1. Hesekiel okwa mono shike shoka she tu kumitha?

 ANDO ongoye wa monene emoniko lya fa ndyoka lya monikile komupolofeti Hesekiel oomvula 2500 dha piti, mbela ando owa kala wu uvite ngiini? Natu tye ando owe ya petungo lyotempeli enenenene tali adhima. Owa adha po omuyengeli omunankondo ngoka te ke ku ulukila motempeli ndjika ombwanawa. Owa kuminwa noonkondo omiyelo dhayo, sho to londo kootalapa heyali wu uka pugumwe gwomomiyelo. Omiyelo ndhoka ndatu odha li dhi na uule woometa 30 lwaampo. Pomiyelo dhayo owa mono po oondunda dhaakeeleli yopomiyelo. Koongudhi dhayo okwa thanekwa omilunga dho opala. —  Hes. 40:1-4, 10, 14, 16, 22; 41:20.

2. (a) Otempeli yomemoniko otayi thaneke shike? (Tala wo enyolo lyopevi.) (b) Oshike tatu ilongo kiinima mbyoka yi li piiyelo yotempeli?

² Otempeli ndjoka ya monika memoniko oyopambepo. Hesekiel okwe yi ndjandjukununa nawa noohapu ndhoka tadhi adhika montopolwa 40 sigo 48 membo lye. Otayi thaneke elongelokalunga lya yela. Oshinima kehe motempeli ndjoka otashi thaneke sha melongelokalunga lyetu momasiku ngaka gahugunina. a Omiyelo dhayo omile otadhi thaneke shike? Otadhi tu dhimbulukitha kutya mboka taye ya melongelokalunga lya yela oye na okwiiyutha komithikampango dhaKalunga dha dhenga mbanda nodhi li pauyuuki. Nokuli omathano gomilunga ngoka ga takelwa mekuma oge na eityo lya faathana nomiyelo, oshoka mOmbiimbeli omathimbo gamwe omilunga ohadhi thaneke uuyuuki. (Eps. 92:12) Mbela dho oondunda dhaakeeleli yopomiyelo otadhi thaneke shike? Osha yela kutya mboka ihaaya vulika komithikampango dhaKalunga itaya yi mo melongelokalunga lya yela. —  Hes. 44:9.

3. Omolwashike sha li sha pumbiwa aalanduli yaKristus ya kale taya yogolwa?

³ Emoniko lyaHesekiel olya gwanithwa ngiini? Ngaashi twa mono mOntopolwa 2 yembo ndika, okuza mo 1914 sigo opetameko lyo 1919, Jehova okwa longitha Kristus a yogole oshigwana she momukalo gwi ikalekelwa. Mbela eyogolo olya hulile mpoka? Hasho nando. Momukokomoko gwoomvula ethele dha piti, Kristus okwa kala nokuhumitha komeho omithikampango dhaJehova dhi nasha neihumbato ewanawa. Onkee ano aalanduli ye oya li ya pumbwa okukala taya yogolwa. Omolwashike? Omolwashoka mboka taya ningi aalanduli yaKristus otaya zi  muuyuni mbuka wa yonuka pamikalo nosho wo kutya Satana onkee ngaa ta kambadhala oku ya shuna monyata. (Lesha 2 Petrus 2:20-22.) Natu konakoneni omikalo ndatu moka Aakriste yashili ya kala nokuyogolwa. Tango otatu ka tala nkene ya kwathelwa ye ethe po omikalo dha nyata, e tatu ka tala koshinima sha simana shoka hashi kwathele okukaleka omagongalo ga yela nohugunina okonkalo momagumbo.

4, 5. Satana okwa kala ta longitha shike a makele oshigwana shaKalunga, noshizemo oshini?

⁴ Oshigwana shaJehova osha kala aluhe sha halelela okukala nomikalo noneihumbato ewanawa. Nomolwashono hashi taamba ko omayele omawanawa ngoka hashi pewa. Natu taleni iiholelwa yimwepo.

⁵ Omilalo dha nyata. Jehova okwa hala omilalo pokati kaaihokani dhi kale dha yogoka. Ihe Satana oku hole okuningitha aantu ya tale ko omagano ngaka gondilo pombambo noku ya hwahwameka ye ga longithe pamikalo dha nyata. Oha longitha wo omilalo okumakela oshigwana shaKalunga, opo Kalunga a kale inee shi hokwa. Pethimbo lyaBileam, Satana okwa makele oshigwana shaIsraeli nomilalo, naashika oshe ya etele iilanduliko iiwinayi. Nomomasiku ngaka gahugunina okwa kala te dhi longitha momukalo inaagu monika nando onale. —  Num. 25:1-3, 9; Eh. 2:14.

6. Egano lini lya nyanyangidhilwe mOshungolangelo nolya li hali longithwa ngiini, nomolwashike lye ke ethiwa po? (Tala wo enyolo lyopevi.)

⁶ Opo ku kelelwe oonkambadhala dhaSatana, mOshungolangelo yo 15 Juni 1908 omwa nyanyangidhwa egano tali ti: “Kutya nduno ondi li ongame awike nomuntu gwuukashikekookantu wa yooloka ko kuwandje nenge omontaneho yaantu, otandi ki ihumbata momukalo gwa faathana ethimbo kehe.” b Nonando egano ndika kalya li tali dhengele, oyendji oye li ningi e taya gandja omadhina gawo ga nyanyangidhwe mOshungolangelo. Nokonima yoomvula dhontumba, nonando egano ndika olya li lya kwathele oyendji, olye ke ethiwa po, oshoka oyendji oya li ye li tala ko ongomukalondjigilile gowala. Ihe omakotampango gopamikalo ngoka ga popiwa mulyo oga kala aluhe taga humithwa komeho.

7. Mo 1935, Oshungolangelo oya kundathanene uupyakadhi wuni, nomuthikampango guni ya tsu omuthindo?

⁷ Omamakelo gaSatana oga li owala ga pimbile. Oshungolangelo ye 1 Maalitsa 1935 oya kundathanene oshinima shoka sha li tashi eta uupyakadhi moshigwana shaKalunga. Yamwe oya li taya dhiladhila kutya shaashi ohaya uvitha, inaya tegelelwa yi iyuthe komithikampango dhaJehova moonkalamwenyo dhawo. Oshungolangelo oya tile: “Otu na okudhimbulukwa kutya inaku tegelelwa tu kale owala hatu yi momapya. Ihe otwa tegelelwa wo twi ihumbate momukalo ngoka tagu ulike kutya tse aakalelipo yaJehova nuukwaniilwa we.” Oshifo osha tsikile nokugandja omayele kombinga yondjokana nankene oshigwana shaKalunga shi na okwiihumbata ngele tashi ya pomilalo, shoka she shi kwathele shi ‘yande oluhondelo.’ —  1 Kor. 6:18.

8. Omolwashike Oshungolangelo ya kala tayi tsu omuthindo eityo lyoshitya shOshigreka shoka tashi ti omilalo dha nyata?

 ⁸ Moomvula opo dha piti, Oshungolangelo oya kala tayi tsu omuthindo efatululo lyoshitya porneia shoka sha longithwa mOmanyolo gOshigreka okuulika komilalo dha nyata. Oshitya shoka itashi ti owala okulalathana panyama. Ihe porneia osha kwatela mo wo omilalo kehe dha nyata, ngaashi iinima ya nyata niinyanyalithi mbyoka hayi ningwa koombwanda. Kungeyi aalanduli yaKristus oya kala ya gamenwa kaaya ye momilalo dha nyata ndhoka dha kwata ko oyendji kunena. —  Lesha Aaefeso 4:17-19.

9, 10. (a) Oshungolangelo oya kundathanene kombinga yuupyakadhi wuni mo 1935? (b) Ombiimbeli otayi ti ngiini kombinga yokunwa omalovu?

⁹ Okulongitha nayi iikolitha. Oshungolangelo ye 1 Maalitsa 1935 oya popi wo kombinga yuupyakadhi wulwe ya ti: “Okwa konekiwa kutya aantu yamwe ohaya yi miilonga yomomapya nohaya longo iilonga yilwe yehangano yi idhenga mo. Ombiimbeli oya pitika omuntu a nwe omaviinu monkalo yini? Oshi li ngaa pandunge omuntu a nwe omaviinu e ta kala itaa vulu we okulonga iilonga ye mehangano lyOmuwa?”

¹⁰ Oshifo osha yamukula omapulo ngoka sho sha kundathana shoka Oohapu dhaKalunga tadhi ti kombinga yiikolitha. Ombiimbeli oya pitika okunwa omaviinu nenge iikolitha yilwe pandjele, ihe inayi pitika nando uunkolwe. (Eps. 104:14, 15; 1 Kor. 6:9, 10) Shi na ko nasha nokulonga iilonga iiyapuki omanga omuntu a nwa omalovu, oshigwana shaKalunga osha kala hashi dhimbulukithwa ehokololo lyoyanamati yaAaron mboka ya li ya dhipagwa kuKalunga, sho ya ningi omafikiloyambo ngoka Kalunga inaa hokwa. Ehokololo olya holola kutya aalumentu mbaka otashi vulika ya ningi omafikilondjambo ya nwa, oshoka ethimbo efupi konima yaashoka, Kalunga okwa ka gandja ompango tayi indike aayambi kaaya nwe omalovu uuna taya longo iilonga iiyapuki. (Lev. 10:1, 2, 8-11) Aalanduli yaKristus kunena ohaya tula miilonga ekotampango ndyoka mokukala itaaya kutha ombinga miilonga iiyapuki uuna yi idhenga mo.

11. Omolwashike sho oshigwana shaKalunga sha mono uuyelele wa gwedhwa po kombinga yuunkolwe shi li elaleko nuuyamba kusho?

¹¹ Shoka shi li elaleko nuuyamba, osho kutya moomvula omilongo opo dha piti, aalanduli yaKristus oya monene uuyelele wa gwedhwa po kombinga yuunkolwe nenge yokupikwa kiikolitha. Iikulya yopambepo mbyoka hayi gandjwa pethimbo oya kwathela oyendji yi ikwate nawa ngele tashi ya piikolitha. Noyendji oya kwathelwa ye ethe po thiluthilu uunkolwe. Ano inaya etha nando uunkolwe wu ya shundule, wu teye po omagumbo gawo nuunene tuu uuthembahenda wawo wokulongela Jehova.

12. Aalanduli yaKristus oya kala ya tala ko ngiini okuhila omakaya nokuli nomanga omasiku gahugunina inaaga tameka?

¹² Omakaya. Aalanduli yaKristus oya kala taya ladhipike aantu kaaya hile omakaya, okuza nokuli manga omasiku gahugunina inaaga tameka. Omumwatate omukokele, Charles Capen, ota dhimbulukwa oshikando shotango a tsakanenene naCharles Taze Russell lwopehulilo lyomimvo 1800. Capen, ngoka a li e na oomvula 13 pethimbo ndyoka, ye naamwayinamati yatatu oya li ya thikama pootalapa dhoBible House moAllegheny moPennsylvania. Manga Russell ta piti po puyo, okwe ya pula ta ti:  “Mwa fa tamu hili omakaya? Ondu uvite taga nika.” Oye mu shilipaleke kutya itaya hili. Kuyo osha li sha yela kutya omumwatate Russell okwe ga tala ko ngiini. MOshungolangelo ye 1 Auguste 1895, omumwatate Russell okwa popile kombinga 2 Aakorinto 7:1 a ti: “Kandi wete tashi kwatha omuntu nenge tashi simanekitha Kalunga ngele Omukriste oha hili omakaya. . . . Itatu vulu nando okudhiladhilila Omuwa gwetu ta nika omakaya nenge ta tula mokana ke oshinima sha nyata.”

13. Uuyelele wuni wa yelele aalanduli yaKristus shi na nokuhila omakaya mo 1973?

¹³ Mo 1935, Oshungolangelo oya tile omakaya “egwanga lya nyata” noya ti wo kutya ngoka te ga taasina nenge te ga hili ita pitikwa a kale oshilyo shaBetele, a kale omukokolindjila nenge omutonateli omweendi mehangano lyaKalunga. Mo 1973 opwa monika natango uuyelele wulwe kombinga yomakaya. Oshungolangelo ye 1 Juni oya yelithile kutya ngele gumwe megongalo oha hili omakaya, ita ka kala e li oshiholelwa oshiwanawa. Mboka taya tindi okweetha po okuhila omakaya oya li ye na okukondwa mo. c Kristus okwa li a katuka onkatu yilwe ya simana, opo a yogole aalanduli ye.

14. Kalunga okwa ti shike kombinga yombinzi, nomolwashike etulombinzi lya ha kunena?

¹⁴ Elongitho nayi lyombinzi. Pethimbo lyaNoowa, Kalunga okwa popile kutya okulya ombinzi okwa puka. Okwe shi tsu wo omuthindo mOmpango ndjoka a pele oshigwana shaIsraeli, nokwa lombwelele wo egongalo lyopaKriste li ‘idhilike ombinzi.’ (Iil. 15:20, 29; Gen. 9:4; Lev. 7:26) Ihe Satana pethimbo lyetu okwa ningitha aantu oyendji kaaya vulike komuthikampango nguka gwaKalunga. Moomvula dhe 1800 nasha, oondohotola odha kala tadhi kambadhala okulongitha ombinzi mepango, ihe etulombinzi olya ka taandela owala konima sho omaludhi gi ili nogi ili gombinzi ga monika mo. Mo 1937, aantu oya tameke okugandja ombinzi yi pungulwe, nopo nduno pIita Iitiyali yUuyuni egandjo lyombinzi olya li lya humithwa komeho. Nokuza mpono etulo lyombinzi olya taandele nuuyuni awuhe.

15, 16. (a) Oonzapo dhaJehova odha vulika komuthikampango guni ngele tashi ya petulombinzi? (b) Aalanduli yaKristus oya kwathelwa ngiini shi na ko nasha nokutulwa ombinzi nosho wo okulongitha iinima yilwe peha lyombinzi, noshizemo oshini?

¹⁵ Okuza owala 1944, Oshungolangelo oya ti kutya uuna omuntu ta tulwa ombinzi, nena okwa fa owala te yi li. Omumvo gwa ka landula, oshinima shoka osha yelithwa nawa. Mo 1951, opwa nyanyangidhwa omusholondondo gwomapulo nomayamukulo gu kwathele oshigwana shaKalunga shi vule okuungaunga noondohotola. Aalanduli yaKristus aadhiginini muuyuni awuhe, oya kala nokuvulika kekotampango ndyoka, nonando olundji oya li ya shekwa nenge ya hepekwa. Ihe Kristus okwa kala ta longitha ehangano lye e ya pe ekwatho ndyoka ya pumbwa. Opwa li wo pwa nyanyangidhwa uumbo niileshwa yi na uuyelele womuule.

¹⁶ Mo 1979, aakuluntugongalo yamwe oya tameke okutalela po iipangelo, opo ya kwathele oondohotola dhu uve ko omatompelo gopamanyolo kombinga yonkalo yetu yi nasha nelongitho lyombinzi nosho wo iinima yilwe mbyoka tayi vulu okulongithwa pehala lyombinzi. Mo 1980 miilando 39 yaAmerika, aakuluntugongalo  oya pewa edheulo lyowina kombinga yoshilonga shoka. Mokweendela ko kwethimbo, Olutuwiliki olwa toto po Ookomitiye dhOkukwatathana nIipangelo miilongo yi ili noyi ili muuyuni awuhe. Mbela oonkambadhala adhihe ndhika odha tompola po sha ngaa muule woomvula dha piti? Kunena oondohotola omayuvi dhi ili nodhi ili otadhi longele kumwe nOonzapo, tadhi ya panga kaapu na etulombinzi. Iipangelo oyindjiyindji ngashingeyi ohayi longitha iinima yilwe okupanga aantu pehala lyoku ya tula ombinzi. Nayimwe oya simaneka nokuli omuthikampango nguka gwa dhenga mbanda gwokwaatula aantu ombinzi. Otashi tu nyanyudha shili okudhiladhila komikalo moka Jesus a gamene aalanduli ye koonkambadhala dhaSatana dhoku ya nyateka. —  Lesha Aaefeso 5:25-27.

17. Ongiini tatu vulu okuulika kutya otwa lenga omukalo moka Kristus a kala nokuyogola aalanduli ye?

¹⁷ Natu ipuleni ngeyi: ‘Mbela otwa lenga ngaa omukalo moka Kristus a kala noku tu yogola, te tu dheula tu kale hatu dhiginine omithikampango dhopamikalo dha dhenga mbanda?’ Ngele osho, natu dhimbulukweni kutya Satana ota kambadhala aluhe oku tu pilamenitha Jehova naJesus moku tu ningitha tu kale twa dhina omithikampango dhopakalunga. Opo tu kondjithe enwethomo ndyoka, ehangano lyaJehova ohali tu  londodha aluhe noku tu dhimbulukitha tu yande omikalo dha nyata dhuuyuni mbuka. Ano natu kaleni twa tonata nokuvulika komayele ngoka omawanawa. —  Omayel. 19:20.

18. Emoniko lyaHesekiel otali tu dhimbulukitha nawa shike kombinga yaamboka ihaaya vulika komithikampango dhaKalunga?

¹⁸ Oshinima oshitiyali shokukala twa yogoka pamikalo osha kwatela mo okukaleka egongalo lya yogoka. Shiyemateka osho kutya haayehe mboka ya taamba ko oompango dhaJehova Kalunga dhi na ko nasha neihumbato noye mu iyapulila ya dhiginine etokolo lyawo. Hugunina yamwe ohaya ka kukutika omitima dhawo e taya kala itaaya vulika we komithikampango ndhoka. Mbela aantu ya tya ngaaka oye na okuningwa ngiini? Memoniko lyaHesekiel lyotempeli yopambepo ndjoka ya kundathanwa petameko lyontopolwa ndjika otatu mono mo shoka ye na okuningilwa. Natu dhiladhile ishewe komiyelo dhayo omile. Poshiyelo kehe opwa li pu na omala gaalangeli. Aalangeli ohaya tonatele otempeli ya keelele mboka ‘inaa fukalekwa momwenyo’ yaa ye mo. (Hes. 44:9, OB-1954) Shika otashi ti kutya oomboka owala taya vulika komithikampango dhaJehova dha yogoka ye na uuthembahenda wokukala melongelokalunga lya yela. Sha faathana, kunena haayehe ye na uuthembahenda wokulongela Kalunga pamwe nAakriste ooyakwawo.

19, 20. (a) Kristus okwa kala ta kwathele ngiini kashona nakashona aalanduli ye ya lundulule omukalo gwokuungaunga nomayono ga kwata miiti? (b) Aayoni mboka inaayi iyela ombedhi oye na okukondwa mo megongalo molwomatompelo gatatu geni?

¹⁹ Nale mo 1892, Oshungolangelo oya popile kutya “oshi li oshinakugwanithwa shAakriste okukonda mo mboka taya tindi montaneho nenge meholamo kutya Kristus okwa gandja omwenyo gwe gu ninge iikulila yaayehe.” (Lesha 2 Johannes 10.) Mo 1904, embo lyedhina The New Creation olya tile kutya mboka ya kakatela omikalo dha nyata oya nika lela oshiponga kegongalo. Nale, egongalo alihe olya li hali kutha ombinga “miipotha yongeleka,” opo li ungaunge nomayono ga kwata miiti. Ihe hanaanaa lya li hali kala niipotha ya tya ngaaka. Mo 1944 Oshungolangelo oya ka popya kutya aakuluntugongalo oyo owala ye na okuungaunga niipotha mbyoka. Mo 1952, mOshungolangelo omwa nyanyangidhilwe omilandu dhopaMbiimbeli kombinga yokuungaunga niipotha, tadhi tsu omuthindo kutya opo egongalo li kale lya yela, omuyoni ngoka ini iyela ombedhi oku na okukondwa mo.

²⁰ Okuza komumvo ngoka sigo okunena, Kristus okwa kala ta kwathele aalanduli ye ya lundulule omukalo gwawo gwokuungaunga nomayono ga kwata miiti. Aakuluntugongalo ohaya dheulwa nuukeka, opo yu ungaunge nohenda nopauyuuki niipotha yaamboka ya yona. Kunena aayoni mboka inaayi iyela ombedhi, oya pumbwa okukondwa mo megongalo omolwomatompelo gatatu: (1) opo kaaya shekithe edhina lyaJehova, (2) opo kaaya nyateke egongalo nosho wo (3) opo shi ya kwathele yi iyele ombedhi ngele otashi vulika.

21. Omomukalo guni elongekidho lyokukonda omuyoni lya kala eyambeko koshigwana shaKalunga?

²¹ Mbela owu wete ngaa nkene elongekidho lyokukonda omuyoni lya kala eyambeko kaalanduli yaKristus kunena? MuIsraeli  shonale, olundji aayoni oya kala ye na enwethomo ewinayi koshigwana, nomathimbo gamwe oya li oyendji nokuli ye vule mboka ye hole Jehova noya hala okulonga shoka shu uka. Nomolwaashono oshigwana shaIsraeli sha kala olundji nokushekitha edhina lyaJehova, Jehova e ta kala inee shi hokwa we. (Jer. 7:23-28) Ihe kunena, Jehova otu ungaunga naantu ye na uupambepo uuwanawa. Molwashoka aayoni mboka ya kukutika omitima dhawo ohaya kuthwa mo mokati ketu, nena Satana iha vulu we oku ya longitha ya nwethe mo egongalo noye li nyateke. Otu na uushili kutya kungeyi, tu li oshigwana shaJehova, otatu ka kala twa hokiwa kuye. Natu dhimbulukweni kutya Jehova oku uvaneke a ti: “Oshikondjitho kehe tashi hambulwa shi ku kondjithe, itashi tompola sha.” (Jes. 54:17) Mbela ohatu ambidhidha ngaa nuudhiginini aakuluntugongalo mboka ye na oshinakugwanithwa sha kwata miiti shokuungaunga niipotha megongalo?

22, 23. Omolwashike twa pandula ooitaali ooyakwetu mboka ya li ko petameko lyomimvo 1900 nasha, noshike tashi ulike kutya oya li ya pumbwa okukala nondjele kombinga yonkalamwenyo yomegumbo?

²² Omukalo omutitatu moka aalanduli yaKristus ya mona uuwanawa mokuyogolwa, omondjokana nomonkalamwenyo yomegumbo. Mbela etaloko lyetu li nasha naanegumbo olya kala ngaa nokuyogolwa momimvo dha piti? Eeno. Pashiholelwa, ngele tatu lesha omahokololo kombinga yaapiya yaKalunga yopetameko lyomimvo 1900 nasha, ohatu kala twa kumwa shili sho ya kala nombepo yeiyambo. Ohatu kala twa shambukwa sho ya kala ya pititha komeho yaayihe monkalamwenyo yawo oshilonga shawo oshiyapuki. Ihe natango, otu wete kutya oya li ya pumbwa okukala nondjele. Ngiini mbela?

²³ Omolwiilonga yokuuvitha nenge yuuyendi, aamwatate oya li haya vulu okukala oomwedhi odhindji poshikando kokule naakulukadhi yawo. Omathimbo gamwe, okwaaya mondjokana okwa li kwa tsuwa omuthindo shi vulithe pwaashoka Omanyolo taga ti, nokakwa li kwa popiwa oshindji kombinga yokukoleka oondjokana dhopaKriste. Mbela kunena natse osho ngaa tu li ngawo? Aawe!

24. Ongiini Kristus a kwathele aalanduli ye aadhiginini ya kale netaloko li li pandjele kombinga yondjokana noyonkalamwenyo yomegumbo?

²⁴ Kunena omuntu ito vulu okulalakanena iinakugwanithwa megongalo, ngele iho sile oshimpwiyu aanegumbo lyoye. (Lesha 1 Timoteus 5:8.) Kristus okwa kala ta shilipaleke kutya aalanduli ye aadhiginini kombanda yevi otaya pewa omayele gopamanyolo kombinga yondjokana nosho wo yonkalamwenyo yomegumbo. (Ef. 3:14, 15) Mo 1978, omwa pitile embo Making Your Family Life Happy. Nokonima yoomvula 18 lwaampono, embo Shoka tashi vulu okweeta ombili muukwanegumbo olya piti. Shimwe ishewe, mOshungolangelo omwa holokele iileshwa oyindji yokukwathela aaihokani ya tule miilonga omakotampango gOmbiimbeli.

25-27. Aanona yoomvula dhi ili nodhi ili oya kala taya kwathelwa ngiini momukokomoko gwoomvula?

 ²⁵ Ongiini kombinga yaagundjuka? Momukokomoko gwoomvula, aagundjuka oya kala taya kwathelwa. Ehangano lyaJehova olya kala hali longekidhile aanona yomapipi gi ili nogi ili iikulya yopambepo, ihe iikulya yopambepo mbyoka ya li owala hayi ya okanamundonda ngashingeyi ofulundundu. Pashiholelwa, okuza mo 1919 sigo 1921 mo-The Golden Age omwa li oshitopolwa “Ekonakonombiimbeli lyaagundjuka.” Osha ka landulwa kokambo The Golden Age ABC mo 1920 nokembo lyedhina Aanona mo 1941 mOshiingilisa. Mo 1970 nasha, omwa nyanyangidhilwe omambo Listening to the Great Teacher, Your Youth — Getting the Best out of It nosho wo Embo Lyandje lyOmahokololo gOmbimbeli. Mo 1982 o-Awake! oya tameke okukala niileshwa kohi yoshipalanyolo “Aagundjuka taya pula” mbyoka ya ka nyanyangidhwa membo lyedhina Questions Young People Ask — Answers That Work mo 1989.

²⁶ Nena otu na omambo gaali gedhina Young People Ask, omanga iileshwa yilwe kombinga yaagundjuka yi li ko-jw.org. Opu na wo embo Ilonga kOmulongi Omunene. Ko-jw.org oku na iitopolwa  oyindji yaanona aakuluntu naashona, ngaashi uukalata womadhina gaantu yomOmbiimbeli, iilongadhalwa yOmbiimbeli, ootumbutumbu, uuvidio nookartuuna dhomahokololo gOmbiimbeli. Oku na wo iilongwa yOmbiimbeli ya nuninwa oohembumbangele niimputu. Osha yela kutya Jesus oku hole natango aanona ngaashi naanaa a li e ya hole sho e ya papatele methelemumvo lyotango. (Mark. 10:13-16) Okwa hala wo aanona kunena ya kale yu uvite kutya oye holike notaya palulwa nawa pambepo.

²⁷ Jesus okwa hala wo aanona ya kale ya gamenwa kiiponga. Ehepeko lyaanona kunena olya vuka, molwaashoka omikalo dhaantu muuyuni otadhi ende tadhi nayipala. Onkee ano, ehangano olya nyanyangidha uuyelele wa yela okukwathela aavali ya gamene oyana kehepeko ndyoka. d

28. (a) Oshike twa tegelelwa tu ninge, opo tu kale melongelokalunga lya yela ngaashi tashi thanekwa memoniko lyaHesekiel lyotempeli? (b) Owa tokola toko okuninga shike?

²⁸ Kashi shi tuu oshiwanawa okumona nkene Kristus a kala ta yogola aalanduli ye, te ya dheula ya kale ya simaneka omisindalandu dhaJehova, ye dhi tule miilonga noya mone uuwanawa mudho! Natu shuneni ishewe kotempeli ndjoka Hesekiel a mono memoniko. Dhimbulukwa kutya omiyelo dhayo odha li omile. Nonando otempeli ndjoka oyopambepo, mbela kutse oyolela ngaa? Motempeli moka ihatu yi mo owala molwashoka hatu yi kOshinyanga shUukwaniilwa nenge hatu lesha Ombiimbeli nenge hatu yi momapya. Iilonga mbyoka ohayi vulu okulongwa nokomufudhime, ngoka kee na nando esiku e endele motempeli yaJehova. Onkee ano ngele otwa kala hatu longo iilonga mbyoka nohatu vulika wo komithikampango dhaJehova nokulongela Kalunga nomutima aguhe, nena otwa ya motempeli yaJehova Kalunga yopambepo. Natu kaleni aluhe twa lenga uuthembahenda mbuka woku mu longela motempeli ye. Natu longeni twaa na ezimbuko tu ulike kutya Jehova omuyapuki mokuvulika komithikampango dhe dhu uka.