PaMateus 13:1-58
-
OMATHANEKO KOMBINGA YUUKWANIILWA (1-52)
-
Omukuni (1-9)
-
Etompelo kutya omolwashike Jesus a longitha omathaneko (10-17)
-
Ethaneko lyomukuni tali yelithwa (18-23)
-
Iilya nomawu (24-30)
-
Omuma yosinapi nosho wo efulika (31-33)
-
Ehunganeko kombinga yokulongitha omathaneko lya gwanithwa (34, 35)
-
Ethaneko lyiilya nomawu tali yelithwa (36-43)
-
Eliko lya holekwa nokamanya kondilo (44-46)
-
Onete yoohi (47-50)
-
Eliko lyiinima iipe niikulu (51, 52)
-
-
Aantu yomoshitopolwa moka Jesus a za, ya tindi oku mu itaala (53-58)
13 Esiku ndyoka, Jesus okwa zi mo megumbo e ta ka kuutumba pomunkulofuta.
2 Opo ihe aantu oyendji oye ya ye mu gongalele, nokwa yi mowato e ta kuutumba, omanga ongundu ayihe yaantu ya li ya thikama pomunkulofuta.
3 Opo nduno okwe ya lombwele iinima oyindji ta longitha omathaneko, ta ti: “Omukuni okwa yi a ka kune.
4 Sho a li ta kunu, oombuto dhimwe odha gwile mondjila, nuudhila owe ya e tawu dhi li po.
5 Dhimwe odha gwile mevi lya nika omamanya, nodha mene nziya, molwaashoka kapwa li evi olindji.
6 Ihe etango sho lya piti, iimeno mbyoka oya lembe e tayi ganya, molwaashoka omidhi dhayo kadha li dha ya muule.
7 Dhimwe odha gwile mokati koondjoho, naasho oondjoho dha koko, odha thininike iimeno.
8 Dho dhimwe odha gwile mevi ewanawa, naasho dha koko, odha vala, dhimwe olwethele, dhimwe olwomilongo hamano, noonkwawo olwomilongo ndatu.
9 Ngoka e na omakutsi, na uve ko.”
10 Onkee ano aalongwa oye ya kuye e ta ye mu pula taya ti: “Omolwashike to popi nayo to longitha omathaneko?”
11 Okwe ya yamukula a ti: “Ne omwa pewa ontseyo yokutseya iiholekwa iiyapuki yUukwaniilwa womegulu, ihe yo inaye yi pewa.
12 Kehe ngoka e na, ota pewa oshindji e ta kala e na oshindji lela. Ihe ngoka kee na sha, ota kuthwa nokuli naashoka e na;
13 nomolwaashoka tandi popi nayo tandi longitha omathaneko; oshoka nonando ohaya mono ko, kaye wete ko, nonando oye na omakutsi, ihaya pulakene noihaya uvu ko eityo lyaashoka tashi popiwa;
14 nehunganeko lyaJesaja otali ya gwanithilwa, ndyoka tali ti: ‘Nonando otamu ka pulakena, itamu ka uva ko eityo lyaashoka tashi popiwa, ne nonando ohamu mono ko, itamu ka kala mu wete ko.
15 Oshoka aantu mbaka oya kukutika omitima dhawo; omakutsi oye na, ihe ihaya pulakene, omeho gawo oye ga thithikilitha, kaaya mone ko nando, nomakutsi gawo oye ga thitika, opo shoka tashi popiwa kaashi gume omitima dhawo, nokaaya uve ko eityo lyasho, yo yi itedhulule nondi ya aludhe.’
16 “Nonando ongawo, ne kaleni mwa nyanyukwa, oshoka omeho geni oge wete ko, nomakutsi geni oge uvite ko.
17 Oshili tandi mu lombwele, aahunganeki naayuuki oyendji oya li ya halelela okumona iinima mbyoka mwe yi mono, ihe inaye yi mona, noya li ya hala okuuva iinima mbyoka mwe yi uvu, ihe inaye yi uva.
18 “Ngashingeyi pulakeneni shoka ethaneko* lyomukuni tali ti.
19 Kehe ngoka ta pulakene ketumwalaka lyUukwaniilwa, ihe ke li uvite ko, okwa fa oombuto ndhoka dha kunwa mondjila, mwiinayi e te ya e te mu yugu shoka sha kunwa momutima gwe.
20 Ndhoka dha kunwa mevi lya nika omamanya, oye ngoka ta uvu etumwalaka ndyoka e te li taamba ko nziya nenyanyu.
21 Ihe molwaashoka inali mena omidhi muye, ote li taamba ko owala uule wokathimbo, nuuna pwa holoka uupyakadhi, nenge omapataneko omolwetumwalaka ndyoka, nena ota sholola.
22 Ndhoka dha gwile mokati koondjoho, oye ngoka a uva etumwalaka, ihe iimpwiyu yuuyuni mbuka* nefundjaleko lyomaliko otayi thininike etumwalaka ndyoka noitali imike iiyimati muye.
23 Ndhoka dha kunwa mevi ewanawa, oye ngoka ta uvu etumwalaka e ta uvu ko eityo lyalyo; ngoka oye lela ta imike nokulikola iiyimati, gumwe olwethele, gumwe olwomilongo hamano, nagulwe olwomilongo ndatu.”
24 Okwe ya lombwele ishewe ethaneko limwe, a ti: “Uukwaniilwa womegulu otawu faathanithwa nomulumentu, ngoka a kuna oombuto oombwanawa mepya lye.
25 Manga aantu ya kotha, omutondi gwe okwe ya e ta kunu omawu mokati kiilya e ta yi.
26 Iilya sho ya mene e tayi vala, omawu nago wo oga holoka.
27 Nena aapiya yamwene gwegumbo oye ya kuye e taya ti: ‘Omuwa, mepya lyoye ino kuna mo nani oombuto oombwanawa? Omolwashike nduno mwa mena omawu?’
28 Okwa ti kuyo: ‘Omutondi e shi ningi.’ Aapiya ye oye mu pula taya ti: ‘Owa hala tu ye tu ke ga vudhe mo?’
29 Okwa ti: ‘Aawe, oshoka otashi vulika mu vudhe mo iilya pamwe nomawu.
30 Etheni ayihe yi kokele mumwe, sigo eteyo lya thiki, nuuna lya thiki, otandi ka lombwela aateyi: Tango gongeleni omawu e tamu ga manga iihampi ga fikwe po, opo nduno tamu gongele iilya miigandhi yandje.’”
31 Okwe ya lombwele ishewe ethaneko limwe, ta ti: “Uukwaniilwa womegulu owa fa omuma yosinapi, ndjoka omulumentu a kutha e te yi kunu mepya lye.
32 Nonando oyo oshuushuka koombuto adhihe, ohayi ningi omuti omunene gu vule iimeno ayihe, noondhila dhokegulu ohadhi ya dhi tungile iihandhila yadho kiitayi yagwo.”
33 Okwe ya lombwele ishewe ethaneko limwe ta ti: “Uukwaniilwa womegulu owa fa efulika, ndyoka omukiintu a kutha e te li lungile mumwe nuusila, wu udha iiyelekitho itatu iinene, sigo ondombo ayihe ya fulu.”
34 Iinima ayihe mbyoka okwe yi lombwele ongundu yaantu ta longitha omathaneko. Nokuli ka li ha popi nayo itaa longitha omathaneko,
35 opo oohapu ndhoka dha popiwa okupitila momuhunganeki, dhi gwanithwe, ndhoka tadhi ti: “Otandi popi tandi longitha omathaneko; otandi tseyitha iinima mbyoka ya kala ya holekwa okuza petameko.”*
36 Konima sho a laleke ongundu yaantu, okwa yi megumbo. Aalongwa ye oye ya kuye e taya ti: “Tu yelithila ethaneko lyomawu, ngoka ga kunwa mepya.”
37 Okwe ya yamukula a ti: “Omukuni gwombuto ombwanawa, Omuna gwomuntu;
38 epya olyo uuyuni, yo ombuto ombwanawa oyo oyana yUukwaniilwa, ihe omawu ogo oyana yamwiinayi,
39 nomutondi ngoka e ga kunu, Ondiyapoli. Eteyo otali ulike komasiku gahugunina guuyuni,* naateyi aayengeli.
40 Onkee ano ngaashi owala omawu ga gongelwa e taga fikwa po nomulilo, osho wo tashi ka kala pomasiku gahugunina guuyuni.*
41 Omuna gwomuntu ota ka tuma aayengeli ye, notaya ka yoolola mo mUukwaniilwa we iinima ayihe mbyoka hayi pundukitha aantu, naamboka haya longo shoka inaashi uka.
42 Oyo notaye ke ya umbila meziko lya hanya omulilo, moka taya ka lilagana nokwiikokota komayego.
43 Pethimbo ndyoka, aayuuki otaya ka adhima ongetango mUukwaniilwa waHe. Ngoka e na omakutsi, na uve ko.
44 “Uukwaniilwa womegulu owa fa eliko lya holekwa mepya, ndyoka omulumentu a mono e te li holeke; molwaashoka okwa li a nyanyukwa, okwa yi nokwa landitha po ashihe shoka a li e na e ta landa po epya ndyoka.
45 “Natango, Uukwaniilwa womegulu owa fa omulandithi omweendi ta kongo omagwe gondilo*.
46 Sho a mono egwe limwe lyondilo, okwa yi nokwa landitha po nziya iinima ye ayihe e te li landa po.
47 “Natango, Uukwaniilwa womegulu owa fa onete, ndjoka ya umbilwa mefuta e tayi kwata oohi dhomaludhi agehe.
48 Sho ya udha, oye yi nanene komunkulo gwefuta noya kuutumba ya hogolole mo ndhoka oombwanawa e taye dhi tula miikwatelwa yawo, ihe ndhoka oombwinayi oye dhi ekelehi.
49 Shoka osho wo tashi ka kala pomasiku gahugunina guuyuni.* Aayengeli otaya ka ya e taya yoolola mo aakolokoshi mokati kaayuuki
50 e taye ya umbile meziko lya hanya. Moka omo taya ka lilagana, nokwiikokota komayego.
51 “Omwa uva ko tuu shoka iinima ayihe mbika tayi ti?” Oya ti kuye: “Eeno.”
52 Opo nduno okwa ti kuyo: “Ngele osho shi li ngawo, omulongi kehe ha longo aantu montaneho, ngoka a longwa kombinga yUukwaniilwa womegulu, okwa fa omulumentu ngoka e li mwene gwegumbo nota holola mompungulilo yeliko lye iinima iipe niikulu.”
53 Sho Jesus a mana okugandja omathaneko ngaka, okwa zi po mpoka.
54 Konima sho a yi koshitopolwa shaandjawo, okwa tameke okulonga aantu moosinagoga dhawo, noya li ya kumwa e taya ti: “Omulumentu nguno uunongo mbuka noonkondo dhokulonga iikumithalonga okwe dhi adha peni?
55 Mbela nguka haye omwana gwomuhongi gwiipilangi? Yina ke shi Maria naamwayinamati kaye shi Jakob, Josef, Simon naJudas?
56 Naamwayinakadhona hayo mbaka ayehe ye li natse? Iinima ayihe mbyoka okwe yi adha nduno peni?”
57 Onkee ano inaye mu itaala. Ihe Jesus okwa ti kuyo: “Omuhunganeki iha kala a simanekwa moshitopolwa shaandjawo nomegumbo lyaandjawo.”
58 Molwaashoka kaya li ye na eitaalo, moshitopolwa shaandjawo ina longela mo iikumithalonga oyindji.
Omanyolo gopevi
^ Nenge “eyele.”
^ Nenge “yonkalelo yiinima yuuyuni mbuka.” Tala Omafatululo giitya.
^ Nenge tashi vulika, “okuza petameko lyuuyuni.”
^ Tala Omafatululo giitya.
^ Tala Omafatululo giitya.
^ Omagwe ngaka ohaga zi moonkosa dhomefuta.
^ Tala Omafatululo giitya.
