Ombiimbeli otayi ti kutya Kalunga okwa hala aantu ya “yande oluhondelo.” (1 Aatessalonika 4:3) Oshitya shoka sha longithwa mOmbiimbeli “oluhondelo” nenge tu tye omilalo dha nyata, osha kwatela mo omilalo kondje yondjokana, uushenge nosho wo omilalo pokati komulumentu nomukiintu mboka inaaya hokana.

•  Mbela osha simana kuKalunga aantu ya hokane?

•  Ongiini kombinga yaamboka yo otekathana ya tale tango ngele otaya opalelathana?

•  Ongiini aaihokani taya vulu okukoleka ondjokana yawo?

• Ondjokana oyi li elongekidho lya tulwa po kuKalunga. Okwe yi toto po, sho a hokanitha aantu yotango. (Genesis 2:22-24) Ka li nando a hala omulumentu nomukiintu ya kale pamwe inaaya hokana.

• Kalunga oku shi shoka sha dhenga mbanda kaantu. Okwa toto po ondjokana yi kalelele pokati komulumentu nomukiintu, opo ayehe ya mone uuwanawa nokugamena iilyo yawo ayihe yuukwanegumbo. Natu tale kethaneko limwe. Ngaashi owala okambo komunduluki ke na ko nasha nomalombwelo gankene oshinima shontumba shi na okutulwa kumwe, Kalunga naye okwe tu pa omalombwelo gankene tatu vulu okukoleka ekwatathano lyetu tu li uukwanegumbo. Ayehe mboka haya tula miilonga omithikampango dhaKalunga, ohaya mono mo uuwanawa. — Jesaja 48:17, 18.

• Omilalo kondje yondjokana, ohadhi eta iilanduliko ya kwata miiti. Pashiholelwa, otadhi vulu okweetitha omategelelo inaaga halika, omikithi ndhoka hadhi taandele pamilalo nosho wo uuwehame wopamaiyuvo. *

• Kalunga okwa pitika omulumentu nomukiintu ya valathane okupitila momilalo. Kalunga okwa tala ko omwenyo omuyapuki, nokuvalathana oku li omagano gondilo. Kalunga okwa hala tu kale twa simaneka omagano ngoka, mokukala twa lenga elongekidho lye li na ko nasha nondjokana. — Aahebeli 13:4.

Okukala pamwe ethimbo lyontumba inaamu hokana, hasho hashi utha kutya ondjokana yeni otayi ka pondola. Pehala lyaashono, ekwatathano pokati kaaihokani ohali kala lya kola, uuna taya longele kumwe, opo ya kandule po omaupyakadhi. * Ondjokana ohayi koleke ekwatathano. — Mateus 19:6.

Kapu na ondjokana ya gwanenena. Nonando ongawo, aaihokani otaya vulu okupondola mondjokana yawo, ngele ohaya landula omayele gOmbiimbeli. Mpaka otapu landula iiholelwa yimwepo:

• Kala ho pititha komeho oompumbwe dhakuume koye kopandjokana. — 1 Aakorinto 7:3-5; Aafilippi 2:3, 4.

• Kaleni mu holathane nomwa simanekathana. — Aaefeso 5:25, 33.

• Kala ho pangele elaka lyoye. — Omayeletumbulo 12:18.

• Kala omwiidhidhimiki noho dhimine po mbala. — Aakolossa 3:13, 14.