Sho Josef a li mondholongo, Farao, omukwaniilwa gwaEgipiti, okwa yaguma oondjodhi, ihe kapwa li ngu ta vulu oku dhi fatulula. Omupiya gumwe okwa lombwele mwene gwe, Farao, kutya Josef ota vulu oku dhi fatulula. Farao okwa tumu nziya Josef a ka talwe.

Farao okwe mu pula a ti: ‘Oto vulu oku fatulula oondjodhi dhandje?’ Josef okwe mu lombwele omaityo gadho a ti: ‘Otaku ya omimvo heyali dheloolo muEgipiti alihe, konima yaandhika otaku ya omimvo heyali dhondjala yekomba. Hogolola ano omulumentu omunandunge e na owino, a gongele iilya opo aantu kaaya ka se kondjala.’ Farao okwe mu yamukula a ti: ‘Otandi ku langeke po, wu ninge omupangeli a landula ndje muEgipiti alihe.’ Olye a li a kwathele Josef a fatulule oondjodhi dhaFarao? Jehova oye e mu kwathele.

Josef okwa gongele iilya muule womimvo heyali. Konima yaashono, ondjala oye ya kombanda yevi alihe, ngaashi naanaa Josef a popile. Aantu oya li ya zi kiitopolwa yi ili noyi ili, ye ye ya lande iilya. Jakob, he yaJosef, oku uvu kutya kuEgipiti oku na iilya. Okwa ningi po shike? Okwa tumu ko oyanamati omulongo ya ka lande iilya.

Oyanamati yaJakob osho ya thiki muEgipiti. Josef okwe ya dhimbulula, ihe yo inaye mu dhimbulula. Oye mu inyongamene ngaashi naanaa Josef a yagumine, sho a li omushona. Josef okwa li a hala a tale ngele aamwahe oye na iikala yuutondwe natango. Okwa ti kuyo: ‘Ne oondaadhi. Omwe ya okutala ngele oshilongo osha nengena.’ Oya yamukula ya ti: ‘Aawe, tatekulu. Tse otwa za kuKaanan, atuhe kumwe otwa li aantu namumwayina tu li 12. Mukwetu gumwe okwa sa, nonkelo oyi li putate kegumbo.’ Opo ihe  Josef okwa ti: ‘Etelii ndje omumwanyoko onkelo, opo shi ninge ekoleko kutya omwa lombwela ndje oshili.’ Okuza mpono, aamwahe yaJosef oya shuna kegumbo kuhe.

Sho iikulya ya pu po, Jakob okwa tumu oyanamati kuEgipiti, ya ka lande iilya. Oshikando shino oya yi nonkelo yawo Benjamin. Josef okwa li a hala okuyeleka aamwahe. Okwa holeke oshitenga she shoshisiliveli mompunda yiilya yomumwayina Benjamin, e ta lundile aamwahe kutya oyo ye shi yaka po. Oya li ya haluka sho Josef a adha oshitenga she mompunda yaBenjamin. Oyi indile Josef opo e ya geele, pehala lyaBenjamin.

Shono osha kwathele Josef a mone kutya aamwahe oya lundulula iikala yawo. Josef ka li we ta vulu okwiidhimbika aamwahe. Onkee ano, okwa tameke okulila nokulililila. Okwa ti: “Ongame Josef. Tate oku na omwenyo natango?” Aamwahe oya li ya haluka noya kumwa noonkondo. Okwe ya lombwele a ti: ‘Inamu ninga omwenyo omwiinayi sho mwa landitha ndje po. Kalunga oye a tetekelitha ndje huka, opo a hupithe oomwenyo dheni. Endeleleni ano mu ye kutate, e tamu mu eta huka.’

Oya yi kegumbo kuhe, noye mu lombwele onkundana ombwaanawa kutya omwana, Josef, oku na omwenyo. Opo ihe ayehe oya tembukile kuEgipiti. Josef nahe, osho ya hangana ishewe konima yomimvo odhindji ndhoka ya kala ya topoka.