1, 2. Mano niphwanaphwaniho taani nnathonyerya otchuneya wa mathipelo aphama wii nthanle volocha sa myaha sa ikeresha?

MANO nnahaala ophiyerya omusuwela Muluku mwawiihai? Onahaala okhala wotchuneya weeha mahusiheryo othene a ikeresha sinchipale irivovo? Onahaala okhala woohiweryeya. Nari nahaala weerano eyo, mano nahaala osuwela mwawiihai yawo ari mahusiheryo aphama?

² Woohikhalavo wanyiherya ori wothene, ohiyana muupuwelo wothene ononeya volocha sa Muluku, ninnatchuneleya ephiro emoha wii nsuwele eparipari tiheni, mwa makhalelo amathipelo aweemeryeryiwa ti atchu. Wii nlikanyiherye: Okhanleene wii wookhalavo oheemeryeryana volocha sa wiinnuwa wa ekuwo entumihiwaa va merkatu. Mulipa ootumiha onlocha wii ti ekuwo erino ameturu araru, nyenya mulipa oothuma onoona wii ekuwo eyo erino ameturu oohakhwana mararu. Mano munahaala omaliha mwawiihai mwahoowo? Mwa ophima ekuwo eyo.

3. Mano ntakhara heni Biblia aarempwiiye?

³ Mano yokhalavo etchu ya mathipelo, yoophimano wii nthanle volocha sa myaha sa ikeresha? Ayi yokhalavo, ti Biblia. Muluku aheriha wii Biblia arempwe ntakhara a atchu a makupa othene ewerye ohuserya eparipari volocha sa yowo. Mabilyawu a ikoopiya saahirempwa. Owo ahitaphuleliwa othene nari mmakupa makina mu ilochelo soopwaha 2.100. Vakhiviru-khiviru mutchu ori othene onnawerya waalakhanya eparipari volocha sa Muluku mu elochelo awe.

4. Mano tisolokoha taani iri m’Bibliani?

⁴ Biblia ti yamahala ya esisapo yowalamela  ya Muluku. Onnathoriha itchu hiiho voohikhalavo Biblia nahahaalahu osuwela. Onnanlela volocha sa atchu anakhala mu olamulelo womunepani. Onnupulula mawupuwelo a Muluku, omutchu awe ni yotchuna awe. Onnalocha volocha sa meerelo awe ni atchu iyakha amile ivinree. Onnathoriha itchu inahaala weereya muholo. Nave onnanthonyerya mummo nnahaalahu ophwanyerya ephiro ya wukumini wohimala.

5. Mano tisotakiherya taani inathonyerya wii Biblia onneemeryeryana ni siyensiya?

⁵ Akhalavo mathowa manchipale awii nroromele wii Biblia ori tchiryene Masu a Muluku. Nthowa nimoha na mathowene yawo tiyawii Biblia onneemereryana ni siyensiya. Mu ilukuluku sakhalai, atchu velaponi yothene yuupuwela wii elapo yavathi yaasheryeryiwa ni etchu ekina. Mwa yootakiherya, Onaneela Nsuwa wa Afrika, atchu yanemererya wii elapo yavathi yaaphareleliwa ni enowa yawikhulumanya ni orukuryerya wawaakhwana 3.500 vasulu velaponi orukuryerya wawaakhwanatho 3.500 vathi. Nyenya, moopharihana ni siyensiya, oorepa mukina a Biblia aahirepa mu iyakha sopwaha 3.500 muchuli wii Muluku “onatikitherya elapo vatheru vene.”—Yobu 26:7.

6. Mano yochichimiherya taani etokwene enathonyerya wii Biblia orwenle wa Muluku?

⁶ Yochichimiherya etokwene yawii Biblia tchiryene ta Muluku ti ophamawe wa olochela khuluwi sa muholo. Mohiyana ni solochela khuluwi sa atchu, Muluku tchiryene onnasuwela sa muholo; hiiho owo onlochiiye sinnereya tchiri.

7. Mano ti soloherya ikina iviini sa Biblia saakhwanenle khalai?

⁷ Masana manchipale a soloherya sa Biblia sohaakhwanela mu ilukuluku sakhalai. Mwa yotakiherya, iyakha 700 Yesu ahinaakuve oyariwa m’muchetche wa Betelehemu, Biblia ahilocha eyo mochichimiherya, nave yahereya tchiri. (Mikeya 5:2; Mateyu 2:3-9) Wachererya va soloherya sikina sinchipale volocha sa Yesu, Biblia ahilochelatho khuluwi wii owo ahaala oyariwa mwa namwali nave vachulivaya ahaala oveleeliwa ni ikhorowa 30 sa mivira. Soloherya sene hiihotho sohaakhwanela. Mweparipari, havovo mutchu ahaala owerya olochela khuluwi itchu sene hiiho!—Yesaya 7:14; Zakariya 11:12, 13; Mateyu 1:22, 23; 27:3-5.

8. Mano ti soloherya ikina iviini sa Biblia inakhwanela olelo nave inachichimiherya eheni?

⁸ Soloherya sinchipale sa Biblia sinnakhwanelatho  mmahikwahu ala. Onani ikina sa hiiho:

• “Nloko na atchu n’narwa-nivinyerya va nloko nikina [mu ekhocho]; nave omwene ni omwene mukina: nave onarwa-okhala ochikinyeya otokotoko, ni etala ni epahu m’mapuro ori ori.”—Luka 21:10, 11.

• Wahaala okhalawo “wachasha wa óhiléleya.”—Mateyu 24:12.

• “M’mahiku ókutchula . . . atchu enarwa-ekhala awisivela mkhataya, ósivela icharama, . . . óhiwiwelela yawo yáyanre, . . . ósasa, óhiwerya wíhíha, . . . óhásivela aphama, . . . awirumiha murima, ósivela hiho sinatheiha mutchu, óhikhala ómusivela Muluku.”—2 Timoteo 3:1-5.

Mano himunona wii itchu hiiho sinneereya olelo? Eparipari ni waakhwaniheryiwa wa soloherya sa Biblia sinnathonyerya wii Biblia kahi livru pure. Ti Masu oovereliwa a Muluku!—2 Timoteo 3:16.

9, 10. Mano tiheni enathonyerya wii Muluku haahinye atchu omwaakakhanyiha Biblia?

⁹ Nlikanyiherye mwawihiha: nyuwo mwa mwaneene afaaprika nave mokuhavo va kwatru ya solokoherya elista ya solakiherya sawii anamuteko anyu etchareleke. Wakhala wii mwiichani ohakakhanyiha hiiho nyuwo murempanyu, mano mwahaala wiihai? Mano himwii muryeheryerye yeyo yakakhanyihiwe? Mu ephiro emoha-mohatho, Muluku hanemererya wii atchu yakakhanyihe eparipari ya Masu awe, Biblia.

¹⁰ Atchu yawo yeerenrye wakakhanyiha sohusiha sa Masu a Muluku hiyaarino sokhumelelavo saphama. Vavaa nnamulikanyiheryahu Biblia yowo nryahuno olelo ni ikoopia sakhalai sa Biblia, iho iri solikana. Va ela enathonyerya wii Biblia hakakhanyenye mu ovira wa iyakha.