1-3. (a) Achu ancipale anoona hai miteko aya? (b) Moonelo taani wa muteko Piipiliya onaloceiye, nave makoho taani anahaala othokororyiwa mmwaha yoola?

ACHU ancipale olelo, anoona muteko okhala echu yoohihakalaliha. Elapaka iwora sincipale mmuteko yoowo ohinaahakalaliha, awo hanasiveliwa oya olapa elukuluku yoothene. Ni moonelo yoowo, achu enii ewerye hai osiveliwa ni muteko aya ni ohakalala mmuteko aya?

² Piipiliya onnanceenyerya okhalano moonelo waphaama vooloca sa muteko wakuru. Owo onnaloca wi muteko ni yookhumelela aya anakhala mareeliho. Soolomoni oorepa: “Navetho olya ni owurya, opuha wa itxhu sa muteko ahu ti yovaha ya Muluku.” (Eklesiyaste 3:13, BNM) Yehova, onnanisivela nave onachuna yaphaama wa hiyo, onachuna wi niphwanye ohakalala mmuteko ahu ni opuha sookhumelela sa muteko ahu. Wi niikhapelele mu osivela awe, nnaphwanela okhalaka mwawiiwanana ni moonelo ni malakiheryo awe vooloca sa muteko.—Mwaalakhanye Eklesiyaste 2:24; 5:18.

³ Mmwaha yoola, nnahaala othokororya makoho maxexe: Nnii niwerye hai ophwanya ohakalala mmuteko ahu? Mukhalelo taani wa muteko ohinaphwanela wa Mukiristu eeparipari? Nnahaala owerya hai ophimelela muteko wa mulaponi ni miteko soomunepani? Nave tuuvi ori muteko woochuneya nnaphwanelaahu ophara? Woopaceryani, hankooni nthokororye yawooniherya ya achu apiili oophara muteko—Yehova ni Yesu Kiristu.

4, 5. Piipiliya onooniherya hai wi Yehova namalapa oowetha?

⁴ Yehova ti Namuteko Oowetha. Maphatxuwelo 1:1, BNM, onnaloca: “Wopatxeryani Muluku àpatunse erimu ni elapo ya vathi.” Vaavaa Muluku aakwanseiye muteko awe wa opatuxa ophitaanyerya elapo, owo aaloca wi “sàri txhiri sorèrasa.” (Maphatxuwelo 1:31, BNM) Mmasu makina, owo aari oohakalala ni muteko awe woothene wa vathi. Yehova, Muluku oohakalala, moohikhwa minikwa onnaphwanya ohakalala mu okhala namalapa oowetha.—1 Timoteo 1:11.

⁵ Muluku ahu oolapa hantonko ohiyererya olapa. Elukuluku muhoolo imanle opatuxiwa ichu sa elapo yavathi, Yesu aaloca: “Atithaka annaphara muteko ophiyerya hihano.” (Yohane 5:17) Tiheeni Tiithi oneereiye? Ovinyerya wirimu, owo chiryene onnahoolela ni onnakhapelela elapo. Owo oopatuxa ichu “siri sahihano” Akiristu awoocihiwa ni munepa anahaala olamulela ni Yesu wirimu. (2 Akorinto 5:17) Owo onnalapa wi akhwaaniherye yoochuna awe wa achu—yaawo anamusivela wi ekhaleno okumi woohimala mu elapo ya hiihaano. (Aroma 6:23) Yehova oohakalala vancipale ni sookhumelela sa muteko yoowo. Ancipale annapuruliwa ni Muluku wi yaakhulele michaka sa Omwene, epakaka matorokelo mu okumi aya wi yiikhapelele mu osivela wawe.—Yohane 6:44.

6, 7. Muteko taani Yesu aareiyeno?

⁶ Yesu opacenrye khalai olapa. Ahaakumve orwa veelapo yavathi, owo aalapa ntoko “mulipa òteka” a Muluku mu opatuxa ichu soothene “sa wirimu ni sa velaponi.” (Masiposipo 8:22-31; Akolose 1:15-17) Vaavaa aaruuleiye veelaponi, aatitelela okhala namalapa. Opacerya ari mmiravo ene aahuserya oteka ichu, nave aasuweliwa ntoko “mulipa-iracha a miri.” * (Marko 6:3) Muteko yoowo waavolowela olapa mwa  ikuru mmavyakelo oohiyana hiyana—xaxaxa ntakhara hisaariwo ichu soorehererya ithaapwa ni nipuro na othumavo naari ikhankoonya sawaakuveya. Munnawerya waanyiherya Yesu ayaaka waavya miri sawe—akwacaka naari ateexaka ikhukulu akerihaka o nipuro na muteko? Munnawerya waanyiherya atekaka ipa—athomeelaka, ni apakaka ichu sa mpa? Yesu moohikhwa minikwa onnahakalala ni yookhumelela ya muteko woopakiwa phaama.

⁷ Yesu aasuweliwa ntakhara aalapa mmukhalelo woohihiyererya mu orummwa awe. Mu iyaakha raru ni emeya, owo aaweiwa ni muteko yoowo woochuneya. Nthowa na ochuna waaphwanya achu ancipale, owo aanapharihela phaama nihiku, alapaka opacerya wooxixelo ophiyerya ohiyu. (Luka 21:37, 38; Yohane 3:2) Aaneeca “o muchetcheni ni witchokoni, alaleyerya ni wáléla Michaka yaphama ya Omwene wa Muluku.” (Luka 8:1) Yesu aaneeca mastatiya masana masaneene, eecaka ni meco mu ephiro ya nchupi aakerihelaka achu michaka yaphaama.

8, 9. Yesu oona hai yeeyo yaari yaphaama mmuteko awe?

⁸ Apwanne Yesu aanaphwanya ohakalala mmuteko awe wa olaleerya? Aai! Owo aahaala mmiso wa eparipari ya Omwene, ahiyaka imaca sawaakhwanela ntakhara ohaca. Opaka makupa mmuteko wa Muluku waanamulipiha Yesu ophiyerya oyeleela olya wi apake muteko yoowo. (Yohane 4:31-38) Nkaanyiheryani ohakalala yoowo aareiyeno akuchunle orummwa wawe veelapo ya vathi, vaavaa aalonceiye wa Tiithi awe: “Miyo kihochichimihani Nyuwo mwilaponi ya vathi, kákutchunlaka muteko yowo mwákivahilanyu wi kiphare.”—Yohane 17:4.

⁹ Chiryene Yehova ni Yesu aanivaha yootakiherya etokweene ya ophwanya ohakalala mmuteko ahu. Osivela wahu wa Yehova onnaneeriha okhala “ótakiherya a Muluku.” (Aefeso 5:1) Osivela wahu wa Yesu onnaneeriha ‘otcharatchara manani awe.’ (1 Petro 2:21) Hankooni  nthokororye ti mwawiihai nnahaalaahu owerya ophwanya ohakalala mmuteko ahu.

10, 11. Tiheeni enahaala onikhaviherya okhalano moonelo waphaama mmuteko ahu?

¹⁰ Muteko wa mulaponi onnapaka makupa mu okumi wa Mukiristu eeparipari. Ninnachuna wi oniruuhele ohakalala ni opuha, nyenya eyo enahaala okhala yoovila wakhala wi hinnasiveliwa ni muteko ahu. Onaweryeya hai ophwanya ohakalala mmuteko ahu variyari va makacamiho?

¹¹ Moorweela wa okhalano moonelo waphaama. Ikwaha sincipale haniwerya otoroka makhalelo ahu, nyenya nnanwerya otoroka moonelo ahu. Wuupuwelela moonelo wa Muluku enahaala onikhaviherya okhalano moonelo waphaama ntakhara muteko. Ntoko yootakiherya, wakhala wi nyuwaano mwa muhooleli a emusi, muupuwelele wi muteko anyu, moohipwacha mmukhalelo taani, onnookhaviheryaani ovaha soochuna soomwiilini sa emusi anyu. Waakhapelela achu munaasivelaanyu tahi mwaha mukhaani vamiithoni va Muluku. Masu awe annaloca wi yoowo onahiya ovakulela emusi awe “tanananariye ompwaha yowo ohinaroromela” wa Yehova. (1 Timoteo 5:8) Osuwela wi muteko anyu onnookhaviheryaani waakhwaniherya murici mvahiwaanyu ni Muluku—enahaala oweerihaani ophwanya ohakalala mmuteko anyu, yeeyo akina akhweya ahinaweryaaya okhalano.

12. Mmukhalelo taani nnakhalaahuno mphurelo ntakhara okhala oowetha ni oororomeleya mmuteko ahu?

¹² Moorweela wa okhala oowetha ni oororomeleya. Nnahaala okhalano mphurelo moorweela wa olapa ni osuwela waakhwaniherya muteko ahu. Mmapuro oothene asipwiya annasiveliwa ni anamalapa aya aphaama ni oowetha. (Masiposipo 12:24; 22:29) Ntoko Akiristu eeparipari, hiyaano tho nnanwerya okhala oororomeleya mmuteko ahu—ohiya  wiiya ikhorowa, ichu soomwiilini, naari elukuluku ya pwiya ahu. (Aefeso 4:28) Ntoko noonnaahu mmwaha ovinre ororomeleya ti wa mphurelo. Namalapa oororomeleya onahaala ororomeliwa ni pwiya awe. Naari pwiya ahu onne yootakiherya ahu ntoko namalapa oowetha naari hooye, nnanwerya okhalano ohakalala yoowo onarweela okhalano “yawupusherya-ya-murima yorera” ni osuwela wi nnamuhakalaliha Muluku nnamusivelaahu.—Ahebri 13:18; Akolose 3:22-24.

13. Meecelo ahu aphaama omutekoni anahaala okumiherya eheeni?

¹³ Moorweela wa osuwela wi meecelo ahu annamucicimiha  Muluku. Vaavaa nnakhalaahuno meecelo Eekiristu omutekoni wahu, akina anahaala woona. Ni yookhumelela taani? Nnanwerya oreeriha “mahusiheryo a Mvulushahu Muluku.” (Tito 2:9, 10) Aai meecelo ahu aphaama ananwerya waatikiniha akina eweerihaka weemererya eparipari. Mwaanyiherye ohakalala mwaahaalaanyu okhalano wakhala wi nthamwene anyu a omuteko oheemererya eparipari moorweela wa yootakiherya anyu yaphaama! Echu yoochuneyaxa, muthokororye ela: Tiheeni yaahaala okumiherya ohakalala opwaha osuwela wi meecelo anyu aphaama annamucicimiha Yehova ni annahakalaliha murima awe?—Mwaalakhanye Masiposipo 27:11; 1 Petro 2:12.

14-16. Vaavaa nnakumanaahu ni soolakelela sa muteko, makoho taani oochuneyaxa nnaphwanelaahu othokororya?

¹⁴ Vooloca sa muteko wa mulaponi, Piipiliya hanathariha mookwakwaleya sa yoowo ori waweemereryeya ni ohiri waweemereryeya. Ela henataphulela wi nnaphwanela weemererya mukhalelo woothene wa muteko moohipwacha yeeyo enavolowela. Soorempwa sinnanikhaviherya othanla muteko wa mphurelo weekhaikhai ni onamuhakalaliha Muluku nsepaka muteko waahaala omuthananiha. (Masiposipo 2:6) Vaavaa nnakumanaahu ni soolakelela sa muteko, aakhalavo makoho meeli oochuneyaxa nnaphwanelaahu othokororya.

¹⁵ Mukhalelo wa muteko yoola onnakhwatiihiwa Mpiipiliyani? Masu a Muluku annakhwatiiha wiiya, wootha ni othamalela soophwaniherya. (Mukwaha 20:4; Saweriwa Tarummwa 15:29; Aefeso 4:28; Yawupulula 21:8) Hiyaano naahaala okhooca muteko woothene waahaala ochuneya weerano ichu seiya. Omusivela wahu Yehova waahaala oneeriha okhooca muteko onavolowela meerelo ahiniiwanana ni malamulo Awe.—Mwaalakhanye 1 Yohane 5:3.

 ¹⁶ Weerano muteko yoola onnaneeriha ovolowela naari ovuwiha meerelo oonanara? Muthokororye yootakiherya emoha. Olapa ntoko mulipa oowaakhela achu tahi yoonanara. Hanka wakhala wi Mukiristu oovahiwa muteko yoowo mu nipuro na oyeeha irukulu? Eparipari wi muteko awe honamweeriha opaka meerelo a oyeeha irukulu. Naamwi hiiha, apwanne muteko awe hiwaahaala okhaviherya meerelo a oyeeha irukulu—yeeyo eri yoohiyana ni Masu a Muluku? (Mukwaha 21:22-24) Ntoko achu anamusivela Yehova,  hiyaano hinnachuna ophitaana ni meerelo ahiniiwanana ni Soorempwa.

17. (a) Ichu taani nnaphwanelaahu othokororya vaavaa nnapakaahu soolakelela vooloca sa muteko? (Moone ekaaxa “ Kinnaphwanela Weemererya Muteko Ola?”) (b) Yawuupuxerya-ya-murima ahu enahaala onikhaviherya hai opaka soolakelela inamuhakalaliha Muluku?

¹⁷ Miyaha mincipale sa muteko inahaala omalihiwa moorweela wa othokororya phaama maakhulo a makoho meeli oochuneyaxa aromoliwe mu eparakrafo 15 ni 16. Mwawaacererya, sookhalavo ichu ikina nnaphwanelaahu othokororya vaavaa nnapakaahu soothanla vooloca sa muteko. * Hannaphwanela oweherya wi kapuro oororomeleya onahaala otikitherya malamulo a miyaha soothene inahaala okhumelela. Ti nthowa nene oryaaya woochuneya okhala a miruku.  Ntoko nihusenryaahu Mmwaha 2, nnaphwanela ohusiha ni ovyakiha yawuupuxerya-ya-murima ahu moorweela wa ohuserya mukhalelo wa opharihela Masu a Muluku mu okumi ahu wa nihiku nnihiku. Nrino “masuwelelo” oovyakihiwa “vaweranosha,” yawuupuxerya-ya-murima ahu enahaala onikhaviherya opaka soolakelela inahaala omuhakalaliha Muluku ni oneeriha wiikhapelela mu osivela wawe.—Ahebri 5:14.

18. Ntakhara heeni okhapelela moonelo woomunepani tahi wookhweya?

¹⁸ Okhalano moonelo woomunepani tahi wookhweya “m’mahiku [yaala] ókutchula” ni “ilukuluku sohósha.” (2 Timoteo 3:1) Ophwanya ni okhapelela muteko chiryene ti woovila. Ntoko Akiristu eeparipari, ninnasuwela ochuneya waya olapa mwakuru wi nivakulele emusi ahu. Nyenya wakhala wi hanniikasopa, sookhinyererya omutekoni ni munepa wa elapo wa wiithukumanyerya sinahaala ovolowela muhakhu ahu woomunepani. (1 Timoteo 6:9, 10) Hankooni nthokororye ti mwawiihai nnahaalaahu okhalano moonelo woophimelela, ni “othalela eri yaphama.”—Filipi 1:10, BNM.

19. Ntakhara heeni Yehova onnaphwanela ororomeliwa, nave tiheeni ororomela yoowo onanikhaviheryaaya osepa?

¹⁹ Mmuroromele Yehova moomalela. (Mwaalakhanye Masiposipo 3:5, 6.) Yehova onnaphwanela ororomeliwa. Opwaha soothene, owo onnanikhapelela. (1 Petro 5:7) Owo oosuwela soothowa sahu opwaha hiyaano, nave ntata nawe tahi nookhuveya. (Salmo 37:25) Mwawiihiiha ti waphaama owiriyana ekano ya Masu awe: “Murimányu okhale wohisivela muhakhu, hiho murianyuno sokhwánelekeni; ntakhara Yowo tálonchiye, Nkirwa-kohiyaru nari, nari woriha, nkirwa-koriha tchiri.” (Ahebri 13:5) Alapeli ancipale a elukuluku yoothene anneerela onamoona owerya  wa Muluku waakhwaniha soothowa sa okumi. Wakhala wi ni murima woothene ninnaroromela wi Yehova onahaala onikhapelela, nnahaala osepa okhala awuukhuwaxa vooloca sa ovakulela echoko ahu. (Mateyu 6:25-32) Hanrwa neemererya wi muteko wa mulaponi oneerihe wiicuwaliha miteko soomunepani, ntoko olaleerya michaka yaphaama ni  ophwanyeya mmithukumanoni.—Mateyu 24:14; Ahepri 10:24, 25.

20. Okhalano niitho na omoha enataphulela eheeni, nave munii nwerye hai okhalano moonelo yoowo?

²⁰ Mukhaleno niitho na omoha. (Mwaalakhanye Mateyu 6:22, 23.) Okhalano niitho na omoha enataphulela okhweiha okumi ahu. Mukiristu a niitho na omoha onateteiwa ni yoolakelela emoha—weerano yoochuna ya Muluku. Wakhala wi niitho nahu ti na omoha, hanneemererya owokeya naavyaka muteko onavaha mphurelo wawaaca naari mukhalelo wa okumi wa vasulu. Hanikhala a woototheya ni mukhalelo woothene wa ichu ivyaani soomwiilini seiyo alipa maroca yaahaalaaya oneeriha weemererya wi ninnachuna ichu seiyo wi nikhale oohakalala. Munii muwerye hai okhaleno niitho na omoha? Musepe wiisuukhula ni ivaale soohichuneya. Muhikacamihe okumi anyu ni sawiithukumanyerya seiyo inamaliha ikuru ni elukuluku yincipale. Nwiriyane ekano ya Piipiliya ya ohakalalela “sólya ni sawikhunelano.” (1 Timoteo 6:8) Mweere yeeyo munaweryaanyu wi mukhweihe okumi anyu.

21. Ntakhara heeni ti woochuneya otikitherya soolakelela, nave tiheeni enaphwanela okhala va nipuro noopacerya mu okumi ahu?

²¹ Mutikitherye soolakelela soomunepani, nave mucharihe. Woona wi nnakhala elukuluku vakhaani, ti woochuneya otikitherya soolakelela. Ohiya yeeyo, ichu soohichuneya saahaala omaliha elukuluku ahu, nihiyaka okhwipi ichu soochuneyaxa. Tiivi enaphwanela okhala yoolakelela yoopacerya mu okumi ahu? Achu ancipale mweelaponi annateteiwa ni ohuserya wa vasulu wi ekhaleno muteko wa mphurelo mweelapo yeela. Yesu aahaalopola oomuchara awe ‘opacherya wavya Omwene.’ (Mateyu 6:33) Chiryene, ntoko Akiristu eeparipari, ninnahela Omwene wa Muluku va nipuro noopacerya mu okumi ahu. Mukhalelo wa okumi ahu—soothanla sahu, soolakelela nnapakaahu ni miteko sahu—inaphwanela wooniherya wi soothowa sa Omwene ni  yoochuna ya Muluku ichu soochuneyaxa wa hiyo opwaha ichu soomwiilini ni sookhalano sa mweelaponi.

22, 23. (a) Tuuvi ori muteko woochuneyaxa wa Akiristu eeparipari, nave nnii nooniherye hai wi muteko yoowo ti woochuneya wa hiyo? (Moone ekaaxa “ Yoolakelela Aka Yaaruuhela Okumi Waphaama ni Woohakalaliha.”) (b) Teevi eri yoolakelela anyu vooloca sa muteko wa mulaponi?

²² Nsuwelaka wi nnakhala mmahiku ookuchula, ninnateteiwa mmuteko woochuneyaxa wa Akiristu eeparipari—olaleerya ni waapaka oohuserya. (Mateyu 24:14; 28:19, 20) Ntoko yootakiherya ahu, Yesu, ninnachuna okhala ooweiwa ni muteko yoola woovuluxa okumi. Nnii nooniherye hai wi muteko yoola ti woochuneyaxa wa hiyo? Alapeli ancipale a Muluku anniiveleela ni murima woothene mmuteko wa olaleerya ntoko alaleeryi. Akina aakukuca mukhalelo wa okumi aya wi erumeele ntoko mapiyoneero naari mamisiyonaariyo. Esuwelaka ochuneya wa soolakelela soomunepani, asitiithi ancipale annaaceenyerya anaaya ovolowa mmuteko wa elukuluku yoothene. Apwanne alaleeryi amvai a Omwene annoona yeeyo eri yaphaama mmuteko aya wa olaleerya? Aai! Omurumeela Yehova mukhalelo waphaamaxa onavaha ohakalala ni mareeliho oohaalakhanyeya.—Mwaalakhanye Masiposipo 10:22.

²³ Ancipale a hiyo ninnalapa mwakuru mmuteko wa mulaponi wi nivakulele emusi ahu. Muupuwele wi Yehova onachuna wi noone yeeyo eri yaphaama mmuteko ahu. Moorweela wa wiiwananiha moonelo, saweera sahu ni sa Yehova, nnahaala ophwanya ohakalala mmuteko ahu. Hankooni nikhale oolakelela oheemererya wi muteko ahu wa mulaponi onihiihe weerano muteko ahu woochuneyaxa—olaleerya michaka yaphaama ya Omwene wa Muluku. Moorweela wa ohela muteko yoola va nipuro noopacerya mu okumi ahu, ninnooniherya osivela wahu wa Yehova nave ntoko yookhumelela nnahaala wiikhapelela mu osivela wawe.