OSHITOPOLWA 4
Nkene Uukwaniilwa wa sindana — Okupopila evaangeli paveta
MANGA tamu uvithile aantu momagumbo, opo mu li po, omu uvite ohauto tayi ti wii-wii-wii nenge mu yi wete tayi ya tayi hingililwa. Sho to tameke okupopya nomunegumbo, mukweni ngoka tamu longo pamwe naye okwa tameke itaa landula we sho a mono embamba lyopolisi lyu uka kune. Mekambamba omwa zi omupolisi e te mu pula ta ti: “One ndishi tamu uvithile aantu momagumbo? Otwa lombwelwa kutya aantu otaya nyenyeta kombinga yeni.” Ihe omwe mu yamukula nombili kutya ne Oonzapo dhaJehova. Oshike tashi ka ningwa po?
Shoka oshi ikolelela unene kondjokonona yOonzapo dhaJehova moshilongo sheni. Mbela epangelo moshilongo sheni olya li lyu ungaunga ngiini nOonzapo dhaJehova omimvo dha piti? Mbela aantu moshilongo sheni oye na ngaa uuthemba wokulongela Kalunga ya manguluka? Ngele osho, otashi vulika omolwaashoka aamwatate ya li ya longo nuudhiginini oomvula dha piti ‘mokupopila nokukoleka evaangeli.’ (Fil. 1:7) Kutya nduno oho kala peni, otashi ka koleka eitaalo lyoye, ngele owa tedhatedha kombinga yiipotha mbyoka Oonzapo dhaJehova dha sindana mompangu. Moshitopolwa shika otatu ka kundathana yimwe yomiipotha. Iipotha mbyoka twa sindana otayi gandja uunzapo kutya Uukwaniilwa epangelo lyolela, molwaashoka katwa li tatu vulu okusindana kutse yene.
MOSHITOPOLWA SHIKA
ONTOPOLWA 13
Aauvithi yUukwaniilwa taya yi kompangu
Aapanguli yamwe yomoompangu dhopombanda kunena oye na etaloko lya fa lyomulongimpango Gamaliel.
ONTOPOLWA 14
Taya ambidhidha epangelo lyaKalunga nuudhiginini
Omahepeko ogendji ga fa ‘omulonga’ ngoka ga ningilwa Oonzapo dhaJehova sho dha tindi okukutha ombinga mopolotika oga ninwa po inaashi tegelelwa konzo yontumba.
ONTOPOLWA 15
Taya kondjele uuthemba wawo wokulongela Kalunga ya manguluka
Oshigwana shaKalunga osha kondjele uuthemba washo, opo shi vulike koompango dhUukwaniilwa waKalunga.