Sho omwanamati gwaSakaria naElisabet, Johannes, a koko, okwa ningi omuhunganeki. Jehova okwe mu longitha u uvithile aantu kutya Mesiasa ote ya. Ihe pehala lyokuuvithila aantu moosinagoga nenge moondoolopa, Johannes okwe yu uvithile mombuga. Aantu oya zi kuJerusalem naapuhe muJudea taya yi kuJohannes e ke ya longe. Okwe ya longo kutya oye na okweetha po iilonga iiwinayi, ngele oya hala okuhokiwa kuKalunga. Konima sho ye mu pulakene, oya hempulula oondjo dhawo noyi itedhulula. Opo nduno Johannes okwe ya ninginitha momulonga gwaJordan.

Johannes ka li e na iinima oyindji monkalamwenyo. Okwa li ha zala onguwo yiifufu yongamelo noha li oombahu nomagadhi goonyushi. Aantu oya li ye mu kuminwa. Nokuli Aafarisayi nAasadukayi aanuntsa oya li ye ya kuye. Johannes okwe ya lombwele a ti: ‘Omwa pumbwa okulundulula oondjila dheni e tamu itedhulula. Inamu dhiladhila kutya omwa simana, molwaashoka owala hamu iti kutya ne oyana yaAbraham. Shoka itashi ti kutya ne oyana yaKalunga.’

Aantu oyendji oye ya kuJohannes noye mu pula ya ti: ‘Oshike tu na okuninga, opo tu hokiwe kuKalunga?’ Johannes okwa lombwele Aajuda mboka a ti: ‘Ngoka e na oohema mbali, na pe mukwawo ngoka kee na sha.’ Owu shi kutya omolwashike e ya lombwele ngawo? Okwa li a hala ya tseye kutya oye na okukala ye hole aantu ooyakwawo, opo ya hokiwe kuKalunga.

Johannes okwa lombwele aafendelithi a ti: ‘Kaleni aanashili, inamu kotokela nando omuntu.’ Okwa lombwele aakwiita a ti: ‘Inamu taamba oombumbo nenge mu popye iifundja.’

 Aayambi nAalevi nayo oyi ile kuJohannes noye mu pula taya ti: ‘Ongoye lye? Kehe gumwe okwa hala oku ku tseya.’ Johannes okwa ti: ‘Ongame ewi lyanakwiigidha mombuga, tandi kwathele aantu ya hedhe kuJehova, ngaashi Jesaja a hunganeke.’

Aantu oya li ye hole shoka Johannes te ya longo. Oyendji oya li tayi ipula ngele Johannes oye Mesiasa. Ihe Johannes okwa ti kuyo: ‘Opu na ngoka e vule ndje moonkondo te ya. Ngame inandi gwana nokuli okudhitula omiya dhoongaku dhe. Ngame otandi mu ninginitha nomeya, ihe ye ote mu ninginitha nombepo ondjapuki.’