PaJohannes 17:1-26
17 Sho Jesus a popi oohapu ndhika, okwa ligamene kegulu, nokwa ti: “Tate, ethimbo olya thika. Tumbalekitha omumwoye, opo omumwoye naye e ku simanekithe,
2 ngaashi owala we mu pa oonkondopangelo dhokupangela aantu ayehe, opo a vule okupa omwenyo gwaaluhe ayehe mboka we mu pa.
3 Opo aantu ya ka mone omwenyo gwaaluhe, oye na oku ku tseya, Kalunga awike kashili, nosho wo ngoka wa tuma, Jesus Kristus.
4 Onde ku simanekitha kombanda yevi, nonda gwanitha iilonga, mbyoka wa li wa pe ndje, ndi yi longe.
5 Onkee ano ngashingeyi, Tate, tumbalekitha ndje netumbalo, ndyoka nda li ndi na sho nda li pungoye, manga uuyuni inaawu shitwa.
6 “Ngame onda tseyithila* aantu edhina lyoye, mboka wa pa ndje okuza muuyuni. Oya li yoye e to ya pe ndje, noya dhiginina* oohapu dhoye.
7 Ngashingeyi, oye shi shi kutya iinima ayihe, mbyoka wa pa ndje, oya za kungoye;
8 molwaashoka onde ya lombwela oohapu, ndhoka wa lombwela ndje, noye dhi taamba ko, noye shi shi lela kutya onde ya ndi li omukalelipo gwoye, noya itaala kutya ongoye wa tuma ndje.
9 Otandi galikana kombinga yawo; hakombinga yuuyuni, ihe okombinga yaamboka wa pa ndje, molwaashoka oyoye;
10 iinima yandje ayihe oyoye, noyoye oyandje, nonde ku simanekitha mokati kawo.
11 “Ngame kandi li we muuyuni, oshoka otandi ya kungoye, ihe yo omo ye li muuyuni. Tate Omuyapuki, ya tonatela omolwedhina lyoye, ndyoka wa pe ndje, opo ya kale ya hangana, ngaashi ngame nangoye twa hangana.
12 Sho nda li nayo, onda li handi ya tonatele omolwedhina lyoye, ndyoka wa pa ndje; onde ya gamena, nokapu na nando ogumwe gwomuyo a hanagulwa po, kakele komuna gwehanagulo, opo enyolo li vule okugwanithwa.
13 Ihe ngashingeyi, ngame otandi ya kungoye, niinima mbika otandi yi popi muuyuni, opo ya kale ye na enyanyu enene, ngaashi ngame ndi li na.
14 Onde ya lombwela oohapu dhoye, ihe uuyuni owu ya tonde, molwaashoka kaye shi oshitopolwa shuuyuni, ngaashi owala ngame kaandi shi oshitopolwa shuuyuni.
15 “Itandi indile wu ya kuthe mo muuyuni, ihe owu ya gamene kumwiinayi.
16 Kaye shi oshitopolwa shuuyuni, ngaashi owala ngame kaandi shi oshitopolwa shuuyuni.
17 Ya yapula* noshili; oohapu dhoye odho oshili.
18 Ngaashi owala wa tuma ndje muuyuni, nangame onde ya tuma wo muuyuni.
19 Otandi iyapula molwawo, opo nayo ya yapulwe noshili.
20 “Itandi galikana owala kombinga yawo, ihe okombinga wo yaayehe, mboka taya itaale ndje omolwoohapu dhawo,
21 opo ayehe ya kale ya hangana, ngaashi ngame nangoye, Tate, twa hangana. Nayo naya kale ya hangana natse, opo uuyuni wu itaale kutya ongoye wa tuma ndje.
22 Onde ya pa etumbalo, ndyoka wa pa ndje, opo ya kale ya hangana, ngaashi ngame nangoye twa hangana.
23 Ngaashi wa hangana nangame, nangame onda hangana nayo, opo ya kale ya hangana thiluthilu, nuuyuni wu tseye kutya ongoye wa tuma ndje nosho wo kutya owa kala wu ya hole, ngaashi wa kala wu hole ndje.
24 Tate, onda hala mboka wa pa ndje ya ka kale mpoka ndi li, opo ya ka mone etumbalo, ndyoka wa pa ndje, molwaashoka owa kala wu hole ndje, manga uuyuni inaawu shitwa.
25 Tate Omuyuuki, odhoshili kutya uuyuni inawu ku tseya, ihe ngame ondi ku shi, naambaka oye shi kutya ongoye wa tuma ndje.
26 Ngame onde ya tseyithila edhina lyoye, notandi ke li tseyitha natango, opo wu kale wu ya hole, ngaashi wu hole ndje, nondi kale nda hangana nayo.”
