1. Ndombali nɛ la ayɔ ya e hĩnga nga aangelo nɛ?

YEHOVA ye yako e hĩnga ndasewa tɛ ni. Aangelo nga ka ndasewa ni. Ngbangɔ ndo ili la ya ʻaya Nzapa.’ (Yobo 38:7) Kwa mɛ aangelo ndo li nɛ? Ala zandó azi na ngoi ti uzu ngasia? Ala ndo za nga e ndɛ?​—Ba Nɔti ti 8.

2. (a) Zo mɛ li aangelo na? (b) Aangelo ka ndozu kɛ̃?

² Ti uzu e hĩnga ya, Yehova la li aangelo. Yehova lindó Yezo uzu ti aye zu. Na gesi, mbeti ti Kɔlɔsɛ 1:16 tɛnɛ ya, “ti ndo lo ndo la Nzapa ali aye zu mɛ ka yayu na omɛ ge tise.” Ngbangɔ tɛnɛ ya Nzapa lindó amiliɔ̃ ngbangbo tɛ aangelo.​—Nzembo 103:20; Suma 5:11.

3. Ye mɛ mbeti ti Yobo 38:4-7 a ha na e na ndo aangelo nɛ?

³ Ngbangɔ tɛnɛ ya, Yehova lindó aangelo uzu ti lo lingɔ sese. Ala mandó ngasia ngoi mɛ ala hũndó sese nɛ? Mbeti tɛ Yobo tɛnɛ ya, bɛ la dendó mawoma. Na ngoi kondó ko, alandó ka ndasewa kɔi mɛ na mangbi, ala ndo lendó kwa hɛ̃ Yehova ndoni kɔi.​—Yobo 38:4-7.

4. E hĩnga ngasia ya aangelo ndo sepala na azi nɛ?

⁴ Bandandó gã bɛ aangelo ndo de ngoi zu na ndo akpale tɛ azi, nga na ndo dangɔ bɛ mɛ Yehova na ni na ndo sese nga na ndo azi. (Masese 8:30, 31; 1 Petro 1:11, 12) Ngoi mɛndó Adamu na Eva kɛ̃ndó tɔndɔngɔ Yehova ko, zangangɔ tembe aangelo mandó vundu. Ndɛ lo mɛ ko, ala ndo ma nga vundu na hũngɔ ndenge mɛ azi  ndo kɛ̃ tɔndɔngɔ Yehova. Kanda ngoi mɛ zo ma vundu ti siɔ ye mɛ lo li, lo gbinya bɛ lo wa lo diri ga ka tɛ Yehova ko, aangelo ndo ma dengɔ bɛ mawoma. (Luka 15:10) Bɛ la ndo de gba na ndo awakwa tɛ Nzapa. Yehova ndo to ala ya, ala za, abata nga ava ni ge lɛ sese. (Aebreo 1:7, 14) E ba ambanga lɛlo ni.

5. Aangelo zandó awakwa tɛ Nzapa ngasia?

 ⁵ Uzu ti hongɔ Sɔdɔmɛ na Gɔmɔrɔ, Yehova tondó aangelo sɛ ti songɔ na Lɔta na ndasewa tɛ lo. (Ebandeli 19:15, 16) Angbangbo ti bulu na gesi, abindó prɔfeta Daniɛlɛ kaya du tɛ Ambata. Ta lo hɔ̃ndó kã bɛ kɔi ma, na lo mɛ ya “Nzapa tondó angelo tɛ lo, lo kanga yanga Ambata ni (Lions).” (Danyele 6:22) Na gesi, ngoi mɛndó toma Petro ka bɔlɔkɔ ko, Yehova tondó angelo tɛ lo asi na lo kaya da ti bɔlɔkɔ ni. (Awa Pangɔ Kwa 12:6-11) Aangelo aza ngandó Yezo ngoi mɛ londó ge lɛ sese. Na pɛ batisimɔ tɛ lo, aangelo gandó za lo. (Marko 1:13) Ngoi mɛndó lo doli ti kpingɔ ko, angelo kɔi asa ngunu bɛ lo.​—Luka 22:43.

6. (a) E hĩnga ngasia ya aangelo ndo za awa kwa tɛ Nzapa ndɛ na ngoi tɛ e nɛ? (b) Ahũnda mɛ wa la e na hɛ̃ngɔ agbinya ni wa?

⁶ Ndɛ lo mɛ ko, ta aangelo dɛ si gbɛlɛ azi ma. Bɛ se ngaso ko, Nzapa ndo to ala ti nɛngɔ ya ala za awakwa tɛ lo. Ngbangɔ tɛnɛ ya: “Angelo tɛ Nzapa ndo du dã na azi mɛ ndo kpɛ Nzapa, ko lo ndo sara nga ala.” (Nzembo 34:7) Ndombali nɛ la ayɔ yako abata e nɛ? Na lo mɛya e na awa kula mɛ na ngunu gba aɔ e, ala ndo ye lingɔ e siɔni. Awa kula ni la ana? Ala lo wa? Wa ngasia la ala ndo gi lingɔ e siɔni nɛ? Ti hɛ̃ngɔ gbinya na ndo ahũnda olo ko, e ba ye mɛndó ali tɛrɛ lo na pɛ lingɔ Adamu na Eva.

7. Ndombali nɛ la Satana ndo handa azi nɛ?

⁷ E mandandó kaya shapitrɛ ti 3 ya, angelo kɔi atɔmbɔkɔndó tɛrɛ Nzapa. Londó na gwɛ̃ ti tingɔ gbia tɛ aangelo mɛndɛ̃. Ngbangɔ ili lo ya Satana Zabulu.  (Suma 12:9) Lo ye ngandó ya azi tɔmbɔkɔ nga tɛrɛ Nzapa. Lo to ndanindó na handangɔ Eva, so pɛni lo handa nga azi mɛndɛ̃ gba. Kanda azi mɛndɛ̃ mabere Abɛlɛ, Enɔka na Noa, ala ngbã tɛ landó mbilimbili ka tɛ Nzapa.​—Aebreo 11:4, 5-7.

8. (a) Ngasia la aangelo mɛndɛ̃ atindó ademo nɛ? (b) Ti nɛngɔ ya ta ala kpili na ngu na ngoi tɛ Noa ma, ye mɛndó ademɔ li nɛ?

⁸ Na ngoi tɛ Noa ndó ko, aangelo mɛndɛ̃ atɔmbɔkɔndó tɛrɛ Nzapa. Ala ziandó ndozu azu ge tise na tɛrɛ ti mi, mabere tɛ azi. Na ndombali nɛ? Ngbangɔ tɛnɛ ya, ala tindó na gwɛ̃ ti mungɔ awe. (Di Ebandeli 6:2.) Ala lindó ye mɛ ta aangelo alengbi ti lingɔ ni ma. (Yudɛ6) Azi ati ngandó na seliye mabere tɛ aangelo niko, azi bandandó lingɔ aye ti siɔni, ala tindó awa zaga. Ni la atondó Yehova ya lo kpɔ la na ngu, na ngoi tɛ Noa. Kanda lo batandó awakwa tɛ lo ti mbilimbili. (Ebandeli 7:17, 23) Asiɔ aangelo ni akpɛlɛndó diri ka ndozu ti nɛngɔ ya, ta ala kpili ma. Ala la Ngbangɔ ndo ili la ya ademo. Ala ye tɛ landó tingɔ ka mbage tɛ Satana, la lo ti ngandó gbia tɛ la.​—Matie 9:34.

9. (a) Ngoi mɛ ademo adiri ka ndozu, ye mɛndó asi na ala nɛ? (b) Ye mɛ e na tɛnɛngɔ tɛnɛ na ndoni nɛ?

⁹ Na lo mɛ ya ademo du asanza, ta Yehova yendó yako, ala diri li ka ndasewa tɛ ni ma. (2 Petro 2:4) Ta ala lengbi nga ti diringɔ fãni mɛndɛ̃ na tɛrɛ ti mi ma, kanda ala ndo ngbã bo la kwɛ ti “handangɔ azi ti lɛ sese zu.” (Suma 12:9; 1 Yoanɛ 5:19) Wa e ba aye mɛ ala ndo li ti handangɔ na azi.​—Di 2 Kɔrinto 2:11.

10. Ademo ndo handa azi ngasia?

¹⁰ Ademo ndo handa azi na lége ndɛ̃́ ndɛ̃́ ndɛ̃́. Zo lengbi ti tɛnɛngɔ tɛnɛ na ademo mbala kɔi, bere na lége  tɛ zo mɛndɛ̃, ngama wa dɔngɔ lí bere wa biando. Tɛnɛngɔ tɛnɛ na ademo a ndo ili ni ya kwa tɛ asiɔ nyingɔ. Ngbangɔ ndo wa e ya e du yɔngɔrɔ ni na aye mɛ alengbi ti tongɔ e ya e ti na mangbi na asiɔ nyingɔ. (Galatia 5:19-21) Na lo nɛ? Mabere se ko la wa hongɔ sa ndo hɔ̃nɔ sɔ̃ ya ko sa za ko, ademo ndo si nga na akɔdɛ ndɛ̃́ ndɛ̃́ ndɛ̃́ ti gbɔ̃ngɔ na azi ya ala ti angba tɛ ani.​—Ba Nɔti ti 26.

11. (a) Azi ndo li nɛ ti pangɔ alo mɛ ahɔndɛ tɛrɛ lo nɛ? (b) Ndombali nɛ la ayɔ ya e kɛ̃ akpale ni ko nɛ?

¹¹ Ademo ndo handa azi na lége ti gingɔ hĩngangɔ akpale mɛ ahɔndɛ tɛrɛ lo. Ti hĩngangɔ akpale mɛ ahɔndɛ tɛrɛ lo bere omɛ ta dɛ li tɛrɛ lo ma, azi niko ndo lekwa na ngunu tɛ asiɔ nyingɔ bere ademo. Ambanga azi ndo gi hĩngangɔ ayɛ mɛ ta dɛ li tɛrɛ lo ma na lége ti zege, kambisangɔ nda suma, gwengɔ ka tɛ wa biando, gwengɔ bangɔ talatala, bangɔ lɛ ndozu, bangɔ yambati zo. Ta azi gba ndo hũ ni siɔni ma, kanda adu nvɛ̃nɛ! Ni du siɔni nvɛ̃ni. Ngbangɔ tɛnɛ ya awa hãngɔ biando na ademo ndo li kwa ndoni kɔi. Awa Pangɔ Kwa 16:16-18 atɛnɛ tɛnɛ tɛ nyi wali kɔi mɛ wa pangɔ lo mɛ na singɔ na lége tɛ “siɔ tɔrɔ mɛ ndo pa lo mɛ na singɔ.” Ngoi mɛ Polo ĩ toma siɔ tɔrɔ ni ko, ngunu tɛ nyi wali ni ti pangɔ lo mɛ na gangɔ awɛ nga.

12. (a) Nda mɛ adu siɔni gingɔ tɛnɛngɔ tɛnɛ na azi mɛ kpili nɛ? (b) Nda mɛ ta awakwa tɛ Nzapa alengbi ti hɛ̃ngɔ ti la bɛ yakele na akpale ti kutimɛ mɛ na mangbi na asiɔ nyingɔ ma nɛ?

¹² Ademo ndo handa nga e na tongɔ e eye ya, elengbi ti tɛnɛngɔ tɛnɛ na azi mɛ kpili. Ala ndo to nga e eye ya, azi mɛ kpili ndo du lɛ la ngɛ̃́ ka ndo mɛndɛ̃, ala lengbi ti tɛnɛngɔ tɛnɛ na e, ala lengbi nga ti zangɔ e bere lingɔ e siɔni. Zo lengbi ti gwengɔ ka tɛ wa biando  ya ni tɛnɛ tɛnɛ na nyita ni mɛ kpi. Wa biando ni lengbi ti kambisangɔ hɛ̃ lo akpale mɛ aba nyita lo, bere mungɔ legɔ̃ zo mɛ kpi tɛnɛngɔ na tɛnɛ. (1 Samwele 28:3-19) Aye mɛ ndo li na pɛ kwá tɛ zo mɛ kpi, ni ndo hɛ̃ dangɔ bɛ ya, azi mɛ kpili ndo du na dungɔ lɛ ngɛ̃́ ka ndo mɛndɛ̃. Alengbi ti dungɔ: onzingɔ matanga, dangɔ bɛ na bĩ ti kwá, sangɔ ye ka ndo sɛndɛ, hãngɔ pili (kpongɔ mwá), langɔ gigi ti kwá. Ngoi mɛ awakristo ndo kɛ̃ lingɔ aye niko ko, azi ti ndasewa bere ti kɔdɔrɔ alengbi ti gurungɔ ala, zongangɔ ala, kɛ̃ngɔ tɛrɛ ala. Bɛse so ko, awakristo hĩnga tɛ la ya, ta azi mɛ kpili ndo du lɛ la ngɛ̃́ ka ndo mɛ ndɛ̃́ ma. Ta elengbi bɛ ti tɛnɛngɔ tɛnɛ na la ma, ta ala lengbi nga ti lingɔ e siɔni bere zangɔ e ma. (Nzembo 115:17) Du na kpengba lɛ! Ta mɔ tara gingɔ tɛnɛngɔ tɛnɛ bɛ yakere na azi mɛ kpili bere ademo ma. Ta mɔ hɛ̃ nga ti mɔ bɛ yakere na akpale ti kutimɛ mɛ na mangbi na asiɔ nyingɔ ma.​—Di Kolimbola Mibeko 18:10, 11; Yisaya 8:19.

13. Ye mɛ azi kondó ndo kpɛ mbɛtɔ tɛ ademo alindó ti nɛngɔ ya, ala hã mbɛtɔ ni nɛ?

¹³ Ta ademo ndo handa bo azi ma, ala ndo hɛ̃ nga azi mbitɔ. Satana na ademo tɛ lo ahĩnga ya “ngoi tɛ ani angbã bo yakere” na lo mɛ ya angbã yakere Nzapa kpɔ la ge lɛ sese. (Suma 12:12, 17) Ala ti siɔni mawoma ɔngɔ se mɛndó ala da uzu. Kanda azi gba mɛndó na mbɛtɔ tɛ ademo ko, ta ala dɛ kpɛ la fãni mɛndɛ̃ ma. Ye mɛ ala lindó ti nɛngɔ ya ala hã mbɛtɔ ni nɛ?

14. Na bangɔ ye mɛndó awakristo ti Efɛzɛ li, ye mɛ elengbi ti lingɔ wa e fa mangbi na ademo nɛ?

¹⁴ Ngbangɔ fa e na se mɛ e kɛ̃ tɛnɛ tɛ ademo, nga na se mɛ elengbi ti fangɔ mangbi na ala. Azi mɛndɛ̃ ti  Efɛzɛ, uzu ti la tingɔ awakristo ko, ala ndo tɛnɛndó tɛnɛ na ademo. Ye mɛ ala lindó ti fangɔ mangbi na ademo ni nɛ? Ngbangɔ tɛnɛ ya azi gba “mɛ ndo awa hãngɔ biando, aga na abuku ti biando tɛ la, azɔ ni so gbɛlɛ azi zu.” (Awa Pangɔ Kwa 19:19) Na lo mɛ ya, alandó na gwɛ̃ ti tingɔ awakristo, la ala zɔndó abuku tɛ la zu ti maji (aye ti biando). Ye mɛ ayɔ nga ya e lini ndɛ la. Azi zu mɛ na gwɛ̃ ti lingɔ kwa hɛ̃ngɔ Yehova, ala lengbi nga ti kɛ̃ngɔ aye zu mɛ na mangbi na ademo. Ayeni lengbi ti dungɔ abuku, ambeti, bangɔ lɛ ndozu, afilimɛ, abia, awele na alimɔ: ye zu mɛ aba maji, dɔngɔ lí, ademo bere asiɔ nyingɔ, na asuma mɛ ndo si mabere ta ni siɔni ma. Alengbi nga ti dungɔ ye zu mɛ zo gbe, lo yu ti batangɔ na tɛrɛ lo.​—1 Kɔrinto 10:21.

15. Ye mɛndɛ̃ mɛ elengbi ti lingɔ ya e kɛ̃ lo hɛ̃ Satana na ademo tɛ lo nɛ?

¹⁵ Na pɛ zɔngɔ buku tɛ la, toma Polo tɛnɛndó hɛ̃ la ya, ala ngbã lá kwɛ tiringɔ to “na asiɔ tɔrɔ.” (Efɛzɛ 6:12) Bɛ du ya, ala zɔndó abuku tɛ la zu, ademo ndo gi bondó lége ti lingɔ la siɔni. Ye mɛndɛ̃ mɛ ngbã ti nɛngɔ ya ala lindó nɛ? Polo tɛnɛndó hɛ̃ la ya: “Ĩ gbɔ̃ vara so ti ĩ, so gbanzingɔ ya, ta mbanza mɛ Satana agana na ĩ abɔrɔ ĩ ma, ko bɛ se wá adu na li ambanza ni ko, vara amingɔ wá ni.” (Efɛzɛ 6:16) Ye mɛ ndo bata soda ka lɛ to adu vara tɛ lo. Ndenge ni kɔi, loyengɔ tɛ e alengbi ti batangɔ e. Se e ye na bɛ e kɔi ya Yehova lengbi ti batangɔ e ko, elengbi ti kɛ̃ngɔ lo hɛ̃ Satana na ademo tɛ lo.​—Matie 17:20.

16. Ye mɛndɛ̃ mɛ elengbi ti lingɔ ya loyengɔ tɛ e ati kpengbani ka tɛ Yehova nɛ?

¹⁶ Ye mɛ e li ti nɛngɔ ya loyengɔ tɛ e ati kpengbani ka tɛ Yehova nɛ? E di Ngbangɔ bi zu. Elengbi e kpã bɛ e ka  tɛ Yehova wa e ye nga ya lo lengbi ti batangɔ e. Se e kpã bɛ e zu ka tɛ Yehova ko, ta Satana na ademo tɛ lo alengbi ti lingɔ e na ye kɔi ma.​—1 Yoanɛ 5:5.

17. Ye mɛndɛ̃ mɛ elengbi ti lingɔ ti nɛngɔ ya e bata tɛrɛ e na ademo nɛ?

¹⁷ Awakristo ti Efɛzɛ alengbindó ti lingɔ ye mɛndɛ̃. Na lo mɛ ya kɔdɔrɔ ti Efɛzɛ asĩndó na kwa tɛ asiɔ nyingɔ ko, la Polo tɛnɛndó hɛ̃ la ya: “Ale ĩ sambela Nzapa ngoi zu.” (Efɛzɛ 6:18) Ala lengbindó ti yɔngɔ ka tɛ Yehova ngoi zu ya, lo bata ani. E nga ndɛ ge lɛ gegi mɛ asĩ na kwa tɛ asiɔ nyingɔ. Elengbi nga e yɔ ka tɛ Yehova ya lo bata e. Elengbi e kpã ili lo na ya sambela tɛ e. (Di Masese 18:10.) Se e ngbã lá kwɛ ti yɔngɔ ka ti Yehova yako lo bata e na ya asɔ̃ tɛ Satana ko, lo na mangɔ sambela tɛ e.​—Nzembo 145:19; Matie 6:13.

18, 19. (a) Ye mɛ e li, wa e nwɔ̃ to mɛ e ndo e tiri na Satana na ademo tɛ lo nɛ? (b) Hũnda mɛ e na hɛ̃ngɔ gbinya na ndoni na ya shapitrɛ mɛ na gangɔ nɛ?

¹⁸ Se e fa mangbi na aye zu mɛ aba kwa tɛ asiɔ nyingɔ, se e kpã nga bɛ e ka tɛ Nzapa ya lo na batangɔ e, ni na zangɔ e ya, e kɛ̃ lo hɛ̃ Satana na ademo tɛ lo. Ta elengbi ti dungɔ na mbitɔ tɛ ala ma. (Di Zaki 4:7, 8.) Yehova ɔ ademo na ngunu. Lo hɛ̃ndó la tumbu na ngoi tɛ Noa, lo nga na onzingɔ ala zu na bi mɛ na gangɔ. (Yudɛ6) Ta bɛ mɔ ali na ni ma, to mɛ e ndo e tiri na Satana ko, ta e bo kɔi ma. Aangelo tɛ Yehova ndo bata e. (2 Bakonzi 6:15-17) Elengbi ti yengɔ yako, ta Yehova na ziangɔ e ma, lo na zangɔ e ya e nwɔ̃ to ni.​—1 Petro 5:6, 7; 2 Petro 2:9.

¹⁹ Satana na ademo tɛ lo la ndo si na apɛnɔ ndɛ gba ge lɛ sese, na lo nɛ la ta Yehova kpɔ la ma nɛ? E na hɛ̃ngɔ gbinya ti hũnda olo kaya shapitrɛ mɛ na gangɔ.