BULU na bulu, ando diri na angasã gbaga tɛ Yehova ti ngbondoni ge ya bombi tɛ Awakristo. Da bɛ mɔ na kota dengɔ bɛ mɛ ndo du ka “yayu” na ngoi mɛ zo kɔi adiri ka tɛ Yehova! (Lk. 15:7, 10) Se du ya, mɔ diri kaya bombi fãnani ko, mɔ lengbi ti yengɔ ya, Yezo, aangelo ná Yehova nvɛ̃ni, ala na dengɔ bɛ gba ti hũngɔ mɔ fãni mɛndɛ̃ ka popo tɛ azi tɛ lo. Biani, na ngoi mɛ mɔ na hɛ̃ngɔ tɛrɛ mɔ so lɛkɛngɔ mangbi tɛ mɔ ná Yehova ko, ngoi mɛndɛ̃ mɔ na tengbingɔ na akpengba kpale. Akpengba kpale ni mɛndɛ̃ nɛ, wa aye mɛ alengbi ti zangɔ mɔ ya, mɔ nwɔ ni nɛ?

Abɛse na pɛ diringɔ ya bombi ko, ayata gba ndo ngbã bo lá kwɛ mangɔ nzɛ̃ngɔ na lo ti ye mɛndó ala li. Ngoi mɛndɛ̃ mɔ lengbi ti mangɔ tɛrɛ mɔ nga ma se tɛ Gbia Davidi abɛse du ya, Yehova kandó lɛ lo na ndo siɔ kpale tɛ lo. Davidi sundó ya: “Yungɔ ndo tɛ mbi aɔ ndo mbi nvɛ̃ni.” (Nz. 40:12; 65:3) Se zo diri ka tɛ Yehova wɛ ko, ngoi mɛndɛ̃ lo lengbi ti dungɔ na kamɛnɛ ná dangɔ bɛ ti siɔni na ya abulu gba. Isabelle, * mɛndó abi lo gigi ali abulu ɔngɔ 20 ko, lo tɛnɛ ya, “Adundó pɛnɔ nvɛ̃ni ti nɛngɔ ya, mbi ye ya Yehova lengbi ti kangɔ lɛ lo na ndo siɔ kpale tɛ mbi.” Se du ya mɔ nzɛ̃ ko, mangbi tɛ mɔ ná Yehova alengbi nga ti gbɛ̃ngɔ fãni mɛndɛ̃. (Mas. 24:10) Ta mɔ zia ya, ni si na mɔ ma.

Azi mɛndɛ̃ ndo kpɛ mbɛtɔ se ala da bɛ na aye zu mɛ na yɔngɔ ya, ala li ti nɛngɔ ya, ala lɛkɛ mangbi tɛ ala ná Yehova. Na ngoi mɛndó Antoine adiri ya bombi ko, lo pa ya: “Bɛ mbi alindó na aye gba mɛndó mbi manda, ná omɛndó mbi ndo li na ngoi mɛndó mbi dɛ Tɛmwɛ tɛ Yehova.” Na lo ti adangɔ bɛ ti ngaso ko, azi gba ndo kpɛ hɛ̃ngɔ tɛrɛ la gba na ya kpale ti nyingɔ.

E mu ndakisa kɔi: Yá ti kpengbani akala da tɛ zo kɔi mɛ lo ndo ye ni gba. Se lo da bɛ lo na ngoi nga na kwa zu mɛ na yɔngɔ ya, lo li ti nɛngɔ ya, lo diri kĩ da ni ko, alengbi ti hɛ̃ngɔ lo nzɛ̃ngɔ. Ndenge kɔi, se du ya, da tɛ mɔ ti nyingɔ, afa mangbi tɛ mɔ ná Yehova agbɛ̃ndó na lo ti siɔ kpale mɛ kotani ko, mɔ lengbi ti kamwangɔ se mɔ hĩnga ya, na yɔngɔ ya mɔ  li kwa mɛ kpengbani ti nɛngɔ ya, mɔ diri mɔ lɛkɛ ni. Kanda hĩnga ya, aye mɛ alengbi ti zangɔ mɔ da.

Yehova tɛnɛ hɛ̃ e zu ya: “Ĩ ga e lɛkɛ tɛnɛ na popo tɛ e.” (Yis. 1:18) Mɔ li deja akpale gba ti nɛngɔ ya, mɔ “lɛkɛ tɛnɛ” ná Yehova, wa lo ndo ye mɔ gba na lo ti ge ge ge mɛ mɔ li. Binga li mɔ ĩ: Na lo mɛ ya, mɔ diri ka tɛ Yehova ko, lo lengbi ti salelangɔ ndakisa tɛ mɔ so fangɔ na Satana ya, lo du wa nvɛ̃nɛ!​—Mas. 27:11.

Se mɔ li ngaso ko, mɔ ndo dɔ dã na Yehova wa lo ko kapa ya, ni nga na dɔngɔ dã na mɔ. (Zk. 4:8) Hãngɔ ni zingɔ, adu nzɔ̃ni ndenge mɛ azi mɛndɛ̃ ndo hũ ya, mɔ diri fãni mɛndɛ̃ ge ya bombi, kanda ta ni la alengbi ma. Ayɔ ya, mɔ li zu ti nɛngɔ ya, songo tɛ mɔ na Yehova mɛ To mɔ, lo nga kwa mɔ ati kpengbani. Ngasia la mɔ lengbi ti lingɔ ni nɛ?

Kpã mikanɔ mɛ mɔ lengbi ti kokisangɔ. Ta bɛ mɔ li na ni ma ya, fɔndasiɔ̃ ti da tɛ mɔ ti nyingɔ afa ya​—akpale ti ngbondoni mɛndó mɔ manda na lo tɛ Yehova ná kapa mɛ lo ko na lo ti bi mɛ na gangɔ ko,—​ta ni gbinyangbi ma. Kanda mɔ na gwɛ̃ ti lɛkɛngɔ fãni mɛndɛ̃ dungɔ lɛ ngɛ̃́ tɛ mɔ ti wakristo. Ayɔ ya, mɔ du na momesɛno ti nzɔ̃ni mabere: fangɔ tɛnɛ ngoi zu, gwengɔ bombi, nga na dungɔ ndoni kɔi na ayata mɔ awakristo. Zia e ba ambanga mikanɔ mɛ mɔ lengbi ti kpãngɔ.

Ndo tɛnɛ tɛnɛ ná Yehova ngoi zu. To mɔ ti ndozu ahĩnga ya, na lo ti nzɛ̃ngɔ ti siɔ kpale tɛ mɔ ko, alengbi ti dungɔ pɛnɔ ya, mɔ li sambela hɛ̃ lo. (Rom. 8:26) Abɛse ngaso ko, “sambela Nzapa ngoi zu,” pa hɛ̃ Yehova yangondo se mɛ mɔ na gwɛ̃ ti lɛkɛngɔ mangbi tɛ mɔ na lo. (Rom. 12:12) Andrej pa ya: “Mbi ndo mandó kamɛnɛ kpengbani nvɛ̃ni, mbi ndo hɛ̃ndó tɛrɛ mbi fotɛ. Kanda ngoi zu kondó la mbi ndo li sambela ko, mbi ndo mandó ya tɛrɛ mbi nzɔ̃ni. Bɛ mbi ndo zundó” Se ta mɔ hĩnga tɛnɛ mɛ mɔ tɛnɛ hɛ̃ Yehova na ya asambela tɛ mɔ ma ko, mɔ lengbi ti bangɔ sambela tɛ Gbia Davidi mɛ kaya Nzembo 51 ná 65.

Manda Ngbangɔ ngoi zu. Ni na zangɔ mɔ ya, loyengɔ ná songo tɛ mɔ na mbage tɛ Yehova ati kpengbani. (Nz. 19:7-11) Felipe tɛnɛ ya “Na lo mɛ ya, ta mbindó na prɔgramɛ ti nzɔ̃ni na omɛ aba kpale ti nyingɔ ma ko, mbi nzɛ̃ndó, wa mbi zia ngandó vɔrɔngɔ Yehova. Ta mbi lengbi ti yungɔ ndo ti ngaso fãni sɛ ma. Ni la mbi mundó ekateli ti batangɔ tɛrɛ mbi na kpãngɔ prɔgramɛ tɛ mbi nvɛ̃ni ti mandangɔ Ngbangɔ.” Mɔ lengbi nga ti lingɔ nga ngaso. Se mɔ du na gwɛ̃ ti hĩngangɔ akpale mɛ mɔ lengbi ti mandangɔ ni ko, hũnda ayata mɛ ala kpengbani na ya nyingɔ.

Diri mɔ lɛkɛ mangbi tɛ mɔ ná ayata mɔ awakristo. Azi mɛndɛ̃ mɛ ndo diri ya bombi ko, ala ndo kpɛ mbɛtɔ ya, ayata na hũngɔ ala siɔni. Larissa tɛnɛ ya: “mbi ndo mandó kamɛnɛ nvɛ̃ni. Mbi ndo hũndó ya, mbi hɛ̃ ayata mbi pɛnɔ nvɛ̃ni. Ta dangɔ bɛ niko awɛndó ge ya bɛ mbi iɔ ma.” Hĩnga ya, abiazi ná ayata mɛ ala kpengbani na ya nyingɔ, ala na gwɛ̃ kpengbani ti zangɔ mɔ ya, mɔ diri mɔ ti kwa Yehova. (Ba ãkadre “ Aye mɛ abiazi alengbi ti lingɔ.”) Ala na dengɔ bɛ gba na ndenge mɛ mɔ diri ka tɛ Yehova, wa ala ye nga ya mɔ du na dengɔ bɛ!​—Mas. 17:17.

Aye mɛ mɔ lengbi ti lingɔ ti nɛngɔ ya mɔ dɔ dã na ayata ti ya bombi nɛ? Ndo gwe bombi, wa si nga kwa ti fangɔ tɛnɛ ndoni kɔi na ala. Nzɔ̃ kpale mɛ mɔ na luangɔ nɛ? Felix tɛnɛ ya: “Ayata ti ya bombi tɛ mbi ndó na gwɛ̃ kpengbani ya, mbi diri ka tɛ Yehova. Ala yambandó mbi na dengɔ bɛ zu. Ala zandó mbi ti nɛngɔ ya mbi hũ ya, mbi na olo kɔi tɛ ayata ti ya bombi, wa Yehova ka lɛlo na ndo siɔ kpale tɛ mbi wɛ. Ala za ngandó mbi ya, mbi gwe uzu.”​—Ba ãkadre “ Aye mɛ mɔ lengbi ti lingɔ”

Satana na ngbãngɔ bo lá kwɛ tongɔ “kpengba yá” na lége mɛ mɔ ndo ɔ da so gbanzingɔ mɔ ya, ta mɔ lɛkɛ mangbi tɛ mɔ ná Yehova ma. (Lk. 4:13) Du dã ti nɛngɔ ya, mɔ lɛkɛ wa mɔ li nga ka yada tɛ mɔ ti nyingɔ​—afa ya, mangbi tɛ mɔ ná Yehova ati kpengbani bandangɔ ndɛ.

Na lo tɛ angasã gbaga tɛ lo ko, Yehova ko kapa mɛ: “Mbi na gingɔ ngasã ko la agere, lo ko la akpɛ yada, mbi na diringɔ na lo, lo ko la ahɔ̃ kã mbi na gbengɔ kã tɛ lo, wa mbi na sangɔ ngunu bɛ lo ko la anzɛ̃.” (Ezk. 34:16) Yehova zandó azi gba mɛndó azia vɔrɔngɔ lo ya, ala diri ka tɛ lo. Wa hĩnga ya, lo na gwɛ̃ kpengbani ti zangɔ mɔ ya, mɔ lɛkɛ mangbi tɛ mɔ na lo.