Olapela nipantera. Anamoona a Yehova anneemererya wi olapela naari okokhorela nipantera, vaavaa nniipiwaaya ncipo nneemelela elapo, mukhalelo wa malapelo onavaha weemereryiwa ohiya wa Muluku, nyenya wa omwene naari ahooleli. (Yesaya 43:11; 1 Akorinto 10:14; 1 Yohane 5:21) Mmoha a yaawo aari mwene Napukotonosori a Paapulu akhalai. Wi aatikhinihe achu ni owerya ni mvai awe mmalapelo, mwene yoola akuru aapaka yoophwaniherya yoorekama nave aahaaceenyerya achu oothene a omwene awe wi ekokhorele yoophwaniherya eyo, niipiwaka ncipo noolikana ni ncipo nneemelela elapo. Mwawiihiiha, Aheepri araru—Satraki, Mesaki, ni Apeteneko—yaakhooca okokhorela yoophwaniherya eyo naamwi olakiwa waya waari okhwa.—Taniyeli, Ecima 3.

Mulipa oorepa miyaha Carlton Hayes onnaloca wi mmahiku ahu, “Elapo yookhalano nipantera ntoko eneneeryo yoochuneya ya nroromelo ni malapelo. Achu annamurula ciphewa vaavaa nipantera nnavirihiwaaya, nave alipa oorepa annarepa nave amiravo anniipa ncipo nneemelela elapo ecicimihaka nipantera.” Owo tho onnaaceererya, elapo yookhalano “nihiku naweela,” ntoko nihiku na woopowa naari “anakhoco aya aweela”  vamoha ni “mapuro aya a malapelo.” Va esatakha ya hiihaanoru ya o Prasili, muhooleli mutokotoko a anakhoco aaloca: “Nipantera ninnalapeliwa ni okokhoreliwa . . . ntoko enakokhoreliwaaya elapo.” Aai, The American Encyclopedia ennaloca wi “nipantera ti naweela hiiha ntoko mwikimanyo.”

Ensiklopetia emohamoha yooloca hiihaanoru wi macipo aneemelela elapo “masu enooniherya moonelo wa ocicimiha elapo, nave ikwaha sincipale sinnaphitaanyerya oveka wa okhapelela woomuluku wa achu ni mamwene aya.” Anamoona a Yehova tahi wi tookacamiha vooloca sa isatakha sa elapo sinavolowela olapela nipantera vamoha ni ncipo nneemelela elapo ntoko mukhalelo wa malapelo. Liivuru American Character (Mukhalelo wa Achu a Amerika) atharihaka sa okhooca wa anamwane a Anamoona a Yehova okokhorela ni ororomela nipantera oxikola ya Estatu Unitu onnaloca: “Mu saweereya sincipale, olamulelo wa vasulu wa Amerika woheerela onamoona wi ola mukhalelo wa malapelo.”

Naamwi ehipakaka makupa a isatakha sihiniiwanana ni Piipiliya, Achu a Yehova annacicimiha nchuno na akina na opaka makupa. Awo tho hananyemula mapantera nave anoona ntoko ineneeryo ni alamuleli ntoko “olamulelo wa atokwene” enalapa ntoko “óthanliwa a Muluku.” (Aroma 13:1-4) Mwawiihiiha, Anamoona a Yehova anniiwelela nlakiheryo na ovekela “ntakhara a mamwene ni othene yawo enalamulela”, ninneera yeela wi “nikhale ómála ni awitchachala, vomuchichimiha Muluku mochichimiheya tchiri.”—1 Timoteo 2:2.

Othanla va namuthanle eelapo. Akiristu eeparipari annacicimiha nchuno na akina na othanla. Awo hanamwaakaaha namuthanle, nyenya annamwiiwelela yoowo othanliwe. Awo tho hanapaka makupa a miyaha sa elapo. (Mateyu 22:21; 1 Petro 3:16) Tiheeni Akiristu anaphwanelaaya weera mu ilapo heiho othanla oryaaya woophareliwa naari achu anakhalaaya oonyeenyeya ni yaale ehinaya mmapuro a othanla? Muupuwele wi Satraki, Mesaki, ni Apeteneko yaaya vakhiviru wa mureyareya wa Tuura, mmukhalelo woolikana Mukiristu, akhweya onnalakelela oya mmapuro a othanla wakhala wi yawuupuxerya-ya-murima awe ennamweemererya. Nyenya,  onaphwanela wiikasopa wi ahipake makupa. Owo onaphwanela wiiwelela malakiheryo mathanu nammoha anacharela:

1. Oomuchara a Yesu ‘hari a elapo yavathi.’—Yohane 15:19.

2. Akiristu anamweemelela Yesu ni Omwene awe.—Yohane 18:36; 2 Akorinto 5:20.

3. Muloko Weekiristu ori wawiiwanana mu soororomela saya, nave achu aya tawiiwanana nthowa na okhalano osivela woolikana ni wa Kiristu.—1 Akorinto 1:10; Akolose 3:14.

4. Yaale anamuthanla muchu wi akhale muhooleli a elapo annakhalano nthowa wa ichu heiho onapakeiye.—Moone yeeyo enavolowela malakiheryo anaphwanyeya mu 1 Samuwele 8:5, 10-18 ni 1 Timoteo 5:22.

5. Vaavaa nloko na Isarayeli yaamvenkaaya mwene awooneya, Yehova onne ntoko mukhalelo wa omukhooca.—1 Samuwele 8:7.

6. Akiristu hanaphwanela okhuwa echu vaavaa enalaleerya Omwene wa Muluku wa alamuleli a elapo a mukhalelo woothene.—Mateyu 24:14; 28:19, 20; Ahepri 10:35.

Miteko mikina sihinavolowela etoropa. Mu ilapo ikina, olamulelo onnaloca wi yaale anakhooca ovolowa mmuteko weetoropa, ephareke miteko mikina sihinavolowela etoropa variyari va elukuluku elakaniwe. Nakumana ni yoolakelela ya mukhalelo yoola, nnaphwanela ovekela, akhweya oloca ni Mukiristu awunnuwa omunepani, voocharela opaka yoolakelela ahu mwawiiwanana ni yawuupuxerya-ya-murima ahu yoovyakihiwa.—Masiposipo 2:1-5; Afilipi 4:5.

Masu a Muluku annanleela wi ‘niwiweleleke alipa òlamulela ni asitokwene. Niwiweleleke nikhale òmalelene ophara miteko . . . noneihaka wa atxhu othene opisa wahu murima.’ (Tito 3:1, 2) Ni muupuwelo yoola, nnaphwanela wiikoha: ‘Apwanne weemererya muteko yoola onanariha ohipaka waka makupa a elapo?’ (Mikeya 4:3, 5; 2 Akorinto 6:16, 17) ‘Opaka muteko yoola waahaala weeriha wi okhale woovila, naari woohiweryeya waakhwaniherya mirici saka Seekiristu ?’ (Mateyu 28:19, 20; Aefeso 6:4; Ahebri 10:24, 25) ‘Mmukhalelo mukina, apwanne weemererya muteko yoola waahaala okeeriha waaceererya  miteko saka Seekiristu, ntoko muteko wa elukuluku yoothene?’—Ahepri 6:11, 12.

Wakhala wi Yawuupuxerya-ya murima ya Mukiristu ennamweeriha olakelela wi owo anaphwanela ophara muteko ohinapaka makupa a etoropa opwaha owaleliwa mukariposo, asinthamwene awe Eekiristu enaphwanela ocicimiha yoolakelela awe. (Aroma 14:10) Wakhala wi, owo tho onoona wi hanaphwanela ophara muteko yoola awo tho anaphwanela ocicimiha moonelo awe.—1 Akorinto 10:29; 2 Akorinto 1:24.