Se siɔ lo si na zo ko, adu nzɔ̃ni ya lo hũnda tɛrɛ lo na ndo ya: “Nda mɛ kpale ti ngaso si na mbi nɛ?” E na dengɔ bɛ na lo mɛ ya elengbi ti luangɔ gbinya ti hũnda olo mɛ kaya Ngbangɔ!

1. Satana sindó na siɔ kpale ge lɛ gigi ngasia?

Satana tɔmbɔgɔndó tɛrɛ Nzapa. Na lo mɛ ya, Satana ndó na gwɛ̃ ya ni lɛ gbia ndo azi ko, lo tondó Adamu na Eva ya ala tɔmbɔgɔ nga tɛrɛ Nzapa. Lo li ni na lége ti nvɛ̃nɛ mɛndó lo pa hɛ̃ Eva. (Ebandeli 3:1-5) Lo tondó Eva ya lo ti na bingangɔ li ya Yehova gbanzi lo na ye kɔi ti nzɔ̃ni nvɛ̃ni. Lo yendó tɛnɛngɔ ya, azi na dungɔ na dengɔ bɛ se du ya ala kɛ̃ tɔndɔngɔ Nzapa. Satana pandó nvɛ̃nɛ ti kɔzoni na ngoi mɛndó lo tɛnɛ hɛ̃ Eva ya ta lo na kpingɔ ma. Na lo ni la Ngbangɔ ndo ili Satana ya “wa nvɛnɛ, lo nga ta nvɛnɛ.”​—Yoanɛ 8:44.

2. Ye mɛndó Adamu na Eva pɔna lingɔ nɛ?

Yehova hɛ̃ndó Adamu na Eva aye zu mɛndó ala na gwɛ̃ ni. Lo hɛ̃ la nyɔ ya ala tɛ ale kɛkɛ zu mɛ ka yaka ti Edɛnɛ, kanda lo gbanzindó ala bo na le kɛkɛ kɔi. (Ebandeli 2:15-17) Kanda ala pɔna tɛ la bondó tɛngɔ le kɛkɛ niko. Eva “mundó le kɛkɛ niko lo tɛ.” Na gesi, Adamu “tɛ ngandó ni.” (Ebandeli 3:6) Ala zu sɛ kɛ̃ndó tɔndɔngɔ Nzapa. Na lo mɛ ya Adamu na Eva ndó na tɛrɛ ti lengbingɔ ko, ta lingɔ ye ti nzɔ̃ni dundó pɛnɔ ka tɛ la ma. Ala kɛ̃ndó tɔndɔngɔ Nzapa na sana, ala lindó siɔ kpale wa ala kɛ̃ ngandó ya ta Nzapa lɛ gbia ndo ani ma. Ekateli mɛndó ala mu asindó na kota pɛnɔ hɛ̃ la.​—Ebandeli 3:16-19.

3. Ekateli mɛndó Adamu na Eva mu asi na nɛ hɛ̃ e nɛ?

Na ngoi mɛndó ala li siɔ kpale ko, Adamu na Eva atindó azi ti zangangɔ lengbingɔ, wa ni lingandó ya atara la zu ati nga azi ti zangangɔ lengbingɔ. Ngbangɔ tɛnɛ ya: “Bo kɔli kɔi mɛ ili lo Adamu ndo la ato nda lingɔ siɔ ye ge lɛ sese, ko azi ndokpili na lo ti siɔ ye. Na lo ni ko, kwá ndokpɔ azi zu, na lo mɛ ya ala zu ali siɔ ye.”​—Roma 5:12.

E ndo hũ pɛnɔ na lo ti atina ndɛ̃ ndɛ̃ ndɛ̃. Ngoi mɛndɛ̃ e ndo hũ pɛnɔ na lo mɛ ya e mu ekateli ti siɔni. Bere e ndo hũ nga pɛnɔ na lo mɛ ya azi mɛndɛ̃ mu ekateli ti siɔni. Wa na ambanga ngoi e ndo hũ pɛnɔ na lo mɛ ya e ka ndo nga na ngoi mɛ siɔ lo kɔi si na ni.​—Di Mosakoli 9:11.

 GI HĨNGANGƆ LO MƐNDƐ̃

4. Zo mɛ ndo si na pɛnɔ hɛ̃ e

Azi mɛndɛ̃ ndo da bɛ la ya Nzapa la ndo lɛ gbia ndo lɛ gi gi olo mɛ. Ni du bɛta tɛnɛ? Ba VIDEO.

Di Zaki 1:13 nga na 1 Yoanɛ 5:19, wa na pɛni hɛ̃ gbinya ti hũnda olo mɛ:

• Nzapa la ndo si na siɔ kpale nga na apɛnɔ hɛ̃ azi?

5. Ba ye mɛ lo-lɛngɔ gbia tɛ Satana si na ni

1. Adamu na Eva ndó na tɛrɛ ti lengbingɔ, wa ala ndo dundó ka Paradizo. Kanda ala mandó nyɔ Satana wa ala tɔmbɔgɔndó tɛrɛ Yehova

2.   Na gesi ni sindó na siɔ kpale, pɛnɔ nga na kwá ge lɛ sese

3. Yehova na onzingɔ siɔ kpale, pɛnɔ nga na kwá. Azi na diringɔ na tɛrɛ ti lengbingɔ wa ala na diringɔ dungɔ ka Paradizo fãni mɛndɛ̃

6. Yehova ndo ma sɔngɔ bɛ na ngoi mɛ e ndo hũ pɛnɔ

Yehova ndo ma ngasia na ngoi mɛ e ndo hũ pɛnɔ nɛ? Ba tɛnɛ mɛndó gbia David na toma Pɛtro asu. Di Nzembo 31:7 nga na 1 Pɛtro 5:7, wa na pɛni hɛ̃ gbinya ti hũnda olo mɛ:

• Hĩngangɔ ya Nzapa ndo hĩnga pɛnɔ mɛ e ndo hũ, a to mɔ ya mɔ ma tɛrɛ mɔ ngasia?

 NA NDUNU NI

Satana Zabulu, Adamu na Eva ndó la si na apɛnɔ mɛ e ndo hũ ndɛ ge lɛ gigi. Yehova ndo ma sɔngɔ bɛ gba na lo ti apɛnɔ mɛ e ndo hũ, wa a ngbã dã lo na onzingɔ ni.

Bozongeli

• Nvɛ̃nɛ mɛndó Satana pa hɛ̃ Eva nɛ?

• Kɛ̃ngɔ nyɔ tɛ Adamu na Eva asi na nɛ hɛ̃ e nɛ?

• E hĩnga ngasia ya na ngoi mɛ e ndo hũ pɛnɔ ko, ndo hɛ̃ Yehova songɔ bɛ nɛ?