Na lo mɛ ya kwa ti fangɔ tɛnɛ ndo maindó ko, azi gba ati na gwɛ̃ ti ambeti. Ayata ti bethel ti Brooklyn, ndo sindó na azulunalo, kanda akopanyi mɛndɛ̃ndó la ndo si na abuku hɛ̃ la. Na ya anzɛ̃ gba, ta akopanyi niko di dɛndó si na ambeti gba hɛ̃ la ma, wa ni bandando gbɛ̃ngɔ kwa ti fangɔ tɛnɛ. Ni la nyita Rutherford hũndandó nyita Robert Martin mɛ wa bangɔ izini ti singɔ na ambeti ka bethel ya, se alengbi ko e nvɛ̃ni e banda singɔ na ambeti tɛ e.

“Nyita Martin tɛnɛ ya, adu dangɔ ti nzɔ̃ni” afa ya, “e na kpãngɔ masini kɔi mɛ alengbi ti singɔ na abuku.” Ayata ndo futelandó ndo kɔi ka Brooklyn, ka talége ti Concord nimero 18, wa ala vɔ̃ndó aye mɛ alengbi ti lingɔ kwa ni.

Ta bɛ azi zu asepelandó na kpale niko ma. Ngoi mɛndó nvɛ̃ kopanyi mɛndó ndo si na ambeti tɛ e aga aba amashine tɛ e ti fãnani ti singɔ na ambeti ko, lo tɛnɛndó ya, ĩ na akpengba mashini kanda ta zo kɔi so popo tɛ ĩ ahĩnga salelangɔ ni ma. Na pɛ nzɛ mana gɛgɛrɛ ko, ĩ na gbɛ̃ngɔ ni zu.

Nyita Martin tɛnɛ ya, “ni sindó mabere lo tɛnɛ biani, kanda e hĩnga ya, Yehova na zangɔ e, wa lo lindó ni.” Ta aningandó ma, mashine niko ti fãnani abandandó singɔ na ambeti 2 000 bi zu.

Abɛse ando sindó na ambeti ko; awa kwa tɛ Yehova abandó salelangɔ kɔdɛ mɛndɛ̃ ti fãnani ti fangɔ tɛnɛ na lége ti radio. Na lá yenga bi nzɛ ti 26/1922, nyita kɔli Rutherford alindó emisiɔ̃ ti uzu kaya radio ni. Lo lindó diskur kɔi mɛ bɛli tɛnɛ ni atɛnɛ ya; “Amiliɔ̃ tɛ azi mɛ na dungɔ lɛ ngɛ̃́ ndɛ, ta ala na  kpilingɔ ma,” kaya radio KOG mɛ ka kɔdɔrɔ ti Los Angeles mɛ ka Californie.

Azi bere 25 000 alandandó diskur ni. Ambɛge ni asundó ambeti ato hɛ̃ nyita Rutherford so hɛ̃ngɔ lo sia kɔli. Willard Ashford mɛ ndo du ka Santa Ana mɛ ka Californie ahɛ̃ndó Rutherford sia kɔli na lo ti diskur ti nzɔ̃ni mɛndó lo li. Lo tɛnɛndó ya: “E ndó na azi taa kaya da tɛ e, mɛ tɛrɛ la ndo so, ta ala elengbi ti nɔngɔ nɔ ma. Abɛse diskur ni ali tɛrɛ lo so gunda e ko, ta e ndó na likoki ti gwengɔ ma.”

Bandangɔ na pɔsɔ niko abandandó lingɔ adiskur mɛndɛ̃ na lége ti radio. Linɔngi ti sinzili tɛnɛndó ya; na nda buru ti 1922, “azi bere 300 000, ama nzɔ̃ pa na lége ti radio.”

Tɛnɛ tɛ azi nga na ambeti mɛndó ala su, asandó ngunu bɛ awa mandangɔ Ngbangɔ, ni la ayata mundó ekateli ti kĩngɔ shɛnɛ kɔi ti radio ka Staten Island mɛ ni dã na bethel ti Brooklyn. Awa mandangɔ Ngbangɔ asalelandó shɛnɛ ti radio, WBBR ti fangɔ nzɔ̃ pa ti Lo-lengɔ Gbia na ya akɔdɔrɔ gba.

Linɔngi ti sinzili ti 15/06/1922 na anglais, atɛnɛndó ya, kota bombi kɔi na lingɔ tɛrɛ ka Cedar Point mɛ ka Ohio, ni na bandangɔ na bi nzɛ ti 05-13/1922. Bɛ awa mandangɔ Ngbangɔ adendó na ngoi mɛndó ala si ka Cedar Point.

Na ya diskur tɛ lo ti uzu, nyita Rutherford tɛnɛndó ya; “mbi nvɛ̃ni na loyengɔ ya, gbia tɛ e na sulungɔ kota bombi mɛ, wa lo nga na lingɔ ya kwa ti fangɔ tɛnɛ ali tɛrɛ lo na se mɛndó ta adɛ li tɛrɛ lo uzu ma.” Ayata mɛndó ali adiskur na ngoi ti kota bombi niko ko, ala sandó ngunu bɛ ata ya, ala hɛ̃ tɛrɛ la gba na ya kwa ti fangɔ tɛnɛ.

Na bi kwa kũ bi nzɛ ti 08/09/1922 azi bere 8 000 alindó ka ndo ti kota bombi, so landangɔ diskur tɛ Rutherford. Ala ndo kũndó ya; lo kambisa nda tɛnɛ “ADV” mɛndó asu ka lɛ invitation. Ngoi mɛndó ala du sese ko, azi gba ndo hũndó mbeti mɛndó asu ni ka ɛstrade. Nyita Arthur Claus mɛndó alo ka kɔdɔrɔ ti Tulsa mɛ ka Oklahoma ko, lo dundó ka ndo kɔi mɛndó lo lengbi ti mangɔ  diskur nzɔ̃ni. Adundó pɛnɔ nvɛ̃ni na lo mɛ ya, na ngoi niko ko, ta amikro ndó da ma.

Ti nɛngɔ ya, ta zo kɔi fa nyita Rutherford na ngoi mɛ lo ndo li diskur ma ko, prezida ti kota bombi pandó ya, se diskur abanda ko, ta zo na lingɔ kaya da ti kota bombi fãni mɛndɛ̃ ma. Nyita Rutherford badandó diskur na ngoi ti 9:30, lo bandandó diskur tɛ lo na tɛnɛ tɛ Yezo mɛ ka ya Matie 4:17: ‘Lo-lengɔ Gbia ti ndozu angbã yakere agã.’ Na ngoi mɛndó lo ndo kambisa se mɛ azi na mangɔ nzɔ̃ pa ti Lo-lengɔ Gbia niko ko, lo tɛnɛndó ya; “Yezo nvɛ̃ni pandó ya, na ngoi ti gangɔ tɛ lo ko, lo nvɛ̃ni na tambwisangɔ kwa ti kɔngɔ le kɛkɛ tɛ awa kwa tɛ lo, na ngoi mɛ lo na bombingɔ azi ti mbilimbili.”

Nyita Claus mɛndó adu na ndo ti uzu kaya da ti bombi ka dã na awa lingɔ diskur atɛnɛ ya; “E ndo landandó tɛnɛ kɔi kɔi mɛndó lo ndo tɛnɛ na seni nvɛ̃ni.” Na vundu zu lo mandó ya tɛrɛ lo siɔni, wa lo sindo kaya da ti bombi lo gwe. Ta bɛ nyita Artthur dendó na ngoi mɛndó lo si ma, na lo mɛ ya, lo hĩngandó ya, ta na hɛ̃ngɔ ni lége ti lingɔ kai fãni mɛndɛ̃ na ngoi mɛ nyita Rutherford ndo li diskur tɛ lo ma.

Na pɛ ngoi yakere lo bandandó mangɔ tɛrɛ lo nyi nzɔ̃ni. Lo tɛnɛ ya, na ngoi mɛndo lo ndo diri kaya da ti kota bombi ko, lo mandó azi so sɔ̃ ti lá kpengbani. Ni lindó ya, lo lua ngunu! Lo mundó ekateli ti landangɔ tanga diskur niko tee ka ndani abɛse na yɔngɔ ya, lo ma ka ndo lɛ da. Lo ndó na bulu 23 na ngoi niko, ni la lo mandó mure ti da mɛ na mɛtrɛ ɔngɔ bere 4. Lá ndo lindó kaya da ti kota bombi ni, wa ngoi mɛndó lo ndo dɔ dã ko, lo “bandandó mangɔ diskur nzɔ̃ni”

Kanda ta nyita Arthur ndó kɔi ma, azi mɛndɛ̃ ama ngandó ka bɛli da. Kɔi ka popo tɛ la adu nyita Frank Johnson, lo hũndandó Arthur ya, “Mɔ na zama mɛ ando hɔ̃ nzɔ̃ni so ya poshɛ tɛ mɔ?”

 Arthur pandó hɛ̃ lo ya, “Ee ni da.”

Nyita Frank tɛnɛndó hɛ̃ lo ya, “E ndo li fale sambela se du ya, nyita kɔi lengbi ti lingɔ ni. * Mɔ hũ kota bɔngɔ mɛ agĩni ni ka ndo lɛ estradɛ? Adu banderole, agbe ni na asɛtɛ mɛ. Ndo landa na seni wa fangɔ ngbanga. Na ngoi mɛ lo na tɛnɛngɔ ya, “Wa ĩ fa tɛnɛ, ĩ fa tɛnɛ” ko, fa akpu olo 4.”

Na lo ni la nyita Arthur na zama tɛ lo so ti lo, lo ndo lo kũndó ngoi ti fangɔ akpu niko ndoni kɔi na afɔ lo mɛndɛ̃. Ta anĩngandó ma, nyita Rutherford sindó ka ndo ti ngbondoni ti diskur tɛ lo. Lo ndó na dengɔ bɛ nga na ge ge ge, ngoi mɛndɛ̃ lo tɛnɛndó tɛnɛ na ngunu ya: “Ĩ du awa fangɔ̃ kwa ti mbilimbili tɛ Gbia. Ĩ gwe uzu na ya to tee ka ndo zu ti Babilonɛ ati gɛgɛrɛ. Ĩ pa nzɔ̃ pa na ndo lɛ sese zu. Ale lɛ gigi zu ahĩnga ya, Yehova la du Nzapa, wa Yezo Kristo du Gbia tɛ agbia. Ndɛ, adu bi mɛ aɔ abi zu. Ĩ ba, Gbia ndo le gbia! Wa ĩ awa fango tɛnɛ tɛ lo. Na lo ni la, ĩ fa tɛnɛ, ĩ fa tɛnɛ, ĩ fa tɛnɛ mɛ aba Gbia ná Lo-lengɔ gbia tɛ lo!”

Nyita Arthur tɛnɛ ya, mbi ná afɔ̃ mbi e fandó kpu ti banderɔle mɛndó ka ndo lɛ estrade, wa ya ni zindó kotani nvɛ̃ni, e hĩngandó nda tɛnɛ “ADV” mɛ alo na yanga ti anglai mɛ afa ya, “ĩ fa tɛnɛ.” Asundó ka lɛ banderɔle ni ya: “Ĩ fa tɛnɛ mɛ aba Gbia ná Lo-lengɔ gbia tɛ lo!”

Kota bombi mɛndó ali tɛrɛ lo ka Cedar Point azandó ayata ya; ala kpã lɛ la na kwa ti ngbondoni mɛ aba fangɔ tɛnɛ. Wa azi mɛndó asepela na tɛnɛ niko abandandó fango tɛnɛ. Ka kɔdɔrɔ ti Oklahoma mɛ ka États-Unis, nyita kɔi mɛndó lo du colporteur, mɛ ndɛ e ndo ili la ya, awa sungɔ lege ko, lo sundó ya; “E ndo fandó tɛnɛ ka ndo mɛ azi ndo gɛ̃ na diama bere wolo, wa azi gba adundó awa yɛlɛ.” Lo tɛnɛ ya, ngoi mɛndó azi ndo ma tɛnɛ mɛ kaya Zulunalo Âge d’or ko, ala “ndo tondo to.” Lo di tɛnɛ ya; “Ando hɛ̃ndó e dengɔ bɛ na lo mɛ ya, e ndo sandó ngunu bɛ la.”

Awa mandangɔ Ngbangɔ ni agbɔ̃ndó nda tɛnɛ tɛ Yezo mɛ kaya mbeti ti Luka 10:2 mɛ apa ya: “Tɛ ma wo ma ale ka lɛ yaka, kanda awa kwa ti kɔngɔ tɛ ni adu yakere.” Na ngoi mɛndó bulu niko ndo wɛ ko, ala mundó ekateli ti ngbãngɔ lá kwɛ fangɔ tɛnɛ ti Lo-lengɔ Gbia na ndo lɛ sese zu.