Iilonga yaayapostoli 28:1-31
28 Konima sho twa thiki komutunda tu li nawa, otwa uvu kutya ontuntu ndjoka ohayi ithanwa Malta.
2 Opo nduno aakalimo yamo* oye tu ulukile olukeno olunene. Oye tu taamba ko atuhe nombili, noya tema omulilo, molwaashoka omvula oya li tayi loko, noku na uutalala.
3 Ihe sho Paulus a tyaya oshihampi shiikuni, nokwe yi tula peziko, miikuni omwa hituluka epili* omolwuupyu womulilo, nolye mu idhingile koshikaha.
4 Sho aakalimo yomontuntu ndjoka ya mono eyoka li na uuzigo lya idhingila koshikaha she, oya tameke okulombwelathana taya ti: “Oshili omulumentu nguka omudhipagi, oshoka nonando okwa hupa mefuta, kalungakiintu gwuuyuuki* ine mu pitika a kale nomwenyo.”
5 Nonando ongawo, okwe li nipile momulilo, noinali mu monitha nando oshiponga shasha.
6 Ihe aantu oya li ya tegelela a zinde, nenge a se pethimbo mpoka. Konima sho ya kala ya tegelela ethimbo ele, noya mono kutya ina mona nando oshiponga shasha, oya lundulula omadhiladhilo gawo, noya tameke okupopya kutya Paulus okalunga.
7 Popepi nehala ndyoka opwa li omapya gomukuluntu gwontuntu ndjoka, gwedhina Publius, nokwe tu taamba ko e te tu yakula nawa uule womasiku gatatu.
8 Pethimbo mpoka, he yaPublius okwa li a lala mombete e na oshivu nosho wo oshimela, na Paulus okwa yi kuye, nokwa galikana, te mu tenteke iikaha ye, nokwe mu aludha.
9 Konima yaashoka, aantu ayehe yomontuntu ndjoka, mboka ya li taya ehama, nayo oya tameke okuya kuPaulus, nokwe ya aludha.
10 Oye tu pe wo omagano ogendji, naasho twa li pokuthayila nosikepa, oye tu pe kehe shoka twa pumbwa.
11 Konima yoomwedhi ndatu, otwa thayila nosikepa yi na endhindhiliko tali ti “Oyanamati yaZeus.”* Osikepa ndjoka oya li ya za kuAleksandria, noya kala montuntu ndjoka, sigo okufu kwa piti.
12 Sho twa tula petulilosikepa lyaSirakusa, otwa kala moka uule womasiku gatatu;
13 okuza mpoka, otwa yi kuRegio. Konima yesiku limwe, opwa tukuluka ombepo, tayi pepe tayi zi kuumbugantu, notwa thiki muPuteoli esiku lya landula ko.
14 Moka, otwa adha mo aamwatate, noye tu pula, tu kale puyo uule womasiku gaheyali, nokuza mpoka, otwa yi twa thinda kuRoma.
15 Sho aamwatate ya uvu kutya otu li mondjila, oye ya sigo okomalandithilo gaAppius nopehala, hali ithanwa Omagumbo Gatatu Gaayenda,* ye tu tsakaneke. Sho Paulus e ya mono, okwa pandula Kalunga, noshe mu tsu omukumo.
16 Hugunina, sho twa thiki muRoma, Paulus okwa pitikwa a kale ha zi megumbo, he li futile, e li nomukwiita, te mu tonatele.
17 Ihe konima yomasiku gatatu, okwa gongaleke aalumentu, mboka ya simanekwa kAajuda. Sho ya gongala, okwa ti kuyo: “Aalumentu ne, aamwatate, nonando inandi yona sha kaantu, nenge oonkuluhedhi dhootatekulululwa, onda gandjwa miikaha yAaroma okuza kuJerusalem ndi li omunandholongo.
18 Konima sho ya pulapula ndje, oya li ya hala okumangulula ndje, oshoka oya mono kutya inandi ninga sha nando, sha gwana okudhipagitha ndje.
19 Ihe sho Aajuda ye shi tindi, onda pula, opo oshipotha shandje shi ka talululwe kOmukesari, ihe shoka inandi shi ninga andola molwaashoka ndi li ompinge noshigwana shetu.
20 Onkee ano omolwoshinima shoka, onda pula, ndi mu mone, nondi popye nane, oshoka onda tulwa momalyenge ngaka omolwetegameno lyoshigwana shaIsraeli.”
21 Oya ti kuye: “Inatu yakula oontumwafo, dha za kuJudea, tadhi popi kombinga yoye, noinaku za nando omumwatate gumwe ta hokolola, nenge ta popi sha oshiwinayi kombinga yoye.
22 Ihe otu wete shi li pandunge okuuva kungoye kutya oto ti ngiini, oshoka otu shi shi nawa kutya oshimpaga sheni otashi popilwa muuwinayi kehe pamwe.”
23 Nena oya ningi elongekidho, ya tsakanene naye esiku limwe, noye ya oyendji noonkondo shi vulithe nale kehala, hoka a li ha zi. Opo nduno okuza ongula sigo okongulohi, okwe ya yelithile oshinima shoka moku ya pa uumbangi nawanawa kombinga yUukwaniilwa waKalunga, e ya tompe ya itaale iinima, mbyoka ya popiwa kombinga yaJesus mOmpango yaMoses nokAahunganeki.
24 Yamwe oya tameke okwiitaala iinima, mbyoka ta popi; yalwe inaye mu itaala.
25 Onkee ano molwaashoka kaya li taya tsu kumwe, oya tameke taya yi, na Paulus okwa popi ta ti:
“Omuhunganeki Jesaja okwa li a lombwelwa sha yela okupitila mombepo ondjapuki a lombwele oohokulululwa
26 ta ti, ‘Inda koshigwana shika e to shi lombwele to ti: “Otamu ka pulakena shili, ihe itamu ka uva ko, notamu ka tala shili, ihe itamu ka mona ko nando.
27 Oshoka aantu mbano oya kukutika omitima dhawo; omakutsi oye na, ihe ihaya pulakene. Omeho gawo oye ga thithikilitha, kaaya mone ko nando, nomakutsi gawo oye ga thitika, opo shoka tashi popiwa kaashi gume omitima dhawo, yo ya itedhulule, nondi ya aludhe.”’
28 Onkee ano tseyeni kutya ehupitho, ndika lya zi kuKalunga, otali tseyithilwa iigwana; otayi ka pulakena lela kulyo.”
29 ——
30 Onkee ano Paulus okwa tsikile okukala megumbo, ndyoka ha futile, uule womimvo mbali, nokwa kala ha taamba ko nombili ayehe, mboka haye ya kuye,
31 te ya uvithile kombinga yUukwaniilwa waKalunga, noku ya longa kombinga yOmuwa Jesus Kristus nehwamo,* kaapu na shoka tashi mu imbi.
Omanyolo gopevi
^ Nenge “aapopi yelaka lyoshikwiilongo.”
^ Nenge “eyoka.”
^ mOshigreka Dike, tashi vulika tashi ulike kukalungakiintu kegeelo, nenge kuuyuuki momukalo gwentuumpeko.
^ Nenge tashi vulika, “yi na oshiyelekela shoyanamati yaZeus.”
^ Nenge “ehala lyokulila nokuthuwa po.”
^ Nenge “nuulaadhi.”
