Yehova onaweherya wi yaale athelanne ekhale oororomeleya mu nlakano na othela. Vaavaa Yehova aamphitaanyiiye mulopwana oopacerya ni muthiyana oopacerya aaloca: “Mulopwana . . . aphitàneke ni mwàriye nave òwèli anamukhalaka ntoko muchu mmoharu.” Ohoolo waya, Yesu aahuuluulela mwaha yoola nave aahaaceererya: “Ntakhara awe ela yeyo Muluku áphitannyiye vamoha, mutchu ahipachule.” (Maphatxuwelo 2:24, BNM; Mateyu 19:3-6) Mwawiihiiha, Yehova ni Yesu anoona othela ntoko echu yawiikhalelaru onamala pahiru wakhala wi mmoha a oothelana ookhwa. (1 Akorinto 7:39) Woona wi othela marehereryo aweela, omwalana honaphwanela wooniwa ntoko echu yookhweya. Chiryene Yehova onniica omwalana ohirino mathipelo a Piipiliya.—Malakiya 2:15, 16.

 Mathipelo taani a Piipiliya aneemererya omwalana? Chiryene, Yehova onniica ocapaheya ni mararuwo. (Mapacereryo 39:9; 2 Samuwele 11:26, 27; Salmo 51:4) Mwawaacererya, owo onoona ocapaheya ntoko echu yoonanara nave onneemererya ntoko mathipelo a omwalana. (Wi musuwele ocapaheya onavolowela heeni, muye va mwaha 9 eparakrafo 7.) Yehova onamvaha murici muchu ohirino nthowa wi alakelele wakhala wi onachuna okhala ni oothelana awe orino nthowa naari omwalanano. (Mateyu 19:9) Mwawiihiiha, wakhala wi muchu ohirino nthowa onalakelela omwalana, Yehova haniica yoolakelela eyo. Mu elukuluku emohamoha, muloko Weekiristu honamuceenyerya muchu omwalana. Chiryene, makhalelo makina ananwerya omweeriha muchu ohirino nthowa okhala ni oothelana awe yoowo orino nthowa, xaxaxa wakhala wi owo oocharuwa chiryene. Vookuchulani, muchu ohirino nthowa torino murici wa opaka yoothanla awe mukhateiye, ni weemererya makacamiho vyakala enahaala okhumelela.—Akalatiya 6:5

Mmakhalelo ookacamiha, Akiristu akina annalakelela ohiyana naari omwalana ni oothelana aya naamwi owo ahipanke mararuwo. Mmukhalelo yoola, Piipiliya onnaloca wi oomwalana owo “íkhaleleru óhitheliwa, akhweya átánihiwetho.” (1 Akorinto 7:11) Mukiristu ori mmukhalelo ntoko yoola hari ootaphuwa wi athele wanaawiili. (Mateyu 5:32) Muthokororye makhalelo a vakhaani yaawo akina yonnaaya ntoko mathipelo a ohiyana.

Okhooca mwaayiini ovakulela echoko. Echoko akhweya ennakhala yoothoiwa, ntakhara wi mulopwana onamukhooca ovakulela, naamwi owo aweryaka. Piipiliya onii: “Mukina áhivakhulelaka . . . tchirine yawo a mu emusi awe yowo takonchiye nroromelo nave tanananariye ompwaha yowo ohinaroromela.” (1 Timoteo 5:8) Wakhala wi mulopwana owo onnakhooca otoroka mukhalelo awe, muthiyana onanwerya olakelela yeeyo enaphwanelela wi akhapelele okumi awe vamoha ni ya anamwane awe moorweela wa waavya omwalana waweemereryeya. Chiryene, atokweene anahaala otholathola  phaama mukhalelo yoola wa Mukiristu okhooca ovakulela echoko. Mukhalelo yoola onanwerya okumiherya wiikariwa mmulokoni

Ohooxa woomwiilini. Oothelana yoowo oowali onnakhala oohooxa ophiyerya ohela vawoopiha okumi wa oothelana awe. Wakhala wi oothelana owo oohooxa Mukiristu, atokweene enaphwanela otholathola mwaha yoola. Nlala ni ohooxa onanwerya okumiherya wiikariwa mmulokoni.—Akalatiya 5:19-21.

Woopopiha makupa oomunepani. Oothelana onanwerya wiiliwiili weeriha okhale woovila omulapela Muluku, naari omukhinyererya owo wi ahiiwelele malamulo makina a Muluku. Mmukhalelo yoola, oothelana yoowo ori mu woopiha onanwerya olakelela mukhalelo waphaama wa “omwiwelela Muluku wopwaha atchu” eyo ennavaha mathipelo a ohiyana.—Saweriwa Tarummwa 5:29.

Mmukhalelo ori woothene onavolowela miyaha seiha sookacamiha nimanlaahu othokorororya, haavovo onaphwanela omuceenyerya muchu ohirino nthowa omwalana naari okhala vamoha ni oothelana awe. Naamwi asinthamwene Eekiristu awunnuwa omunepani ni asitokweene eweryaka ovaha nikhaviheryo ni ikano sinarweela Mpiipiliyani, awo hanasuwela miyaha soothene sinaavolowela makacamiho a oothelana awo. Pahiru Yehova tonawerya osuwela. Chiryene, muthiyana Eekiristu hii amucicimihe Muluku naari marehereryo a othela wakhala wi owo onnaaceererya miyaha vooloca sa makacamiho a echoko awe pahiru wi akhale oomwalana ni iyawe, naari tho mulopwana weerano mwawiihiiha. Yehova onnoona echu eri yoothene eneeriha omwalana, moohipwacha wiilipixerya wa muchu wa weererya wiipithiha. Mwawaacererya, “sothe sene sinakhala sepwitikiri ni sokhunuliwa vamithoni vawe va Yowo n’nerahuno.” (Ahebri 4:13) Nyenya wakhala wi mukhalelo mmoha wawoopiha onnatitelela, haavovo onaphwanela waakaaha wakhala wi Mukiristu onnathanla omuhiya oothelana awe. Omakuchuwelo, “othene n’narwa-nemela omunyukhuni wothoriherya wa Muluku.”—Aroma 14:10-12.