Aantu muuyuni awuhe, otayi idhidhimikile ekuthikuthi lyuupyu wamatutu nosho wo iiponga yilwe mbyoka ya etithwa konkalo yombepo ndjoka. Tala koolopota tadhi landula:

•   Momasiku 13 Juli 2023, oshikondo shedhina National Oceanic and Atmospheric Administration, U.S. Department of Commerce, osha ti: “Okuza sho aantu ya tameke okukala haya nyola kombinga yonkalo yombepo muuyuni awuhe, omimvo 174 dha ka pita, shika osho oshikando shotango twa mona menenevi lyetu pethimbo lyaJuni, mwa pupyala noonkondo.”

•   Momasiku 13 Juli 2023, ehangano European Space Agency, olya ti: “Italia, Spania, Ndowishi naPoland oye li mekuthikuthi enene lyuupyu, nonkalo yombepo mokantuntu Sicily naSardinia oya tegelelika yi ka londe sigo 48°C, shoka inaashi monika nando onale mondjokonona yaEuropa.”

•   Momasiku 17 Juli 2023, Stefan Uhlenbrook, omuwiliki gwiinima yi na ko nasha nedhingoloko lyomeya mehangano World Meteorological Organization, okwa ti: “Sho opulanete tayi ende tayi pupyala, otwa tegelela okumona omvula onene nosho wo onkalo yombepo tayi nayipala, shoka tashi fala sigo omiikungulu oyindji.”

 Mbela oto ipula unene noolopota ndhika kombinga yonkalo yombepo ndjika ondhigu, sho tadhi ende tadhi indjipala? Tala shoka Ombiimbeli tayi ti kombinga yoshikundathanwa shika sha simana.

 Eeno. Omakuthikuthi guupyu muuyuni awuhe nosho wo oonkalo dhombepo dha nika oshiponga, otayi holola shoka Ombiimbeli ya hunganeka kombinga yethimbo lyetu. Pashiholelwa, Jesus okwa hunganeka kutya otatu ka mona iinima “iitilithi iinene nomandhindhiliko omakumithi.” (Lukas 21:11) Onkalo yombepo ndjoka ondhigu, oya ningitha oyendji ya kale ya tila kutya aantu otaya ka yonagula evi.

 Hasho nando. Kalunga okwa shita evi li kale egumbo lyetu lyaaluhe. Ke na esiku a pitike aantu ye li hanagule po. (Episalomi 115:16; Omuuvithi 1:4) Okwa uvaneka kutya ota ka “[hanagula] po mboka taa yonagula po evi.” — Ehololo 11:18.

 Ombiimbeli oya ulika kutya Kalunga ota vulu nota ka gamena evi kiiponga mbyoka tayi holoka.

•   “[Kalunga] okwa loteke ombepo yoshikungulu nokwa mweneke omakuthikuthi.” (Episalomi 107:29) Kalunga oku na oonkondo dhokupangela oonkondo dhomeshito. Ota vulu okukandula po omaupyakadhi ngoka ngashingeyi taga ningitha aantu ya mone iihuna konkalo yombepo ondhigu.

•   “Evi oho li sile oshimpwiyu, sho ho li tekele; oho li yambapaleke.” (Episalomi 65:9) Limwe lyomomayambeko ngoka tatu ka mona olyo kutya Kalunga ota ka ninga evi oparadisa.

 Opo wu ilonge oshindji kombinga yaashoka Ombiimbeli ya uvaneka shi na ko nasha nevi, tala oshitopolwa “Who Will Save the Earth?”