Azi gba ndo da bɛ la ya, ta alengbi ti lingɔ tɛrɛ lo ya, azi ti pɔrɔ tɛrɛ ndɛ̃ ndɛ̃ ndɛ̃ adu kwɛ kɔi ma.

•   “Na ya akɔdɔrɔ gba, pɔnangɔ pɔrɔ tɛrɛ adu nga ma puazɔ̃ mɛ ndo gbɛ̃ akɔdɔrɔ, mangbi tɛ azi nga na dungɔ lɛ ngɛ̃́ ti bi kɔi kɔi. Ni ndo to azi gba ya, ala li aye tɛrɛ afɔ̃ la zangangɔ songo.”​—António Guterres, sɛkrɛtɛrɛ général ti Nations-unies.

 Lá kɔi gbanda ko, azi ti pɔrɔ tɛrɛ ndɛ̃ ndɛ̃ ndɛ̃ na tingɔ kwɛ kɔi? Tɛnɛ mɛ Ngbangɔ tɛnɛ nɛ?

 Ngbangɔ kambisa hɛ̃ e se mɛ Nzapa ndo ba na azi ti pɔrɔ tɛrɛ ndɛ̃ ndɛ̃ ndɛ̃.

•   “[Nzapa lindó] bo zo kɔi, na ndo zo niko la lo li azi mɛndɛ̃ zu, la azi ni ko amu lɛ sese zu.”​—Awa Pangɔ Kwa 17:26.

•   “Azi zu ka lɛ Nzapa kwɛ kɔi. Kanda azi ti lɛ sese zu mɛ ndo tɔndɔ lo, ndo li nga ye na seni ko, lo ndo ye la.”​—Awa Pangɔ Kwa 10:34, 35.

 Ngbangɔ tɛnɛ yangondo ya, azi ti lɛ sese zu adu azi ti ndasewa kɔi, wa Nzapa ndo ye azi ti pɔrɔ tɛrɛ zu.

 Lo-lengɔ Gbia tɛ Nzapa na lingɔ ya, azi ti pɔrɔ tɛrɛ zu ati kwɛ kɔi. Guvɛrnɛma niko na hangɔ na azi se mɛ ala lengbi ti lingɔ kpale tɛrɛ afɔ̃ la na ndenge ti nzɔ̃ni. Azi na mandangɔ se mɛ ala lengbi ti hãngɔ seliye ti siɔni mɛ aba pɔnangɔ pɔrɔ tɛrɛ.

•   “Azi mɛ na dungɔ ge lɛ sese na mandangɔ mbilimbili.”​—Yisaya 26:9.

•   “Bɛta mbilimbi na hɛ̃ngɔ siriri, ni na lingɔ ya, azi adu na siriri ti bwai na bwai zangangɔ dungɔ na mbɛtɔ ti ye kɔi.”​—Yisaya 32:17.

 Ndɛ lo mɛ ko, amiliɔ̃ tɛ azi ndo manda kaya Ngbangɔ se mɛ ala lengbi ti lingɔ kpale tɛrɛ azi mɛndɛ̃ na tɔndɔngɔ nga na ndima.

•   Ti nɛngɔ ya, mɔ hĩnga akpale mɛndɛ̃ gba ko, di Lamuka! mɛ bɛli tɛnɛ ni pa ya, “Kokanisela baninga mabe ekosila?”

•   Ti nɛngɔ ya, mɔ hĩnga se mɛ awa dũngɔ ayangambi alengbi ti kambisangɔ hɛ̃ ayati la kpale mɛ aba pɔnangɔ pɔrɔ tɛrɛ ko, di bɛli tɛnɛ mɛ apa ya; “Comment parler de racisme à votre enfant”