ONTOPOLWA 10
Omukwaniilwa ta yogola oshigwana she pambepo
1-3. Jesus okwa ningi po shike sho a adha otempeli ya nyatekwa?
JESUS okwa li a simaneka noonkondo otempeli muJerusalem, molwashoka okwa li e shi shoka yi lile po. Uule woomvula odhindji, otempeli oya kala ondingandinga yelongelokalunga lyashili kombanda yevi. Ihe elongelokalunga ndyoka oli na okukala lya yela shekesheke. Dhiladhila owala nkene Jesus a li u uvite sho e ya motempeli mo 10 Nisan 33 E.N., e ta adha ya nyatekwa. Oshike sha li tashi ningwa mo? — Lesha Mateus 21:12, 13.
2 Aapingakanithi yiimaliwa naahalithi aanalwiho mboka ya li mEhale lyotempeli lyaamboka kaaye shi Aajuda, oya li taya nyokoma aalongelikalunga mboka ye ya okuyambela Jehova omayambo. a Jesus okwa “tidha mo ayehe ya li taa landa notaa landitha motempeli. Oye okwa tilehi [iitaafula] yaapingakanithi yiimaliwa.” (Yelekanitha Nehemia 13:7-9.) Okwa geyele aalumentu mboka aanalwiho sho ya ningi ongulu yaHe “ombogo yaayugi.” Kungeyi Jesus oku ulike kutya okwa simaneka otempeli naashoka yi lile po. Elongelokalunga lyashili olya li li na okukala lya yela.
3 Konima yoomvula omathele sho Jesus a ningwa omukwaniilwa gwopaMesiasa, okwa ka yogola ishewe otempeli yilwe, moka ayehe mboka ya hala okulongela Jehova momukalo ngoka a hokwa ye na oku mu galikanena. Otempeli ndjoka oyini?
Ta yogola “aayambi”
4, 5. (a) Aalanduli yaJesus aagwayekwa oya yogolwa ngiini okuza mo 1914 sigo olwopetameko lyo 1919? (b) Mbela eyogolo lyoshigwana shaKalunga opo owala lya hulile mpoka? Shi yelitha.
4 Ngaashi twe shi mono nOntopolwa 2 yembo ndika, konima sho Jesus a langekwa po mo 1914, okwe ya naHe okukonakona otempeli yopambepo, ano elongelokalunga lyashili. b Konima sho e yi konakona, Omukwaniilwa okwa mono kutya “aayambi,” ano Aakriste aagwayekwa, oya pumbwa okuyogolwa. (Mal. 3:1-3) Okuza mo 1914 sigo olwopetameko lyo 1919, Jehova ngoka e li Omuhemuni, okwe etha oshigwana she shi pite momahepeko gi ili nogi ili nelalakano lyoku shi yogola. Otashi nyanyudha okumona kutya omahepeko ngoka oga li ge ya yogola, noya zi mo ya halelela okwaambidhidha Omukwaniilwa gwopaMesiasa.
5 Mbela eyogolo lyoshigwana shaKalunga opo lya hulile mpoka? Aawe. Okuza owala sho omasiku gahugunina ga tameke, Jehova okwa kala ta longitha Omukwaniilwa gwopaMesiasa a tsikile okukwathela aalanduli ye ya kale ya yogoka, opo ya vule okukala motempeli yopambepo. Moontopolwa mbali tadhi landula, otatu ka tala nkene a yogola omikalo dhawo nankene a hwepopaleke omilandu mehangano lye. Ihe tango natu kundathaneni nkene a yogola oshigwana she pambepo. Otashi ka koleka eitaalo lyetu okukonakona shoka Jesus a ningi, opo a yogole aalanduli ye pambepo ta longitha omikalo ndhoka dhi wetike naandhoka kaadhi wetike.
‘Iyapuleni’
6. Shoka Jehova a lombwele Aaisraeli mboka ya li muupongekwa otashi tu kwathele ngiini tu uve ko kutya okukala twa yela pambepo otashi ti shike?
6 Okukala twa yogoka pambepo otaku ti shike? Opo tu mone eyamukulo, natu tale koohapu ndhoka Jehova a lombwele Aajuda sho ya li pokuza mo muupika waBabilonia mo 537 K.E.N. (Lesha Jesaja 52:11.) Aajuda mboka oya li taya shuna kuJerusalem nelalakano lyoku ka tungulula otempeli nelongelokalunga lyashili. (Esra 1:2-4) Jehova okwa li a hala oshigwana she shi ethe po iinima ayihe ya pamba elongelokalunga lyaBabilonia. Ndhindhilika kutya okwe ya lombwele a ti: “Inamu guma tuu shoka sha nyata!” “Iyoololeni mo musho ne mu iyapule” nenge ne mu kale mwa yela. Elongelokalunga lyashili kali na okukala lya nyatekwa kiinima yomalongelokalunga giifundja. Otatu vulu okuthika pehulithodhiladhilo lini? Opo tu kale twa yela pambepo, katu na okukala twi itaala momalongo gomalongelokalunga giifundja nenge tu kuthe ombinga mugo.
7. Jesus okwa longitha lye a kwathele aalanduli ye ya kale ya yela pambepo?
7 Konima owala sho Jesus a ningwa Omukwaniilwa, okwa langeke po omumati nenge omupiya omudhiginini nomunandunge ngoka a kala ta longitha okukaleka aalanduli ye ya yela pambepo. Okwe mu langeke po mo 1919. (Mat. 24:45) Sho omumvo ngoka gwa ka thika, Aakonakoni yOmbiimbeli oya adhika nale ye ekelahi ogendji gomomalongo giifundja. Ihe oya li natango ya pumbwa okuyogolwa pambepo. Kristus okwa kala te ya yelithile kashona nakashona okupitila momupiya omudhiginini kombinga yiituthi niinima yilwe mbyoka ya pumbwa okweetha po. (Omayel. 4:18) Natu taleni kuyimwe yomuyo.
Mbela Aakriste oye na okudhana Okrismesa?
8. Aakonakoni yOmbiimbeli oya kala nale ye shi shike kombinga yOkrismesa, ihe oshike ya li kaayu uvite ko nawa?
8 Aakonakoni yOmbiimbeli oya kala nale ye shi kutya Okrismesa oya za momalongo goshipagani nosho wo kutya Jesus ina valwa mo 25 Desemba. Oshungolangelo yaDesemba 1881 oya tile: “Aantu omamiliyona oya zile momalongelokalunga goshipagani e taya ningi Aakriste. Ihe oya ningi owala Aakriste edhina, molwashoka aapristeli yomalongelokalunga goshipagani oyo ya ningwa aapristeli mongeleka, niituthi yoshipagani oya lukwa omadhina gOshikelesiti, mwa kwatelwa Okrismesa.” Mo 1883, Oshungolangelo oya li yi na oshitopolwa shedhina “Jesus okwa valwa uunake?” shoka sha popi kutya Jesus okwa valwa lwopetameko lyaKotoba. c Ihe pethimbo mpoka, Aakonakoni yOmbiimbeli kaya li yu uvite ko kutya osha pumbiwa ye ethe po okudhana Okrismesa. Nokuli nAabetel yokoBrooklyn oya tsikile oku yi dhana. Ihe konima yo 1926 opwa ningwa elunduluko. Omolwashike mbela?
9. Aakonakoni yOmbiimbeli oya ndhindhilike shike kombinga yOkrismesa?
9 Konima sho Aakonakoni yOmbiimbeli ya konakona nawa oshituthi shika shOkrismesa, oya mono kutya hoka sha tamekela niinima mbyoka hayi ningwa po itayi simanekitha Kalunga. Oshileshwa shedhina “Mpoka Okrismesa ya tamekela,” shoka sha li moshifo The Golden Age sho 14 Desemba 1927, osha ti kutya Okrismesa oshituthi shoshipagani mpoka aantu haya kala ya pwila momainyanyudho nohaya kala taya simaneke iikalunga. Oshileshwa osha yelitha kutya Kristus ina lombwela Aakriste ya dhane oshituthi shika e tashi hulitha tashi ti: “Molwashoka uuyuni, aantu nOndiyapoli otayi humitha komeho oshituthi shika . . . oshe tu yelela kutya mboka yi iyapulila Jehova thiluthilu kaye na oku shi dhana.” Okuza muDesemba gwomumvo ngoka Aabetel inaya dhana we Okrismesa sigo okeluwa ndi!
10. (a) MuDesemba 1928 Aakonakoni yOmbiimbeli oya mono ishewe uuyelele wa gwedhwa po wuni kombinga yOkrismesa? (Tala wo oshimpungu “ Mpoka pwa tamekela Okrismesa nelalakano lyayo.”) (b) Oshigwana shaKalunga osha mono uuyelele wulwe wuni kombinga yiituthi yilwe mbyoka kaaye na okudhana? (Tala oshimpungu “ Omasiku gomafudho niituthi yilwe tayi anekwa pomutenya.”)
10 Omvula ya landula, Aakonakoni yOmbiimbeli oya mono ishewe uuyelele wa gwedhwa po kombinga yOkrismesa. Mo 12 Desemba 1928, omumwatate Richard H. Barber, oshilyo shaBetele, okwa gandja oshipopiwa koradio moka a aneke pomutenya onzo yoshituthi shika shoshipagani. Oshigwana shaKalunga oshi inyengele ngiini kelombwelo ndika lyomupiya omudhiginini? Omumwatate Charles Brandlein ota dhimbulukwa sho ye noyaandjawo ye etha po okudhana Okrismesa. Okwa ti: “Mbela otwa li tu uvite nayi sho tu na okweetha po iinima mbika yoshipagani? Aawe! . . . Osha li owala sha fa omuntu ti ihula ohema ya kaka e te yi ekelehi.” Omumwatate Henry A. Cantwell ngoka a ka ninga omutonateli omweendi naye osho a li u uvite. Okwa ti: “Otwa li twa nyanyukwa sho twe etha po iinima mbika tu ulike kutya otu hole Jehova.” Aalanduli yaKristus aadhiginini oya li yi ilongekidha okuninga omalunduluko ngoka ga pumbiwa nokwaadhana we oshituthi shoka sha yama komalongo goshipagani. d — Joh. 15:19; 17:14.
11. Otatu vulu ngiini okwaambidhidha Omukwaniilwa gwopaMesiasa?
11 Aakonakoni yOmbiimbeli mbaka aadhiginini inaye tu tulila po tuu oshiholelwa oshiwanawa! Natse otu na okwiipula tatu ti: ‘Onda tala ko ngiini omalombwelo ngoka hatu pewa komupiya omudhiginini? Mbela ohandi ga taamba ko ngaa noku ga tula miilonga?’ Ngele ohatu vulika nehalo ewanawa otashi ulike kutya otatu ambidhidha Omukwaniilwa gwopaMesiasa ngoka ta longitha omupiya omudhiginini a gandje iikulya yopambepo pethimbo. — Iil. 16:4, 5.
Aakriste mbela oye na okulongitha omushigakano?
Ombandi yomushigakano noshikoloni (Tala okatendo 12, 13)
12. Aakonakoni yOmbiimbeli oya kala uule woomvula odhindji ya tala ko ngiini omushigakano?
12 Aakonakoni yOmbiimbeli oya kala uule woomvula odhindji ya tala ko omushigakano gu li oshinima shopaKriste. Ihe kaya li yi itaala kutya ogu na okwiinyongamenwa, molwashoka oya li ye shi kutya okulongela iikalunga okwa puka. (1 Kor. 10:14; 1 Joh. 5:21) Okuza nokuli mo 1883, Oshungolangelo oya kala hayi popi kutya “okulongela iikalunga koludhi kehe iihuna yowala koshipala shaKalunga.” Ihe petameko Aakonakoni yOmbiimbeli kaya li ye wete sha puka okulongitha omushigakano momikalo dhontumba. Pashiholelwa, oya li haya zala ombandi yi na omushigakano noshikoloni, opo ya monike kutya yo Aakonakoni yOmbiimbeli. Kuyo ombandi oya li tayi ulike kutya ngele oya kala aadhiginini sigo omeso, otaya ka mona omwenyo gwaaluhe. Okuza mo 1891, kombanda yOshungolangelo okwa li haku kala endhindhiliko lyomushigakano noshikoloni.
13. Aalanduli yaKristus oya pewa uuyelele wuni kombinga yelongitho lyomushigakano? (Tala wo oshimpungu “ Uuyelele kombinga yokulongitha omushigakano tawu ende tawu yele.”)
13 Aakonakoni yOmbiimbeli oya li ya lenga noonkondo omushigakano noshikoloni. Ihe okutameka mo 1920 nasha, aalanduli yaKristus oya kala taya yelithilwa kashona nakashona kombinga yokulongitha omushigakano. Omumwatate Grant Suiter ngoka a ka ninga oshilyo shOlutuwiliki, ota dhimbulukwa oshigongi shoka sha ningilwe mo 1928 moDetroit moMichigan moAmerika. Okwa ti: “Poshigongi mpoka opwa popiwa kutya omushigakano noshikoloni inayi pumbiwa yo oya puka.” Momukokomoko gwoomvula dha ka landula uuyelele kombinga yayo owe ende tawu yele. Osha yele mo kutya omushigakano kagu na mo ehala melongelokalunga lya yela.
14. Oshigwana shaKalunga oshi inyenge ngiini sho uuyelele kombinga yomushigakano we ende tawu yele?
14 Oshigwana shaKalunga oshi inyenge ngiini sho uuyelele kombinga yomushigakano we ende tawu yele? Mbela osha tsikile owala okulongitha ombandi yomushigakano noshikoloni ndjoka sha kala sha lenga? Lela Roberts ngoka a kala ta longele Jehova uule woomvula odhindji, okwa ti: “Sho twa mono kutya otayi ti shike, otwe yi etha po nziya.” Omumwameme gulwe omudhiginini, Ursula Serenco, ota popi shoka oyendji ya li yu uvite sho a ti: “Otwa dhimbulula kutya oshinima shoka twa li twa lenga ongoendhindhiliko lyeso lyOmuwa gwetu neigandjo lyetu lyopaKriste, nani endhindhiliko lyoshipagani. Otwa li twa pandula sho uuyelele we ende tawu yele metsokumwe nOmayeletumbulo 4:18.” Aalanduli yaKristus aadhiginini kaya li ya hala nando okwiinyateka niinima yomalongelokalunga giifundja.
15, 16. Ongiini tatu vulu okuulika kutya otwa tokola toko okukaleka ehale lyotempeli yaJehova yopambepo kombanda yevi lya yela?
15 Natse kunena osho tu uvite ngaaka. Otwa dhimbulula kutya Kristus okwa kala ta longitha omupiya omudhiginini nomunandunge okukwathela aalanduli ye ya kale ya yela pambepo. Onkee ano ohatu vulika neendelelo, ngele otwa londodhwa kombinga yiituthi nomithigululwakalo ndhoka dha yama komalongelokalunga giifundja. Ngaashi naanaa aamwatate naamwameme mboka ya li ko sho Kristus opo owala a tameke okupangela, natse otwa tokola toko okukaleka ehale lyotempeli yaJehova yopambepo kombanda yevi lya yela.
16 Momasiku ngaka gahugunina, Kristus okwa kala ta ningi iinima mbyoka kaatu wete a gamene omagongalo goshigwana shaJehova kwaamboka tashi vulika ya hala ye ga nyateke pambepo. Okwe shi ningi ngiini? Natu taleni.
Okuyoolola aantu “aawinayi maawanawa”
17, 18. Meyele lyoshiyulitho, oshike tashi thanekwa (a) kokuumbila oshiyulitho shoohi mefuta, (b) ‘kokukwata oohi dhomaludhi agehe’ (c) kokutula oohi oombwanawa miiyuma (d) kokweekelahi oohi oombwinayi?
17 Omukwaniilwa Jesus Kristus ota tonatele omagongalo goshigwana shaKalunga kombanda yevi alihe. Kristus naayengeli ye oya kala taya yoolola aantu momukalo moka itaatu vulu naanaa okuuva ko. Jesus okwa hokolola kombinga yoshinima shika meyele lye lyoshiyulitho. (Lesha Mateus 13:47-50.) Eyele ndyoka otali ti shike?
Oshiyulitho otashi thaneke euvitho lyUukwaniilwa ndyoka tali uvithilwa mefuta ndyoka tali thaneke aantu kombanda yevi alihe (Tala okatendo 18)
18 Okuumbila “oshiyulitho shoohi . . . mefuta.” Oshiyulitho otashi thaneke euvitho lyUukwaniilwa ndyoka tali uvithilwa mefuta ndyoka tali thaneke aantu kombanda yevi alihe. “Okukwata oohi dhomaludhi agehe.” Onkundana ombwanawa ohayi nana aantu yomaludhi agehe mboka yamwe haya ningi Aakriste yashili nosho wo oyendji mboka petameko haya ulike ohokwe moshili, ihe ihaye ke yi taamba ko. e Okutula ‘oohi oombwanawa miiyuma.’ Aanamitima omiwanawa otaya gongelwa miiyuma, mbyoka tayi thaneke omagongalo, moka taya vulu okulongela Jehova melongelokalunga lya yogoka. Okweekelahi oohi “oombwinayi.” Momasiku ngaka gahugunina Kristus naayengeli oya kala taya yoolola aantu “aawinayi maawanawa.” f Nomolwaashono mboka kaaye na omitima omiwanawa, ano mboka inaaya hala okweetha po omaitaalo ga puka, inaaye ethelwa mo megongalo. g
19. Owu uvite ngiini sho Kristus a kala ta gamene elongelokalunga lyashili nosho wo oshigwana shaKalunga shi kale sha yogoka?
19 Itashi nyanyudha tuu okutseya kutya Omukwaniilwa gwetu, Jesus Kristus, ota gamene aalanduli ye! Notashi hekeleke noonkondo okutseya kutya natango Jesus oku na uulaadhi wokukaleka elongelokalunga lyashili lya yela, ngaashi naanaa a li e wu na sho o opaleke otempeli methelemumvo lyotango. Inatu pandula tuu sho Kristus a kala ta gamene elongelokalunga lyashili nosho wo oshigwana shaKalunga shi kale sha yogoka pambepo! Otatu vulu okwaambidhidha Omukwaniilwa nUukwaniilwa we mokukala kaatu na ekwatathano lyasha nomalongelokalunga giifundja.
a Opo Aajuda mboka ya za kokule ya vule okufuta oompale dhotempeli dhokomumvo, oya li ye na okupingakanitha iimaliwa yawo naapingakanithi yiimaliwa mboka ya li haye ya pula iihohela. Oshikwawo, otashi vulika aatalelipo ya li ye na okulanda iinamwenyo mbyoka taya ka yamba. Jesus okwi ithana aahalithi ‘aayugi,’ tashi vulika molwashoka ya li haya nyokoma aantu.
b Aapiya yaJehova kombanda yevi ohaye mu longele mehale lyotempeli ye onene yopambepo.
c Oshileshwa shika osha popi kutya ngele otwi itaala kutya Jesus okwa valwa pokufu, “itashi tsu kumwe nehokololo ndyoka tali popi kutya aasita oya li melundu ya langela iimuna yawo.” — Luk. 2:8.
d Omumwatate Frederick W. Franz mo 14 Novomba 1927 okwa nyolele ontumwafo tayi ti: “Omvula ndjika itatu ka dhana Okrismesa. Aabetel oya tokola kutya itaya kala we haya dhana Okili.” Konima yoomwedhi dhontumba, mo 6 Febuluali 1928, omumwatate Franz okwa nyola a ti: “Omuwa ote tu yogola kashona nakashona komapuko gomalongelokalunga gOshibabilonia ngoka taga wilikwa kOndiyapoli.”
e Pashiholelwa, ndhindhilika kutya mo 2013 otwa adha oshitsa shopombanda shaauvithi 7 965 954, omanga aantu 19 241 252 ya li pEdhimbuluko lyeso lyaKristus.
f Okuyoolola oohi oombwinayi moombwanawa inaku faathana nokuyoolola oonzi miikombo. (Mat. 25:31-46) Okuyoolola nenge epangulo lyahugunina lyoonzi niikombo otali ka ningwa pethimbo lyuudhigu uunene mboka wu li komeho. Manga shoka inaashi ningwa, mboka ya fa oohi oombwinayi otaya vulu okugalukila kuJehova e taya gongelwa momagongalo ngoka taga faathanithwa niiyuma. — Mal. 3:7.
g Hugunina ndhoka oombwinayi otadhi ku umbilwa meziko lyomulilo gwopathaneko, shoka tashi ti otaya ka hanagulwa po.
Opu na ishewe uuyelele mbuka
OSHUNGOLANGELO YOKUKONAKONWA
Mbuka uuthiga wetu wopambepo
Okukala tu shi uuthiga wetu wopambepo nokukala tu na olupandu lwawo otaku ke tu kwathela tu kale twa tokola toko tu kale aadhiginini kuKalunga.
OSHUNGOLANGELO YOKUKONAKONWA
Mbela owu ‘uvite ko Omanyolo’?
Otwi ilongo shike meyele lyomukuni ngoka a kotha, lyoshiyulitho shoohi nosho wo lyomumati a kanene?
