paMarkus 8:1-38
8 Pomasiku ngeyaka opwa li ishewe ongundu onene yaantu, ndjoka ya li ya gongalele Jesus, ihe kaya li ye na sha shokulya. Onkee ano Jesus okwa ithana aalongwa ye nokwa ti kuyo:
2 “Onda etela ohenda ongundu ndjika yaantu, oshoka pungame oya kala po nale omasiku gatatu, nokaye na sha shokulya.
3 Ngele onde ya laleke ya ye komagumbo gawo inaaya lya sha, otashi vulika ya ka kambukile mondjila, oshoka yamwe yomuyo oya za kokule.”
4 Ihe aalongwa ye oye mu yamukula ya ti: “Openi tatu adha iikwiila ya gwana okukutitha aantu mbaka mehala ndika li ikalela?”
5 Opo ihe Jesus okwe ya pula ta ti: “Omu na po iikwiila ingapi?” Oya ti: “Iheyali.”
6 Opo nduno okwa lombwele ongundu yaantu yi kuutumbe pevi. Opo ihe okwa kutha iikwiila iheyali e ta galikana, nokwe yi pambula e ta tameke oku yi pa aalongwa ye, noye yi gandja kongundu yaantu.
7 Oya li wo ye na po uuhi uushona, nokonima sho Jesus a galikana okwe ya lombwele wo ye wu topolele aantu.
8 Onkee ano oya li noya kuta, naalongwa oya gongele iipambu, mbyoka ya hupu po ya udha iimbamba iinene iheyali.
9 Aalumentu, mboka ya li, oya li 4 000. Konima yaashono, okwe ya laleke ya ye.
10 Nziya, Jesus okwa yi pamwe naalongwa ye mowato, noya yi koshitopolwa shaDalmanuta.
11 Hoka Aafarisayi oye ya kuye, noya tameke oku mu ludhikitha, taye mu pula e ya ulukile endhindhiliko lya za megulu, opo ye mu makele.
12 Onkee ano Jesus okwa fudha muule e ta ti: “Omolwashike epipi ndika tali kongo endhindhiliko? Oshili tandi mu lombwele, epipi ndika itali pewa endhindhiliko lyasha.”
13 Opo ihe okwe ya thigi po e ta yi ishewe mowato pamwe naalongwa ye, noya yi handiyaka yomunkulofuta.
14 Ihe aalongwa oya dhimbwa okweetelela iikwiila, nomowato oya adhika owala ye na mo oshikwiila shimwe.
15 Opo nduno okwe ya londodha ta ti: “Kaleni mwa kotokela efulika lyAafarisayi nolyaHerodes.”
16 Onkee ano oya tameke okupaathana uusama, sho inaaya etelela iikwiila.
17 Sho Jesus e shi dhimbulula, okwa ti kuyo: “Omolwashike tamu paathana uusama, sho inaamu etelela iikwiila? Mbela shono nda popi oshe mu yelela ngaa, nomu shi uvite ko tuu? Natango omitima dheni inadhi patuluka, sho kaamu uvite ko?
18 ‘Omeho omu na, ihe kamu wete ko; omakutsi omu na, ihe kamu uvite ko.’ Itamu dhimbulukwa nani,
19 sho nda topolele aalumentu 5 000 iikwiila itano kutya omwa gongele iimbamba ingapi ya udha iipambu, mbyoka ya hupu po?” Oya ti kuye: “Omulongo niiyali.”
20 “Itamu dhimbulukwa wo, sho nda topolele aalumentu 4 000 iikwiila iheyali kutya omwa gongele iimbamba ingapi iinene ya udha iipambu, mbyoka ya hupu po?” Oya ti kuye: “Iheyali.”
21 Opo nduno okwa ti kuyo: “Kamu uvite ko natango?”
22 Jesus naalongwa ye oya thiki muBetsaida. Sho ye li moka, aantu oya eta kuJesus omulumentu omuposi, noye mu indile ya mana mo e mu gume.
23 Opo nduno okwa kwata omulumentu ngoka omuposi moshikaha e te mu fala kondje yoshilando. Konima sho e mu hiyile omayeye momeho, okwe mu tenteke iikaha e te mu pula ta ti: “Owu wete sha?”
24 Omulumentu ngoka okwa yelutha omeho ge e ta ti: “Ondi wete aantu, ihe otaya monika ya fa omiti tadhi ende.”
25 Jesus okwa gumu ishewe omulumentu ngoka pomeho niikaha ye e ta tsikuluka, nokwa kala e wete iinima ayihe nawa.
26 Opo ihe okwe mu lombwele a ye kegumbo a ti: “Ino shuna mo moshilando shoka.”
27 Okuza mpono Jesus naalongwa ye oya yi komikunda dhaKesarea Filippi, nomanga ye li mondjila, Jesus okwa tameke okupula aalongwa ye ta ti: “Aantu otaya ti ongame lye?”
28 Oye mu yamukula ya ti: “OJohannes Omuninginithi, ihe yamwe otaya ti ongoye Elia, nayalwe otaya ti ongoye gumwe gwomaahunganeki.”
29 Opo ihe okwe ya pula ta ti: “Ihe ne otamu ti ongame lye?” Petrus okwe mu yamukula ta ti: “Ongoye Kristus.”
30 Opo nduno okwe ya londodha kaaya lombwele nando omuntu kombinga ye.
31 Okwa tameke wo oku ya longa kutya Omuna gwomuntu ota ka hepekwa nonyanya noita ka taambiwa ko kaakuluntu yoshigwana, kaayambi aakuluntu nokaalongimpango, nota ka dhipagwa e ta yumudhwa konima yomasiku gatatu.
32 Okwa popi oohapu ndhoka nopwaa na oku ya holeka sha. Ihe Petrus okwe mu ithana po e ta tameke oku mu ganda.
33 Opo ihe Jesus okwa punguluka e ta tala kaalongwa ye, nokwa ganda Petrus ta ti: “Za po, Satana! Oshoka ito dhiladhila ngaashi Kalunga, ihe ongaashi aantu.”
34 Opo nduno okwa ithana ongundu yaantu nosho wo aalongwa ye e ta ti kuyo: “Kehe ngoka a hala okulandula ndje na ihupule ye mwene, ye ta itsike omuti gwe gwomahepeko* e ta tsikile okulandula ndje;
35 oshoka kehe ngoka ta kambadhala okuhupitha omwenyo gwe ote gu kanitha, nakehe ngoka ta kanitha omwenyo gwe omolwandje nomolwonkundana ombwanawa ote gu hupitha.
36 Onkee ano otashi kwatha shike, ngele omuntu ta ilikolele uuyuni awuhe e ta kanitha omwenyo gwe?
37 Oshike naanaa omuntu ta vulu okugandja opo a kale nomwenyo?
38 Kehe ngoka ta si ndje ohoni nosho wo oohapu dhandje mokati kepipi ndika kaali shi edhiginini nekolokoshi, Omuna gwomuntu ote ke mu sa wo ohoni sho te ke ya meadhimo lyahe pamwe naayengeli aayapuki.”
Omanyolo gopevi
^ Tala Omafatululo giitya.
