A su nzɔ̃ pa ka ya Ngbangɔ ya, azi na dungɔ lɛ la ngɛ̃́ kaka bwaí ge lɛ sese. (Nzembo 37:29) Ngbangɔ adu anzina buku 66 lá abombi ndoni koi. Nzapa to ndó akɔli ti loyengɔ bere 40 lá asu ni. Mɔzɛsi su a buku 5 ti kɔzoni a ɔ dɛ buru 3 500. Apɔstrɔ Yoanɛ ndó la asu ndangba buku a ɔ dɛ buru 1 900. Awa sungɔ Ngbangɔ asundó dangɔ bɛ tɛ na? Nzapa ndo tɛnɛndó tɛnɛ hɛ̃ awa sungɔ Ngbangɔ na lége ti nyingɔ vurú. (2 Samwele 23:2) Ala sundó dangɔ bɛ tɛ Nzapa, ta tɛ la nvɛ̃ni ma. Ni la Ngbangɔ adu buku tɛ Nzapa.​—Di 2 Timɔte 3:16; 2 Petro 1:20, 21.

Ba video Zo mɛ nvɛ Ngbangɔ na?

E hĩnga ya Ngbangɔ lo ka tɛ Nzapa na lo mɛ ya ni ndo pia tɛnɛ tɛnɛ mɛ na gangɔ na se ni kɔndɛ kɔndɛ. Ta zo kɔi lengbi ti lingɔ so ma. (Yosua 23:14) Bo Nzapa mɛ Nvɛ̃ Nguru Zu kɔi la lengbi ti hĩngangɔ na seni ye mɛ na gangɔ.​—Di Yisaya 42:9; 46:10.

E hĩnga ya buku mɛ lo ka tɛ Nzapa ahɔngbi na abuku mɛ ndɛ̃́ kwɛ́, Ngbangɔ du nga so. Akangbi ndó amiliare ti Ngbangɔ na ayanga a ɔ ngbangbo ngbangbo. Abɛ se azi mɛ ndɛ̃́ ndo hũ tɛ la ya Ngbangɔ du ngbina buku ko, tɛnɛ ti ya Ngbangɔ a mangbi na siãsi. Fani mɛ ndɛ̃́, awa sungɔ Ngbangɔ ko 40 ndó na mangbi. * Se e bɛ oko katɛ, tɛnɛ mɛ Ngbangɔ tɛnɛ na lo songo afa ya buku ni a lo ka tɛ bɛta Nzapa, lo du Nzapa ti songo, tee ndɛ na la olo mɛ buku ni na nguru ti gbinyangbingɔ azi. Alo ko kwɛ́ ndo to a miliɔ tɛ azi ya ala ye ya Ngbangɔ adu Tɛnɛ tɛ Nzapa.​—Di 1 Tɛsalonikɛ 2:13.

Ba video Ngasia la elengbi ti yengɔ ya, Ngbangɔ ndo tɛnɛ bɛta tɛnɛ nɛ?

Ngbangɔ ndo tɛnɛ fani sĩni nzɔ̃ pa mɛ fa ye mɛ Nzapa ye na lo tɛ azi. Ngbangɔ ndo fa se mɛ ndó dungɔ lɛ ngɛ̃́ ka ya paradizo agere bo so kpa ka ya pandɛ ti du tɛ azi nga na se mɛ na lɛkɛngɔ lɛ sese ati paradizo fani mɛ ndɛ̃́.​—Di Suma 21:4, 5.

Elengbi ti lwangɔ andia, angbondo tɛnɛ, nga na awangɔ ka ya Ngbangɔ. Fani mɛ ndɛ̃́, Ngbangɔ tɔndɔ nda a lɛlo ti se mɛ ndó Nzapa ndó mangbi na azi. A lɛlo niko ndo fa ase liye tɛ Nzapa. Ni la, Ngbangɔ lengbi ti zangɔ mɔ ya, mɔ hĩnga Nzapa. A ndo fa ye mɛ mɔ li ko mɔ ti kwa lo.​—Di Nzembo 19:7, 11; Zaki 2:23; 4:8.

Nyĩ buku mɛ na zangɔ mɔ ya mɔ gbɔ̃ nda tɛnɛ ti ya Ngbangɔ se mɔ landa se kɔdɛ mɛ ndó Yezo ndo li. Yezo ndo dindó vɛrsɛ kɔi so pɛni omɛ ndɛ̃ ti kambisangɔ “nda tɛnɛ ti ya buku tɛ Nzapa.”​—Di Luka 24:27, 45.

Ta mbɛni ye mɛ ndɛ̃́ mɛ a dɛ̃ a ɔ nzɔ̃ pa mɛ a lo ka tɛ Nzapa da ma. Kanda ta a mbanga azi ndo ye nzɔ̃ pa ni ma, ambanga ndo hũ tɛ la ya tɛnɛ ni ndo gia a ni. Ta mɔ nzɛ̃ ma. Du ti kaka mɛ mɔ ndo lɛndɛrɛ na ngoi mɛ na gangɔ a ba se mɛ mɔ ndo li kpengbani ti hĩngangɔ Nzapa.​—Di Yoanɛ 17:3.