WANGƆ 41
Tɛnɛ mɛ Ngbangɔ tɛnɛ na lo ti bombingɔ tɛrɛ tɛ kɔli na wali nɛ?
Azi gba ndo ma kamɛnɛ ti tɛnɛngɔ tɛnɛ mɛ ba bombingɔ tɛrɛ tɛ kɔli na wali. Kanda Ngbangɔ ndo tɛnɛ tɛnɛ ni yangondo nga na ndenge ti nzɔ̃ni. Tɛnɛ mɛ Ngbangɔ tɛnɛ na lo ti bombingɔ tɛrɛ tɛ kɔli na wali ndo du na lo ti nzɔ̃ kpale tɛ e. Na lo mɛ ya Yehova la li e ko, lo hĩnga ye ti nzɔ̃ ni na lo tɛ e. Lo kambisa hɛ̃ e ye mɛ e li ti nɛngɔ ya e hɛ̃ lo dengɔ bɛ nga na ye mɛ za e ya e sepala na dungɔ lɛ ngɛ̃́ bwai na bwai.
1. Yehova ndo ba bombingɔ tɛrɛ tɛ kɔli na wali ngasia?
Bombingɔ tɛrɛ tɛ kɔli na wali adu nzɔ̃ ye mɛ Yehova hɛ̃ azi mɛ li libala. Lo na gwɛ̃ ya kɔli na wali mɛ li libala abombi tɛrɛ la ti nɛngɔ ya a hɛ̃ la dengɔ bɛ. Ta bombingɔ tɛrɛ tɛ kɔli na wali ndo du bo na lo ti dũngɔ ayangambi ma, kanda ni ndo du nga na lo ti fangɔ songo mɛ kɔi kɔi na ni na mbage tɛ fɔ̃ lo. Ni la Ngbangɔ tɛnɛ ya: “Sepala na ya mɔ ti nyifɔ̃.” (Masese 5:18, 19) Yehova yɔ ka ti awakristo mɛ li libala ya zo kɔi kɔi du mbilimbili na mbage tɛ fɔ̃ lo, ti nɛngɔ ya ta ala ti kɔmbɛ ma.—Di Aebreo 13:4.
2. Se ti bombingɔ tɛrɛ mɛ Nzapa ndo kɛ̃ nɛ?
Ngbangɔ tɛnɛ ya “Ta azi ti pite [bere azi ko la ndo bombi tɛrɛ la na ndenge ti bí] . . . na luangɔ Lo-lɛngɔ Gbia tɛ Nzapa ma.” (1 Kɔrinto 6:9, 10) Ti tɛnɛngɔ tɛnɛ ti pite bere bombingɔ tɛrɛ na ndenge ti bí ko, azi mɛndó su Ngbangɔ salelandó tɛnɛ ti grɛki mɛ pornéïa. Tɛnɛ niko ndo fa (1) bombingɔ tɛrɛ a ka popo tɛ azi mɛ ta ala li libala ma, (2) bombingɔ tɛrɛ tɛ kɔli na kɔli bere wali na wali nga na (3) bombingɔ tɛrɛ na asa. E ndo lua nzɔ̃ kpale gba wa e ndo hɛ̃ nga Yehova dengɔ bɛ na ngoi mɛ e ndo kɛ̃ lingɔ pite nga na bombingɔ tɛrɛ ti bí.”—1 Tɛsalionikɛ 4:3.
GI HĨNGANGƆ LO MƐNDƐ̃
Gi hĩngangɔ ye mɛ mɔ li ti nɛngɔ ya mɔ kpɛ lingɔ pite na bombingɔ tɛrɛ ti bí nga na nzɔ̃ lo mɛ mɔ lua se mɔ du na bingangɔ li ti vuruni.
3. Kɛ̃ pite ti ndenge zu
Yozefu kɔli kɔi mɛ mbilimbili kɛ̃ndó bombingɔ tɛrɛ lo na wali kɔi. Di Ebandeli 39:1-12, wa na pɛni hɛ̃ gbinya ti ahũnda olo mɛ:
-
Nda mɛndó Yozefu kpɛ nɛ?—Ba vɛrsɛ 9.
-
Mɔ da bɛ mɔ ya Yozefu mundó ekateli mɛ nzɔ̃ni? Na lo nɛ?
Ngasia la apalanga lengbi ti landangɔ se lɛ lo tɛ Yozefu wa ala kpɛ nga lingɔ pite ti ndenge zu nɛ? Ba VIDEO.
Yehova ndo yɔ ka ti awakwa tɛ lo zu ya ala du vuruni. Di 1 Kɔrinto 6:18, wa na pɛni hɛ̃ gbinya ti ahũnda olo mɛ:
-
Aye mɛ lengbi ti tongɔ zo ya lo li pite nɛ?
-
Ngasia la mɔ lengbi ti kpɛngɔ pite ti ndenge zu nɛ?
4. Mɔ lengbi ti kɛ̃ngɔ ya ta mɔ ti ya tara ti lingɔ pite ma
Ando yɔ ya mɔ li ge ge ge ti nɛngɔ ya ta mɔ ti ya tara ti lingɔ pite ma. Ba VIDEO, wa na pɛni hɛ̃ gbinya ti hũnda olo mɛ.
-
Na ya video mɛ ye mɛndó nyita kɔli kɔi li na ngoi mɛndó lo hũ ya ye mɛ ni ndo li alengbi ti lingɔ ya ta ni ngbã mbilimbili ka mbage tɛ ya ni ma nɛ?
Ando yɔ nga ya zo mɛ mbilimbili ka mbage tɛ Yehova ali kpengbani ti batangɔ bingangɔ li tɛ lo vuruni. Ye mɛ mɔ li ti nɛngɔ ya mɔ kɛ̃ dangɔ bɛ ti siɔni nɛ? Di Filipɛ 4:8, wa na pɛni hɛ̃ gbinya ti ahũnda olo mɛ:
-
Aye mɛ du nzɔ̃ni ya e bata ni kaya bingangɔ li tɛ e nɛ?
-
Ngasia la dingɔ Ngbangɔ na hɛ̃ngɔ tɛrɛ kaya kwa tɛ Yehova ndo za e ya ta e ti ya sɔ̃ ti lingɔ siɔ kpale ma nɛ?
5. Andia tɛ Yehova ndo du na lo ti nzɔ̃ lo tɛ e
Yehova hĩnga ye mɛ nzɔ̃ni na lo tɛ e. Lo kambisa hɛ̃ e ye mɛ elengbi ti lingɔ ti nɛngɔ ya e bata bingangɔ li tɛ e vuruni nga na nzɔ̃ lo mɛ e lua se e li ni. Di Masese 7:7-27 bere ba VIDEO, wa na pɛni hɛ̃ gbinya ti ahũnda olo mɛ.
-
Palanga mɛ tindó ya tara ngasia?—Ba Masese 7:8, 9.
-
Na bangɔ mbɛti ti Masese 7:23, 26, lingɔ pite ndo si na pɛnɔ gba hɛ̃ zo. Se e du na bingangɔ li ti vuruni siɔ lo mɛ ta na singɔ na e ma nɛ?
-
Ngasia la dungɔ na bingangɔ li ti vuruni alengbi ti zangɔ e ya e sepala na dungɔ lɛ ngɛ̃́ ti bwai na bwai nɛ?
Ambanga azi ndo hũ ya tɛnɛ mɛ Ngbangɔ tɛnɛ na lo ti bombingɔ tɛrɛ tɛ kɔli na kɔli bere wali na wali adu zangangɔ songo. Kanda Yehova du Nzapa ti songo wa lo na gwɛ̃ ya azi zu lua dungɔ lɛ ngɛ̃́ ti bwai na bwai. Ti nɛngɔ ya e lua dungɔ lɛ ngɛ̃́ ko, ayɔ ya e tɔndɔ ndia tɛ lo. Di 1 Kɔrinto 6:9-11, wa na pɛni hɛ̃ gbinya ti hũnda olo mɛ:
-
Kɔtɛ ye mɛ Nzapa ndo kɛ̃ kɔi bo la bombingɔ tɛrɛ tɛ kɔli na kɔli bere wali na wali?
Ti nɛngɔ ya e hɛ̃ Yehova dengɔ bɛ ko, ayɔ ya e gbinyangbi dungɔ lɛ ngɛ̃́ tɛ e. Lingɔ ni ndo yɔ ge ge ge. Di Nzembo 19:8, 11, wa na pɛni hɛ̃ gbinya ti ahũnda olo mɛ:
-
Mɔ da bɛ mɔ ya Yehova li nzɔ̃ni na ndenge mɛ lo hɛ̃ e ndia mɛ ba dungɔ na seliye ti nzɔ̃ni? Na lo nɛ?
Yehova lengbi ti zangɔ mɔ nga ma se mɛ lo za na azi mɛndɛ̃ ya mɔ gbinyangbi dungɔ lɛ ngɛ̃́ tɛ mɔ
AZI MƐNDƐ̃ NDO TƐNƐ YA: “Ta bombingɔ tɛrɛ du siɔni ka popo tɛ azi sɛ mɛ yengbi ma.”
-
Gbinya mɛ mɔ na hɛ̃ngɔ nɛ?
NA NDUNU NI
Bombingɔ tɛrɛ adu nzɔ̃ ye mɛ Yehova hɛ̃ kɔli na wali mɛ li libala.
Bozongeli
-
Na bangɔ Ngbangɔ pite na bombingɔ tɛrɛ ti bí adu nɛ?
-
Ye mɛ lengbi ti zangɔ e ya e kpɛ pite na bombingɔ tɛrɛ ti bí nɛ?
-
Nzɔ̃ lo mɛ tɔndɔngɔ andia tɛ Yehova alengbi ti hɛ̃ngɔ e nɛ?
AYE MƐNDƐ̃ MƐ MƆ LI
Gi hĩngangɔ nda mɛ Nzapa ye ya uzu ti nɛngɔ ya kɔli na wali abombi tɛrɛ la ko, ayɔ ya ala li libala.
“Biblia elobi nini mpo na libala ya makango?” (Tɛnɛ mɛ kaya intɛrnɛt)
Tɛnɛ mɛ Ngbangɔ tɛnɛ na ndo bombingɔ tɛrɛ tɛ kɔli na kɔli, wali na wali ta lengbi ti tongɔ e ya e kɛ̃ azi mɛndɛ̃ ma.
“Kosangisa nzoto mibali na mibali to basi na basi ezali mabe?” (Tɛnɛ mɛ kaya intɛrnɛt)
Ba se mɛ ndia tɛ Nzapa mɛ ba bombingɔ tɛrɛ ndo bata e.
“Kofiba enama ya nzoto ya mwasi to ya mobali ezali mpenza kosangisa nzoto?” (Tɛnɛ mɛ kaya intɛrnɛt)
Ti nɛngɔ ya mɔ hĩnga ye mɛndó za kɔli kɔi mɛndó ndo bombi tɛrɛ lo na fɔ̃ lo kɔli ya lo gbinyangbi dungɔ lɛ ngɛ̃́ tɛ lo ti nɛngɔ ya lo hɛ̃ Yehova dengɔ bɛ ko, ba bɛ li tɛnɛ mɛ “Bapesaki ngai limemya.”
“Ngbangɔ ndo gbinyangbi dungɔ lɛ ngɛ̃́ tɛ azi” (Linɔngi ti Sinzili ti 01/04/2011)
a Bombingɔ tɛrɛ na ndenge ti bí abombi alo ndɛ̃ ndɛ̃ ndɛ̃ mabere bombingɔ tɛrɛ na lége ti yanga zo, bombingɔ tɛrɛ na lége ti kanda zo nga na lɛngɔ wele na tɛrɛ zo ti kɔli bere wali mɛ ta lo kɔ mɔ bere ya mɔ ma.
