NIKUPA 1
Mmwaavye Muluku wi Muhakalale mu Othela
“Yowo ápachunshe atchu vopacherya, áhápachusha yawo mulopwana ni muthiana.”
Yehova * Muluku aatikitherya othela woopacerya. Piipiliya onnanleela wi aampaka muthiyana oopacerya nave ‘àmukeriha wa mulopwana.’ Aatamu aatepa ohakalala nave aaloca: “Txhiri ola ti nikhuva na makhuva aka, ethai ya ethai aka.” (Maphatxuwelo 2:22, 23, Bibiliya Nsu na Muluku, BNM.) Yehova nlelo onnachuna wi achu oothelana ekhale oohakalala.
Vaavaa nyuwaano munathelaanyu, munanwerya wuupuwela wi ichu soothene sinahaala okhala sawookololowa. Mweeparipari, naamwi mulopwana ni muthiyana chiryene esivelanaka mukina ni mukhwaawe anahaala okhalano makacamiho. (1 Akorinto 7:28) Mu eproxura yeela, nyuwaano munahaala ophwanya malakiheryo a Piipiliya, wakhala wi moopharihela yaawo, enahaala weeriha wi othela ni echoko anyu ekhale yoohakalala.
1 MWEEMERERYE MURICI YEHOVA OOVANHEIYENI
TIHEENI PIIPILIYA ONALOCEIYE: Mulopwana muru wa echoko.
Wakhala wi nyuwaano mwa mulopwana, Yehova onawehererya wi mmuthokororye phaama mwaarinyu. (1 Petro 3:7) Yehova ompaka muthiyana ntoko ookhaviherya anyu nave owo onachuna wi nyuwaano mmuthokororyeke ni ncicimiho ni osivela. (Mapacereryo 2:18) Nyuwaano munaphwanela omusivela mwaarinyu vancipale ophiyerya ohela soochuna sawe ohoolo wa soochuna sanyu.
Wakhala wi nyuwaano mwa muthiyana, Yehova onaweherya wi mmucicimiheke iyanyu nave mmukhaviheryeke waakhwaniha mirici awe. (1 Akorinto 11:3; Aefeso 5:33) Mukhaviherye soolakelela sawe nave muniiwanana ni yoowo ni murima woothene. (Akolose 3:18) Mweerano hiiha, nyuwaano munahaala okhala ooreera vamiithoni va iyanyu vamoha ni Yehova.
TIHEENI MUNAPHWANELAANYU WEERA:
-
Mmukohe oothelana anyu mukhalelo wa okhala iya naari mwaara aphaama. Nwiriyane phaama, nave mweere yeeyo munaweryaanyu wi mukhale phaama.
-
Mukhale oopixa murima. Enahaala ovira elukuluku wi oopiili anyu musuwele ti mwawiihai munahaalaanyu ohakalalihana mukina ni mukhwaawe.
2 MUTHOKORORYE CHIRYEENE MOONELO WA OOTHELANA ANYU
TIHEENI PIIPILIYA ONALOCEIYE: Nyuwaano munaphwanela othokororya soothowa sa oothelana anyu. (Afilipi 2:3, 4) Mmuthokororye oothelana anyu ntoko ookhweleyaxa, muupuwele wi Yehova onachuna wi alapeli awe ekhale “épewe wa othene.” (2 Timoteo 2:24) “Masu a mulavilavi t’ophoreiha ntoko nsipàtxa nto malotxelo a anamiruku, t’openusa.” Mwawiihiiha muthanle masu anyu phaameene. (Masiposipo 12:18, BNM.) Munepa wa Yehova onahaala wookhaviheryaani oloca ni epewe ni moosivela.
TIHEENI MUNAPHWANELAANYU WEERA:
-
Mveke nikhaviheryo mu nivekelo wi mukhale oomaaleleya ni oohuleya mmuupuwelo muhaakumve othokororya miyaha sookhweleya ni oothelana anyu.
-
Muupuwelele phaama vooloca sa yeeyo munayaanyu oloca ni mukhalelo munahaalaanyu oloca.
3 MUUPUWELE NTOKO NIKHUURU
TIHEENI PIIPILIYA ONALOCEIYE: Vaavaa nyuwaano munathelaanyu, munakhala ‘enama emoha’ ni oothelana anyu. (Mateyu 19:5) Nyenya nivano nyuwaano mwa achu apiili nave munahaala okhala oohiyana mmuupuweloni. Mwa yeeyo munaphwanela ohuserya wi mukhale a wiiwanana mmuupuwelo ni mmoonelo. (Afilipi 2:2) Wiiwanana ti wookhweleya vaavaa munapakaanyu soolakelela. Piipiliya onnaloca: “Wasye ikano saphama, onamukhalano ekari.” (Masiposipo 20:18, BNM.) Muhiye wi malakiheryo a Piipiliya yoohooleleeni vaavaa munapakaanyu vamoha soolakelela sookhweleya.
TIHEENI MUNAPHWANELAANYU WEERA:
-
Muuke moonelo anyu ni oothelana anyu ohiya pahiru miseelo naari muupuwelo.
-
Mmukohe oothelana anyu muhaakumve opaka nlakano.
^ par. 4 Yehova nsina na Muluku Mpiipiliyani.
