Adũndó mbi na bulu ti 1941, ka Paris kɔdɔrɔ mɛ ndo du ka France. Mbi ndo yendó mandangɔ aye. Na ngoi mɛndó mbi na bulu sui kɔi ko, aluandó mbi na ngã ti to kɛlɛ (tuberculose) wa ni lindó ya, mbi zia kalasi. Binga li mɔ na ndo pɛnɔ mɛndó mbi ma na ngoi mɛndó agbanzi mbi na gwengɔ kalasi! Adɔktɛrɛ tɛnɛndó ya, adu nzɔ̃ni ya, mbi ngbã kaya da na lo mɛ ya, ta bɛ mbi dɛndó li kwa nzɔ̃ni ma. Na lo ni la, na ya anzɛ gba, mbi ndo lekisandó ngoi na dingɔ dictionɛrɛ nga na landangɔ prɔgramɛ ti radio Sorbonne ti univɛrsite ti Paris. Na ngoi mɛndó dɔktɛrɛ pa hɛ̃ mbi ya, ngã tɛ mbi wɛ, mbi lengbi ti bandangɔ gwengɔ kalasi ko, mbi mandó dengɔ bɛ kpengbani. Mbi tɛnɛndó ka gbɛ bɛ mbi ya, ‘Aye mɛ adɔktɛrɛ li ko, adu nzɔ̃ni nvɛ̃ni!’ Bandangɔ so ndoko ko, mbi tindó na gwɛ̃ ti sarangɔ azi mɛ na ngã. Ngoi zu mɛndó to mbi ndo hũnda mbi aye mɛ mbi na lingɔ na ngoi mɛ mbi na tingɔ kangba ko, mbi ndo pandó hɛ̃ lo ngoi zu ya, “Mbi na tingɔ dɔktɛrɛ.” Na lo ni la, lingɔ kalasi ti tingɔ dɔktɛrɛ atindó ye ti uzu mɛndó mbi ndo ye ni.

Ka ndasewa tɛ e ko, e zu e ndo sambelandó ka Katolikɛ. Ta mbi hĩngandó akpale gba mɛ aba Nzapa ma, wa mbi ngandó na ahũnda gba mɛ ta mbi ndo luangandó agbinya ni ma. Bo na ngoi mɛndó mbi banda mandangɔ akpale ti tingɔ Dɔktɛrɛ ka univɛrsite ndó la, mbi yendó ya, ta dungɔ lɛ ngɛ̃́ asi na bɛ lo ma, ali ni lingɔ.

Ta bɛ mbi ndo li na se mɛndó mbi ba na selile (cellule) ti fɛlɛlɛ kɔi ti fãni ti uzu ka lɛ mikroskɔpɛ ma. Mbi kamwandó gba na hũngɔ se mɛ aparti ti selile ndo li ti nɛngɔ ya, ala bata tɛrɛ la na aye mabere gbingɔ ná dé. Mbi ba ngandó se mɛ sitoplazmɛ (ye kɔi mɛ ndo du kaya selile) ndo fɔ̃ tɛrɛ lo ati yakere na ngoi mɛ akpã lo ka ndo mɛ hĩngɔ da, wa ni ndo ti yɔngɔrɔni na ngoi mɛ akpã lo ka ndo mɛ ngu ti vuruni  da. Na lo ti likoki mɛ aye niko ti yakere yakere mɛ na dungɔ lɛ ngɛ̃́ na ni, nga amakoki mɛndɛ̃ mɛ ala na ni la, alengbi ti lingɔ ya, ala ndo mɛsɛnɛ na ando mɛ ala ka da. Na ngoi mɛndó mbi ba aye ndɛ̃ ndɛ̃ ndɛ̃ ti kamwangɔ mɛndó selile kɔi kɔi ndo li ko, atondó mbi ya, mbi ye na bɛ mbi kɔi ya, ta dungɔ lɛ ngɛ̃́ asi na bɛ lo ma.

Na ya bulu sɛ tɛ mbi ti lingɔ kalasi ti tingɔ dɔktɛrɛ ko, mbi hũndó aye gba mɛ ndo fa ya, Nzapa da. Na ngoi mɛndó e manda anatomie, e mandandó se mɛ nyɔ guti e ndo za li ti e ya, e ndo ngo li ti e wa e ndo zara nga li ti e. Ndenge mɛ mi tɛrɛ e afɔ̃ngbi tɛrɛ lo na bio, nga na ndenge mɛ biteni ti tɛrɛ zu ndo li kwa na mangbi ni ndo kamwisa nvɛ̃ni. Na ndakisa, mbi mandandó ya, asisa ti yakere yakere mɛ abombi mi ná bio ti sɛ ti li ti e ko, akangbi ya tɛrɛ lo na sɛ, wa ni li gbagba mɛ ando li ya, asisa mɛ ando gwe ka li ti zo ando yengi ka gbɛnda ni wa a ndo du bo so ndo mɛ ni da. Asisa niko atongbi tɛrɛ lo na abio ti li ti e. Se du ya, ta alindó li ti e ngaso ma ko, ale ta asisa niko alengbindó ti yengingɔ ma, wa ni ngbã bo kpengbani, ni na lingɔ ya, ta li ti e ali kwa nzɔ̃ni ma. Mbi hũndó yangɔndo ya, zo mɛndó wa lingɔ tɛrɛ zo ko, lo na kɔdɛ mawoma nvɛ̃ni.

Mbi kamwandó fãni mɛndɛ̃ gba na hũngɔ aye mɛndó Wa lingɔ aye zu ali, na ngoi mɛndó mbi manda se mɛ nyingambi ndo banda wɛngɔ mbó na pɛ dungɔ lo. Mbi mandandó ya, uzu ti nɛngɔ ya, adũ nyingambi ko, nyingambi mɛ adɛ kaya ta lo ndo wɛ mbó na lége ti kpu ti hinya ta lo. Kanda ta asake ti yakere yakere mɛ mbó ndo du kaya ni mɛ ndo du kaya ofo ofo bɛ ko, ta adɛ súsú na mbó ma. Kanda ngoi mɛ bi ti dũngɔ nyingambi adɛ dã ko, ngu kɔi mɛ adu ngbondoni sĩ ando vĩ sake kɔi kɔi mɛ ndo du na mbó kaya ni. Ni la ndo li ya, kpale ti kamwangɔ ndo li tɛrɛ lo na ngoi mɛ adũ nyingambi wa lo banda wɛngɔ mbó ti fãni ti uzu. Dó kɔi mɛ ndo du kaya bɛ nyingambi ando vĩ tɛrɛ lo, wa ni ndo to mɛnɛ kaya ofo ofo bɛ (foko foko bɛ). Ngu niko ti ngbondoni sĩ mɛ ando vĩ asake ti mbó, ando li ya, ta asake niko mɛ ando du kaya ofo ofo bɛ akanga tɛrɛ lo ma, ti nɛngɔ ya, mbó ali kaya ni iɔ. Ni la ndo li ya, nyingambi banda wɛngɔ mbó na bɛ lo.

Mbi ndó na gwɛ̃ ti hĩngangɔ zo mɛ wa lingɔ aye ti kpɛ̃nɛ mɛ ngaso, ni la, mbi bandandó dingɔ Ngbangɔ na seni nvɛ̃ni. Mbi kamwandó na ndia mɛ Nzapa hɛ̃ aya Izraɛlɛ na omɛ aba lɛkɛngɔ tɛrɛ, ali ndɛ abulu ɔngɔ 3 000. Nzapa tɛnɛndó hɛ̃ aya Izraɛlɛ ya, ala ndo gɛ̃ du aɔ na hĩnyɔ tɛ ala, ala ndo gbɔ̃ ngu ngoi zu, wa ala kpã nga zo mɛ na ngã mɛ alengbi ti gbɔ̃ngɔ azi gba mbala kɔi ka tɛ. (Le. 13:50; 15:11; Mib. 23:13) Ngbangɔ kambisandó se mɛ asiɔ ngã alengbi ti gbɔ̃ngɔ azi mbala kɔi bandandó gã, kanda azi ti siãsɛ alo ti hĩngangɔ ni bo na olo mɛ, ali ndɛ aburu bere 150. Mbi gbɔ̃ ngandó ndani ya, ndia mɛndó Nzapa hɛ̃ aya Izraɛlɛ na omɛ aba dungɔ vuruni na kpale ti bombingɔ tɛrɛ tɛ kɔli ná wali mɛ kaya mbeti ti Balevi, ando li ya, azi zu ti Izraɛlɛ adu na sãte ti nzɔ̃ni. (Le. 12:1-6; 15:16-24) Mbi hũndó ya, wa lingɔ aye zu hɛ̃ndó aya Izraɛlɛ ndia niko na lo ti nzɔ̃ kpale tɛ la nvɛ̃ni, wa lo ndo sulundó azi zu ko la ndo tɔndɔ andia niko. Ni tondó mbi ya, mbi ye na bɛ mbi kɔi ya, asundó Ngbangɔ na lége ti Nyingɔ vurú tɛ Nzapa​—Nzapa mɛndó ta mbi hĩnga ili lo na ngoi niko ma.

Na ngoi mɛndó mbi dɛ mbi li kalasi ti tingɔ dɔktɛrɛ ko, mbi tengbindó na nyi wali kɔi mɛ ili lo la Lydie, mɛndó mbi ye lo mawoma. Mbi ná lo, e lindó libala na bulu ti 1965 na ngoi mɛndó mbi si ka ndo bɛ kalasi tɛ mbi ti universite. Na bulu ti 1971, mbi ná Lydie e tindó na ayangambi taa, na olo e na ayangambi mana.  Lydie ndo hɛ̃ ti lo ngoi zu hɛ̃ mbi na ya kwa tɛ mbi ti dɔctɛrɛ nga na ya kwa ti ndasewa tɛ e.

Mbi lindó kwa ka da yɔrɔ bulu taa uzu ti nɛngɔ ya, mbi zi da yɔrɔ tɛ mbi nvɛ̃ni. Ngoi yakere so pɛni kɔli kɔi ná ya lo agandó ka da yɔrɔ tɛ mbi, ala fale la mbi tɛnɛ tɛnɛ tɛ ala na ebandeli, kɔli ndó la tɛrɛ lo ndo sɔ. Na ngoi mɛndó mbi ndo su yɔrɔ ti hɛ̃ngɔ kɔli niko ko, ya lo tɛnɛndó hɛ̃ mbi ya: “Se mɔ ye dɔktɛrɛ ta mɔ su ya, ahɛ̃ lo mɛnɛ ma.” Na kamwangɔ zu, mbi hũndandó lo ya: “Biani? Na lo nɛ?” Lo pandó hɛ̃ mbi ya: “E du Atɛmwɛ tɛ Yehova.” Ta mbi dɛndó mbi ma tɛnɛ mɛ aba Atɛmwɛ tɛ Yehova nga na aye mɛ ala ndo ha na omɛ aba mɛnɛ ma. Wali ko fandó na mbi kaya Ngbangɔ vɛrse mɛ ato ala ya, ala kɛ̃ mɛnɛ. (Aw. 15:28, 29) Ala fa ngandó na mbi na aye mɛ Lo-lengɔ Gbia tɛ Nzapa na lingɔ; ta pɛnɔ na dungɔ da ma, ta ngã na dungɔ da ma, ta kwá nga na dungɔ da ma. (Sum. 21:3, 4) “Aye mɛ ĩ ndo pa hɛ̃ mbi ko, adu aye mɛndó mbi na gwɛ̃ ti lingɔ ni na ngoi mɛndó mbi dɛ nyingambi la!” Mbi tɛnɛndó ni na dengɔ bɛ zu ya, “Mbi tindó dɔctɛrɛ ti nɛngɔ ya, mbi za azi mɛ na pɛnɔ.” Mbi ndó na dengɔ bɛ nvɛ̃ni, na lo ni la, mbi ná ala e tɛnɛndó tɛnɛ na pɛ sa kɔi na ndambu. Ngoi mɛndó kɔli ko na ya lo agwe ko, ta mbi di dɛndó na gwɛ̃ ti dungɔ kaya sambela ti katolikɛ ma, wa mbi manda ngandó ya, Wa lingɔ aye zu mɛ mbi ndo ye tɛrɛ lo gba, ili lo la​—Yehova!

Mbi tengbindó na kɔli ko ná ya lo mɛ Atɛmwɛ tɛ Yehova fãni taa ka da yɔrɔ tɛ mbi, wa ngoi zu mɛndó e na la e ndo tengbi ko, e ndo tɛnɛndó tɛnɛ ɔngɔ sa kɔi. Mbi ilindó ala kaya da tɛ mbi ti nɛngɔ ya, e lua ngoi gba e tɛnɛ na tɛnɛ mɛ aba Ngbangɔ. Abɛse du ya, Lydie yendó mandangɔ Ngbangɔ ndoni kɔi na e ko, lo yendó ya, ambanga aye mɛndɛ̃ mɛndó ndo aha na e ka katolikɛ adu siɔni. Na lo ni la, mbi ilindó Bwa kɔi ya, lo ga ka tɛ e. E tɛnɛndó tɛnɛ ti aye mɛ asambela ndo ha bo na lége ti Ngbangɔ tee na bi. Tɛnɛ mɛndó e na lo tɛnɛ azandó Lydie ti nɛngɔ ya, lo ye ya, Atɛmwɛ tɛ Yehova ndo ha mbilimbili. Bandangɔ so ndoko ko, songo tɛ e na lo tɛ Yehova atindó kpengbani, wa alindó ya, e zu sɛ e mu batisimɔ lá kɔi na bulu ti 1974.

Aye mɛndó mbi manda na lo ti nzɔ̃ dangɔ bɛ tɛ Nzapa na lo tɛ azi, azandó mbi ya, mbi kpã ye kɔi na ndo ti uzu na ya dungɔ lɛ ngɛ̃́ tɛ mbi. Lingɔ kwa hɛ̃ Yehova atindó ye kɔi ti ngbondoni ti ya dungɔ lɛ ngɛ̃́ tɛ mbi ná Lydie. E mundó ekateli ti kãngɔ ayati e na landangɔ andia ti ya Ngbangɔ. E handó na ayati e ya, ala ye Nzapa ná azi mɛndɛ̃, ni lindó ya, e ti na mangbi ti kpengbani kaya ndasewa tɛ e.​—Mat. 22:37-39.

Na ngoi mɛ e ndo e bi lɛ e gesi ko, ando hɛ̃ mbi ná Lydie ngia gba na ndenge mɛndó ayati e ndo hũ mangbi mɛndó ka popo tɛ e awa dũngɔ la. Ala hĩngandó ya, ndia tɛ Yezo mɛ atɛnɛ ya, “Zia ya, ‘Ĩi’ tɛ ĩ angbã ĩi,  ‘Ipɔ’ tɛ ĩ angbã nga ipɔ”, NWT adundó ndia ti ndasewa tɛ e. (Mat. 5:37) Na ndakisa, na ngoi mɛndó nyingambi tɛ e kɔi ti wali ati na bulu 17 ko, Lydie gbanzindó lo ya, ta lo nɔ nɔ ndoni kɔi na grupɛ tɛ apalanga ti kɔli ná ti wali ma. Kɔi ka popo tɛ ala tɛnɛndó hɛ̃ nyingambi tɛ e ya, “Se du ya, mama tɛ mɔ akɛ̃ ya, ta e na mɔ e nɔ nɔ ma ko, hũnda to mɔ!” Kanda nyingambi tɛ e ti wali pandó hɛ̃ la ya: “Ta tina ti lingɔ ngaso da ma. Ala zu sɛ ndo tɛnɛ tɛnɛ nyɔ la kɔi.” Biani, ayati e zu mana ahũndó yangondo ya, e ndo kpã andia ti ya Ngbangɔ na kwa, wa e na mangbi ti kpengbani nvɛ̃ni. Ndɛ lo mɛ ko, ayangambi tɛ e ná azi ti ndasewa tɛ ala ndo vɔrɔ Yehova, e ndo hɛ̃ Yehova sia kɔli mawoma na lo ni.

Abɛse du ya, mbilimbili agbinyangbi ye mɛndó mbi ndo kpã ni na ndo ti uzu na ya dungɔ lɛ ngɛ̃́ tɛ mbi ko, mbi yendó salelangɔ kɔdɛ mɛndó mbi lua ka kalasi mabere dɔktɛrɛ na lo tɛ azi tɛ Nzapa. Na lo ni la, mbi yendó lingɔ kwa mabere vɔlɔ̃tɛrɛ ka Bethel ti nɛngɔ ya, mbi hɛ̃ ti mbi mabere dɔktɛrɛ, na ngoi kondó ko, Bethel ndo dundó ka Paris na gesi adirindó na ni ka Louviers. Mbi ndo londó ge yada tɛ mbi, mbi gwe mbi li kwa ka Bethel, mbi lindó ngaso na pɛ abulu bere 50. Na ya ngoi niko ko, mbi tindó na akwa ti nzɔ̃ni nvɛ̃ni ka Bethel, ambɛge ni na olo na bulu ɔngɔ 90. Mbi ma ngandó dengɔ bɛ gba nvɛ̃ni na ngoi mɛndó mbi tengbi na nyita kɔi mɛ lo banda lingɔ kwa ka Bethel fãnani. Mbi ndó la mbi za mama tɛ lo na ngoi mɛndó lo ga ti dũngɔ lo, ali ndɛ abulu ɔngɔ 20!

Na ya abulu niko zu ko, songo tɛ mbi na mbage tɛ Yehova ati kpengbani na bangɔ se mɛ lo ndo tambwisa, lo ndo bata nga azi tɛ lo na lége ti linɔ tɛ lo. Bandangɔ na bulu ti 1980, Bombi tɛ Adonzi akpãndó prɔgramɛ kɔi ti nɛngɔ ya, aza adɔktɛrɛ ahĩnga nzɔ̃ni nda mɛ ta Atɛmwɛ tɛ Yehova ndo ye ya, adiri na mɛnɛ tɛrɛ la ma.

Wa na bulu ti 1988, Bombi tɛ Adonzi akpãndó departema kɔi ti fãnani ka bethel mɛ ando ili ni ya: Ser-vice d’information hospitalier. Na ebandeli, departema niko ndo bandó kwa ti comités de liaison hospitaliers (CLH) mɛndó akpã ni ka États-Unis so zangɔ Atɛmwɛ tɛ Yehova mɛ tɛrɛ la ndo sɔ ya, ala tengbi na adɔktɛrɛ mɛ na yengɔ hɛ̃ngɔ ala yɔrɔ zangangɔ diringɔ na mɛnɛ tɛrɛ la. Na ngoi mɛndó azi lége ya, ebongiseli niko adu na ndo lɛ gigi zu ko, akpã ngandó CLH ka kɔdɔrɔ ti France. Mbi kamwandó gba na hũngɔ se mɛ ebongiseli tɛ Yehova ndo za na ayata na songo zu na ngoi mɛ ala na ya pɛnɔ!

Dungɔ dɔktɛrɛ adundó ye ti uzu mɛndó mbi ndo ye ni gba. Kanda na ngoi mɛndó mbi ba aye mɛ mbi kpã ni na ndo ti uzu ko, mbi hũndó ya, sarangɔ azi na nyingɔ la adu ngbondoni​—ayɔ ya, mbi za azi ya, ala ti na mangbi ti nzɔ̃ni na Yehova, Zo mɛ dungɔ lɛ ngɛ̃́ ndo lo ka tɛ lo. Na pɛ mungɔ pasiɔ̃, mbi ná Lydie e lekisandó ngoi gba na ya nzɛ kɔi kɔi so pangɔ nzɔ̃ pa ti Lo-lengɔ gbia mabere tɛ awa sungɔ lége ti ngoi zu. Tee ndɛ, e ndo e li zu mɛ elengbi ti lingɔ na ya kwa niko ti ngbondoni.

Mbi ngbã bo lá kwɛ lingɔ aye mɛ mbi lengbi ti lingɔ ti nɛngɔ ya, mbi za azi mɛ na ngã. Kanda mbi gbɔ̃ ndani ya, abɛse adɔktɛrɛ mɛ ahĩnga kwa nzɔ̃ni ko, ta ala lengbi ti onzingɔ ngã bere kwá ma. Na lo ni la, mbi ndo kũ na yɔngɔrɔ bɛ zu, lá mɛ gbanda ta pɛnɔ, ngã, ná kwá na dungɔ da ma. Kaya gigi ti fãnani mɛ angbã yakere aga ko, mbi na dungɔ na dungɔ lɛ ngɛ̃́ mɛ ta maka ni da ma ti nɛngɔ ya, mbi manda aye mɛ Yehova li nga na se ti kpɛ̃nɛ mɛ lo li na tɛrɛ e azi. Biani, aye mɛndó mbi na gwɛ̃ ti lingɔ na ngoi mɛndó mbi dɛ nyingambi ko, ta zu la ati na seni ma. Mbi ye na bɛ mbi kɔi ya, akpale ti nzɔ̃ni la ka gbɛlɛ e ga!