1-2. Ye mɛ zo lengbi ti lingɔ uzu ti lo mungɔ batisimɔ nɛ?

 NA YA abulu kũ mɛ alo ti ɔngɔ ko, azi ɔngɔ miliɔ̃ kɔi ahɛ̃ tɛrɛ la hɛ̃ Yehova wa ala mu nga batisimɔ. Nga ma tɛ Timɔte mɛ wakristo ti siɛklɛ ti uzu ko, gba ni ka popo tɛ la amandandó mbilimbili na ngoi mɛ ala dɛ “ayangambi.” (2 Tim. 3:14, 15) Ambangani ahĩngandó mbilimbili na ngoi mɛ ala ti akangba, bere ala ti abange. Ali ndɛ abulu gba, na pɛ mandangɔ Ngbangɔ ndoni kɔi na Atɛmwɛ tɛ Yehova ko, wali kɔi mɛ na bulu 97 amundó batisimɔ!

² Se du ya, mɔ ndo manda Ngbangɔ bere mɔ mai kaya ndasewa tɛ Atɛmwɛ tɛ Yehova ko, mɔ ndo da bɛ mɔ na mungɔ batisimɔ? Ni du mɔkanɔ ti nzɔ̃ni nvɛ̃ni! Kanda uzu ti mɔ mungɔ batisimɔ ko, ayɔ ya mɔ hɛ̃ tɛrɛ mɔ hɛ̃ Yehova. Tɛnɛ ti mandangɔ mɛ na kambisangɔ bere hɛ̃ngɔ tɛrɛ hɛ̃ Yehova alengbi na nɛ. Ni nga na zangɔ mɔ, mɔ hũ ya, se mɔ lɛkɛ tɛrɛ mɔ nzɔ̃ni ko, ta tina ti mɔ kpɛngɔ mbɛtɔ ti hɛ̃ngɔ tɛrɛ mɔ hɛ̃ Yehova nga na mungɔ batisimɔ da ma.

HƐ̃NGƆ TƐRƐ HƐ̃ NZAPA ALENGBI NA NƐ?

3. Hɛ̃ se lɛlo tɛ azi mɛ Ngbangɔ tɛnɛ tɛnɛ tɛ la mɛndó ala hɛ̃ tɛrɛ la hɛ̃ Yehova.

³ Na ngoi mɛ Ngbangɔ ndo salela tɛnɛ mɛ, hɛ̃ngɔ tɛrɛ ko, ando fa kpãngɔ ye kɔi katɛ so lingɔ na kwa kɔi mɛ ngbondoni. Azi ti Izraɛlɛ adundó ndasewa mɛ ahɛ̃ tɛrɛ la hɛ̃ Yehova. Kanda ambanga azi ka ndasewa niko ahɛ̃ndó tɛrɛ la hɛ̃ Yehova na ndenge mɛndɛ̃. Na ndakisa, Aarona ndo yundó ka ndo tirban tɛ lo, linzanza kɔi mɛ ali ni na wolo ni dundó ye ti “santo mɛ ndo fa hɛ̃ngɔ tɛrɛ hɛ̃ Nzapa. Linzanza niko ndo fandó ya, akpã lo katɛ  so lingɔ kwa kɔi ti ngbondoni, kwa tɛ kota nganga nzapa ti Izraɛlɛ. (Le. 8:9) Anaziréen ndo hɛ̃ ngandó tɛrɛ la hɛ̃ Yehova so lingɔ kwa ti ngbondoni na ndenge mɛndɛ̃. Tɛnɛ ti ya Ngbangɔ mɛ agbinyangbi ni na “Naziréen,” alo na tɛnɛ ti yanga ti Ebré nazir, mɛ afa ya “zo mɛ akpã lo katɛ,” bere “zo mɛ hɛ̃ tɛrɛ lo.” Ayɔndó ya, Anaziréen ndo tɔndɔ ndia ti ngbondoni mɛ akpã na lo tɛ ala kaya ndia tɛ Moizɛ.​—Mit. 6:2-8.

4. (a) Ngasia la azi mɛ ahɛ̃ tɛrɛ la hɛ̃ Yehova adu nga ma ye mɛ akpã katɛ na lo ti kwa mɛ gbondoni nɛ? (b) Kɛ̃ngɔ tɛrɛ alengbi na nɛ? (Ba nga limɔ.)

⁴ Na ngoi mɛ mɔ hɛ̃ tɛrɛ mɔ hɛ̃ Yehova ko, mɔ ndo pɔna tingɔ kɔi tɛ ava Yezo, wa lingɔ se bɛ Yehova ndo ti ye ti ngbondoni nvɛ̃ni ti ya dungɔ lɛ ngɛ̃́ tɛ mɔ. Aye mɛ hɛ̃ngɔ tɛrɛ hɛ̃ Nzapa nga na tingɔ wakristo ndo yɔ nɛ? Yezo pandó ya: “Se zo ye landangɔ mbi ko, ayɔ ya lo kɛ̃ tɛrɛ lo nvɛ̃ni.” (Mat. 16:24) Tɛnɛ ti grɛkɛ mɛ agbinyangbi ni na ayɔ ya “lo kɛ̃ tɛrɛ lo nvɛ̃ni ko” alengbi nga ti gbinyangbingɔ ni na ayɔ ya “ta lo du na dungɔ lɛ ngɛ̃́ na lo tɛ lo nvɛ̃ni ma.” Nga ma zo mɛ ahɛ̃ tɛrɛ lo hɛ̃ Yehova ko, na yɔngɔ ya, mɔ kɛ̃ aye zu mɛ ta ndo hɛ̃ lo dengɔ bɛ ma. (2 Kɔr. 5:14, 15) Ni fa kɛ̃ngɔ lingɔ akwa zu ti siɔni mɛ aba “gwɛ̃ ti tɛrɛ,” mabere lingɔ pite. (Gal. 5:19-21; 1 Kɔr. 6:18) Tɔndɔngɔ ndia ti ngaso na kpãngɔ dungɔ lɛ ngɛ̃́ tɛ mɔ na ya kaka? Ipɔ, se mɔ ndo ye Yehova wa mɔ ye nga na bɛ mɔ kɔi ya, andia niko adu na lo ti nzɔ̃ kpale tɛ mɔ ko, ta mɔ na hũngɔ ni ngaso ma. (Nz. 119:97; Yis. 48:17, 18) Nyita kɔli kɔi mɛ ili lo la Nicolas tɛnɛ ya: “Mɔ lengbi ti hũngɔ andia tɛ Yehova nga ma nwa ti da bɔlɔkɔ mɛ ndo gbanzi mɔ ya, ta mɔ li aye mɛ bɛ mɔ ye ma, bere mɔ lengbi ti hũngɔ ni nga ma nwa mɛ ndo gbanzi azɛ̃ ya, ta ala li mɔ siɔni ma.”

5. (a) Ngasia la mɔ lengbi ti hɛ̃ngɔ tɛrɛ mɔ hɛ̃ Yehova nɛ? (b) Ɔngbi mɛ ka popo tɛ hɛ̃ngɔ tɛrɛ na mungɔ batisimɔ nɛ? (Ba nga limɔ.)

⁵ Mɔ lengbi ti hɛ̃ngɔ tɛrɛ mɔ hɛ̃ Yehova ngasia? Hɛ̃ngɔ tɛrɛ hɛ̃ Nzapa alengbi na kongɔ  kapa hɛ̃ lo na ya sambela ya, mɔ na vɔrɔngɔ bo lo kɔi, wa lingɔ se bɛ lo na dungɔ na ndo ti uzu na ya dungɔ lɛ ngɛ̃́ tɛ mɔ. Na lingɔ ngaso, mɔ ko kapa hɛ̃ Yehova ya, mɔ na ngbãngɔ lá kwɛ “yengɔ lo na bɛ mɔ zu, na tɛrɛ mɔ zu, na bingangɔ li tɛ mɔ zu, nga na ngunu ti tɛrɛ mɔ zu.” (Mar. 12:30) Hɛ̃ngɔ tɛrɛ adu kpale mɛ ndo ɔ ka popo tɛ zo ná Yehova, ta azi mɛndɛ̃ ndo hĩnga ni ma. Kanda mungɔ batisimɔ adu ye mɛ ndo li tɛrɛ lo na lɛ azi zu, ni ndo fa ya, zo hɛ̃ tɛrɛ lo hɛ̃ Nzapa. Hɛ̃ngɔ tɛrɛ mɔ hɛ̃ Yehova ta adu ye ti wele ma, ayɔ ya mɔ du na ekateli ti tɔndɔngɔ kapa mɛ mɔ ko, wa Yehova ye ya mɔ li ngaso.​—Mos. 5:4, 5.

NDA MƐ AYƆ YA MƆ HƐ̃ TƐRƐ MƆ HƐ̃ YEHOVA NƐ?

6. Ye mɛ ndo to zo ya, lo hɛ̃ tɛrɛ lo hɛ̃ Yehova nɛ?

⁶ Ye ti uzu mɛ lengbi ti tongɔ mɔ ya, mɔ hɛ̃ tɛrɛ mɔ hɛ̃ Yehova adu ya, mɔ ndo ye lo. Ta songo ni alo bo na ndo se mɛ mɔ ndo ma na tɛrɛ mɔ ma. Kanda songo ni alo na ndo “hĩngangɔ ndo ti mbilimbili” nga na “gbɔ̃ngɔ nda akpale na lége ti nyingɔ.” Aye mɛ mɔ manda na lo tɛ Yehova la li ya, songo tɛ mɔ na mbage tɛ lo amai. (Kol. 1:9) Mandangɔ Ngbangɔ aza mɔ ya, mɔ ye na bɛ mɔ kɔi akpale mɛ taa, ti (1) Yehova da biani, ti (2) asu Ngbangɔ na lége ti nyingɔ tɛ lo, wa ti (3) lo ndo salela linɔ tɛ lo ti nɛngɔ ya, lo kokisa na dangɔ bɛ tɛ lo.

7. Ye mɛ ayɔ ya, e li uzu ti nɛngɔ ya, e hɛ̃ tɛrɛ e hɛ̃ Yehova nɛ?

⁷ Azi ko la ndo hɛ̃ tɛrɛ la hɛ̃ Yehova ko, ayɔ ya, ala hĩnga hangɔ lo ti ngbondoni ti ya tɛnɛ tɛ Nzapa, wa ala ndo li ya, dungɔ lɛ ngɛ̃́ tɛ la amangbi na andia tɛ lo. Ala ndo li zu ti pangɔ hɛ̃ azi mɛndɛ̃ mbilimbili mɛ ala manda na bangɔ makoki mɛ ala na ni. (Mat. 28:19, 20) Songo tɛ la na mbage tɛ Yehova ndo ti kpengbani, wa ala ndo ti na gwɛ̃ kpengbani ti hɛ̃ngɔ tɛrɛ la hɛ̃  lo nga na vɔrɔngɔ bo lo kɔi. Se mɛ mɔ ndo ma nga na tɛrɛ mɔ la? Se mɔ ndo ye Yehova na bɛ mɔ kɔi ko, ta mɔ na mungɔ ekateli ti hɛ̃ngɔ tɛrɛ mɔ hɛ̃ lo nga na mungɔ batisimɔ na lo mɛ ya, mɔ ye hɛ̃ngɔ wa hangɔ mɔ na Ngbangɔ nga na awa dũngɔ mɔ dengɔ bɛ, bere mɔ na lingɔ ni na lo mɛ ya, akwa mɔ ali nga ngaso ma.

8. Ngasia la hĩngangɔ anzɔ̃ lo mɛ Yehova li na lo tɛ mɔ, na tongɔ mɔ ya mɔ hɛ̃ tɛrɛ mɔ hɛ̃ lo nɛ? (Nzembo 116:​12-14)

⁸ Na ngoi mɛ mɔ na gbɔ̃ngɔ li mɔ na ndo aye ti nzɔ̃ni zu mɛ Yehova li tɛrɛ mɔ ko, ni na tɔngɔ mɔ ya mɔ hɛ̃ lo sia kɔli wa mɔ hɛ̃ dũngɔ lɛ ngɛ̃́ tɛ mɔ hɛ̃ lo. (Di Nzembo 116:12-14.) Ngbangɔ pa ya “anzɔ̃ ye zu, nga na atisa zu ti lengbingɔ ndo lo ka tɛ Yehova.” (Zaki 1:17) Tisa ti ngbondoni mɛ aɔ atisa mɛndɛ̃ zu adu kwá tɛ Nyi lo Yezo Kristo. Gbɔ̃ li mɔ na ndo aye mɛ kwá tɛ Yezo Kristo ali na lo tɛ mɔ. Kwá tɛ Yezo hɛ̃ mɔ nzɔ̃ tangɔ ligɛrɛ ti dungɔ na mangbi ti nzɔ̃ni na Yehova nga ti luangɔ dungɔ lɛ ngɛ̃́ ti bwai na bwai. (1 Yn. 4:9, 10, 19) Hɛ̃ngɔ tɛrɛ mɔ hɛ̃ Yehova adu ndenge kɔi ti nzɔ̃ni mɛ mɔ na fangɔ ya, mɔ ndo hɛ̃ lo sia kɔli na lo ti kota songo mɛndó lo fa na mɔ, nga na lo ti aye zu ti nzɔ̃ni mɛ lo ndo hɛ̃ mɔ. (Mib. 16:17; 2 Kɔr. 5:15) Buku Du na dungɔ lɛ ngɛ̃́ bwai na bwai! akambisa nda mɛ adu ngbondoni hɛ̃ngɔ Yehova sia kɔli na ndenge ti ngaso kaya wangɔ ti 46, paragrafɛ ti 4, ni nga na Video ti miniti 3 mɛ bɛli tɛnɛ ni pa ya: Pesá makabo na yo epai ya Nzambe.

MƆ DÃ TI HƐ̃NGƆ TƐRƐ MƆ HƐ̃ YEHOVA NGA NA MUNGƆ BATISIMƆ?

9. Se du ya, ta zo dɛ kokisa masengami ti hɛ̃ngɔ tɛrɛ lo nga na mungɔ batisimɔ ma ko, ye mɛ ta lo lengbi ti lingɔ ma nɛ?

⁹ Mɔ lengbi ti dangɔ bɛ mɔ ya, ta mɔ dɛ lɛkɛ tɛrɛ mɔ nzɔ̃ni ti nɛngɔ ya, mɔ hɛ̃ tɛrɛ mɔ hɛ̃ Yehova wa mɔ mu nga batisimɔ ma. Ngoi mɛndɛ̃ mɔ na gwɛ̃ ti gbinyangbingɔ akpale ti ya dungɔ lɛ ngɛ̃́ tɛ mɔ ti nɛngɔ ya amangbi na andia tɛ Yehova, bere mɔ na gwɛ̃ ti ngoi gba ti nɛngɔ ya loyengɔ tɛ mɔ ti kpengbani. (Kɔl. 2:6, 7) Ta awa mandangɔ Ngbangɔ zu ndo mai kwɛ kɔi na ya nyingɔ ma, wa ta apalanga zu ndo du dã ti hɛ̃ngɔ tɛrɛ la hɛ̃ Yehova nga na mungɔ batisimɔ mbala kɔi na bulu kɔi ma. Li kpengbani mɔ ba maingɔ tɛ mɔ ti nyingɔ na bangɔ makoki mɛ mɔ na ni, kanda ta na hangɔ tɛrɛ mɔ na azi mɛndɛ̃ ma.​—Gal. 6:4, 5.

10. Aye mɛ mɔ lengbi ti lingɔ se mɔ hũ ya, ta mɔ dɛ mɔ kokisa masengami ti mungɔ batisimɔ ma nɛ? (Ba nga ãkandre “ Na lo tɛ azi mɛ akã la kaya ndasewa tɛ Atɛmwɛ tɛ Yehova.”)

¹⁰ Se mɔ hũ ya ta mɔ dɛ lengbi ti hɛ̃ngɔ tɛrɛ mɔ hɛ̃ Yehova ma ko, kpã mɔkanɔ ni kaya bingangɔ li tɛ mɔ, wa ta bɛ mɔ li na ni ma. Yɔ ka ti Yehova na lége ti sambela ya lo za mɔ, mɔ gbinyangbi akpale ti ya dungɔ lɛ ngɛ̃́ tɛ mɔ. (Fil. 2:13; 3:16) Mɔ lengbi ti yengɔ na bɛ mɔ kɔi ya, lo na mangɔ sambela tɛ mɔ wa lo nga na zangɔ mɔ.​—1 Yn. 5:14.

NDA MƐ AZI MƐNDƐ̃ NDO KPƐ MBƐTƆ NƐ?

11. Ngasia la Yehova na zangɔ e ti nɛngɔ ya, e ngbã mbilimbili ka tɛ lo nɛ?

¹¹ Ambanga azi mɛ akokisa masengami ti mungɔ batisimɔ ko, ala ndo diri na kpale gesi. Ngoi mɛndɛ̃ ala ndo hũnda tɛrɛ la na ndo ya, ‘Se mbi li siɔ kpale na pɛ batisimɔ tɛ mbi wa abi mbi gigi mɛ?’ Se du ya, mɔ ndo du na mbɛtɔ ti ngaso ko, du na loyengɔ ya “Yehova na hɛ̃ngɔ mɔ aye zu mɛ mɔ na gwɛ̃ ni ti nɛngɔ ya mɔ nɔnɔ ndoni kɔi na lo na mbilimbili wa mɔ hɛ̃ nga lo dengɔ bɛ.” (Kɔl. 1:10) Lo nga na hɛ̃ngɔ mɔ ngunu ti nɛngɔ ya, mɔ li aye ti mbilimbili. Lo zandó azi mɛndɛ̃ ya ala li aye ti mbilimbili, wa lo nga na zangɔ mɔ. (1 Kɔr. 10:13) Na lo ti lisalisi tɛ Yehova ko, bo azi yakere la ando bi ala gigi. Yehova ndo za azi tɛ lo ya ala ngbã mbilimbili.

12. Ye mɛ e li ti nɛngɔ ya, ta e li siɔ kpale ti kotani ma nɛ?

¹² Azi zu ti zangangɔ lengbingɔ ndo tengbi na tara ti lingɔ siɔ kpale. (Zaki 1:14) Abɛse ngaso  ko, zo na zo la na pɔnangɔ ye mɛ lo lengbi ti lingɔ na ngoi mɛ lo tengbi na tara. Kpale ti mbilimbili adu ya, mɔ nvɛ̃ni la na pɔnangɔ se dungɔ lɛ ngɛ̃́ mɛ mɔ ye dungɔ na ni. Azi mɛndɛ̃ ndo tɛnɛ ya, ta zo lengbi ti gbanzingɔ gwɛ̃ ti tɛrɛ lo bere aye mɛ lo ye lingɔ ma. Kanda ta ni du biani ma, elengbi ti mandangɔ kɛ̃ngɔ lingɔ aye mɛ e na gwɛ̃ ni. Ni la abɛse mɔ na tengbingɔ na tara na omɛ aba lingɔ siɔ kpale ko, mɔ lengbi ti pɔnangɔ kɛ̃ngɔ lingɔ ni. Ti nɛngɔ ya mɔ longa ko, ndo li sambela hɛ̃ Yehova ngoi zu, du na mɔ mɛsɛnɔ ti nzɔ̃ni ti mandangɔ tɛnɛ tɛ Nzapa, ndo gwe abombi zu, wa ndo pa nga loyengɔ tɛ mɔ hɛ̃ azi mɛndɛ̃. Lingɔ akpale niko na hɛ̃ngɔ mɔ ngunu ti nɛngɔ ya, mɔ ngbã mbilimbili ka tɛ Yehova. Wa ta bɛ mɔ li na ni ma ya, lo nga na zangɔ mɔ.​—Gal. 5:16.

13. Se lɛlo ti nzɔ̃ni mɛ Yozɛfɛ zia hɛ̃ e nɛ?

¹³ Se du ya, mɔ lɛkɛ tɛrɛ mɔ wa mɔ hĩnga nzɔ̃ni aye mɛ mɔ na lingɔ uzu ti nɛngɔ ya, mɔ tengbi na tara ko, na dungɔ woni ya, mɔ tɔndɔ kapa mɛ mɔ ko ti vɔrɔngɔ Yehova. Ngbangɔ tɛnɛ tɛnɛ tɛ azi gba mɛndó ala li ngaso abɛse du ya, ala dundó azi ti zangangɔ lengbingɔ. E mu se lɛlo mɛ, ngoi zu ya Potiphar ndo gindó lége ya ni na Yozɛfɛ ani bombi tɛrɛ ani. Abɛse ngaso ko, Yozɛfɛ hĩngandó uzu ye mɛ lo lengbi ti lingɔ. Ngbangɔ tɛnɛ ya “lo kɛ̃ndó,” wa lo pandó hɛ̃ wali niko ya: “Ngasia la mbi lengbi ti lingɔ kota siɔ kpale ti ngaso nga na lingɔ siɔ lo tɛrɛ Nzapa nɛ?” (Eb. 39:8-10) Ta kitɛ da ma ya, uzu ti nɛngɔ ya wali niko tara Yozɛfɛ ko, Yozɛfɛ hĩngandó nzɔ̃ni aye mɛ lo na lingɔ. Wa atindó woni ya, lo li aye ti nzɔ̃ni na ngoi mɛndó lo tengbi na tara.

14. E manda kɛ̃ngɔ aye ti siɔni ngasia?

¹⁴ Ngasia la se lɛlo tɛ Yozɛfɛ alengbi ti zangɔ mɔ na ngoi mɛ mɔ tengbi na tara nɛ? Bandangɔ ndɛ pɔna aye mɛ mɔ na lingɔ uzu ti nɛngɔ ya, mɔ tengbi na tara. Ndo kɛ̃ mbala kɔi aye zu mɛ Yehova ndo kɛ̃, wa ta mɔ ndo da nga bɛ mɔ na ni ma. (Nz. 97:10; 119:165) Lingɔ ngaso na zangɔ mɔ ya, ta mɔ li siɔ kpale na ngoi mɛ mɔ tengbi na tara ma, na lo mɛ ya, mɔ hĩnga uzu aye mɛ mɔ lengbi ti lingɔ.

15. Ngasia la zo lengbi ti fangɔ yangondo ya, “lo ndo gi” Yehova nɛ? (Aebreo 11:6)

¹⁵ Ngoi mɛndɛ̃ mɔ hĩnga mbilimbili nzɔ̃ni wa mɔ nga na gwɛ̃ ti vɔrɔngɔ Yehova na bɛ mɔ kɔi, kanda mɔ na aye mɛndɛ̃ mɛ ndo gbanzi mɔ ya, ta mɔ hɛ̃ tɛrɛ mɔ hɛ̃ lo wa mɔ mu nga batisimɔ ma. Se adu ngaso ko, mɔ lengbi ti lingɔ ye nga ma se mɛndó gbia Davidi li na ni. Mɔ lengbi ti yɔngɔ ka ti Yehova ya: “Ee Nzapa, ba bɛ mbi na  seni ti nɛngɔ ya, mɔ hĩnga aye mɛ ka da. Ba mbi nzɔ̃ni ti nɛngɔ ya, mɔ hĩnga aye mɛ ndo gia mbi. Ba se du ya mbi na ye kɔi mɛ alengbi ti hɛ̃ngɔ pɛnɔ kaya bɛ mbi, wa dɔ mbi na nɔ na lége ti kaka.” (Nz. 139:23, 24) Yehova ndo sulu azi zu ko la “Ndo gi lo na bɛ la kɔi.” Ge ge ge zu mɛ mɔ ndo li ti nɛngɔ ya, mɔ kokisa mɔkanɔ ti hɛ̃ngɔ tɛrɛ mɔ hɛ̃ lo nga na mungɔ batisimɔ ko, afa ya, mɔ ndo gi lo na bɛ mɔ kɔi.​—Di Aebreo 11:6.

NGBÃ LÁ KWƐ DƆNGƆ DÃ NA YEHOVA

16-17. Yehova ndo benda azi mɛ akã la kaya ndasewa tɛ Atɛmwɛ tɛ Yehova ngasia? (Yoanɛ 6:44)

¹⁶ Yezo pandó ya, Yehova la ndo ili azi ya ala ti ava lo. (Di Yoanɛ 6:44.) Gbɔ̃ li mɔ na ndo dangɔ bɛ niko ti ngbondoni nga na se mɛ ni ba mɔ. Azi zu mɛ Yehova ndo benda la ya, ala ga ka tɛ lo ko, Yehova ndo hũ aye ti nzɔ̃ni ka bɛ la. Lo ndo hũ zo kɔi kɔi ya, “lo du ye tɛ lo nvɛ̃ni,” bere “ye tɛ lo mɛ na valɛrɛ gba.” (Mib. 7:6) Se mɛ lo ndo hũ na mɔ la.

¹⁷ Ngoi mɛndɛ̃ adũ mɔ bere akã mɔ kaya ndasewa tɛ Atɛmwɛ tɛ Yehova. Mɔ lengbi ti hũngɔ ya, ta Yehova la benda mɔ ti nɛngɔ ya, mɔ ga ge ya mbilimbili ma. Kanda ta adu biani ma, Ngbangɔ pa ya: “Ĩ dɔ dã na Nzapa, wa lo na dɔngɔ dã na ĩ.” (Zaki 4:8; 1 Nt. 28:9) Na ngoi mɛ mɔ ndo li kpengbani ti dɔngɔ dã na Yehova ko, lo ndo li nga kpengbani ti dɔngɔ dã na mɔ. Ta Yehova ndo hũ mɔ ya, mɔ du zo kɔi mɛ gɛgɛrɛ ti ya linɔ kɔi ngaso ma. Lo ndo benda zo kɔi kɔi na ndenge tɛ lo ti nɛngɔ ya, lo li ge ya mbilimbili abɛse azi mɛ akã la kaya ndasewa tɛ Atɛmwɛ tɛ Yehova. Na ngoi mɛ azi niko ndo li kpengbani ti dɔngɔ dã na Yehova ko, lo ndo li nga kpengbani ti gangɔ ka tɛ ala nga ma se mɛ Zaki 4:8 tɛnɛ na ni.​—Ba nga 2 Tɛs. 2:13.

18. Ye mɛ e na tɛnɛngɔ tɛnɛ ndo ni na pɔsɔ ti gesi nɛ? (Nzembo 40:8)

¹⁸ Se mɔ hɛ̃ tɛrɛ mɔ hɛ̃ Yehova, wa mɔ mu nga batisimɔ ko, mɔ na landangɔ se lɛlo tɛ Yezo. Lo hɛ̃ndó tɛrɛ lo na bɛ lo zu hɛ̃ to lo ti lingɔ aye mɛ bɛ to lo ndo ye. (Di Nzembo 40:8; Aeb. 10:7) Na pɔsɔ ti gesi, e na bangɔ aye mɛ alengbi ti zangɔ mɔ ya mɔ ngbã lá kwɛ vɔrɔngɔ Yehova na mbilimbili na pɛ batisimɔ tɛ mɔ.