1. Oshike Jesus a li a tsu omuthindo muusiku we wahugunina sho a li kombanda yevi?

JESUS muusiku we wahugunina kombanda yevi e li omuntu, okwa li u ulike kutya oti ipula unene nonkalonawa yaalanduli ye. Okwa li nokuli a galikana He kombinga yaashoka, a ti: “Itandi ku indile, u ya kuthe mo muuyuni, ihe otandi ku indile, u ya gamene kuMwiinayi. Ngashika ngame ndaa shi gwomuuyuni, osho wo nayo kaye shi yomuuyuni.” (Joh. 17:15, 16) Megalikano ndika lya za komutima, Jesus okwa li u ulike kutya oku hole unene aalanduli ye nokwa li wo u ulike esimano lyoohapu ndhoka a li a popi nale nayamwe yomuyo ongulohi oyo tuu ndjoka tadhi ti: ‘One mwaa shi yomuuyuni.’ (Joh. 15:19, OB-1954) Shika inashi yela tuu kutya Jesus okwa li a hala lela aalanduli ye ya kale ya yooloka ko kuuyuni!

2. Uutumbulilo ‘uuyuni’ mboka wa longithwa kuJesus otawu ulike kushike?

² Uutumbulilo ‘uuyuni’ mboka wa longithwa kuJesus otawu ulike kaantu ayehe mboka yi iteka Kalunga, taya pangelwa kuSatana noya pikwa kombepo ye yokwiihola noyuuntsa. (Joh. 14:30; Ef. 2:2; 1 Joh. 5:19) Okukala tu na ‘uukuume nuuyuni mboka oko okutonda Kalunga.’ (Jak. 4:4) Ongiini ayehe mboka ya hala okwiikaleka mohole yaKalunga taya vulu okukala muuyuni ihe oya yooloka ko kuwo? Otatu ka tala komikalo ntano moka tatu vulu oku shi ninga: omokukala tu li aadhiginini kUukwaniilwa waKalunga mboka wu li mepangelo lyaKristus nokukala ihaatu kutha ombinga moopolotika dhuuyuni, mokukondjitha ombepo yuuyuni, mokukala hatu zala nokwiiyopaleka nawa momukalo gu shi okutalwa, mokukala tu na onkalamwenyo yanathangwa nosho wo mokwiihomateka iikondjitho yopambepo.

3. (a) Jesus okwa li a tala ko ngiini opolotika pethimbo lye? (b) Omolwashike taku vulu okutiwa kutya aalanduli yaJesus aagwayekwa oye li aakalelipo? (Kwatela mo enyolo lyopevi.)

³ Jesus pehala lyokukutha ombinga miinima yopapolotika yopethimbo lye, okwa li a gandja eitulomo kokuuvitha Oshilongo nenge Uukwaniilwa waKalunga, epangelo lyomegulu lyomonakuyiwa ndyoka oye ta ka kala Omukwaniilwa gwalyo. (Dan. 7:13, 14; Luk. 4:43; 17:20, 21) Nomolwaashono sho Jesus a li koshipala shomupangeli gwaRoma, Pontius Pilatus, okwa ti: “Uukwaniilwa wandje kau shi womuuyuni mbuka.” (Joh. 18:36) Aalanduli ye aadhiginini oya li ya landula oshiholelwa she mokukala aadhiginini kuye nokUukwaniilwa we nosho wo mokuuvithila uuyuni Uukwaniilwa mboka. (Mat. 24:14) Omuyapostoli Paulus okwa nyola a ti: “Otse [aakalelipo, NW] yaKristus. . . . Peha lyaKristus otatu mú indile, mu hanganithwe naKalunga.” * — 2 Kor. 5:20.

4. Aakriste yashili ayehe ohayu ulike ngiini uudhiginini wawo kUukwaniilwa waKalunga? (Tala oshimpungu “ Aakriste yonale kaya li haya kutha ombinga miinima yopapolotika.”)

⁴ Molwaashoka aakalelipo oye lile po epangelo lyawo miilongo yilwe, ihaya kutha ombinga miinima yopapolotika yomoshilongo moka taya longele. Ihe ohaya yambidhidha iinima yepangelo lyawo ndyoka ye lile po moshilongo shoka ye li. Aalanduli yaKristus aagwayekwa mboka ye na ‘uukwashilongo megulu’ nayo osho haya ningi. (Fil. 3:20) Omolwokuuvitha kwawo nuulaadhi Uukwaniilwa, oya vula okukwathela “oonzi dhilwe” omamiliyona dhaKristus dhi ‘hangane naKalunga.’ (Joh. 10:16, OB-1954; Mat. 25:31-40) Oonzi dhilwe ndhoka otadhi yambidhidha aamwahe yaKristus aagwayekwa dhi li aalongi pamwe nayo. Aagwayekwa noonzi dhilwe mboka ye li oshigunda shimwe sha hangana mokuuvitha Uukwaniilwa wopaMesiasa,  ihaya kutha nandonando ombinga miinima yopapolotika yomuuyuni. — Lesha Jesaja 2:2-4.

5. Egongalo lyopaKriste olya yooloka ko ngiini kuIsraeli shonale, nomomukalo guni Aakriste haye shi ulike?

⁵ Okukala aadhiginini kuKristus hako owala haku ningitha  Aakriste yashili ya kale ihaaya kutha ombinga miinima yopapolotika. Mepingathano naIsraeli shonale shoka sha li sha pewa oshilongo kuKalunga, tse otu li uumwayinathana wopaigwana. (Mat. 28:19; 1 Pet. 2:9) Onkee ano, ngele otwa yambidhidha oongundu dhopapolotika ndhoka dhi li miilongo moka tu li, otatu yono po emanguluko lyetu lyokuuvitha etumwalaka lyUukwaniilwa nosho wo uukumwe wetu wopaKriste. (1 Kor. 1:10) Niishewe, ngele opwa holoka iita, otatu ka kondjitha ooitaali ooyakwetu mboka twa pewa oshipango tu kale tu ya hole. (Joh. 13:34, 35; 1 Joh. 3:10-12) Ano, omolwetompelo ewanawa Jesus a li a lombwele aalongwa ye kaaya kondje. Okwa li wo e ya lombwele ya kale ye hole aatondi yawo. — Mat. 5:44; 26:52; tala oshimpungu “ Mbela ondi li ngaa ihaandi kutha ombinga miinima yopapolotika?”

6. Okwiiyapulila kwoye Kalunga ohaku gumu ngiini ekwatathano lyoye nomupangeli?

⁶ Tu li Aakriste yashili, inatu iyapulila omuntu gwontumba, ehangano lyopantu nenge oshigwana shontumba, ihe oKalunga. Aakorinto yotango 6:19, 20 otaya ti: “Kamu shi yeni yene, ihe oyaKalunga. Kalunga okwe mú kulile niikulila yi na ondilo.” Onkee ano, nonando aalanduli yaJesus ohaya gandja shoka shi na okupewa “omupangeli,” ngaashi esimaneko, okufuta iifendela nosho wo okuvulika pandjele, ohaya pe ‘Kalunga shoka she.’ (Mark. 12:17; Rom. 13:1-7) Shoka shaKalunga osha kwatela mo oku mu longela, okukala ye mu hole nomutima aguhe nokuvulika kuye nuudhiginini. Ohaya kala yi ilongekidha okusa omolwaKalunga ngele osha pumbiwa. — Luk. 4:8; 10:27; lesha Iilonga 5:29; Aaroma 14:8.

7, 8. ‘Ombepo yuuyuni’ oshike, nohayi “pangele” ngiini maantu mboka ihaaya vulika?

⁷ Omukalo gumwe moka Aakriste haya kala ya yooloka ko kuuyuni ogwo okukondjitha ombepo yuuyuni ombwinayi. Paulus okwa nyola a ti: “Tse inatu pewa ombepo yuuyuni mbuka, ihe otwa pewa Ombepo ya zi kuKalunga.” (1 Kor. 2:12) Okwa li a lombwele Aaefeso a ti: “Pethimbo ndiyaka omwa landula  oondjila dhuuyuni mbuka. Omwa vulika komupangeli gwoonkondo dhombepo yomewangandjo, ombepo ndjoka tayi pangele ngashingeyi aantu mboka ihaa vulika kuKalunga.” — Ef. 2:2, 3.

⁸ “Ombepo” yuuyuni oyo ombepo ihaayi monika ndjoka hayi inyengitha aantu ya kale ihaaya vulika kuKalunga nokuhumitha komeho “uuhalu wopantu okuhola mbyoka aantu taye yi tala.” (1 Joh. 2:16; 1 Tim. 6:9, 10) Ombepo ndjika oyi na “oonkondo” molwaashoka oyi holike kaantu inaaya gwanenena, oyi na omakoto noyi li apuhe. Ohayi “pangele” wo maantu mboka ihaaya vulika mokukokeka muyo kashona nakashona omaukwatya kaage shi gopakalunga, ngaashi okwiihola mwene, uuntsa, okulalakanena esimano negamo lyokwiitulila po omakotampango gopamikalo nosho wo ombepo yuunashipotha. * Oku shi popya paunathangwa, ombepo yuuyuni ohayi kokeke kashona nakashona omaukwatya gOndiaboli momitima dhaantu. — Joh. 8:44; Iil. 13:10; 1 Joh. 3:8, 10.

9. Omomikalo dhini ombepo yuuyuni tayi vulu okuya momadhiladhilo nomomitima dhetu?

⁹ Mbela ombepo yuuyuni otayi vulu okumena omidhi momadhiladhilo nomomutima gwoye? Osho naanaa, ihe ongele owala inoo shi tonatela. (Lesha Omayeletumbulo 4:23.) Enwethomo lyayo olundji ohali tameke nekoto, tashi vulika okupitila mookuume mboka taya monika ya fa ye na omikalo omiwanawa, ihe paulela kaye hole Jehova. (Omayel. 13:20; 1 Kor. 15:33) Omuntu oto vulu wo okunwethwa mo kombepo yuuyuni okupitila mokulesha iileshomwa inaayi yogoka, mokutala omathano giipala nenge okulesha uuyelele waashunimonima ko-Internet, okupitila momainyanyudho inaaga yogoka nomomaudhano moka aantu ye na ombepo yokuthigathana po. Odhoshili kutya oto vulu okunwethwa mo okupitila momuntu kehe nenge moshinima kehe shoka tashi humitha komeho omadhiladhilo gaSatana nenge onkalelo ye.

10. Ongiini tatu vulu okukondjitha ombepo yuuyuni?

 ¹⁰ Ongiini tatu vulu okukondjitha ombepo yuuyuni ndjoka ya nika oshiponga nokwiikaleka mohole yaKalunga? Omokulongitha owala omasiloshimpwiyu agehe gaJehova gopambepo nosho wo mokugalikana aluhe kuye e tu pe ombepo ondjapuki. Jehova omunene e vule kokule Ondiaboli nenge uuyuni wa kolokosha mboka wu li mepangelo lyaSatana. (1 Joh. 4:4) Onkee ano, osha simana noonkondo okukala aluhe popepi naJehova okupitila megalikano.

11. Ombepo yuuyuni oya nwetha mo ngiini omukalo gwaantu gwokuzala?

¹¹ Omukalo gwomuntu gwokuzala, okwiiyopaleka kwe nosho wo uuyogoki we ohayi ulike kutya okwa nwethwa mo kombepo yini. Miilongo oyindji aantu ohaya zala nayi noonkondo, nomolwaashono omukundaneki gumwe gwoko-TV a popi kutya masiku omuntu ito ka yoolola we pokati koombwanda naamboka kaaye shi oombwanda. Nokuli naanona yaakadhona mboka inaaya adha natango oomvula omulongo nasha oya nwethwa mo kiikala mbika. Oshifokundaneki shimwe osha ti kutya ohaya “zala oonguwo hadhi imonikila nokadhi shi okutalwa.” Niishewe, yamwe ohaya zala omizalo dha hwalunguta ndhoka tadhi ulike ombepo yuunashipotha noyokwiishundula.

12, 13. Omakotampango geni ge na oku tu wilika mokuzala nomokwiiyopaleka kwetu?

¹² Tu li aapiya yaJehova oshu uka okukala twa hala okukala tatu monika nawa, sha hala okutya, twa zala oonguwo dho opala, dha yela nodhe eleka monkalo moka tu li. Eholokopo lyetu nali kale aluhe tali ulike kutya ohatu zala “oonguwo dhi shi okutalwa nodha yogoka” pamwe ‘niilonga iiwanawa’ ngaashi sho opalela kehe gumwe, kutya nduno omulumentu nenge omukiintu ‘ngoka ti ihokolola kutya oye nakutila Kalunga.’ Shoka sha simanenena osho ‘okwiikaleka mohole yaKalunga,’ ihe hakugandja eitulomo kutse yene. (1 Tim. 2:9, 10, yelekanitha OB-1954; Jud. 21) Otwa hala eopalo lyetu li kale “ndyoka lyomeni . . . ndyoka li na oshilonga oshinene koshipala shaKalunga.” — 1 Pet. 3:3, 4.

¹³ Natu dhimbulukweni wo kutya omukalo gwetu gwokuzala nogwokwiiyopaleka otagu vulu okunwetha mo etaloko lyayalwe shi na ko nasha nelongelokalunga lyashili. Uutumbulilo wOshigreka mboka wa tolokwa “dhi shi okutalwa,” ngele owa longithwa meityo li na ko nasha nomikalo, otawu gandja edhiladhilo lyokukala nesimaneko nosho wo etilosimaneko lyokusimaneka omaiyuvo nenge omataloko gayalwe. Onkee  ano, otu na okukala twa simaneka omaiyuvo gayalwe komeho yuuthemba mboka tu na wokuzala ngaashi twa hala. Komeho gaayihe, otwa hala okusimaneka Jehova nosho wo oshigwana she nokuulika kutya otu li aakalele ye, mokulonga ‘ayihe noku mu simanekitha.’ — 1 Kor. 4:9; 10:31; 2 Kor. 6:3, 4; 7:1.

14. Otu na okwiipula omapulo geni shi na ko nasha neholokopo lyetu nuuyogoki?

¹⁴ Okuzala nokwiiyopaleka kwetu nosho wo uuyogoki wetu oya simanenena nokuli ngele tu li miilonga yomomapya nenge tatu yi kokugongala kwopaKriste. Ipula to ti: ‘Mbela okuholoka po kwandje nosho wo uuyogoki wandje otawu ukitha unene eitulomo kungame? Mbela eholoko po lyandje ohali sitha yamwe ohoni? Mbela ondi wete uuthemba wandje wu na ko nasha niinima mbika wa simana unene shi vulithe okukala nda gwana okupewa iinakugwanithwa megongalo.’ — Eps. 68:6; Fil. 4:5, NW; 1 Pet. 5:6.

15. Omolwashike Oohapu dhaKalunga inaadhi tula po oompango dhokondandalunde dhi na ko nasha nokuzala nokwiiyopaleka nosho wo uuyogoki?

¹⁵ Ombiimbeli inayi tulila po Aakriste oompango dhokondandalunde dhi na ko nasha nokuzala nokwiiyopaleka nosho wo nuuyogoki. Jehova ina hala oku tu keelela emanguluko lyokuninga omatokolo nenge lyokulongitha omadhiladhilo getu. Pehala lyaashono, okwa hala tu kale twa pyokoka, hatu dhiladhila omakotampango gOmbiimbeli notwi “igilila okuyoolola shoka shu uka nenge sha puka.” (Heb. 5:14) Komeho gaayihe, okwa  hala tu kale hatu wilikwa kohole yoku mu hola nosho wo yokuhola aantu ooyakwetu. (Lesha Markus 12:30, 31.) Ngele tatu landula omakotampango ngoka, otatu ka kala tu na ompito okuzala nokwiiyopaleka pamikalo dhi ili nodhi ili. Shika otashi ulikwa komizalo dhomalwaala gi ili nogi ili ndhoka oshigwana shaJehova hashi zala, kashi na nduno mbudhi kutya osha gongala peni kombanda yevi.

16. Ombepo yuuyuni oya yooloka ko ngiini komalongo gaJesus, nomapulo geni tu na okwiipula?

¹⁶ Ombepo yuuyuni ohayi pukitha nohayi inyengitha aantu omamiliyona ya konge enyanyu okupitila miimaliwa nomiinima yopamaliko. Ihe Jesus okwa ti: “Okukalamwenyo kwomuntu kombanda yevi itaku lelepekwa kowindji weliko lye.” (Luk. 12:15) Nonando Jesus ina popya kutya okwa hala aantu ya kale tayi idhilike sha pitilila, okwa li e ya longo kutya omwenyo  nosho wo enyanyu lyashili ohayi monika kwaamboka “ya tseya ompumbwe yawo yopambepo” nohaya kaleke onkalamwenyo yawo yanathangwa, sha hala okutya, ohayu ukitha eitulomo lyawo kiinima yopambepo. (Mat. 5:3, NW; 6:22, 23, NW) Ipula to ti: ‘Mbela ondi itaala ngaa shili omalongo gaJesus nenge onda nwethwa mo “kuhe yiifundja”? (Joh. 8:44) Mbela oohapu dhandje, omalalakano gandje, iinima mbyoka nda pititha komeho nosho wo onkalamwenyo yandje ohayi ulike shike shi na ko nasha nangame?’ — Luk. 6:45; 21:34-36; 2 Joh. 6.

17. Tumbula omauwanawa gamwe ngoka taga nyanyukilwa kwaamboka ya ninga onkalamwenyo yawo yanathangwa.

¹⁷ Jesus okwa ti: “Uunongo wa hololwa owo u uka okiilonga yawo.” (Mat. 11:19, OB-1954) Tala owala omauwanawa gamwe ngoka taga nyanyukilwa kwaamboka ya ninga onkalamwenyo yawo yanathangwa. Ohaya mono etalaleko lyashili miilonga yUukwaniilwa. (Mat. 11:29, 30) Ohaya yanda iimpwiyu ya pitilila, nokungawo oyi igamena kuuwehame wopamadhiladhilo nowopamaiyuvo. (Lesha 1 Timoteus 6:9, 10.) Molwaashoka oya gwanenwa kiipumbiwa yonkalamwenyo, oye na ethimbo lya gwana okukala pamwe nomaukwanegumbo gawo nokweendathana nAakriste ooyakwawo. Shoka otashi vulu wo oku ya kwathela ya kale haya kotha nawa. (Omuuv. 5:12) Ohaya mono enyanyu enene ndyoka hali zi mokugandja momukalo kehe ngoka taya vulu oku shi ninga. (Iil. 20:35) Oye na wo ‘etegameno’ nosho wo ombili yokomutima noya gwanenwa. (Rom. 15:13; Mat. 6:31, 32) Omalaleko nuuyamba ngaka oge na shili ondilo kaayi shi okuyelekwa nasha.

18. Ombiimbeli otayi hokolola ngiini omutondi gwetu, omikalo dhe nekondjo ndyoka tatu ‘kondjo’?

¹⁸ Mboka hayi ikaleke mohole yaKalunga oya gamenwa wo pambepo koonkambadhala dhaSatana ngoka a hala okukutha po enyanyu lyawo noku yi imba ya mone omwenyo gwaaluhe. (1 Pet. 5:8) Paulus okwa ti: “Itatu kondjitha aantu, ihe otatu kondjitha oonkondo dhomombepo, aanankondo yuuyuni mbuka womilema nosho wo oonkondo dhuuwinayi mewangandjo.”  (Ef. 6:12) Oshitya “kondjitha” otashi gandja edhiladhilo kutya itatu kondjitha oshinima shi li kokule natse, shi li ando mehala lyomeholamo, oku shi popya pathaneko, ihe oshi li putse. Niishewe, omautumbulilo “oonkondo dhomombepo,” “aanankondo yuuyuni” nosho wo “oonkondo dhuuwinayi” otagu ulike kutya omaponokelo ngoka haga zi mehala moka hamu kala iishitwa yopambepo ogu unganekwa nohaga ningilwa owina.

19. Hokolola iikondjitho yopambepo yOmukriste.

¹⁹ Nonando tse aantu otu na omaunkundi nomangambeko, otatu vulu okusindana mekondjo ndyoka. Ngiini mbela? Omokwiihomateka ‘iikondjitho ayihe mbyoka Kalunga te tu pe.’ (Ef. 6:13) Aaefeso 6:14-18 otaya hokolola iikondjitho mbyoka taya ti: “Kaleni ano omuthika mwi ilongekidha; zaleni oshili, yi ninge epaya moombunda dheni. Izalekeni uuyuuki, u ninge ehuuyanza poontulo dheni. Kaleni mwi ilongekidha okuuvitha elaka etoye lyombili, li kale oongaku dhokoompadhi dheni. Ethimbo alihe zaleni eitaalo ongehuuyanza, opo mu wape okudhima nalyo iikuti ayihe ya hwama omulilo mbyoka tayi umbwa kuMwiinayi. Taambeni ehupitho, li ninge ongegala lyosheela, noohapu dhaKalunga ongegongamwele, ndyoka Ombepo te li mú pe. Mbika ayihe yi longeni negalikano okwiindila ekwatho lyaKalunga. Galikaneni aluhe [mOmbepo, OB-1954].”

20. Onkalo yetu oya yooloka ko ngiini kwaandjoka yomukwiita gwolela?

²⁰ Molwaashoka iikondjitho yopambepo oyi li esiloshimpwiyu lya za kuKalunga, otayi ke tu gamena thiluthilu, shampa owala tatu kala twe yi zala ethimbo kehe. Mepingathano naakwiita yolela mboka hashi vulika pu pite ethimbo ele inaaya kondja, Aakriste oye li miita kaayi na oluthuwo tayi pula omwenyo nenge eso, mbyoka tayi ka hula po owala ngele Kalunga a hanagula po uuyuni waSatana nokutula iishitwa ayihe yopambepo iikolokoshi molumbogo. (Eh. 12:17; 20:1-3) Onkee ano, ino teka omukumo ngele oto kondjitha uunkundi nenge omahalo gontumba ga puka, molwaashoka atuheni otu na ‘okudhenga omalutu getu’ opo tu vule okukala aadhiginini kuJehova. (1 Kor. 9:27) Ano otu na okukala tatu ipula ngele itatu kondjo.

21. Ongiini tatu vulu okusindana mekondjo lyetu lyopambepo?

²¹ Kakele kaashono, itatu vulu okusindana mekondjo lyetu  lyopambepo koonkondo dhetu yene. Onkee ano, Paulus okwe tu dhimbulukitha kutya otwa pumbwa okugalikana kuJehova “aluhe mOmbepo.” Ihe otu na wo okukala hatu pulakene kuJehova mokukonakona Oohapu dhe nokukala hatu endathana ‘naakwiita’ ooyakwetu ethimbo kehe, molwaashoka itatu kondjo otse atuke. (Filem. 2; Heb. 10:24, 25) Mboka ye li aadhiginini miinima ayihe mbika itaya ka sindana owala, ihe otaya ka kala wo taya vulu okupopila eitaalo lyawo nuulaadhi ngele tali makelwa.

22, 23. (a) Omolwashike tu na okukala twi ilongekidha ethimbo kehe okupopila eitaalo lyetu, nomapulo geni tu na okwiipula? (b) Oshike tatu ka kundathana montopolwa tayi landula?

²² ‘One mwaa shi yomuuyuni, onkee uuyuni tau mú tondo,’ Jesus osho a ti. (Joh. 15:19, OB-1954) Onkee ano, Aakriste oye na aluhe okukala yi ilongekidha okupopila eitaalo lyawo noye na oku shi ninga momukalo gwesimaneko nogwombili. (Lesha 1 Petrus 3:15.) Ipula to ti: ‘Mbela ondi uvite ko ngaa kutya omolwashike Oonzapo dhaJehova omathimbo gamwe hadhi katuka oonkatu itaadhi tsu kumwe nomadhiladhilo ngoka ge holike kaantu oyendji muuyuni? Uuna nda ya monkalo ndjika ondhigu tayi pula ndi ninge ngawo, mbela ondi itaala ngaa thiluthilu kutya shoka tashi popiwa kOmbiimbeli nokomupiya omudhiginini oshi li mondjila? (Mat. 24:45, NW; Joh. 17:17) Uuna tashi ya pokulonga shoka shu uka koshipala shaJehova, mbela ondi ilongekidha ngaa okukala nda yooloka ko kuuyuni nondi uvite wo uuntsa sho nda yooloka ko kuwo?’ — Eps. 34:2; Mat. 10:32, 33.

²³ Nonando otwa hala okukala twa yooloka ko kuuyuni, olundji ohatu makelwa momikalo dhiineya. Pashiholelwa, ngaashi sha kundathanwa nale, Ondiaboli ohayi kambadhala okuhekela aapiya yaJehova muuyuni okupitila momainyanyudho guuyuni. Ongiini tatu vulu okuhogolola omainyanyudho ga yogoka ngoka tage ke tu thiga twa talalelwa notu na eiyuvo lya yela? Shika otashi ka kundathanwa montopolwa tayi landula.