Na pɛ lingɔ kɔli na wali ti uzu, Nzapa bombindó ala ndoni kɔi na ya libala. Lo li ndó libala ya, kɔli na ya lo ahũ ni ya adu ngbondoni, wa ni nga la ndo gbɔ̃ ndasewa.​—Ebandeli 1:27, 28; 2:18.

 Nzapa ye ya kɔli na wali mɛ ali libala adu na dengɔ bɛ. (Masese 5:18) Ngbangɔ hɛ̃ ndia nga na wangɔ mɛ lengbi ti zangɔ azi mɛ ali libala ya ala du na dengɔ bɛ.

Na ya tɛnɛ mɛ e na bangɔ

•  Ndia mɛ Nzapa hɛ̃ na ndo libala nɛ?

•  Tɛnɛ mɛ Ngbangɔ tɛnɛ na ndo kangbingɔ nga na hongɔ libala nɛ?

•  Ti nɛngɔ ya Nzapa ye libala ayɔ ya asu ni kaya buku tɛ leta?

•  Kumba mɛ Ngbangɔ hɛ̃ kɔli na wali mɛ ali libala nɛ?

•  Nzapa yɔ ya ale kɔli na wali mɛ ali libala adũ bo ayangambi?

•  Ngasia la Ngbangɔ lengbi ti lɛkɛngɔ libala tɛ mbi nɛ?

•  Avɛrsɛ ti ya Ngbangɔ mɛ atɛnɛ tɛnɛ ti libala

 Bandangɔ na ebandeli, Nzapa lindó libala ya abombi bo azi sɛ, kɔli kɔi na wali kɔi. (Ebandeli 2:24) Ta Nzapa ndo ye ya kɔli kɔi du na awe gba ma, ta lo ndo ye nga azi ko la ndo bombi tɛrɛ la kɔli na kɔli bere wali na wali ma, wa ta lo ndo ye nga libala ti wanda ma. (1 Kɔrinto 6:9; 1 Tɛsalionikɛ 4:3) Yezo hɛ̃ndó wangɔ hɛ̃ ava lo ya ale ala ndo tɔndɔ ndia mɛndó Nzapa hɛ̃ na ebandeli mɛ aba Libala.—Marko 10:6-8.

 Ka lɛ Nzapa libala du ye mɛ alengbi ti ngbãngɔ bwai na bwai. Ngoi mɛ kɔli na wali ndo li libala ko, ala ndo ko kapa ti ngbãngɔ mbilimbili kɔi na mbage tɛ fɔ̃ lo, ala ndo ko nga kapa ti dungɔ ndoni ngoi zu mɛ ala na dungɔ na dungɔ lɛ ngɛ̃́. Nzapa ndo kpã bɛ lo ya ala tɔndɔ kapa mɛ ala ko.—Marko 10:9.

 Ye kɔi lengbi ti lingɔ ya kɔli bere wali mɛ ali libala azia fɔ̃ lo gwe ndo mɛndɛ̃, se ayɔ ya lo gwe ka ndasewa tɛ lo ti nɛngɔ ya ni za la na ye kɔi mɛ ala na gwɛ̃ni. Kanda ta Ngbangɔ hɛ̃ lége ya kɔli na ya lo kangbi na lo ti kpengba lo mɛ si kaya libala tɛ la ma. Ni yɔ ka ti kɔli na wali mɛ ala tengbi na lo ti ngaso ya ala lɛkɛ ni iɔ iɔ.—1 Kɔrinto 7:10.

 Zo lengbi ti hongɔ libala se du ya kɔi ka popo tɛ la ati kɔmbɛ. (Matie 19:9) Na lo ni la, se du ya kɔli na wali mɛ ali libala aye kangbingɔ bere hongɔ libala zangangɔ ya kɔi ka popo tɛ la ti kɔmbɛ ko, Ngbangɔ pa ya ale ta ala di yengbi na zo mɛndɛ̃ bere ala li libala na zo mɛndɛ̃ ma.—Matie 5:32; 1 Kɔrinto 7:11.

 Gwɛ̃ tɛ Nzapa du ya awakristo tɔndɔ ndia tɛ leta mɛ aba libala. (Tito 3:1) Se alengbi, kɔli na wali mɛ ali libala lengbi ti sungɔ libala tɛ la kaya buku tɛ leta, lingɔ ngaso ndo fa ya ala ye tɔndɔngɔ lo gbia tɛ leta nga na ndia tɛ Nzapa mɛ ndo tɛnɛ ya ayɔ ya libala angbã bwai na bwai. a

•   Kumba mɛ ala zu sɛ na ni. Ayɔ ya kɔli na wali ndo fangbi songo nga na tɔndɔngɔ ka popo tɛ la. (Efɛzɛ 5:33) Ayɔ ya kɔi kɔi ndo kokisa gwɛ̃ tɛ fɔ̃ lo ti bombingɔ tɛrɛ na songo, wa ayɔ nga ya ala kɛ̃ zangangɔ mbilimbili abɛse na ndenge mɛ ngasia. (1 Kɔrinto 7:3; Aebreo 13:4) Se du ya ala dũ ayangambi ko, kumba ti kãngɔ ayangambi adu tɛ la zu sɛ.—Masese 6:20.

   Ta Ngbangɔ tɛnɛ tɛnɛ zu mɛ aba kwa ti mi nga na kwa ti ya da mɛ kɔli lengbi ti lingɔ nga na omɛ wali lengbi ti lingɔ ma. Ala zu se la na kumba ti gingɔ hĩngangɔ ye mɛ du Ngbondoni na lo ti ndasewa tɛ la.

•   Kumba mɛ kɔli na ni. Ngbangɔ tɛnɛ ya “kɔ wali adu gbia ti ndo ya lo.” (Efɛzɛ 5:23) Lo gbia mɛ kɔli na ni adu ya, lo ndo dɔ nɔ na ndasewa tɛ lo, wa lo ndo mu nga ekateli ti nzɔ̃ni na lo tɛ ya lo nga na ayangambi tɛ la.

   Ayɔ ya lo li kpengbani ti hɛ̃ngɔ la tɛ, bɔngɔ, lo za ala ya ala du na dengɔ bɛ wa ala ti nga na mangbi ti nzɔ̃ni na Nzapa. (1 Timɔte 5:8) Lo na fangɔ ya lo ndo sepala na seliye ti nzɔ̃ni nga na kɔdɛ tɛ ya lo na lingɔ kwa na mangbi ndoni kɔi na lo, lo ndo kpã nga lɛ lo ndo dangɔ bɛ nga se mɛ ya lo ndo ma na tɛrɛ lo na ngoi mɛ lo ye mungɔ ekateli kɔi. (Masese 31:11, 28) Ngbangɔ tɛnɛ ya, ayɔ ya kɔ wali kokisa kumba tɛ lo na songo zu.​—Kɔlɔsɛ 3:19.

•   Kumba mɛ wali na ni. Ngbangɔ tɛnɛ ya “ale ya kɔli atɔndɔ kɔ lo.” (Efɛzɛ 5:33) Nzapa ndo ma dengɔ bɛ na ngoi mɛ wali ndo tɔndɔ kumba mɛ Nzapa hɛ̃ kɔ lo.

   Wali na kumba ti zangɔ kɔ lo, zangɔ lo ya lo mu ekateli ti nzɔ̃ni, hɛ̃ngɔ ti hɛ̃ lo ya lo kokisa kumba tɛ lo na seni. (Ebandeli 2:18) Ngbangɔ ndo hɛ̃ gonda hɛ̃ wali ko la ndo kokisa kumba tɛ lo ti ngbondoni kaya libala tɛ lo.—Masese 31:10.

 Ipɔ. Nzapa yɔndó ka ti awa kwa tɛ lo mɛndɛ̃ ti gã ya ala dũ ayangambi. (Ebandeli 1:28; 9:1) Kanda ta ndia niko ba awakristo ma. Ta Yezo yɔ ngandó bɛ fãni kɔi ka ti ava lo ya ala dũ ayangambi ma. Ta toma tɛ lo kɔi ti gã ayɔ ngandó ka ti azi mɛ ali libala ya ala dũ ayangambi ma. Bo kɔli na wali mɛ ali libala la lengbi ti mungɔ ekateli ti dũngɔ nyingambi bere ta ala dũ ma.

 Ngbangɔ na awangɔ gba mɛ alengbi ti zangɔ azi mɛ aye lingɔ libala ya ala tonda libala tɛ la na ndenge ti nzɔ̃ni. Ngbangɔ na awangɔ mɛ alengbi ti zangɔ azi mɛ ali libala ya ala li zu ti nɛngɔ ya ta kpengba lo si ma wa ala nwɔ̃ nga kpengba lo mɛ ala ndo tengbi na ni.

 Ngbangɔ na awangɔ mɛ alengbi ti zangɔ azi mɛ ali libala ya . . .

•   ala fangbi bɛta songo ka popo tɛrɛ la.—1 Kɔrinto 13:4-7; Kɔlɔsɛ 3:14.

•   ala gbe bɛ la na ya lo kɔi mɛ ta nyɔ̃ la se kɔi na lo ni ma.—1 Kɔrinto 10:24.

•   ale zo kɔi kɔi ndo ma fɔ̃ lo na yɔngɔrɔ bɛ.—Zaki 1:19.

•   ale ala du na tɔndɔngɔ ka popo tɛ la.—Roma 12:10.

•   ale ala ndo ka lɛ la na ndo siɔ kpale.—1 Pɛtro 4:8.

•   ala du mbilimbili.—Marko 10:9.

•   ala du na yɔngɔrɔ bɛ.—Efɛzɛ 4:2, 3.

•   ala ndo li kwa ndoni kɔi na mangbi.—Mosakoli 4:9.

•   ala tɔndɔ kapa ti libala mɛ ala ko.—Loyembo ya Salomo 8:7.