WANGƆ 03
Mɔ lengbi ti kpãngɔ bɛ mɔ na ndo atɛnɛ mɛ Ngbangɔ ndo tɛnɛ?
Ngbangɔ sĩ na akapa nga na awangɔ. Ngoi mɛndɛ̃ mɔ ndo du na gwɛ̃ ti hĩngangɔ aye mɛ Ngbangɔ ndo ha, kanda mɔ ndo binga bɛ mɔ. Mɔ lengbi ti hũndangɔ tɛrɛ mɔ na ndo ya, ayɔ ya mɔ ye akapa ná awangɔ mɛ alo kaya buku ti gã? Mɔ lengbi ti yengɔ ya tɛnɛ mɛ Ngbangɔ ndo tɛnɛ alengbi ti hɛ̃ngɔ mɔ dengɔ bɛ ndɛ nga na bi mɛ na gangɔ? Dangɔ bɛ mɛ amiliɔ̃ tɛ azi ndo du na ni la. Wa e ba se mɛ mɔ lengbi ti lingɔ nga ngaso.
1. Apandɛ mɛ kaya Ngbangɔ alindó tɛrɛ lo biani?
Ngbangɔ tɛnɛ ya atɛnɛ mɛ kaya ni adu “bɛta tɛnɛ mɛ mbilimbili.” (Mosakoli 12:10) Ni ndo tɛnɛ tɛnɛ tɛ azi mɛndó da, nga na aye mɛndó ali tɛrɛ lo biani. (Di Luka 1:3; 3:1, 2.) Azi gba ti istwarɛ ná azi ti arkeoloji ndo ye ya abi nzɛ, azi, ndo ná atɛnɛ mɛ Ngbangɔ ndo tɛnɛ adu biani.
2. Nda mɛ ta elengbi ti tɛnɛngɔ ya Ngbangɔ du ngbina ye ma nɛ?
Na ya angoi gba, Ngbangɔ ndo tɛnɛ tɛnɛ ti aye mɛ ta azi ndo hĩnga ni nzɔ̃ni ma na ngoi mɛndó asu na ni. Na ndakisa, ni tɛnɛ tɛnɛ ti siãsi. Na ngoi mɛndó asu na tɛnɛ ni kaya Ngbangɔ ko, ta azi gba ndo yendó tɛnɛ ni ma. Kanda ndɛ lo mɛ ko, azi ti siãsi ndo ye ya tɛnɛ mɛndó Ngbangɔ tɛnɛ adu biani. Ni ndo tɛnɛ tɛnɛ mɛ “akpã bɛ ndo ni ngoi zu, nga bwai na bwai.”—Nzembo 111:8.
3. Nda mɛ elengbi ti kpãngɔ bɛ e na ndo tɛnɛ mɛ Ngbangɔ ndo tɛnɛ na lo ti bi mɛ na gangɔ nɛ?
Ngbangɔ sĩ na aprɔfɛsi a mɛ ndo tɛnɛ tɛnɛ ti “akpale mɛ ta dɛ ali tɛrɛ lo ma.” (Yisaya 46:10) Ngbangɔ kambisa na seni akpale mɛ na lingɔ tɛrɛ lo abulu gba uzu ti nɛngɔ ya ni li tɛrɛ lo. Ni kambisa nga na seni akpale mɛ ndo li tɛrɛ lo ndɛ ge lɛ gigi. Na ya wangɔ mɛ, e na bangɔ ambanga aprɔfɛsi ti ya Ngbangɔ. Hũngɔ se mɛ ni ndo ti na seni ndo hulu li!
GI HĨNGANGƆ LO MƐNDƐ̃
Gi hĩngangɔ nda mɛ azi ti siãsi aye ya tɛnɛ mɛ Ngbangɔ ndo tɛnɛ adu bɛtani, wa ba se mɛ aprɔfɛsi ti ya Ngbangɔ atindó na seni.
4. Azi ti siãsi aye tɛnɛ mɛ Ngbangɔ tɛnɛ
Ndo gã, azi gba ndo tɛnɛ ya sese dɔ lo ndo ye kɔi. Ba VIDEO.
E ba tɛnɛ mɛ mbɛti ti Yobo tɛnɛ aɔ ndɛ abulu 3 500. Di Yobo 26:7, wa na pɛni hɛ̃ gbinya ti hũnda olo mɛ:
-
Na lo nɛ la hĩngangɔ ya ta sese dɔ lo “na ndo ye kɔi ma” ndo hulu li nɛ?
Bo na ya bulu ti 1800 la azi ti siãsi ahĩnga nzɔ̃ni ye mɛ ndo li ya ngu ni. Wa e ba na olo mɛ tɛnɛ mɛndó Ngbangɔ tɛnɛ mɛ aɔ ndɛ abulu 3 500. Di Yobo 36:27, 28, wa na pɛni hɛ̃ gbinya ti ahũnda olo mɛ:
-
Na lo nɛ la tɛnɛ mɛ Ngbangɔ tɛnɛ na lo ti ye mɛ ndo li ya ngu ni akamwisa mɔ nɛ?
-
Na bangɔ avɛrsɛ mɛ mɔ lo ti dingɔ, ato mɔ ya mɔ di kpã bɛ mɔ gba ndo tɛnɛ mɛ Ngbangɔ ndo tɛnɛ?
5. Ngbangɔ piandó tɛnɛ tɛnɛ ti alo ti ngbondoni uzu ti nɛngɔ ya ali tɛrɛ lo
Di Yisaya 44:27–45:2, wa na pɛni hɛ̃ gbinya ti hũnda olo mɛ:
-
Tɛnɛ mɛndó Ngbangɔ pia tɛnɛ abulu 200 uzu ti nɛngɔ ya Babilonɛ ti nɛ?
Azi ti istwarɛ aye ya Sirisɛ mɛ gbia ti Pɛrsɛ ná linɔ tɛ asoda tɛ lo ndó la mu Babilonɛ na bulu ti 539 U.N.E. b Ala sundó lége hɛ̃ tɛ mɛndó ndo bata kɔdɔrɔ ni ko aswua gwe katɛ. Ngoi mɛ ala ga ti lingɔ ka Babilonɛ ko, ala tãndó nyɔ̃ngise pó, wa ala li amu Babilonɛ zangangɔ ya ala tiri to. Aɔ ndɛ abulu 2 500, Babilonɛ angbã zwa. Wa e ba tɛnɛ mɛndó Ngbangɔ pia tɛnɛ.
Di Yisaya 13:19, 20, wa na pɛni hɛ̃ gbinya ti hũnda olo mɛ:
-
Ngasia la prɔfɛsi mɛ aba Babilonɛ atindó na seni nɛ?
Zwa ti Babilonɛ mɛ ndɛ ka Irak
6. Ngbangɔ piandó tɛnɛ tɛnɛ ti alo mɛ e ndo hũ ni ndɛ
Ngbangɔ ndo ili ngoi mɛ e da ya “ndangba bi.” (2 Timɔte 3:1, NWT) Ba tɛnɛ mɛ Ngbangɔ piandó tɛnɛ mɛ aba ndangba bi.
Di Matie 24:6, 7, wa na pɛni hɛ̃ gbinya ti hũnda olo mɛ:
-
Aye mɛ na lingɔ tɛrɛ lo na ndangbi bi mɛ Ngbangɔ piandó tɛnɛ tɛnɛ ni nɛ?
Di 2 Timɔte 3:1-5, wa na pɛni hɛ̃ gbinya ti ahũnda olo mɛ:
-
Na bangɔ Ngbangɔ, se liye mɛ azi na tingɔ nani na ndangba bi nɛ?
-
Na ya aseli niko, omɛ mɔ ndo hũni ndɛ wa?
AZI MƐNDƐ̃ NDO TƐNƐ YA: “Ngbangɔ du buku ti pandɛ nga ti mbaye.”
-
Wa mɔ, ye mɛ ndo to mɔ ya mɔ kpã bɛ mɔ ndo tɛnɛ mɛ Ngbangɔ ndo tɛnɛ nɛ?
NA NDUNU NI
Istwarɛ, siãsi na aprɔfɛsi ndo fa ya elengbi ti kpãngɔ bɛ e ndo tɛnɛ mɛ Ngbangɔ ndo tɛnɛ.
Bozongeli
-
Apandɛ ti ya Ngbangɔ adu bɛta tɛnɛ?
-
Aye mɛ ndo fa ya Ngbangɔ ná siãsi na mangbi nɛ?
-
Mɔ da bɛ ya Ngbangɔ piandó tɛnɛ tɛnɛ na ndo kpale me na lingɔ tɛrɛ lo na bi mɛ na gangɔ? Nda mɛ mɔ tɛnɛ ngaso nɛ?
AYE MƐNDƐ̃ MƐ MƆ LI
Ngoi mɛ Ngbangɔ ndo tɛnɛ tɛnɛ mɛ aba siãsi, ni ndo tɛnɛ bɛta tɛnɛ?
Aye mɛ ndo fa ya e na “ndangba bi” nɛ?
“Bisakweli 6 ya Biblia oyo ozali komona kokokisama na yango” (Linɔ́ngi ya Mosɛnzɛli 01/5/2011)
Ba se mɛndó aprɔfɛsi mɛ aba kɔdɔrɔ ti Grɛsɛ ati na seni.
Ba se mɛ aprɔfɛsi ti ya Ngbangɔ agbinyangbi Bingangɔ li tɛ Kɔli kɔi na ndo Ngbangɔ.
“Nazalaki kondima te ete Nzambe azali” (Linɔngi ti Sinzili No. 5 2017)
