Atuhe otu na okuhogolola: Ngele otatu longele Jehova nenge otatu longele Satana noompwidhuli dhe. Itatu vulu okulongela ayehe. Okulongela Jehova kashi li tuu pandunge!

Ngaashi twe shi mono, oompwidhuli ohadhi nyanyukilwa okweehameka nokupukitha aantu. Jehova ye hasho e li ngaaka. Ye oku hole aantu ngaashi tate e hole aanona ye. Oye Omugandji ‘gwoshipewa kehe oshiwanawa nomagano ga gwana.’ (Jakob 1:17) Iha holeke aantu sha oshiwanawa, nonando onashi mu pule oshindji.—Aaefeso 2:4-7.

Dhiladhila kiinima mbyoka ya longwa kombanda yevi kuJesus, Omwana gwaKalunga. Okwa thitulula aathitamawi e ta tonatitha aaposi. Okwa aludha aanashilundu niilema. Okwa tidha mo oompwidhuli e ta aludha uuvu woludhi kehe. Jesus okwa yumudha nokuli aasi koonkondo dhaKalunga.—Mateus 9:32-35; 15:30, 31; Lukas 7:11-15.

Pehala lyokupopya iifundja e tu pukithe, Jehova oha popi aluhe oshili. Iha pukitha nando ogumwe.—Numeri 23:19.

Ngaashi owala ongodhi yewiiwili ya yula ondhi, aantu omamiliyona ogendji oya yulwa kiidhila nokiifundja. Yo ohaya tila oonakusa. Ohaya tila oompwidhuli. Ohayi ipula shi na sha nomathingo, iipo niiketi. Oya mangwa komaitaalo nokomithigululwakalo dha kankamena kiifundja yaSatana Ondiaboli. Aapiya yaKalunga inaya yulwa nando okushimwe shomiinima mbika.

Jehova omunankondo unene e vule Satana. Ngele oto longele Jehova, ye ote ke ku gamena koompwidhuli. (Jakob 4:7) Omathingo itage ku ningi sha. Pashiholelwa, muNigeria, oonganga ndatu dhi na oonkondo odha thingi Onzapo yaJehova yi se molwashoka ya tindi okuza moshilando. Sho omathingo inaaga pondola sha, yimwe yomoonganga oya li ya tila, oya yi kOnzapo e tayi indile yi silwe ohenda.

Ngele oompwidhuli tadhi ku ningile nayi, oto vulu okwiithana edhina lyaJehova note ku gamene. (Omayeletumbulo 18:10) Ihe opo u kale megameno lyaKalunga, ou na okumanguluka ko thilu kukehe shimwe shi na sha nuumpulile nomagalikano goompwidhuli. Aagalikani yaKalunga yomuEfeso shonale osho ya ningi. Oya gongele omambo gawo agehe guumpulile e taye ga fike po. (Iilonga 19:19, 20) Aapiya yaKalunga yonena oye na okuninga sha faathana. Ekelahi iiketi, oongodhi “dhokwiigamena,” omambo guumpulile nosho wo kehe shimwe shoka shi na ekwatathano nomikalo dhuumpulile.

Ngele owa hala okuhokiwa kuKalunga, inashi gwana okukala owala we etha po egalikano lyiifundja nokweetha po okulonga iinima iiwinayi. Ou na okwiitula mo shili megalikano lyashili. Ombimbeli otayi ulike shoka sha pumbiwa:

Satana noompwidhuli oye na aantu kombanda yevi mboka haya longo aantu iinima ya puka nohaye yi ningi wo. Ihe Jehova oku na wo oshigwana. Osho Oonzapo dhaJehova. (Jesaja 43:10, NW) Muuyuni auhe, omu na Oonzapo dhi vulithe pomamiliyona gane. Adhihe ohadhi kambadhala noonkondo okulonga iinima iiwanawa nohadhi longo aantu oshili. Miilongo oyindji, oto vulu oku dhi tsakaneka pOshinyanga shUukwaniilwa, mpoka tadhi ke ku hambelela nenyanyu.

Iilonga yadho oyo okukwathela yalwe ya longele Kalunga. Otadhi ka konakona nangoye Ombimbeli megumbo lyoye noku ku kwatha wi ilonge okugalikana Jehova momukalo gu uka. Ito futu sha moshinima shika. Oonzapo ohadhi nyanyukilwa okulonga oshili oshoka odhi hole aantu nodhi hole Jehova Kalunga.