1. (a) Se ahũnda mɔ ya, zo mɛ na bɛ ti vundu adu na, mɔ na pangɔ ya nɛ? (b) Ngoi mɛ e ye kambisangɔ ye mɛ ndo fa bɛ ti vundu, ndakisa ti ya Ngbangɔ mɛ alengbi ti gangɔ kaya li e nɛ?

SE AHŨNDA mɔ ya, mɔ kambisa bere zo mɛ na bɛ ti vundu adu na, mɔ na pangɔ ya nɛ? Ngoi mɛndɛ̃ mɔ na dangɔ bɛ mɔ na zo mɛ wa songo, nzɔ̃ zo, zo mɛ ndo sa ngunu bɛ azi, lo nga na nzɔ̃ bɛ. Ngoi mɛndɛ̃ mɔ da nga bɛ mɔ na pandɛ̃ tɛ zo ti Samaria mɛndó Yezo kpɔ. Kɔli niko, mɛndó ta lo du zo ti Yuda ma ko, lo “fandó bɛ ti vundu, NWT” na zo ti Yuda mɛndó ati na bɛ ti awa nzĩ. Na ngoi mɛndó lo hũ zo ti Yuda mɛ na kã ka tɛrɛ lo ko, lo “ma[ndó] vundu tɛ lo sĩ” wa lo zandó lo na songo zu. (Lk. 10:29-37) Pandɛ niko ndo fa seliye ti nzɔ̃ni mɛ Nzapa tɛ e na ni​—bɛ ti vundu. Nzapa ndo fa bɛ ti vundu na e na lo mɛ ya, lo ndo ye e, lo ndo fa ni na e bi zu na ya akpale ndɛ̃ ndɛ̃ ndɛ̃.

2. Ndenge mɛndɛ̃ mɛ zo lengbi ti fangɔ na bɛ ti vundu nɛ?

² Ndenge mɛndɛ̃ mɛ zo lengbi ti fangɔ na bɛ ti vundu da. Ngoi mɛndɛ̃, zo mɛ na bɛ ti vundu ndo zia mungɔ ekateli ti hɛ̃ngɔ zo mɛ ali siɔ kpale tumbu mɛ alengbi na lo. Yehova ndo ma vundu tɛ e ngoi zu na ya kpale ti ngaso. Davidi mɛ wa sungɔ bia tɛnɛ ya: “Ta lo ndo li kpale tɛrɛ e na bangɔ siɔ kpale tɛ e ma.” (Nz. 103:10) Kanda na ngoi mɛndɛ̃, Yehova ndo hɛ̃ tumbu ti kpengbani hɛ̃ zo mɛ ali siɔ kpale.

3. Ahũnda mɛ e na hɛ̃ngɔ gbinya ni ndɛ nɛ?

³ So ya tɛnɛ mɛ ndɛ e na mandangɔ, e na hɛ̃ngɔ gbinya na ndo hũnda mɛ taa: Nda mɛ Yehova ndo fa bɛ ti vundu nɛ? Mangbi mɛ ka popo tɛrɛ hɛ̃ngɔ zo tumbu na fangɔ bɛ ti vundu na lo nɛ? Wa aye mɛ alengbi ti zangɔ e ya, e fa bɛ ti vundu nɛ? Zia e ba se  mɛ tɛnɛ tɛ Nzapa ahɛ̃ gbinya na ndo ahũnda niko.

4. Nda mɛ Yehova ndo fa bɛ ti vundu nɛ?

⁴ Yehova ndo fa bɛ ti vundu na e na lo mɛ ya, lo ndo ye e. Na lége ti Nyingɔ vurú, toma Polo sundó ya, Nzapa “ndoma vundu . . . sĩ.” Polo ndo tɛnɛndó tɛnɛ ti bɛ ti vundu mɛ Nzapa fa na azi ti zangangɔ lengbingɔ na ndenge mɛ lo hɛ̃ ala nzɔ̃ dangɔ bɛ ti luangɔ dungɔ lɛ ngɛ̃́ ka ndozu. (Ef. 2:4-7) Kanda ta Yehova ndo fa bo bɛ ti vundu na azi mɛ ahĩni la na kpɔ̃ kɔi ma. Davidi wa sungɔ bia tɛnɛ ya: “Yehova du nzɔ̃ni na lo tɛ azi zu, wa e ndo hũ bɛ ti vundu tɛ lo na ndo aye zu mɛ lo li” (Nz. 145:9) Na lo mɛ ya, Yehova ndo ye e ko, lo ndo fa bɛ ti vundu tɛ lo na e ngoi zu mɛ alengbi.

5. Ngasia la Yezo hĩnga se mɛ Yehova ndo ye fangɔ bɛ ti vundu nɛ?

⁵ Yezo hĩnga nzɔ̃ni se mɛ Yehova ndo ye fangɔ bɛ ti vundu na azi. Yezo ná To lo adundó ndoni kɔi abulu gba ka ndozu uzu ti lo gangɔ ge lɛ sese. (Mas. 8:30, 31) Na ya kpale gba, Yezo hũndó se mɛ Yehova ndo fa bɛ ti vundu na azi mɛ ali siɔ kpale. (Nz. 78:37-42) Na ya hangɔ lo tɛ lo ko, lo ndo tɛnɛndó tɛnɛ gba na ndo seliye niko tɛ To lo ti nzɔ̃ni.

6. Ndakisa mɛndó Yezo hɛ̃ so zangɔ e ya, e gbɔ̃ nda bɛ ti vundu tɛ To lo nɛ?

⁶ Nga ma se mɛ mbalasi e manda na ni na pɔsɔ mɛ aɔ, Yezo salelandó ndakisa tɛ nyingambi ti kili kili ti nɛngɔ ya, aza e, e gbɔ̃nda se mɛ Yehova ndo fa na bɛ ti vundu. Nyingambi niko asindó ka yada tɛ la, wa “lo [tindó] wa lingɔ ye yenge yenge, lo gbɛ̃ falanga tɛ lo hororo.” (Lk. 15:13) Na gesi, lo gbinyandó bɛ lo na ndo siɔ kpale tɛ lo, lo zundó na tɛrɛ lo, wa lo diri ngandó kaya da. Ye mɛndó to lo li nɛ? Ta aningandó ti nɛngɔ ya, palanga niko ahũ ye mɛndó to lo ali ma. Yezo tɛnɛ ya: “Ngoi mɛ to lo ahũ lo ka yɔngɔrɔni so ndo ga ko, lo ma vundu tɛ nyi lo, la lo su kpɛ, lo nɔ so ngorongɔ lo. Ala ĩ tengbi ko, lo bɔmbɔ nyi lo, lo fɔ̃ lo na tɛrɛ lo ka ka ka.” Ta to lo lindó kpale tɛrɛ lo na ngɔnzɔ bere lo gulundó lo ma. Lo fandó bɛ ti vundu, lo kandó lɛ lo na ndo siɔ kpale tɛ nyi lo, wa lo dirindó na lo kaya ndasewa. Nyingambi ti kili kili alindó siɔ kpale ti kotani nvɛ̃ni, kanda na lo mɛ ya, lo gbinyandó bɛ lo biani ko, to lo kandó lɛ lo na ndo siɔ kpale tɛ lo. Na ya pandɛ mɛ, to mɛ na bɛ ti vundu adu Yehova. Na ya tɛnɛ ti gbɔ̃ngɔ bɛ mɛ, Yezo fandó na e ya, To lo na gwɛ̃ kpengbani ti kangɔ lɛ lo na ndo siɔ kpale tɛ azi mɛ agbinya bɛ la nvɛ̃ni.​—Lk. 15:17-24.

7. Ngasia la, ndenge mɛ Yehova ndo fa na bɛ ti vundu ando fa ya, lo du nvɛ̃ni zo ti ndara nɛ?

 ⁷ Yehova ndo fa bɛ ti vundu na mbage tɛ e na lo mɛ ya, ndara tɛ lo aɔ tɛ azi zu. Ta Yehova ndo fa ndara tɛ lo na ndenge ti woni, bere na ya kpengba kɔdɛ ma. Kanda Ngbangɔ ndo tɛnɛ ya, “ndara mɛ ndo lo ka tɛ Nzapa” ko, ni “sĩ na [bɛ ti] vundu nga na lé ti nzɔ̃ni.” (Zk. 3:17) Mabere to mɛ na songo gba, Yehova ndo fa bɛ ti vundu na ayati lo na lo mɛ ya, lo hĩnga ya, ni du na lo ti nzɔ̃ kpale tɛ la. (Nz. 103:13; Yis. 49:15) Na lo mɛ ya, Yehova ndo fa bɛ ti vundu na azi tɛ lo ko, ala na nzɔ̃ dangɔ bɛ na ndo bi mɛ na gangɔ, abɛse ala du azi ti zangangɔ lengbingɔ. Ndara tɛ Yehova mɛ ta ni na maka ma ando to lo ya, lo fa bɛ ti vundu ngoi zu mɛ lo hũ nzɔ̃ni. Kanda lo ndo fa seliye niko ngoi zu na ndenge ti lengbingɔ, lo hĩnga nzɔ̃ni ngoi mɛ lo fa na bɛ ti vundu ná ngoi mɛ ta lo fa ni ma. Na ndara zu, lo hĩnga kangbingɔ ya bɛ ti vundu ná dungɔ na yɔngɔrɔ bɛ mɛ aɔ nyɔ kpɔ̃ni.

8. Ye mɛ ando li na zo mɛ akɛ̃ gbinyangɔ bɛ lo nɛ, wa na lo nɛ?

⁸ Kanisa ya, wa kwa tɛ Nzapa kɔi amu ekateli ti dungɔ na dungɔ lɛ ngɛ̃́ ti bí ngoi zu. Ye mɛ elengbi ti lingɔ nɛ? Na lége ti Nyingɔ tɛ Yehova, Polo tɛnɛndó hɛ̃ awakristo ti Kɔrinto ya: “Ta ĩ na lo ĩ du ndoni kɔi ma”. (1 Kɔr. 5:11) Ando bi azi mɛ akɛ̃ gbinyangɔ bɛ la gigi. Ekateli niko mɛ na mangbi na ndia tɛ Yehova, ni du ngbondoni na lo ti batangɔ ayata kɔli ná ayata wali mɛ angbã mbilimbili. Kanda azi mɛndɛ̃ alengbi ti hũngɔ ya, bingɔ zo gigi ta ando fa ya, Nzapa ma vundu tɛ zo ma. Adu bɛta kpale? Zia e ba ni.

9-10. Na bangɔ Aebreo 12:5, 6, nda mɛ elengbi ti tɛnɛngɔ ya, bingɔ zo gigi adu ebongiseli mɛ ando fa bɛ ti vundu tɛ Nzapa nɛ? Hɛ̃ lɛlo kɔi.

⁹ Na ngoi ti bombi, se e ma atɛnɛ ya, zo kɔi mɛ e ndo ye lo gba “ta lo di dɛ Tɛmwɛ tɛ Yehova ma” ko, ando hɛ̃ e songɔ bɛ nvɛ̃ni. Elengbi ngoi mɛndɛ̃ ti hũndangɔ tɛrɛ e ya, siɔ kpale mɛ lo li alengbi bo ti nɛngɔ ya, abi lo gigi? Bingɔ zo gigi adu fangɔ na lo bɛ ti vundu? Ĩi. Se akɛ̃ hɛ̃ngɔ zo mɛ ali siɔ kpale tumbu mɛ alengbi na lo ko, ta ni du fangɔ na lo songo ná bɛ ti vundu ma, ta ni du nga ye ti ndara ma. (Mas. 13:24) Bingɔ zo gigi alengbi ti zangɔ zo ya, lo gbinya seliye tɛ lo? Ĩi. Ni lengbi ti zangɔ lo. Azi gba mɛndó abi la gigi atɛnɛ ya, bingɔ ani gigi azandó ani ti nɛngɔ ya, ani hĩnga siɔ kpale tɛ ani, ani gbinya seliye tɛ ani, wa ani diri fãni mɛndɛ̃ ka tɛ Yehova.​—Di Aebreo 12:5, 6.

¹⁰ E mu se lɛlo kɔi: Wa batangɔ ngasã gbaga kɔi ahũ ya, tɛrɛ ngasã tɛ lo kɔi ndo sɔ. Ti nɛngɔ ya, lo sala ngasã ni ko, lo hĩnga ya, ayɔ ya, lo kpã lo na bɛ lo, ta lo du ndoni kɔi na afɔ̃ lo ma. Angasã gbaga adu asa mɛ ta ala ndo koka dungɔ na bɛ la ma, ala ndo ye dungɔ ndoni kɔi ná afɔ̃ la. Wa se akpã lo na bɛ lo ko, ngoi mɛndɛ̃ lo lengbi ti tingɔ na vundu. Se wa batangɔ ngasã mu ekateli ti lingɔ ngaso na ngasa tɛ lo mɛ na ngã, afa ya, lo na kpengba kpale bere lo wa zaga? Ipɔ. Lo hĩnga ya, se lo zia ngasã niko so popo tɛrɛ afɔ̃ lo ko, ngã tɛ lo na gbɔ̃ngɔ ala. Kpãngɔ lo na bɛ lo na batangɔ angasã gbaga mɛndɛ̃.​—Haka na Balevi 13:3, 4.

11. (a) Nda mɛ elengbi ti hakangɔ zo mɛ abi lo gigi na ngasã gbaga mɛ tɛrɛ lo ndo sɔ nɛ? (b) Abɛse abi zo gigi, ebongiseli mɛ akpã ti nɛngɔ ya aza lo nɛ?

¹¹ Elengbi ti hakangɔ wakristo mɛ abi lo gigi na ngasã mɛ tɛrɛ lo ndo sɔ. Tɛrɛ zo niko ndo sɔ na ya nyingɔ. (Zk. 5:14) Mabere zo mɛ na ngã ti mi, zo ko la tɛrɛ lo ndo sɔ na ya nyingɔ ko, ngã tɛ lo lengbi ti gbɔ̃ngɔ azi mɛndɛ̃. Alengbi ti dungɔ ngoi mɛndɛ̃ nzɔ̃ni ya, abi zo mɛ na ngã ti nyingɔ gigi. Disiplinɛ niko ando fa songo mɛ Yehova na ni na lo tɛ azi ti ya bombi mɛ angbã mbilimbili ka tɛ lo. Ni lengbi nga ti zangɔ zo mɛ ali siɔ kpale ya, lo hĩnga siɔ kpale tɛ lo, wa lo  gbinya bɛ lo. Abɛse abi lo gigi ko, lo lengbi ti gwengɔ bombi ndo mɛ lo lengbi ti luangɔ awangɔ mɛ na zangɔ lo ya, loyengɔ tɛ lo adiri ti kpengbani. Lo lengbi ti mungɔ ambeti mɛ lo na mandangɔ ni, bangɔ nga ngoi mɛndɛ̃ a emisiɔ̃ ti TV JW. Wa se lo gbinyangbi akpale na ya du tɛ lo ko, abiazi alengbi ti hɛ̃ngɔ lo awangɔ ngoi na ngoi ti zangɔ lo ya, lo lɛkɛ mangbi tɛ lo ná Yehova, wa lo lengbi ti diringɔ fãni mɛndɛ̃ kɔi tɛ Atɛmwɛ tɛ Yehova. *

12. Se ta zo mɛ ali siɔ kpale agbinya bɛ lo ma, ndenge ti nzɔ̃ni mɛ abiazi alengbi ti fangɔ songɔ ná bɛ ti vundu na lo nɛ?

¹² Ale ta bɛ e ali na ni ma ya, bo azi mɛ ali siɔ kpale wa ala kɛ̃ nga gbinyangɔ bɛ la, la ando bi ala gigi. Abiazi hĩnga nzɔ̃ni ya, ekateli ti bingɔ zo gigi adu ekateli mɛ ngbondoni, wa ta ala ndo mu ni na wele ma. Ala hĩnga ya, Yehova ndo hɛ̃ zo tumbu “na ndenge mɛ lengbi.” (Yir. 30:11) Ala ndo ye ayata la ti kɔli ná ti wali, wa ta la ndo ye lingɔ ye mɛ alengbi ti gbɛ̃ngɔ mangbi tɛ ayata la ná Yehova ma. Ngoi mɛndɛ̃, ndenge ti nzɔ̃ni ti fangɔ songo ná bɛ ti vundu na mbage tɛ zo mɛ ali siɔ kpale adu bingɔ lo gigi.

13. Nda mɛndó abi wakristo kɔi ti Kɔrinto gigi nɛ?

¹³ E ba ndia mɛndó Toma polo hɛ̃ azi ti Kɔrinto na lo tɛ zo kɔi mɛndó ali siɔ kpale, wa lo kɛ̃ ngandó gbinyangɔ bɛ lo. Wa kristo kɔi ka Kɔrinto ndo mundó ya to lo. Ye kɔi mɛ siɔni nvɛ̃ni! Polo hĩngandó ya, Yehova tɛnɛndó hɛ̃ azi ti Izraɛlɛ ya: “Kɔli ko la amu ya to lo ko, lo gbɛ̃ ndima tɛ to lo. Ale akpɔ ala zu sɛ.” (Le. 20:11) Biani, ta Polo lengbindó ti hɛ̃ngɔ nyɔ ya, a ho zo niko ma. Kanda lo tɛnɛndó hɛ̃ azi ti Kɔrinto ya, ala bi zo niko gigi. Seliye ti bí tɛ kɔli niko, agbɛ̃ ngandó kɔdɛ tɛ azi gba kaya bombi! Ta azi mɛndɛ̃ ka popo tɛ ayata ndo hũndó ya, ni du siɔ kpale mɛ kotani ma​—1 Kɔr. 5:1, 2, 13.

14. Na bangɔ 2 Kɔrinto 2:5-8, 11 ngasia la Polo fandó bɛ ti vundu na wakristo kɔi ti Kɔrinto mɛndó abi lo gigi nɛ, wa na lo nɛ?

¹⁴ Na gesi Polo mandó ya, kɔli niko gbinyandó nvɛ̃ni akpale ti ya du tɛ lo. Lo gbinyandó bɛ lo biani! Abɛse kɔli niko gbɛ̃ndó ndima ti bombi ko, Polo tɛnɛndó hɛ̃ abiazi ya, ta ni ye ya, “tɛnɛ tɛ ni adu kpengbani aɔ ndoni ma.” Lo tɛnɛndó hɛ̃ la ya: “Ale ĩ ka lɛ ĩ ndo siɔ ye tɛ zo ni ko, ĩ sa nga ngunu bɛ lo.” Polo tɛnɛndó ngaso ti nɛngɔ ya: Ta “kota vundu ako ndo bɛ lo” ma. Polo mandó vundu tɛ zo mɛndó agbinya bɛ lo. Ta lo yendó ya, lo ti na nzɛ̃ngɔ, wa lo zia nga gingɔ ya, Nzapa ka lɛ lo na ndo siɔ kpale tɛ lo ma.​—Di 2 Kɔrinto 2:5-8, 11.

15. Ngasia la, abiazi alengbi ti fangɔ bɛ ti vundu zangangɔ vĩngɔ lɛ la na ndo siɔ kpale nɛ?

 ¹⁵ Nga ma Yehova, abiazi ndo du na dengɔ bɛ ti fangɔ bɛ ti vundu. Zangangɔ vĩngɔ lɛ la ndo siɔ kpale, ala ndo hɛ̃ zo mɛ ali siɔ kpale tumbu mɛ alengbi na lo, wa ala ndo fa nga bɛ ti vundu se alengbi. Se ta abiazi ndo lonzi azi mɛ ali siɔ kpale ma ko, afa ya, ta ala ndo fa bɛ ti vundu ma, kanda, ala ndo vĩ lɛ la na ndo siɔ kpale. Bo abiazi kɔi la alengbi ti fangɔ bɛ ti vundu?

16. Na bangɔ Masese 21:13, ye mɛ Yehova ndo li na azi mɛ ta la ndo ma vundu tɛ afɔ̃ la ma nɛ?

¹⁶ Awakristo zu ndo li kpengbani ti dungɔ na bɛ ti vundu nga ma Yehova. Na lo nɛ? Na lo mɛ ya, ta Yehova ndo ma zo mɛ azanga bɛ ti vundu ma. (Di Masese 21:13.) Na dungɔ siɔni nvɛ̃ni se Yehova kɛ̃ mangɔ sambela tɛ e! Ni la, e li zu ti nɛngɔ ya, ta bɛ e ati kpengbani ma, bere e ti azi mɛ ta ala ndo ma vundu tɛ afɔ̃ la ma. Na nɛngɔ ya, e vĩ ma e so kɛ̃ngɔ mangɔ tɛnɛ tɛ ayata kɔli ná ayata wali mɛ na pɛnɔ ko, e du ngoi zu dã ti mangɔ “to to tɛ azi ti pɛnɔ.” Ta bɛ e ali na tɛnɛ mɛ ma: “Zo ko la ta ndoma vundu tɛ afɔ̃ lo ma, na ngoi ti fangɔ ngbanga tɛ lo gbandá ko, ta Nzapa ama nga vundu tɛ lo ma.” (Zk. 2:13) Se du ya, na zungɔ na tɛrɛ zu, e binga li e na ndenge mɛ e na gwɛ̃ ya, afa bɛ ti vundu na e ko, ni na tongɔ nga e ya e fa bɛ ti vundu na azi mɛndɛ̃. E zu e ye nga fangɔ bɛ ti vundu na azi ko la ali siɔ kpale, agbinya bɛ la wa ala diri ka tɛ Yehova.

17. Davidi fandó bɛ ti vundu ngasia?

¹⁷ Ngbangɔ na se lɛlo tɛ awa kwa tɛ Nzapa mɛ alengbi ti zangɔ e ya, e du na seliye ti bɛ ti vundu, wa ta e du azi mɛ bɛ la kpengbani ma. E mu se lɛlo tɛ Davidi. Lo ndo fandó bɛ ti vundu na azi. Na ngoi mɛndó Saulo ndo gi lo so hongɔ lo ko, Davidi lindó kpale tɛrɛ Saulo na bɛ ti vundu na lo mɛ ya, lo dundó zo mɛ Yehova hĩni lo na kpɔ̃. Ta lo gindó lége ti diringɔ na siɔ kpale hɛ̃ Saulo bere lingɔ lo siɔ ni ma.​—1 Sa. 24:9-12, 18, 19.

18-19. Akpale sɛ mɛndó, Davidi zanga fangɔ bɛ ti vundu na lo ni nɛ?

¹⁸ Kanda ta Davidi ndo fandó bɛ ti vundu ngoi zu na azi ma. Na ndakisa, na ngoi mɛndó Nabale mɛ wa kpengba kpale gba, atɛnɛ siɔ tɛnɛ hɛ̃ Davidi wa lo kɛ̃ ngandó hɛ̃ngɔ lo ná azi tɛ lo tɛ ti tɛngɔ ko, Davidi mundó ekateli ti hongɔ Nabale ná azi ti yada tɛ lo zu. Abigail mɛ ya Nabale, lo dundó wali mɛ nzɔ̃ zo nga ti yɔngɔrɔ bɛ, lo lindó iɔ so gbanzingɔ Davidi ya, ta lo sa mɛnɛ ma.​—1 Sa. 25:9-22, 32-35.

¹⁹ Na libaku mɛndɛ̃, prɔfeta, Nathan tɛnɛndó hɛ̃ Davidi ya, kɔli kɔi mɛ wa ye gba anzĩ ngasã tɛ zo kɔi mɛ wa yɛlɛ. Davidi mandó ngɔnzɔ kpengbani wa lo pandó ya: “Se du bɛta kpale ya, Yehova bo na dungɔ lɛ ngɛ̃́ ko, zo ko la li ngaso, lo lengbi na kwá!” (2 Sa. 12:1-6) Davidi hĩngandó Ndia tɛ Moizɛ nzɔ̃ni. Lo hĩngandó ya, se zo nzĩ ngasã tɛ fɔ̃ lo ko, lo lengbindó ti diringɔ na ngasã siɔ na se lɛ ni. (Kob. 22:1) Adundó fangɔ ngbanga ti siɔni nvɛ̃ni na pangɔ ya, zo niko alengbi na kwá. Nathan kpɔndó pandɛ niko ti fangɔ na Davidi ya, lo li siɔ kpale mɛ kotani nvɛ̃ni! Kanda Yehova fandó bɛ ti vundu  gba na mbage tɛ Davidi, ye mɛndó ta Davidi li ni na lo tɛ wa nzĩ mɛndó Nathan kpɔ pandɛ tɛ lo ma!​—2 Sa. 12:7-13.

20. Wangɔ mɛ elengbi ti luangɔ na ndo se lɛlo tɛ Davidi nɛ?

²⁰ Hĩnga ya, ngoi mɛndó Davidi na ngɔnzɔ kpengbani la, lo mu ekateli ti hongɔ Nabale ná zi ti ndasewa tɛ lo. Na gesi, lo pandó ya, wa nzĩ mɛndó Nathan kpɔ pandɛ tɛ lo ko, lo lengbi na kwá na lo ti ye mɛndó lo li. Kanda Davidi ndó nzɔ̃ zo. Wa nda mɛndó lo fa ngbanga tɛ wa nzĩ niko zangangɔ vundu nɛ? Zia e ba kpale mɛndó alo ti ɔngɔ na ya dungɔ lɛ ngɛ̃́ tɛ lo uzu ti lo tɛnɛngɔ tɛnɛ niko. Na ya ngoi niko ta Davidi ndó na bingangɔ li ti nzɔ̃ni ma. Se zo banda fangɔ ngbanga tɛ azi mɛndɛ̃ siɔni ko, ni du ye mɛ ndo fa ya, ta mangbi tɛ lo na Yehova adɛ nzɔ̃ni ma. Yezo kebisandó ava lo yangondo ya: “Ta ĩ fa ngbanga tɛ afɔ ĩ ma, so Nzapa afa nga ngbanga tɛ ĩ, ta sanga ma, se ko la ĩ ndo fa na ngbanga tɛ azi mɛ ndɛ̃ ko, se mɛ nga gbanda Nzapa afa na ngbanga tɛ ĩ la.” (Mat. 7:1, 2) Na lo ni la, e li zu mɛ elengbi ti lingɔ ti nɛngɔ ya, ta e du na kpengba kpale ma, e landa se lɛlo tɛ Nzapa tɛ e mɛ bɛ lo na “vundu . . . sĩ.”

21-22. Ndenge ti nzɔ̃ni mɛ elengbi ti fangɔ na bɛ ti vundu nɛ?

²¹ Se e du azi mɛ na bɛ ti vundu ko, ta e na ngbãngɔ bo na mangɔ vundu tɛ azi ma. Azi mɛ na bɛ ti vundu ala ndo fa ni na kwa. Na lo ni la, zo kɔi kɔi so popo tɛ e agi kaya ndasewa, kaya bombi, bere so gunda lo, zo mɛ na gwɛ̃ ya aza lo. Zangangɔ kitɛ, e na luangɔ anzɔ̃ tangɔ li gɛrɛ gba ti fangɔ bɛ ti vundu na azi! Zo kɔi na gwɛ̃ ya, asa ngunu bɛ ni? Zo kɔi na gwɛ̃ ya, atɔ tɛ ti tɛngɔ hɛ̃ ni bere aza ni na kwa mɛndɛ̃? Wakristo kɔi mɛ adiri ya bombi fãnani, lo na gwɛ̃ tɛ kwa kɔi mɛ na sangɔ ngunu bɛ lo? Wa elengbi nga ti sangɔ ngunu bɛ azi na pangɔ hɛ̃ la nzɔ̃ pa? Ni du alége mɛ nzɔ̃ni mɛ elengbi ti fangɔ bɛ ti vundu na azi.​—Yb. 29:12, 13; Rom. 10:14, 15; Zk. 1:27.

²² Se e hĩnga gwɛ̃ tɛ azi mɛndɛ̃ ko, e na luangɔ nga alége gba ti fangɔ na ala bɛ ti vundu. E hĩnga ya, na ngoi mɛ e ndo fa seliye niko ko, e ndo hɛ̃ To e mɛ ka ndozu dengɔ bɛ na lo mɛ ya, lo du Nzapa mɛ na bɛ ti “vundu . . . sĩ”!