Yezo hĩnga nzɔ̃ni pɛnɔ mɛ azi ndo hũ na lo ti mɔbulu nga na zangangɔ mbilimbili. Akalandó lo tɛrɛ lo, asɔndó lo zangangɔ ya, lo li ye kɔi ti siɔni, afandó ngbanga abi li lo na zangangɔ mbilimbili, wa lo kpindó kwá ti siɔni nvɛni. Abɛse ta lo lindó ye kɔi ma ko, “lo hɛ̃ndó dungɔ lɛ ngɛ̃́ tɛ lo so tɔ̃ngɔ azi gba.” (Matie 20:28; Yoanɛ 15:13) Ngama Gbia ti Lo-lengɔ gbia tɛ Nzapa, angbã yakere lo onzi kpale ti mɔbulu na ndo lɛ gigi zu.—Yisaya 42:3.

 Ngbangɔ kambisa se mɛ lɛ gigi na tingɔ na ni ka gbɛ Lo-lengɔ Gbia tɛ Yezo:

•   “Ta wa lingɔ siɔ ye na dungɔ da fãni mɛ̃ndɛ ma; mɔ na bangɔ ndo mɛ lo ndo du da, ta mɔ na hũngɔ lo ma. Kanda azi ti zungɔ na tɛrɛ na mungɔ lɛ sese, wa ala na sepalangɔ na bɛta siriri.”—Nzembo 37:10, 11.

 Ngasia la elengbi ti hɛ̃ngɔ Yezo sia kɔli na lo ti aye mɛ lo li na lo tɛ e ná aye mɛ lo na lingɔ na lo tɛ e nɛ? Kaya mbeti ti Luka 22:19, Yezo pandó hɛ̃ ava lo ya, ala ndo da bɛ la na bi ti kwá tɛ ni. Na lo ni la, na bulu olo, na landangɔ bi mɛndó lo kpi na ni, Atɛmwɛ tɛ Yehova ti ndo lɛ gigi zu na lingɔ bombi so dangɔ bɛ la na bi ti kwá tɛ lo. E ili mɔ na dengɔ bɛ zu ya, mɔ ga e li bombi ti dangɔ bɛ na bi ti kwá tɛ Yezo na bi nzɛ ti 24/03/2024.

Ba ndo mɛ e na dangɔ bɛ e na bi ti kwá tɛ Yezo