Azi gba na ndo lɛ gigi ndo hũ ya, ala ngbã na bɛ la bere ta zo ti ala ma. Azi ti kɔdɛ na omɛ aba sãte atɛnɛ ya, zangɔ azi mɛndɛ̃ adu se ti nzɔ̃ni mɛ alengbi ti lingɔ ya, zo nwɔ seliye ti ngaso.

•   “Zangɔ azi alengbi ti lingɔ ya, dungɔ lɛ ngɛ̃́ tɛ zo ati nzɔ̃ni nvɛ̃ni, ni lengbi nga ti zangɔ ya, ta zo hũ ya ni ngbã na bɛ ni ma.”—Linɔ mɛ ndo ba kpale ti sãte ka Etat-Unis.

 Ngbangɔ hɛ̃ awangɔ ti nzɔ̃ni mɛ alengbi ti zangɔ mɔ ya, mɔ hĩnga aye mɛ mɔ lengbi ti lingɔ na lo tɛ azi mɛndɛ̃. Landangɔ awangɔ niko alengbi ti zangɔ e ya, e nwɔ se mɛ e ndo hũ ya, e ngbã na bɛ e.

 Du wa songo. Ndo gi lége ti lekisangɔ ngoi ndoni kɔi na azi mɛndɛ̃. Du dã ti hɛ̃ngɔ ala aye mɛ mɔ na ni. Se mɔ li ngaso ko, ala na hɛ̃ngɔ mɔ sia kɔli gba, wa ni na lingɔ ya, mangbi tɛ i ti kpengbani.

•   Wangɔ ti ya Ngbangɔ: “Ĩ ndo hɛ̃ ye hɛ̃ afɔ̃ ĩ, wa ala nga na hɛ̃ngɔ ĩ.”—Luka 6:38.

 Salela ngunu tɛ mɔ so zangɔ azi mɛndɛ̃. Ndo gi lége ti zangɔ azi mɛ atengbi na kpengba kpale. Alengbi ti dungɔ mangɔ ala na seni bere lingɔ kwa hɛ̃ la so zangɔ ala.

•   Wangɔ ti ya Ngbangɔ: “Beta kwa ndo za kwa lo na ya ngoi ti pɛnɔ.”—Masese 17:17, Ngbangɔ ti Contemporary na yanga ti Anglais.

 Ti nɛngɔ ya, mɔ hĩnga akpale gba na ndo se mɛ mɔ lengbi ti dungɔ na mangbi ti nzɔ̃ni na azi mɛndɛ ko, di bɛli tɛnɛ mɛ, “Libota mpe boninga ná basusu.”