Saaviravo iyaakha 70 ovinyerya vaavaa Aisarayeli yaakookenlaaya o Yerusalemu. Nyenya akina nlelo yaakhala o Persiya. Mmoha a yaawo aari Estra yoowo aahusiha Malamulo a Yehova. Estra aasuwela wi achu o Yerusalemu hiyiiwelela Malamulo, nave aanachuna oyawo wi aakhaviherye. Mwene o Persiya awiichaniwa Artaxerxe aamuleela: ‘Muluku ohoovaha miruku wi waahusihe achu Malamulo awe. Hawe, nave omukuxe yoole onachuna opwaha ni weyo.’ Estra aahaathukumanya oothene yaale yaachuna okookela o Yerusalemu. Awo yaavekela wi Yehova aakhaviherye mmukwaha aya, nave yaacimula.

Miyeeri mixexe ohoolo waya yaaphiya o Yerusalemu. Asitokweene a weiwo yaamuleela Estra eriki: ‘Aisarayeli aamuchekela Yehova, nave ahaathela athiyana a maloko makina.’ Tiheeni Estra enreiye? Owo aakokhora variyari va achu nave aavekela: ‘Hiyaano, nichenke nyuwaano mwaari oororomeleya.’ Achu yaacharuwa, nyenya ikwaha ikina yaaneera ichu soonanara. Estra aahaathanla asitokweene ni amuthoriha wi emalihe miyaha seiya. Miyeeri miraru ohoolo waya, yaale yaahimwiiwelela Yehova yaarowihiwa.

Saavira iyaakha khumi napiili. Mweelukuluku yeeyo saatekiwa wanaawiili ixiri sa Yerusalemu. Vano Estra aahaathukumanya achu vanlakani wi aalakhanye Malamulo a Muluku. Vaavaa Estra aamuhunleiye liivuru, achu yaaheemela. Owo aamucicimiha Yehova mu nivekelo nave achu oothene yaahaakhulela. Voocharela Estra aahaalakhanya ni othariha Malamulo, nave achu yaanawiriyana phaama. Achu yaaheemererya wi yaamuhiya Yehova nave yaahinla. Mmeeloni mwaya Estra aawaalakhanyerya tho Malamulo. Achu yaahuserya wi anaphwanela opaka Efesta ya Mixakala. Mwawaakuveya, awo yaapacerya orehererya Efesta.

Mmahiku mathanu nameeli, achu yaahakalala ni omuthamala Yehova nthowa na okhalano yoolya  yawaaca. Opacerya mahiku a Yosuwa hiyitonko okhalavo Efesta ntoko yeeyo. Yaamanlaaya, achu yaathukumana nave Estra aavekela ariki: ‘Nyuwo Yehova moonoopola mookapuroni, ni moonivakulela mutakhwani ni onivaha elapo ela yaphaama. Nto nihoochekelaani ikwaha sincipale. Mwaahaaruma alipa miririmu, nto hiyaano hinaawiriyanne. Nave mwaapixa murima mukhapelela nlakano nanyu ni Aparahamu. Vano ninnaroromeliha owiiwelelaani.’ Awo yaarepela nlakano naya, nave asitokweene, alevi ni anamukucho yaahelavo eneneeryo.