Mo 23 Mei 2023, omutseyinawa gumwe guundjolowele moAmerika okwa londodha aantu kutya omakwatathano gopaintaneta oga nwethwa mo nayi aagundjuka oyendji.

•   Mo 2023, ehangano Social Media and Youth Mental Health: The U.S. Surgeon General’s Advisory, olya ti: “Nonando omakwatathano gopaintaneta otashi vulika haga kwathele aanona yamwe nosho wo aagundjuka yomimvo omulongo nasha, opu na uumbangi owundji mboka tawu ulike kutya otaga vulu wo oku ya guma nayi noonkondo pamadhiladhilo nosho wo palutu.”

 Onzo ndjoka oya gandja omatompelo kutya omolwashike twa pumbwa okukala tatu ipula nasho.

•   Aagundjuka yomimvo 12 sigo 15, “mboka haya longitha omakwatathano gopaintaneta uule woowili dhi vulithe 3 esiku kehe, oyo unene ye li iihakanwa yokukwatwa kuupyakadhi wopamadhiladhilo nokukala ya gwililwa po.”

•   Aagundjuka yomimvo 14, “oyo unene haya longitha omakwatathano gopaintaneta, nokwa monikwa kutya shoka oshe ya ningitha ya kale ihaaya kotha nawa, haya hindwa komalungula, haya kala ye wete ye na eholokopo ewinayi, ye uvite kaaye na oshilonga nohaya kwatwa kepolimano. Uupyakadhi mbuka ohawu adha unene aakadhona shi vulithe aamati.”

 Ongiini aavali taya vulu okugamena oyana komaupyakadhi ngoka? Ombiimbeli otayi gandja omayele taga longo.

 Katuka oonkatu. Mu li aavali, tseyeni uupyakadhi mboka wa kwatelwa mo nokutokola ngele aanona yeni otaya longitha omakwatathano gopaintaneta nenge hasho.

•   Ekotampango lyopaMbiimbeli: “Putudha omumati pandjila ndjoka e na okweenda nayo.” — Omayeletumbulo 22:6.

•   Opo wu ilonge oshindji, lesha oshitopolwa “Should My Child Use Social Media?”

 Ngele owa pitike aamwoye ya longithe omakwatathano gopaintaneta, kotokela omaupyakadhi ngoka taga vulu okuholoka po nokukala wu shi shoka haya ningi kointaneta. Ngiini mbela?

 Gamena aamwoye kiinima mbyoka ya nika oshiponga. Dheula aamwoye ya ndhindhilike mo iinima mbyoka noku yi yanda.

•   Ekotampango lyopaMbiimbeli: “Onkee itashi vulika, mokati keni tamu uvika oluhondelo niilonga ya nyata yoludhi kehe nolwiho. Osho wo inashi opala, ngele ne otamu popi oohapu tadhi sitha ohoni, omategu guugoya nenge oohapu dha nyata.” — Aaefeso 5:3, 4.

•   Opo wu mone iinima mbyoka tayi vulu oku ku kwathela, lesha oshitopolwa “Teaching Your Teenager Social Media Safety.”

 Tula po ongamba. Pashiholelwa, ya tulila po oompango kutya uunake nethimbo li thike peni taya vulu okulongitha omakwatathano gopaintaneta.

•   Ekotampango lyopaMbiimbeli: “Ikonakoneni ano nawa, nkene mu na okukala. . . . kaleni ngaashi aanandunge. Longitheni nawa ethimbo kehe mu li na.” — Aaefeso 5:15, 16.

•   Longitha okavidio kokoshipelende Kotokela omakwatathano gopaintaneta wu kwathele aamwoye ya uve ko kutya omolwashike we ya tulila po omangambeko.