulongela Jehova nenge otashi vulika e mu thiminike a yone iipango yaJehova momukalo gwontumba. Moshinima sha tya ngaaka, kuume kopandjokana ngoka e li moshiponga ota vulu okutokola a konge ombapila yopaveta yokutopoka, shoka tashi vulu oku mu kwathela a kale ta ‘vulika kuKalunga, ihe hakaantu.’ — Iil. 5:29.

Kapu na ngoka e na okuthiminika kuume ngoka kee na ondjo opo ya topoke nenge ya tsikile nondjokana moonkalo adhihe ndhoka oondhigu twa zi nokukundathana. Nonando Aakriste mboka ya pyokoka naakuluntugongalo otaya vulu okukwathela nokugandja omayele gopaMbiimbeli, itaya vulu okutseya onkalo ayihe ndjoka yi li pokati kaaihokani mboka. Jehova oye owala e shi shi. Odhoshili kutya omukiintu nenge omulumentu Omukriste ita simaneke Kalunga nosho wo elongekidho lyondjokana ngele ota gwedhele oohapu shi na ko nasha nonkalo yuupyakadhi we molwaashoka a hala owala ya topoke. Jehova oku wete oompangela dhiineya adhihe dhi na ko nasha nokutopoka, nonando omuntu ota kambadhala e dhi holeke. Osha yela kutya “kehe shimwe shomeshito oshi li puuyelele montaneho yaKalunga, ngoka tu na oku ke mu hokololela ayihe mbyoka twe yi ninga.” (Heb. 4:13) Ihe ngele onkalo ondhigu otayi tsikile ethimbo ele, kapu na ngoka e na okupa uusama Omukriste ngoka a thiki pehulithodhiladhilo ya topoke. Lwahugunina, natu tseye kutya “atuhe otatu ka thikama koshipala shaKalunga, tu pangulwe kuye.” — Rom. 14:10-12.