PaMateus 4:1-25
4 Opo ihe Jesus okwa falwa mombuga kombepo ondjapuki. Omanga e li hoka okwa makelwa kOndiyapoli.
2 Konima sho a idhilike iikulya uule womasiku 40, omutenya nuusiku, okwa li a sa ondjala.
3 Opo nduno Ondiyapoli* oye ya kuJesus e ta yi mu lombwele tayi ti: “Ngele ngoye omuna gwaKalunga shili, lombwela omamanya ngaka ga shituke iikwiila.”
4 Ihe Jesus okwe mu yamukula ta ti: “Okwa nyolwa: ‘Hakoshikwiila owala omuntu ta kala e na omwenyo, ihe okohapu kehe tayi zi mokana kaJehova.’”
5 Opo ihe Ondiyapoli oye mu fala moshilando oshiyapuki* e tayi mu londeke kondungu yekuma lyotempeli,
6 noye mu lombwele tayi ti: “Ngele ngoye omuna gwaKalunga shili, iyumbila pevi, oshoka okwa nyolwa: ‘Kalunga ote ku tumine aayengeli ye, ye ku gamene, opo waa pume nando ompadhi yoye kemanya.’”
7 Jesus okwa ti kuye: “Natango okwa nyolwa: ‘Ino makela* Jehova Kalunga koye.’”
8 Natango Ondiyapoli oye mu fala kondundu ondeendeka, noye mu ulukile omaukwaniilwa agehe gomuuyuni nesimano lyago
9 e tayi mu lombwele tayi ti: “Iinima ayihe mbika otandi yi ku pe, ngele owa inyongamene ndje e to galikana ndje.”
10 Opo ihe Jesus okwe mu lombwele a ti: “Za po Satana! Oshoka okwa nyolwa, ‘Jehova Kalunga koye oye awike wu na okwiinyongamena noku mu galikana, noye awike wu na oku mu longela iilonga iiyapuki.’”
11 Opo ihe Ondiyapoli oye mu thigi po, naayengeli oye ya e taye mu yakula.
12 Sho Jesus a uvu kutya Johannes okwa mangwa po, okwa yi kuGalilea.
13 Lwanima okwa zi mo muNasaret e ta ka kala muKapernaum popepi nefuta, miitopolwa yAasebulon noyAanaftali,
14 opo ku gwanithwe shoka sha popiwa okupitila momuhunganeki Jesaja, ngoka a ti:
15 “Aasebulon nAanaftali mboka mu li popepi nefuta, handiyaka yomulonga Jordan nosho wo Aagalilea mboka ya za miigwana yilwe;
16 aantu mboka ye li momilema oya mono uuyelele wa tsa, naamboka ye li moshitopolwa shomuzizimba gweso oya minikilwa kuuyelele.”
17 Okuza mpono, Jesus okwa tameke okuuvitha ta ti: “Itedhululeni, oshoka Uukwaniilwa womegulu owa hedha popepi.”
18 Sho a li ta ende komunkulofuta gwaGalilea, okwa mono aalumentu yaali aamwayinathana, Simon, ngoka ha ithanwa wo Petrus, nomumwayina, Andreas, taya umbile onete yawo mefuta, oshoka oya li aayuli yoohi.
19 Okwa ti kuyo: “Landulii ndje, ngame notandi mu ningi aayuli yaantu.”
20 Nziya oya thigi po oonete dhawo e taye mu landula.
21 Okuza mpono, okwa mono ishewe aalumentu yaali aamwayinathana, Jakob, omwana gwaSebedeus, nomumwayina Johannes. Oyo oya li mowato pamwe nahe, Sebedeus, taya andeke oonete dhawo e te ya ithana.
22 Nziya oya thigi po owato nosho wo he e taye mu landula.
23 Opo ihe Jesus okwa ende muGalilea ashihe, ta longo aantu moosinagoga, ta uvitha onkundana ombwanawa yUukwaniilwa nota aludha uuvu nuunkundi kehe wopalutu.
24 Shoka a ningi osha tseyika muSiria ashihe, naantu oya eta kuye mboka ye na omikithi nomauwehame gi ili nogi ili, ngaashi mboka ye na oondemoni, aanashintona naasimbanda e te ya aludha.
25 Shoka osha ningitha oongundu oonene dhaantu dhi mu landule, dha za kuGalilea, kuDekapolis,* kuJerusalem, kuJudea nosho wo handiyaka yaJordan.
Omanyolo gopevi
^ Nenge “Omumakeli.”
^ Sha hala okutya, kuJerusalem.
^ Nenge “ino tala po.”
^ Nenge “Oshitopolwa shIilando Omulongo.”
