Adam naEva oyo aantu yotango ya li ya yono. Inaya vulika kuKalunga sho ya li “komuti gwokutseya uuwanawa nuuwinayi,” naashoka ya ningi eyono enene ndyoka oyendji haye li ithana kutya eyono lyotango nenge uulunde wotango. * (Genesis 2:16, 17; 3:6; Aaroma 5:19) Adam naEva kaya li ya pitikwa ya lye komuti ngoka, molwaashoka ogwa li gwu lile po uuthemba waKalunga wokutokolela aantu shoka shi li mondjila naashoka sha puka. Sho Adam naEva ya li komuti ngoka, oya ningi oshinima shoka kaaya li ye na uuthemba woku shi ninga, ano okutokola kuyo yene shoka shi li mondjila nenge sha puka. Mokuninga ngaaka, oye ekelehi uuthemba waKalunga wokutokola shoka shi li mondjila naashoka sha puka.

•  Ongiini “okuyona kwotango” kwa gumu Adam naEva?

•  “Okuyona kwotango” okwe tu guma ngiini?

•  Mbela otatu vulu ngaa okumanguluka ko kiilanduliko “yeyono lyotango”?

•  Euvoko lya puka kombinga “yokuyona kwotango”

Sho Adam naEva ya yono, oya tameke okukulupa, nahugunina oya si. Oya yono po ekwatathano lyawo naKalunga, noya kanitha ompito yokukala nomwenyo ye na uukolele sigo aluhe. — Genesis 3:19.

Adam naEva oya taambekidha uulunde koluvalo lwawo aluhe. Shika osha faathana nomukalo moka aavali haya taambekidha uuthigululwakwatya koluvalo lwawo. (Aaroma 5:12) Momukalo gwa faathana, aantu ayehe oya valwa “aalunde,” * sha hala okutya otwa valwa inaatu gwanenena naashoka ohashi tu ningitha tu longe shoka sha puka nuupu. — Episalomi 51:5; Aaefeso 2:3.

Omolwuulunde mboka twa thigulula, ngashingeyi ohatu ehama, hatu kulupa nohatu si. (Aaroma 6:23) Ohatu mono wo iihuna, omolwomapuko getu yene nosho wo gayalwe. — Omuuvithi 8:9; Jakob 3:2.

Eeno. Ombiimbeli otayi ti kutya Jesus okwa si, opo “a ninge eyambo lyokudhima po oondjo dhetu.” (1 Johannes 4:10) Eyambo lyaJesus otali vulu oku tu mangulula ko kiilanduliko yuulunde mbyoka twa thigulula, notali tu pe ompito yoku ka mona shoka sha kanithwa kuAdam naEva, ano oku ka kala nomwenyo sigo aluhe tu na uukolele. — Johannes 3:16. *

Euvoko lya puka: Omolwokuyona kwotango, itatu vulu nando okukala nekwatathano ewanawa naKalunga.

Oshili: Kalunga ihe tu pe nando ombedhi, omolwokuyona kwaAdam naEva. Oku shi kutya tse inatu gwanenena, kokutya ohatu ningi omapuko, noina tegelela tu ninge oshindji shi vulithe pwaashoka e shi kutya itatu vulu okuninga. (Episalomi 103:14) Nonando ohatu mono iihuna, omolwuulunde mboka twa thigulula, otu na uuthembahenda wokukala nekwatathano lyopothingo naKalunga. — Omayeletumbulo 3:32.

Euvoko lya puka: Uuhanona owa pumbwa okuninginithwa, oshoka eninginitho otali mangulula omuntu keyono lyotango.

Oshili: Oshoshili kutya otwa pumbwa okuninginithwa, opo tu ka hupithwe, ihe okukala tu na eitaalo mekuliloyambo lyaJesus, okwo taku vulu okuyogola omuntu komayono ge. (1 Petrus 3:21; 1 Johannes 1:7) Ombiimbeli otayi ti kutya eitaalo oli ikolelela kontseyo, onkee itashi vulika okahanona ka kale ke na eitaalo. Ombiimbeli itayi popile nando eninginitho lyuuhanona. Uushili mbuka owa li wo wu shiwike nokAakriste yopetameko. Kaya li ya ninginitha uuhanona, ihe ooitaali, ano “aalumentu naakiintu” mboka ya li yi itaale Oohapu dhaKalunga. — Iilonga 2:41; 8:12.

Euvoko lya puka: Kalunga okwa thingi aakiintu, molwaashoka Eva oye a li a yono tango sho a li oshiyimati shoka shi indikwa.

Oshili: Pehala lyokuthinga aakiintu, Kalunga okwa thingi “eyoka ndyoka hali ithanwa omuhindadhi nenge Satana,” ngoka a li a hwahwameke Eva a yone. (Ehololo 12:9; Genesis 3:14) Shimwe ishewe, Kalunga ondjo yegeelo lyotango okwe yi pe Adam, ihe ine yi pa omukulukadhi gwe. — Aaroma 5:12.

Omolwashike Kalunga a ti kutya Adam ota ka kala nokupangela omukadhi? (Genesis 3:16) Sho Kalunga a popi oshinima shoka, itashi ti kutya okwa li a panda eihumbato ndyoka. Okwa li owala ta popi nkene uulunde tawu ka e ta iizemo iiwinayi monkalathano yaalumentu naakiintu. Kalunga okwa hala omulumentu a kale e hole nokwa lenga omukulukadhi gwe, nokukala wo a simaneka lela aakiintu ayehe. — Aaefeso 5:25; 1 Petrus 3:7.

Euvoko lya puka: Eyono lyotango, olya li okuya momilalo.

Oshili: Eyono lyotango itali vulu okukala omilalo, omolwomatompelo taga landula:

• Kalunga okwa li a pe Adam oshipango shoka tashi ti kutya ina lya komuti gwokutseya uuwanawa nuuwinayi, omanga Adam a li oye awike moshikunino, ano kee na omukulukadhi. — Genesis 2:17, 18.

• Kalunga okwa li a lombwele Adam naEva a ti “valathaneni, ne mu indjipale,” shoka otashi ti kutya ya kale ye na aanona. (Genesis 1:28) Kashi li pandunge Kalunga a geele aaihokani yotango, sho ya ningi shoka e ya lombwela ya ninge.

• Adam naEva sho ya yono kaya li pamwe. Eva oye a yono tango, opo ihe lwanima oAdam. — Genesis 3:6.

• Ombiimbeli oya pitika omilalo pokati komusamane nomukulukadhi. — Omayeletumbulo 5:18, 19; 1 Aakorinto 7:3.