Ombiimbeli otayi ti: “Ngoka ta longo shoka Kalunga a hala, ota kala e na omwenyo aluhe.” (1 Johannes 2:17) Kalunga okwa hala wu ninge shike?

• Ilonga kombinga yaKalunga nOmwana, Jesus. Jesus okwa galikana kuKalunga ta ti: “Mboka ye ku tseya, Kalunga awike kashili, noya tseya wo Jesus Kristus ngoka we mu tumu, oyo mboka ye na omwenyo gwaaluhe.” (Johannes 17:3) ‘Okutseya’ Kalunga naJesus osha kwatela mo shike? Otatu vulu oku ya tseya uuna tatu konakona Ombiimbeli, nokutula miilonga shoka tatu ilongo monkalamwenyo yetu. * Ombiimbeli otayi holola omadhiladhilo gOmushiti gwetu, Jehova Kalunga, ngoka e li Omugandji gwomwenyo. (Iilonga 17:24, 25) Ombiimbeli oya popya wo kombinga yOmwana, Jesus, ngoka ha longo aantu “oohapu ndhoka tadhi gandja omwenyo gwaaluhe.” — Johannes 6:67-69.

• Kala wu na eitaalo mekuliloyambo lyaJesus. Jesus okwa li e ya kombanda yevi a ‘yakule noku gandje omwenyo gwe.’ (Mateus 20:28) Ekuliloyambo lyaJesus’ olya pa aantu ompito yoku ka kala nomwenyo sigo aluhe mOparadisa kombanda yevi. * (Episalomi 37:29) Jesus okwa ti: “Oshoka osho ngeyi Kalunga a kala e hole uuyuni, oye a gandja Omwana awike, opo shaa ngoka te mu itaale, kaa kane, ihe a kale e na omwenyo gwaaluhe.” (Johannes 3:16) Ndhindhilika kutya okutseya Jesus okwa kwatela mo oshindji, kaashi shi owala oku mu itaala. Otu na okukala twe ‘mu itaala,’ nokukala metsokumwe nomalongo ge nosho wo nehalo lyaHe. — Mateus 7:21; Jakob 2:17.

• Panga uukuume wa kola naKalunga. Kalunga okwa hala tu hedhe popepi naye notu ninge ookuume ke. (Jakob 2:23; 4:8) Kalunga omukwaaluhe. Kapu na esiku a se, nokwa hala ookuume ke nayo ya kale nomwenyo sigo aluhe. Kalunga okwa holola mOohapu dhe kutya okwa hala mboka ta ye mu kongo ya ninge shike, sho a ti: “Naa kale nelago sigo aluhe!” — Episalomi 22:26.

Euvoko lya puka: Itatu ka nyanyukilwa okukala nomwenyo sigo aluhe.

Oshili: Kalunga oye e tu uvanekela omwenyo gwaaluhe, oku tu hole nokwa hala tu kale twa nyanyukwa. (Jakob 1:17; 1 Johannes 4:8) Oku shi shi kutya opo tu kale twa nyanyukwa, otwa pumbwa iilonga tayi ti sha. (Omuuvithi 3:12) Kalunga oku uvaneka kutya mboka taya ka kala nomwenyo gwaaluhe kombanda yevi, otaya ka kala ye na iilonga tayi ti sha, tayi ya nyanyudha notayi ya etele uuwanawa nosho wo yaandjawo. — Jesaja 65:22, 23.

Shimwe ishewe, mboka taya ka kala nomwenyo sigo aluhe, otaya ka tsikila okwiilonga iinima iipe kombinga yOmushiti gwawo nosho wo kombinga yeshito lye enenenene. Okwa shita aantu ye na ehalo lyokukala sigo aluhe noyi ilonge kombinga ye, nonando kaye na siku ‘ya tseye iilonga mbyoka Kalunga a longo okuza ketameko sigo okehulilo.’ (Omuuvithi 3:10, 11) Onkee ano, mboka taya ka kala nomwenyo sigo aluhe, otaya ka kala aluhe nokulonga nosho wo okwiilonga iinima iihokithi.