Oonzapo dhaJehova ihadhi kutha ombinga mopolotika omolwomatompelo gopalongelokalunga, shi ikolelela kwaashoka Ombiimbeli tayi ti. Ihatu thiminike aantu, ihatu kutha ombinga mokuhogolola oongundu dhopolotika nenge aakalelipo yadho, ihatu kondjele iipundi mepangelo, noihatu kutha ombinga moshinima kehe shokulundulula omapangelo. Otwi itaala kutya Ombiimbeli otayi gandja omatompelo ga kola gokwaakutha ombinga mopolotika:

•   Ohatu landula oshiholelwa shaJesus, ngoka a li a tindi okupewa ondondo yopapolotika. (Johannes 6:15) Okwa li a longo aalongwa ye kaaya ‘kale oshitopolwa shuuyuni’ nokwe shi popi sha yela kutya kaye na okukutha ombinga miinima yi na ko nasha nopolotika. — Johannes 17:14, 16; 18:36; Markus 12:13-17.

•   Otu li aadhiginini kUukwaniilwa waKalunga, mboka Jesus a popi kombinga yawo a ti: ‘Onkundana ndjika ombwanawa yUukwaniilwa otayi ku uvithilwa uuyuni awuhe.’ (Mateus 24:14, yelekanitha NW.) Tu li aakalelipo yUukwaniilwa waKalunga, twa pewa oshilonga shokuuvitha okuya kwawo, ihatu kutha ombinga miinima yopapolotika miilongo ayihe, mwa kwatelwa iilongo moka tu li. — 2 Aakorinto 5:20; Aaefeso 6:20.

•   Mokukala ihaatu kutha ombinga mopolotika, ohatu vulu okupopya twa manguluka naantu ayehe yomoongundu dhopapolotika dhi ili nodhi ili kombinga yonkundana ombwanawa yUukwaniilwa waKalunga. Ohatu kambadhala oku shi ulika moohapu nomiilonga kutya otwi itaala kutya Uukwaniilwa waKalunga owo tawu ka kandula po uupyakadhi muuyuni. — Episalomi 56:11.

•   Molwaashoka ohatu yanda okukala twa topoka papolotika, otwa hangana tu li uumwayinathana womuuyuni awuhe. (Aakolossa 3:14; 1 Petrus 2:17) Mepingathano naashono, omalongelokalunga ngoka hagi imbwanga mumwe nopolotika ohaga topola iilyo yago. — 1 Aakorinto 1:10..

 Okusimaneka omapangelo. Nonando ihatu kutha ombinga mopolotika, otwa simaneka oonkondopangelo dhomapangelo moka tu li. Shika oshi li metsokumwe noshipango shOmbiimbeli shika tashi ti: “Omuntu kehe na vulike kaapangeli mboka taye mu pangele.” (Aaroma 13:1) Ohatu vulika kompango, ohatu futu iifendela, nohatu longele kumwe noonkambadhala dhomapangelo dhokugandja omakwatho kaakwashigwana yago. Pehala lyokukutha ombinga mokukambadhala okuumba ko omapangelo, ohatu landula omayele gOmbiimbeli tu galikanene “aakwaniilwa naapangeli ayehe,” unene tuu ngele otaya ningi omatokolo ngoka taga vulu okuguma okulongela Kalunga twa manguluka. — 1 Timoteus 2:1, 2.

 Ohatu simaneke wo uuthemba wayalwe ya ninge omatokolo gawo yene miinima yopapolotika. Pashiholelwa, ihatu piyaganeke omahogololo nenge tu ye moshipala aantu mboka taya hogolola.

 Mbela okwaakutha ombinga mopolotika oshinima opo sha tameke okuningwa? Aawe. Aayapostoli nosho wo Aakriste yomethelemumvo lyotango oya li ya ningi sha faathana shi na ko nasha noonkondopangelo dhomapangelo. Ngaashi embo Beyond Good Intentions tali ti: “Nonando oya li ye shi kutya oya tegelelwa ya simaneke omapangelo, Aakriste yopetameko kaya li yi itaala mokukutha ombinga miinima yopapolotika.” Sha faathana, embo On the Road to Civilization otali ti kutya Aakriste yopetameko “kaya li ye na iipundi mopolotika.”

 Mbela okwaakutha ombinga mopolotika ohaku yi moshipala egameno lyoshigwana? Aawe. Tse aakwashigwana tu hole ombili mboka kaatu na okukala twa tilika komapangelo. Natu tale kwaashoka sha li sha popiwa molopota yomo-2001 ndjoka ya nyolwa kehangano lyo-National Academy of Sciences lyaUkraine. Olopota ndjoka ya popi kombinga yokwaakutha ombinga kwetu mopolotika, oya ti: “Kunena aantu yamwe otashi vulika ya kale kaaye hole omuthika gwOonzapo dhaJehova; ndyoka olyo lya li etompelo unene lye ya tamenekithitha kepangelo lyuukayamukulwa lyaNazi nosho wo komapangelo gUukomunisi gonale.” Ihe nonando oongawo, nokuli naasho dha li tadhi hepekwa kepangelo ndyoka lya hogololwa kepangelo lyUukomunisi, Oonzapo “odha kala hadhi vulika koompango dhomapangelo. Odha kala tadhi longo nuushili nosho wo nokwaaihola dho dhene moofaalama nosho wo moofaabulika nokadhi li oshiponga kepangelo lyUukomunisi.” Sha faathana kunena, eitaalo nosho wo shoka hashi ningwa kOonzapo dhaJehova, ihayi “yi moshipala egameno nosho wo uudhiginini woshilongo kehe,” olopota ndjoka osho ya hulitha ngaaka.