Aakriste oyi itaala kutya Jesus okwa si, omolwomayono gaantu. (1 Petrus 3:18) Nonando ongawo, opo tu ka hupithwe otu na okuninga oshindji kaashi shi owala okwiitaala muJesus e li Omuhupithi. Oompwidhuli odhi shi kutya Jesus “Omuna gwaKalunga,” ihe otadhi ka hanagulwa po, pehala lyokuhupithwa. — Lukas 4:41; Judas 6.

•  Oshike ndi na okuninga, opo ndi ka hupithwe?

•  Ongiini kombinga “yEgalikano lyOmulunde”?

•  Oshe ende ngiini opo pu kale “Egalikano lyOmulunde”?

• Owu na okwiitaala kutya Jesus okwa yamba po omwenyo gwe, omolwoondjo dhetu. (Iilonga 16:30, 31; 1 Johannes 2:2) Shika osha kwatela mo okwiitaala kutya Jesus okwa li omuntu gwolela nonokutya ashihe shoka Ombiimbeli ya popya kombinga ye oshoshili.

• Ilonga shoka lela Ombiimbeli tayi longo. (2 Timoteus 3:15) Ombiimbeli otayi ti kutya omuyapostoli Paulus naSilas, oya li ya lombwele omulangeli gwondholongo ya ti: “Itaala Omuwa Jesus, e to hupithwa.” Opo nduno okuza mpono, oya tameke oku mu longa “oohapu dhOmuwa [“Jehova” NW].” * (Iilonga 16:31, 32) Shika otashi ulike kutya omulangeli gwondholongo ka li ta vulu okwiitaala Jesus, manga inaa tseya omalongo gopetameko gOohapu dhaKalunga. Okwa li a pumbwa ontseyo yashili ya kankamena kOmanyolo. — 1 Timoteus 2:3, 4.

• Itedhulula. (Iilonga 3:19) Owu na wo okwiitedhulula nenge tu tye okunika uuthigwa, omolwiikala neihumbato lyoye ewinayi lyomonakuziwa. Yalwe oye na okumona kutya owi itedhulula, mokweetha po iilonga iiwinayi mbyoka hayi yemateke Kalunga nokulonga ‘iilonga mbyoka tayi holola kutya owi itedhulula.’ — Iilonga 26:20.

• Ninginithwa. (Mateus 28:19) Jesus okwa ti kutya mboka taya ningi aalongwa ye, oye na okuninginithwa. Omulangeli gwondholongo ngoka a popiwa metetekelo, okwa li a ninginithwa. (Iilonga 16:33) Sha faathana, konima sho omuyapostoli Petrus a li a longo ongundu yaantu oshili kombinga yaJesus, “oyendji yomuyo oyi itaale oohapu dhe noya [“ninginithwa,”NW].” — Iilonga 2:40, 41.

• Vulika komalombwelo gaJesus. (Aahebeli 5:9) Mboka haya ‘dhiginine ayihe’ mbyoka Jesus a popya, ohaye shi ulike monkalamwenyo yawo kutya oye li aalanduli ye. (Mateus 28:20) Kungawo, ‘okupulakena kwawo ohaku ya fala miilonga.’ — Jakob 1:22.

• Idhidhimika sigo okehulilo. (Markus 13:13) Aalongwa yaJesus oye “na okwiidhidhimika,” opo ya ka hupithwe. (Aahebeli 10:36) Pashiholelwa, omuyapostoli Paulus okwa li a vulika kukehe shoka Jesus a longo nokwa li aluhe omudhiginini kuKalunga nomwiidhidhimiki okuza kesiku a ningi Omukriste sigo oosho a si. — 1 Aakorinto 9:27.

Momalongelokalunga gamwe, aantu ohaya ti kutya opu na “Egalikano lyOmulunde” nosho wo “Egalikano lyEhupitho.” Mboka haya galikana omagalikano ngoka, ohaye shi zimine kutya yo aalunde nohaya ulike kutya oyi itaala kutya Jesus okwa sa, omolwoondjo dhawo. Ohaya pula wo Jesus e ye momitima dhawo nenge monkalamwenyo yawo. Ihe Ombiimbeli inayi popya kutya opu na “Egalikano lyOmulunde.”

Aantu yamwe ohaya dhiladhila kutya ngele omuntu a mana okugalikana “Egalikano lyOmulunde,” nena ota vulu okukala nuushili kutya ota ka hupithwa. Tu li aantu inaatu gwanenena, ohatu tsikile okuninga omapuko. (1 Johannes 1:8) Nomolwaasho Jesus a longo aalanduli ye ya kale taya galikana pandjigilile, opo ya dhiminwe po. (Lukas 11:2, 4) Shimwe ishewe, Aakriste yamwe mboka ye na etegameno lyoku ka mona omwenyo gwaaluhe, ohaya kanitha uuthembahenda mboka, oshoka oya tyololoka nenge ye etha po okulongela Kalunga. — Aahebeli 6:4-6; 2 Petrus 2:20, 21.

Aanandjokonona itaya tsu kumwe naampoka pwa ziilila “Egalikano lyOmulunde.” Yamwe oya popya kutya egalikano ndyoka olya totwa po pethimbo lyEyelitho lyAaprotestande. Yalwe oyi itaala kutya “Egalikano lyOmulunde” olya totwa po komalongelokalunga ngoka ga li ko methelemumvo eti-18 neti-19. Kutya nduno egalikano ndyoka olya totwa po kulye, itali ambidhidhwa kOmanyolo notali kondjithathana nomalongo gOmbiimbeli.