Oshigongi shoshitopolwa shomo 2020 osha li oshindhindhilikwe. Osho shotango sha kwatwa, e ta shi tulwa kointaneta. Ihe aamwatate naamwameme oyendji moMalawi nomoMosambike, oya li ya vulu okutala nenge okupulakena oshigongi itaaya longitha ointaneta. Osha li sha ende ngiini?

 Okomitiye yAaunganeki noyOkulonga yOlutuwiliki oya li ya gandja epitikilo, opo oshigongi shi ulikwe kootiivii noshi dhanwe kooradio moMalawi nomoMosambike. Omolwashike ya li ya pumbwa okuninga ngawo? Oshoka oshilongo shaMalawi osho shimwe shomiilongo yi na ointaneta yi na ondilo muuyuni, nOonzapo owala oonshona hadhi vulu okulongitha ointaneta. William Chumbi, oshilyo shOkomitiye yOshitayimbelewa shaMalawi, okwa ti: “Opo tu kwathela aamwatate naamwameme ya pulakene koshigongi, otwa li owala tu na okulongitha oradio notiivii.” Luka Sibeko, ngoka naye e li oshilyo shOkomitiye yOshitayimbelewa shaMalawi, okwa gwedha ko a ti: “Ando otwa li inaatu longitha oradio notiivii, andola aamwatate owala aashona mboka ye li miitopolwa mbyoka yi li kohi yoshitayimbelewa shetu ya vulu okupulakena nokutala oshigongi.” MoMosambike namo, aamwatate owala aashona ya li taya ka vula okulanda iikwaelektronika yokolela nosho wo ointaneta.

 Omolwomukithi nguka gwekomba, oositaasi dhimwe dhootiivii nodhooradio odha adhika nale hadhi dhana nokuulika omakugongala getu. a Onkee ano, aamwatate oya pula oositaasi ndhoka dhi ya kwathele dhi kale tadhi ulike notadhi dhana wo oshigongi.

 Aamwatate moMalawi oya li ye na uudhigu wontumba. Oositaasi dhokutuma iinima mombepo ohadhi pitike owala ookastoma dhawo dhi dhane nenge dhi ulike sha uule wowili. Ohadhi kala dha tila kutya ngele opolohalama oya dhanwa ethimbo ele unene, aapulakeni itaya ka kala ya hala oku yi pulakena nenge oku yi tala. Ihe aamwatate oya yelitha kutya iilonga yetu ohayi kwathele aakwashigwana. Nokuli nopethimbo ndika lyoKorona, otatu pe aantu onkundana ombwanawa notayi hekeleke okuza mOmbiimbeli, ndjoka tayi kwathela aantu ya kale aakwashigwana ye li nawa noya kale ye na ombili momagumbo. Sho ooyene yoositaasi yu uvu ngawo, oya taamba ko eindilo lyaamwatate.

 MoMalawi, oshigongi osha li sha dhanwa kositaasi yimwe yotiivii nayimwe yoradio. Oositaasi adhihe ndhoka odhi li moshilongo ashihe naantu omamiliyona ohaya vulu okupulakena kudho. MoMosambike, oshigongi osha li shu ulikwa kositaasi yimwe yotiivii nosha dhanwa koositaasi 85 dhoradio.

 Miilongo ayihe mbyoka, otwa li twa longitha oshimaliwa shi thike poondola dhaNamibia 421 147 lwaampo, opo oshigongi shi dhanwe kotiivii. Konyala oshimaliwa shi thike poondola 298 400 osha li sha longithwa, opo oshigongi shi dhanwe kooradio. Aamwatate oya li ya futu oshimaliwa shi thike poondola dhaNamibia 224 uuna ositaasi onshona oyo ya longithwa, ihe uuna ya longitha ositaasi onene ndjoka hayi pulakenwa kaantu oyendji, oya li ya futu oondola 41 433.

 Aamwatate oya longo nuudhiginini, opo ya longithe nawa omayambidhidho ngoka ga gandjwa. Pashiholelwa, aamwatate moMalawi oya li ya pula oositaasi dhi ya kuthile ko koshimaliwa shoka ya li ye na okufuta. Oshikando shimwe oya li ya kuthilwa ko oopelesenda 30. Shoka oshe ya kwathele ya hupithe oshimaliwa shi thike poondola dhaNamibia 25 528 lwaampo. MoMosambike, oositaasi dhimwe odha li dhe tu kuthile ko, oshoka otwa tseyika nawa kutya ihatu nyokoma aantu nohatu futu aluhe pethimbo.

 Aamwatate oya li ya pandula noonkondo sho ya vulu okupulakena nokutala oshigongi kotiivii nokoradio. Omukuluntugongalo gwedhina Patrick gwokoMalawi, okwa ti: “Otwa pandula noonkondo aamwatate yOlutuwiliki, omolwaashihe shoka ye tu ningila pethimbo ndika lyoKorona.” Isaac, ngoka naye ha zi koMalawi, okwa ti: “Molwaashoka katu na iikwaelektronika yilwe, otwa pandula noonkondo ehangano lyaJehova, sho lya tula po elongekidho lyi ikalekelwa tu pulakene oshigongi koradio. Omolwelongekidho ndika, aanegumbo yandje ayehe oya mona mo uuwanawa moshigongi. Otwa mona kutya Jehova okuhole aantu ye.”

 Oshigongi shomo 2020 osho sha li shotango komuuvithi gumwe, moMosambike. Okwa ti: “Elongekidho ndyoka lya tulwa po tu tale oshigongi kotiivii olya dhimbulukitha ndje kutya Jehova, oKalunga omunankondoadhihe. Omukithi gwoKorona inagu mu imba e tu pe shoka twa pumbwa tu koleke eitaalo lyetu, nonando otu li owala momagumbo getu. Onda mona kutya oshigwana shaJehova oshi holathane. Kandi na omalimbililo kutya ndika olyo elongelokalunga lyashili.”

 Omukuluntugongalo gwedhina Wyson okwa ti: “Onda hala okupandula omupiya omudhiginini, sho e tu sile oshimpwiyu pethimbo ndika lyoKorona. Elongekidho lyokudhana oshigongi okupitila moradio nomotiivii olya kwathela oyendji yomutse mboka tu li miilongo ya hepa tu tale notu pulakene koshigongi notu mone wo uuwanawa musho.”

 Okomitiye yAaunganeki noyOkulonga oya tula po natango elongekidho, opo oshigongi shoshitopolwa sho 2021 shi dhanwe kotiivii nokoradio miitopolwa yontumba. Iimaliwa mbyoka hatu longitha tu dhane oshigongi momikalo ndhika, ohayi zi peni? Omomayambidhidho gomuuyuni awuhe, ngoka hamu gandja tamu longitha omikalo dha yoolokathana ndhoka dhi li ko-donate.dan124.com. Otwa pandula komayambidhidho geni gehalo ewanawa.