Michaka yaphaama ya wi achu anahaala okhala wookhala veelaponi ya vathi sirempwe mPiipiliyani. (Salmo 37:29) Piipiliya orino 66 aliivuru akhaani. Muluku aapharihenle muteko alopwana 40 oororomeleya wi emurepe Piipiliya. Aliivuru athanu oopacerya arempwe ti Moose iyaakha 3,500 khalai. Liivuru ookuchula orempwe ti murummwa Yohane iyaakha 1,900 khalai. Muupuwelo orempwe mPiipiliyani tiwawani? Muluku aahipharihela muteko munepa waweela wi waakhaviherye anamarepa a Piipiliya. (2 Samuwele 23:2) Awo arempe muupuwelo wa Muluku, ohiya muupuwelo aya. Yehova pahiru ti mwaneene a Piipiliya.​—Mwaalakhanye 2 Timoteo 3:16; 2 Petro 1:20, 21.

Moone exilema Mwaneene a Piipiliya Taani?

Hiyaano ninnasuwela wi Piipiliya onarweela wa Muluku nthowa nawi owo onnaloca ichu sa muhoolo mwawaakhwanela. Haavo muchu onawerya weera hiihaa. (Yosuwa 23:14) Muluku a Ikuru Soothesene pahiru tonawerya oloherya muhoolo wa achu.​—Mwaalakhanye Yesaya 42:9; 46:10.

Hiyaano nanweherya wi liivuru oorweela wa Muluku akhale avameekheiye, nave owo ti hiihaa. Macikhwi macikhweene aPiipiliya annakaiwa mu ilocelo masaneene. Naamwi ari akhalai, Piipiliya onniiwanana ni siyensiya. Navetho, anamarepa 40 a Piipiliya havaanyihanne mukina  ni mukhwaawe. * Moopwahaxa, yeeyo Piipiliya onaloceiye sa osivela enarweela pahiru wa Muluku eeparipari​—Muluku a osivela, nave Piipiliya ookhalano ikuru sa orukunuxa okumi wa achu wi ekhale phaama. Ichu seiya sinnaweeriha ancipale weemererya wi Piipiliya ti Masu a Muluku.​—Mwaalakhanye 1 aTesalonika 2:13.

Moone exilema Nni Nsuwele Hai wi Piipiliya Teeparipari?

Piipiliya onaloca michaka yaphaama yawi Muluku ookhalano yookhwela yoosivela wa achu. Piipiliya onnaloca moota erimenlaaya wuupaceryani ekari ya muchu okhala mparadaiso veelaponi ya vathi ni mummo paradaiso onahaaleiye okookiheryiwa.​—Mwaalakhanye Yawupulula 21:4, 5.

Masu a Muluku aakhalano tho malamulo, malakiheryo, ni olopola. Mwawaacererya, Piipiliya ookhalano miyaha sa meerelo a Muluku ni achu​—miyaha sinooniherya mikhalelo sa Muluku. Hiihaa, Piipiliya onamookhaviheryaani omusuwela Muluku. Owo onaloca moota wa okhala nthamwene awe.​—Mwaalakhanye Salmo 19:7, 11; Yakobo 2:23; 4:8.

Eproxura ela enahaala wookhaviheryaani nyuwo omwiiwexexa Piipiliya moorweela wa opharihela muteko moota yoowo Yesu eereiye. Owo aaromola etesto ya Piipiliya ni ekina nave “áthoriherya m’sorepiwa.”​—Mwaalakhanye Luka 24:27, 45.

Hisaavo ichu sinatannya murima opwaha michaka yaphaama sinarweela wa Muluku. Nyenya, aakhalavo achu ahinachuna wiiwa, nave akina annathanya. Muhicecheye. Ewehereryo anyu ya okhalano okumi woohimala onachuneya wi mmusuwele Muluku.​—Mwaalakhanye Yohane 17:3.