Ohiyu omoha, Napukotonosori aaloha echu yootikhiniha. Aawiichana anamiruku awe wi emuleele yootaphulela aya. Nyenya haavo aawenrye othariha. Vookuchulani, owo aamuleela Taniyeli.

Napukotonosori aahi wa Taniyeli: ‘Moolohani mwaka, kaahoona mwiri woorakama ophiyerya wirimu nawe waanooniwa mweelapo yoothene. Makukhu aya yaari ooreera nave waanatepa wiima. Inama sa mutakhwani saaniichuuwa va muuruxi vaya, ipalame saanapaka ipuuru saya mmirai. Munkeelo mmoha aaloca wirimu ariki: Muuhe mwiri owo mukwase mirai saya nto muhiye nikoco ni mitathari saya, nave mmake nenlo ni onyooro wa muthipo. Onampacerya wuupuwela ntoko inama; onamukhala hiiha miyakha mithanu napiili. Achu oothene anamusuwela wi Muluku a wirimu onnalamula ilapo soothene. Owo onnamvaha omwene yoole onamuchuneiye.’

Yehova aamuleela Taniyeli yootaphulela ya yooloha eyo. Vaavaa Taniyeli iiwexenxeiye, owo aathanana. Owo aahi: ‘Nyuwaano mwene, kaanachuna muchaka wa oloha waakhanle wa amwiicani anyu. Mwene, mwiri owo wuuhiwe ti nyuwaano. Nyuwaano munamwiikariwa veeri va achu ni muni munakhala ni asinama a mutakhwani, muni munalya manaxi ntoko emope. Nave masu aalonceiye munkeelo wi nikoco na mwiri nihiiwe ni mitathari saya, nnataphulela wi nyuwaano munamukookela omwene.’

Eyaakha emoha ohoolo waya Napukotonosori arikimweeca vaate vawe aapacerya ovarerya epooma ya Papulu. Owo aahi: ‘Kooteka yeeyo ni owerya wi ekhale epooma aka wi kooneihe ovuwa waka.’ Arikimulocaru, naahiiweya nsu wirimu nriki: ‘Wiiwe phaama weyaano mwene Napukotonosori, omwene tahi wawaa.’

Mweelukuluku yeele Napukotonosori yaamurweela anepa nave aakhala ntoko mwaaxinama a mutakhwani. Aahiikariwa mu empa ya omwene wi akhaleke ni axinama mutakhwani. Miihi a Napukotonosori yaahunnuwa ntoko mapururu a enaka, nave ikharu sawe saari soorakama ntoko sa palame.

Saavinraaya iyaakha thanu napiili, Napukotonosori aapenuwa nave Yehova aamvaha omwene wanawiili. Napukotonosori ahi: ‘Miyaano  kinnamuthamala Mwene a Wirimu, nave kinnamucicimiha ni kinnamvuwiha. Ichu soothene oneereiye ti seeparipari ni sawookololowa, nave owo onnawerya waalamwiha achu oothene awiikusererya ni omvaha omwene yoole onamuchuneiye.’