Ombiimbeli oya popya kutya iita yaArmagedon itayi ka guma owala oshitopolwa shontumba, ihe uuyuni awuhe, oshoka otayi ka kala pokati komapangelo agehe gopantu naKalunga.

•   “Oombepo dhoompwidhuli . . . otadhi yi kaakwaniilwa yokombanda yevi alihe oku ya hanganitha, ya ka hinge iita mesiku enene lyaKalunga Omunankondoadhihe. . . . Nena oombepo odha gongele aakwaniilwa pehala ndyoka hali ithanwa mOshihebeli Armagedon.” — Ehololo 16:14, 16.

 Oshitya “Armagedon” osha za koshitya shOshihebeli Har Meghid·dohnʹ, shoka tashi ti “Ondundu yaMegiddo.” Megiddo osha li oshilando shomuIsraeli shonale. Omolwetompelo ndyoka, aantu yamwe oyi itaala kutya iita yaArmagedon otayi ka kala muIsraeli. Nonando ongawo, oshitopolwa shaMegiddo nenge yilwe mbyoka yi li mUuzilo woPokati, kapu na nando oshimwe oshinene sha gwana okukondjelwa “kaakwaniilwa yokombanda yevi alihe” pamwe nomatangakwiita gawo.

 Embo lyEhololo olya nyolwa momukalo ‘gwopathaneko’ nenge tu tye molupe lwomandhindhiliko. (Ehololo 1:1, yelekanitha OB-1954) Armagedon ina ukitha kehala lyo lyenelyene, ihe okonkalo ndjoka tayi ka guma uuyuni awuhe, sho iigwana tayi ki igongela yi kondjithe epangelo lyaKalunga. — Ehololo 19:11-16, 19-21.